Iralaud 3: Padahk 3

Sapwellimen Sises Krais Rongamwahu o

Aramas Kak Medewe

• Ihs me Sises Krais? Ia mwomwen Ah pahn kak sewese ie oh ahi peneinei?

• Ia wehwehn ahneki pwoson Sises Krais? Ia mwomwen ahi pwoson Ih ah kak kapaiada ai mour?

• Ia wehwehn koluhla?

• Ia mwomwen ahi kak kehn sapwellimen Koht meleilei oh mahk mwurin ahi wiadahr pilipil suwed kan?

• Ia kahrepen pepdais?

• Dahieu kisakis en Ngehn Sarawi?

• Ia wehwehn dadaurete lel imwi?

Rongamwahu en Sises Krais wet me kahreiong atail kak kohdo rehn Krais. Uwen ah mengei seri pil kak wehwehki. Mehn kaskuhl wet pid duwen rongamwahu o oh padahk mehlel en Krais, me iangahki pwoson Sises Krais, koluhla, pepdais, kisakis en Ngehn Sarawi, oh dadaurete lel imwi. E pil pid duwen rongamwahu o ah kin kapaiada sapwellimen Koht serihkan koaros.

Lepin koasoai rongamwahu wehwehki “rohng kaperen.” Rongamwahu en Sises Krais wet wia rohng mwahu ehu pwehki e kin kihda padahk mehlel kan—mehlel soutuk o—kitail anahne pwehn kohdo Reh oh komourla (kilang 1 Nihpai 15:14). Rongamwahu o kin padahkiong kitail mwomwen atail pahn momourki, mour me mie kahrepe. Rohng kaperen en rongamwahu o kin kiong kitail ahl pwe kitail en alehdi mahkepen dihpatail kan, sarawihla, oh pwurala rehn Koht.

Padahk loal: Rongamwahu en Krais oh Padahk mehlel en Krais

Padahk mehlel en Krais koaros mihmi nan rongamwahu wet, me iangahki padahk kan, kosonned akan, kosonned en Koht akan, tiahk sarawi kan, oh inou sarawi kesempwal akan ong komour patail oh atail lapalapala.

Padahk en rongamwahu wet iei me kitail kak alehdi sapwellimen Sises Krais manaman en komourla oh poadoandoarala. Kitail kin wia met sang ni atail kin kakelailih atail pwoson Ih, koluhla, pepdaisla, alehdi kisakis en Ngehn Sarawi, oh dadaurete lel imwi (kilang Iren Pwoson Akan 1:4).

Met pil kahdanki padahk mehlel en Krais. Momouriki padahk mehlel wet iei duwen atail pahn kohdo rehn Krais oh komourla (kilang 1 Nihpai 15:14). Met ni kehlail padahk sangehr nan Pwuhk en Mormon (kilang 2 Nihpai 31; 32:1–6; 3 Nihpai11:31–40; 27:13–22). Amwail pwukoah iei en sewese aramas akan en kohdo rehn Krais sang ni amwail pahn sewese irail en momouriki Sapwellime padahk mehlel o.

Kilang Mehn Kaweid kan ohng Pwuhk Sarawi kan, “Rongamwahu,” “Padahk Mehlel en Krais”; Oaralap akan en Rongamwahuo, “Rongamwahu.”

Iren kaweid kan ohng Padahk

Pali wet kasalehda karasaras en koasoandi ehu pwehn sewesei komwi kaunopohng padahk. E pil iangahki soangen peidek oh luhk kei me komw kak doadoahngki.

Ni ahmw kounopada en padahk, kapakapki irair me aramas o mihmi loale oh anahn akan en pali ngehne. Medewehda dahme pahn keiou sawas ohng padahk. Kounopada kawehwehda ireh kan me aramas pahn kakete sohte wehwehki. Koasonehdi ia uwen ansou me komwi ahneki, tamataman me omwi kaskuhl pahn mwotomwot.

Pilada iren pwuhk sarawi kan me komwi pahn doadoahngki nan ansoun padahk. Pali en “Poahson en Padahk o”nan mehn kaskuhl wet iangahki iren pwuhk sarawi tohto kei me kak sawas.

Medewe mehnia peidek me komw pahn peidek ki ansou me komw pahn padahk. Koasonehdi soangen wiepen luhk kan me komw pahn wia me pahn kak kamwakidada emen emen me komw kin luke.

Kawehwehda mwahu sapwellimen Koht kapai inoudahr kan, oh kadehdehki soahng kan koaros me komwi padahngki.

