“Iralaud 3: Onopki oh Padahngki Rongamwahu en Sises Krais,” Kalohngki Ahi Rongamwahu: Mehn Kaweid en Ehukiwei Rongamwahu en Sises Krais (2023)
“Onopki oh Padahngki Rongamwahu en Sihses Krais,” Kalohngki Ahi Rongamwahu
Iralaud 3
Onopki oh Padahngki Rongamwahu en Sises Krais
Mehn kaskuhl kan nan iralaud wet doke padahk kesempwal oh kosonned kan en rongamwahu en Sises Krais. Mehn kaskuhl pwukat iei ihme soukohp oh wahnpoaron kan en rahnwet kupwurki komwi en esehla oh padahngki. Re wiawihda met pwe ken sewese mehteikan en wehwehkihla mwahu padahk en Krais.
Pali keieu en iralaud wet pid duwen luhkehng pepdais. Luhwen iralaudo doke padahk pahiu:
Onopiki pwuhk sarawi kan oh doandoaropwe padahk en nan ehu ehu padahk. Ni ahmw pahn wia met, Ngehno pahn padahkihwei me mehlel kan en dahme ke onopokio. E pahn seweseiuk pwe ken ese dahme ke pahn inda oh wia pwehn sewese mehteikan en kadehdehda mehlelo. Tehk Doctrine and Covenants 84:85.)
Aramas pahn esehda mwahu duwen Sounkomouro sang arail pahn wia dahme E ketin lukehieng irail en wia. Kin kihwei luhk kan en nan ehu ehu padahk, oh sewese aramas en kapwaiada arail inou kan. Ni arail pahn kapwaiada inou pwukat, irail pahn tepda momourki rongamwahu en Sises Krais oh kaunopohng en wiahda inou sarawi ohng Koht.
Padahngki mehn kaskuhl pwukat koaros mwohn oh mwurin pepdais. Irail misineri kan me pahn tiengki kaweid padahngki mehn kaskuhl pwukat nan ansoukoa koaros. Ward misineri de ekei memper kak patehng ansou me kak. Kilang iralaud 10 oh 13 mehn kaweid kan me pid memper kan arail pahn kak iang padahk.
Kaunopohng Padahk
Ni ahmw pahn kaunopohng padahk, onopki mahs mwomwen aramas akan nan app en Kalohngki Ahi Rongamwahu. Kaunopada ehu mehn kaskuhl me pahn doke en aramaso anahn akan. Medewe dahme ohlo de liho anahne ese oh pehm nan ahmw padahko. Ngehno pahn kalaudehla ahmw koahiek ansou me ke pahn ahniki ansou en kaunopada oh koasoanehdi.
Iet ekei peidek me kowe oh iengomwo en kapakapki ni amwa pahn kaunopohng en padahk.
-
Soangen luhk dah me kitail pahn wia me pahn sewese aramaso en kalaudehla ah pwoson Krais oh kak keirkihda? Luhk kan me kin sewese aramas en koluhla oh iang pehmada “manaman en Soundoaro” (Ilemen 5:11). Medewe keirdahn aramaso, soangen irair dahme e mihmi loale, oh ah anahn kan. Mwuri kapatahieng ehu de ekei luhk me mih nan ahmw mehn kaskuhlo.
-
Soangen padahk dah me pahn sewese aramaso pwehn kapwaiada inou me kitail lukehieng en wia? Kapakapki soangen padahk dah me pahn sewese aramaso en wehwehki kahrepen kapwaiada inouo ah inenen kesempwal ohng irail oh Kauno.
-
Ia mwomwen atail pahn sewese aramaso en esehla padahko? Pwehn kaunopehng en padahngki padahko, koasoanehdi mwahu oh oaralapiedi dahme ke pahn padahngki ni ahmw pahn doadoahngki Mehn kaskuhl kan 1–4. Kasalehda peidek kan, iren pwuhk sarawi kan, karasaras kan, oh kasdo me konehng me pahn sewese aramaso en wehwehki dahme ke padahngkio. Kilang iralaud 10 ekei mehn kaweid me pid iamwomwen ahmw pahn kamwahuiala ahmw padpadahk.
-
Soangen kapai dahnge me Koht ketin inoukiong uhk ni ahmw pahn alehda oh kapwaiada luhk kan? Ni ahmw pahn onopiki padahko, kasalehda Sapwellimen Koht inou en kapai kan. Ni ahmw pahn padahk, kasalehda inou en kapai kan oh wia ahmw kadehde.