Dahme Komwi Kak Padahkihong Aramas nan Erein Minit 15 [eisek-limau]-25 [rieisek -limau]

Pilada ehu rehn padahk kan de tohto sang me komwi en padahngki. Poahson en padahk ohng ehu ehu padahk pahn kin kohda mwurin dahme koasoandi.

Misin Sarawi en Sises Krais

• Koht poaroanehdo Sapwellime Iehros, Sises Krais, ohng sampah pwe en kapit kitail sang nan dihp oh mehla.

• Sang ni tomwpen Sises, kitail kak mwakelekel sang dipatail kan oh sarawihla ni atail koluhla.

• Mwurin Sises ah kalopwuhlahr, E ketin iasadahr. Pwehki sang ni Sapwellime Iasadao, kitail pahn pil iasada mwurin atail mehla. Met wehwehki me pali ngehn oh palinwar pahn pwurpene, oh emen emen kitail pahn iasadahng palinwar unsek oh momour kohkohlahte.

Pwoson Sises Krais

• Pwoson iei me wia tepin padahk nan rongamwahu en Sises Krais wet.

• Pwoson Sises Krais iangahki ahniki pepehm kehlail me Ih iei me Sapwellimen Koht oh likih me Ih iei atail Soundoar oh Sounkomour.

• Pwoson Sises Krais wia padahk en mwekid oh manaman ehu.

• Kitail kin kakehlailih atail pwoson sang ni kapakap, onopiki pwuhk sarawi kan, oh kapwaiada kosonned akan.

Koluhla

• Pwoson Sises Krais kin kahluwai kitail ohng koluhla. Koluhla wia mwekid en sohpeilahng Koht oh sohpeisang dihp. Ni atail kin koluhla, atail mwekid kan, ineng kan, oh madamadau kan kin wekila ong ni pereniki wia kupwuren Koht.

• Ansou me kital kin koluhla mehlel, Koht kin ketin mahkong kitail. Mahk kin wiawi pwehki Sises Krais ketin tomwkihlahr dipatail kan.

• Ni atail kin koluhla, kitail kin ahneki pepehm en meleilei ni ansou me dipatail oh atail insensuwed kan kin mwahula.

• Doadoahk en koluhla pahn wihwiawi erein mour. Koht kin ketin kasamwohi kitail ansou koaros me kitail kin koluhla. E sohte pahn kin ketin pwangahkin kitail da.

Pepdais: Tepin Atail Inou ohng Koht

• Pepdais iei tepin atail wiahda atail inou en ehuong Koht.

• Wiepen pepdais mie pali riau: pepdais ki pihl oh pepdais ki Ngehno. Ansou me kitail kin pepdais la oh ale kisakis en Ngehn Sarawi, kitail kin mwakelekelda sang dipatail kan, oh kitail kin tapihada ehu mour kapw.

• Kitail kin pepdais sang ni kaduhdi, ideidawehn karasaras en Sises.

• Serihkan sohte kin pepdais lao irail lel sounpar waluh. Serihkan me kin mehla mwohn sounpar o kin alehier komour sang ni Tomwpen Sises Krais.

• Kitail kin ale kamadipw sarawi nan ehu ehu wihk pwe en kin kataman sapwellimen Sises tohnmetei oh kapwurehiong atail inou sarawi kan ohng Koht.

Kisakis en Ngehn Sarawi o

• Ngehn Sarawi o me wia towe kesilimen en Koht akan. [Karasepe Koht Sahm, Koht Nah, oh Koht Ngehn Sarawi.]

• Mwurin atail pepdaislahr, kitail kin ale kisakis en Ngehn Sarawi sang ni tiahk sarawi en kepwilpwildien peh kan pohn moange.

• Ansou me kitail kin ale kisakis en Ngehn Sarawi, kitail kak wiahla kempoakepah men erein atail mour ma kitail pahn loaloapwoat.

• Ngehn Sarawi kin kasarawih kitailla, kahluwa kitail, kansenamwahuih kitail, oh sewesei kitail en esehla me mehlel o.

Dadaurete lel imwi

• Dadaurete iei wonlahte oh mwekimwekid ki pwoson Krais nan ehu ehu rahn. Kitail kin wonlahte oh kolokol atail inou kan ong Koht, koluhla, wiahla kempoakepahn Ngehn Sarawi o, oh ale kamadipw sarawi.

• Ni atail pahn loaloapwoat oh idawehn Sises Krais, Koht ketin inoukiong kitail me kitail pahn ahneki mour soutuk.

Rongamwahu en Sises Krais wet kin Kapaiada Sapwellimen Koht Serihkan Koaros

• Momouriki rongamwahu o kin koaloalehla atail popohl, kamwahuihala atail mwekid kan, oh kalaudehla atail ehupene kan.

• Kitail koaros kak ahneki peren—ni atail kelehpw de ni duwen peneinei kan—ni atail pahn kin momouriki padahk kan en Sises Krais.

• Sang ni rongamwahu en Sises Krais wet, peneinei kan kapaidahr nan mour wet oh kak mihmipene kohkohlahte oh kousoanla rehn Koht.

Peidek Kan Me Ke Kak Idek Rehn Aramas

Peidek pwukat iei karasaras en peidek me komw pahn kak idek rehn aramas. Peidek pwukat kak sewesei komwi ni omw pahn koasokoasoiong aramas o oh komw pahn wehwehkihda dahme ah anahn oh madamadau.

• Dahme komwi ese me pid duwen Sises Krais?

• Dahme komwi wehwehki duwen pwoson Sises Krais?

• Dahme komwi anahne wekidala nan ahmw mour?

• Dahme komw wehwehki me pid duwen koluhla?

• Dahme komwi wehwehki me pid duwen pepdais? Dahme komwi anahne wia met pwe komwi en kaunopohng pepdais?

• Ia mwomwen Ngehn Sarawi ah pahn kak sewesei komwi nan seiloak wet pwe komwi en pwurala rehn Koht?

• Soangen kahpwal da me komwi de ahmw peneinei kin sohpai? Se kak ehukihwei ekei ahl me rongamwahu en Sises Krais wet kak sawaski?

Luhk Kan Me Komw Kak Wia

• Komwi kak kapakap oh peki rehn Koht en sewesei komwi en kak ese ma soahng koaros me se padahkihwei mehlel? (Kilang “Padahk Loal: Kapakap” ni kaimwseklahn pali en kaskuhl wet 1.)

• Komw kak iang sarawi rahn sarawiet pwe komwi en kak wehwehkihla laud soahng kan me se padahkiong komwiher?

• Komw kak wadek Pwuhk en Mormon oh kapakap ki pwe komwi en ese me iei ih mahsen en Koht? (Komw kak pilada ekei iralaud de ire tikitik ohng dahme kumwail kaskuhlihier ko.)

• Komwi kak idawehn karasaras en Sises oh pepdais la? (Kilang “Luhk en Pepdais oh Ale kisakis en Ngehn Sarawi ,” met me tapiada mehn kaskuhl 1.)

• Kitail kak koasonehdi ansou da se kak pwuredo?

Poahsoan en Padahk

Pali wet kak sewesehkin uhk padahk oh pwuhk sarawih kan me ke pahn onopki pwe en kak kaludehla ahmw marain oh kadehde en rongamwahu o oh seweseiuk nan ahmw padahk.

Misin Sarawi en Sises Krais

Samatail Nanleng kadaredo Sapwellime Iehros, Sises Krais, ohng sampah pwe kitail en kak esehla popohl nin sampah wet oh mour soutuk nan sampah me pahn kohdo. “Oh met iei rongamwahu o, rohng kaperen ehu, … me [Sises Krais] ketidohr sampah … pwe en alehda dipen sampah, oh en kasarawihla sampah, oh kamwakelehdahsang me sapwung kan; pwe sang Ih koaros kak koumourla” (Doctrine and Covenants 76:40–42).

Ni atail wia aramas, kitail koaros dihp, oh kital koaros pahn mehla. Dihp oh mehla pahn perehsang kitail en ahneki mour soutuk rehn Koht ihte ma mie emen atail Soundoar (kilang 2 Nihpai 9). Mwohn sampah ah kapikipikda, Samatail Nanleng piladahr Sises Krais en doarei kitail la. Sang ni limpoak laud me E ketin kasaledahr, Sises ketidohr sampah oh kapwaiadahr pwukoah sarawi wet. E ketin wia met pwe en doreikitail sang dipatail kan, oh E ketin kasalehiong kitail me kitail pahn iang iasada mwurin mehla.