-
Mehnia memper me kak patehng? Nan mihting en wihk koaros en coordinate, kasalehda mehnia memper me kak seweseiuk padahk oh utung aramaso. Mwohn ahmw pahn kaskuhl, kosoaiahda mwomwen arail pahn patehng. Kilang iralaud 10.
-
Dahme kitail kak wia pwehn sewese aramaso en kapwaiada inou kan mwurin atail pahn pwur? Kilang iaire sang ni ahmw pahn kin koahl rahn koaros pwehn sewese aramaso kolokol arail inou kan. Kilangada soangen wiepe dah me memper kan ka iang sewese irail kan me kel kin padahkohng en kapwaiada arail inou kan. Met kak duwehte wadek ehu iralaud sang nan Pwuken Mormon de pwuhk sarawi teikan. Ma mie me sohte kapwaiada tepin ah inouo, mwein e konehng en sewesehki mahs mwohn ahmw pahn kihong pilehu. Kilang iralaud 11.
-
Ia mwomwen atail pahn seweseirail mwahu mwuhr? Mwuin padahk koaros me wiawi, kasawih dahme aramas me ke padahkehngo pehmada. Arail pwoson Krais wie kekeirda? Irail kin kehn Ngehno? Irail kin koluhkihla oh wiahda oh kapwaiada inou kan? Irail kin wie kapakap, onohnopki Pwuken Mormon, oh iang kohdo sarawi? Wiahda plahn pwehn seweseirail.
Padahk sang nan Ahmw Mohngiongen sang ni Kaweid en Ngehno
Ohng elder oh sister koaros, Presedensi Keieu oh Kuohrum en Wahnpoaron Ehk-Riemeno mahsani:
“Atail pwukoah iei en padahngki mahsen en kopwurupwurdohn rongahmwahuo ni wiepehiu pwehn mweidada Ngehno en kaweid misneri kan oh irail me rongorong kan. E kesempwal en esehla mwomwen [mehn kaskuhl kan], ahpw e sohte pahn duwehte padahk me ke wadlikiala nan ahmw madamadau. Misineri kan kak kosoia pein arail madamadau kan ma e kohsang rehn Ngehno. E sohte kak kihwei ire me wadlikla, ahpw koasoaiwei sang nan ah mohngiong. E kak kosoia dahme sohte pid padahk me koasoandio, me kohsang kaweid en ngehno, ohng dahme anahnepen [aramaso]. Ma e kosoiahki pein ah madamadu oh lokaia kan e anahne kadehde duwen mehlelpen ah padahko.”
Padahk oh luke sang ni Anahn kan en Emen.
Mie ahmw ansou mwahu en padahngki padahk kan ni soangen wiepe kei pwehn sewese aramas en kaunopada mwahu pwehn pepdaisla oh kasarawihla. Padahk me ke padahngki, iahd me ke padahngki, oh uwen ansou me ke padahngki kin sansal mwahu sang ni anahn en aramas me ke padpadahkehng oh kaweid en Ngehno. Ni karasepe, ansoun padahkih aramas me sohte iang pelien lamalam en Christian, ke kak sewesehkin irail en kadokepene nan pwungen irail oh Sahm Nanleng oh en wehwehkihla Sapwellime plahn (kilang “Padahkih Aramas Me Sohte Ahniki Lamalam en Christian” nan Iralaud 10).
Mweidehng Ngehno en kaweidkinuhk soangen luhk oh ansou dah me kahn kihla. Luhk pwung nan ansou me konehng kak kamarainih aramas en wia mehkot me pahn kalaudehla arail pwoson. Kemwekid pwukat kak kahrehda wekdeklahn mohngiong (kilang Mosaia 5:2; Alma 5:12–14).
Padahngki padahk me mengei, sansal, oh mwotomwot. Udahno, padahk sohte king reireisang minit 30, oh ke kak padahkih aramas men minite 5.
Udahno ke pahn kin anahne tuhpene pak kei pwehn padahngki padahk kan nan ehu padahk. Aramas pahn kalapw wehwehkihla mwahu mahseno ma ke padahk mwotomwot, kalapw padahk, oh padahngki ekis ekis sang ni irehu.
Onopiki Pwuhk Sarawi
Dahme ke kaweidkihk en padahngki?
Dahme e kesempwaliki en onopiki padahk en nan mehn kaskuhl kan?