Sises Krais ketin ieiaski mour mwakelekel. Ni imwiseklahn Sapwellime mour pohn sampah, E ketikihda dipatail kan koaros sang ni Ah lokolok nan Kedsemeni oh ansou me E ketin kalopwuhlao (kilang 1 Nihpai 11:33). Sapwellimen Sises lokolok me inenen laud me kahreiong Ah ketin rerrer pwehki medek, oh inta keresang ni pwoaren kili koaros (Doctrine and Covenants 19:18). Mwurin Ah ketin Kalopwulahr, Sises ahpw iasadahr, kalowehdier mehla. Patpene, mwekid pwukat koaros iei me Tomwpen Sises Krais.

Dipatail kan koaros kahreiong atail sohte mwakelekel ni palingehn, oh “sohte mehkot samin kak kouson rehn Koht” (1 Nihpai 10:21). Me pil patehng met, pwung en kosonned kin anahne kalokepen atail wiewia sapwung kan.

Tomwpen Sises ketkiong kitail ahl ehu pwe kitail en kak mwakelekeladah sang dipatail kan ma kitail kin koluhla. E pil ketkiong kitail ahl ehu me kitail kak pitkihsang kopwung patail (kilang Alma 42:15, 23–24). Sounkomouro masanih, I … kalokolongkihier mepwukat koaros ong koruhsie, pwe irail en dehr ale lokolok ma irail pahn koluhla; ahpw ma irail sohte pahn koluhla irail pahn ale lokolok duwehte Ahi lokolok (Doctrine and Covenants 19:16–17). Ma sohte Sises Krais, dihp pahn kihsang koapwoaroapwoar en kousoanla rehn Samatail Nanleng ehu rahn.

Sang ni Sapwellime meiroang ong kitail ki kahlapehu, Sises sohte ketin kasorehla pein atail pwukoah. Kitail anahne pwoson Ih, kouluhla, oh nantiong kapwaiada kosonned akan. Ni atail koluhla, Sises pahn sewesehkin kitail Sapwelime pwung oh mahk en Seme Nanleng (kilang Moronai 7:27–28). Pwehki sang ni kapakap en Sounkomour o, Samatail Nanleng ketin mahkong kitail, kasaledek kitail sang kotoutou kan oh soansuwed en dipatail kan (kilang Mosaia 15:7–9). Pali ngenitail mwakelekel da oh kak kasamwohlong rehn Koht.

Sapwelimen Sises doadoahk sarawi o wiawiher pwe en kapit kitail sang mehla. Pwehki E ketin iasadahr, kitail koaros pahn iasada mwurin atail mehla. Met wehwehki me ngehn en emen emen oh palinwere pahn pwurpene, oh kitail koaros pahn momouriki mour lingan kohkohlahte, ni palinwar unsek. Ma sohte Sises Krais, mehla pahn kasorehla koapwoaroapwoar koaros me kitail pahn mihmi rehn Samatail Nanleng ehu rahn.

Onopiki Pwuhk Sarawi

Koht poaronehdo Sapwellime Ieroso

• Alma 11:40

• Sohn 3:16–17

Komourla pwehki Sises Krais

• 2 Nihpai 2:6–8; 9:21–24

• Alma 34:8–9, 14–16

• Moronai 7:27-28

• Doctrine and Covenants 45:3–5

• 1 Korint 15:20–22

Esehla Me Tohto me pid Padahk Wet

• “Krais Ieias o”

• Mehn Kaweid ohng Pwuhk Sarawi kan: “Sises Krais”

• Oaralap kan en Rongamwahu o: “Sises Krais”

Pwoson Sises Krais

Tepin padahk en rongamwahu o iei pwoson Kaun Sises Krais. Pwoson iei poahson en padahk koaros en rongamwahu o.

Pwoson Sises Krais iangahki kamehlele me Ih iei Sapwellimen Koht Iehros o. E pil iangahki likih me Ih me atail Sounkomour oh Soundoar—me Ih ete ahl me pahn kak kapwurei kitaila rehn Koht (kilang Wiwia 4:10–12; Mosaia 3:17; 4:6–8). Kitail pil luhkongehr en “katengehdi atail pwoson ih, koapwoaroapwoariki ih ni mehkoaros me pahn kak komour kitaila” (2 Nihpai 31:19).

Pwoson Sises Krais iei kitail en kamehlele me E ketin lokolongki dipatail kan sang ni Sapwellime tomw en tohnmeteio. Pwehki Sapwellime tohnmeteio, kitail pahn kak mwakelekelda oh komourla ma kitail koluhla. Mwakelekelda wet sewesei kitail en alehda meleilei oh koapwoaroapwoar nan mour wet. E pil sewese kin kitail en alehda popohl unsek mwurin atail pahn mehla.

Pwoson Sises Krais iei kamehlele me pwehki Ih, kitail koaros pahn pilehu iasada mwurin mehla. Pwoson wet kak sewesei kitail oh kaloalamwahuih kitail nan ansou en mehla kan. Pahtou en mehla kak sohrala sang ni inou en Iasadahu.

Pwoson Sises Krais pil iei kamehlele oh likih me E ketin alehdahngehr pein Ih atail lokolok oh luet akan (kilang IAiseia 53:3–5). E ketin mwangih sang ni soahng kan E lelohngehr duwen Ah kak seweseikitail nan kasongsong kan en mour wet (kilang Alma 7:11–12; Doctrine and Covenants 122:8). Ni atail doadoahngki pwoson, E kin ketin sewesei kitail wonlahte mwowe nan kahpwal akan.

Sang ni atail pwoson Ih, Sises kak kamwauih kitaila ni paliwar oh pali ngehn. E kin ketin kaunopada ansou koaros en seweseikitail tamataman Sapwellime luhk en kilengdohngie ni madamadau koaros, dehr peikasal, dehr masak (Doctrine and Covenants 6:36).

Padahk en Wiewia oh Manaman

Pwoson Sises Krais kin kamwakid kitail. Kitail kin kasalehda atail pwoson sang ni atail kin peikiong kosonned akan oh wiewia mwahu nan ehu ehu rahn. Kitail kin koluhkihla dipatail kan. Kitail kin loalapwoat ong Ih. Kitail kin nantiheng en kak duwehla Ih.

Ni atail doadoahngki pwoson, kitail kin kehnda Sapwellimen Sises manaman nan atail mour nan rahn koaros. E pahn ketin kalaudehla atail kak koaros. E pahn sewesei kitail keirda oh powehdi kosongosong kan.

Kakehlaka Atail Pwoson

Soukohp Alma padahngki me kalaudehla pwoson kak tepsang ni mehkot mengei en “inengieng en kamehlele” (Alma 32:27). Eri, pwe atail pwoson Sises Krais en laudla, kitail anahne apwalih sang ni atail esehla Sapwellime mahsen kan, doadoahngki sapwelime padahng kan, oh kapwaiada Sapwelime kosonned akan. Alma padahngki me ni atail pahn ahniki kanengamah, oh kieng Sapwelimen Koht mahsen kan nan atail mongiong kan, “e pahn miehda kalewe [oh pahn duehla] tuhke ehu me udahn tengeteng”—oh wie kakakelail ih atail pwoson (Alma 32:41; kilang ire tikitik 26–43).

Onopiki Pwuhk Sarawi

Pwoson, Manaman, oh Komour

• 1 Nihpai 7:12

• 2 Nihpai 9:23; 25:23

• Moronai 7:33–34; 10:7

Padahk Mehlel en Pwoson

• Alma 32

• Episos 2:8

Karasepe kan en Pwoson

• Ether 12

• Ipru 11

Doadoahk kan oh Peik

• 1 Nihpai 3:7

• Doctrine and Covenants 130:20–21

• Seims 2:17–26

Pwoson ohng Koluhla

• Alma 34

Esehla me Tohto me pid Padahk Wet

• Mehn kaweid ong iren pwuhk sarawi kan: “Sises Krais,” “Tomw, Tomwpen Dihp,” “Pwoson”

• Dikseneri en Pwuhk Sarawi: “Pwoson”

• Oaralap en Rongamwahu o:“Sises Krais,” “Tomwpen dihp en Sises Krais,” “Pwoson Sises Krais”

Koluhla

Dahkot koluhla?

Koluhla iei keriau en padahk en rongamwahu o. Pwoson Sises Krais oh atail limpoak ong Ih pahn elehiong kitail en koluhla (kilang Ilemen 14:13). Koluhla iei mwekid ehu en sohpeiong Koht oh sohpeisang dihp. Ni atail koluhla, atail mwekid kan, ineng kan, oh madamadau kan kin wekila oh kin inengiong wia kupwuren Koht. Mahkpen dihp kohsang rehn Sises Krais oh Sapwellime meiroang en tomw o.

Koluhla laud sang ahmw kin nanantiong en wekidala mwekid ehu de kalowehdi ehu luwet. Koluhla iei sohpeilahng Krais ni mehlel, me ketikiong kitail manaman en esehla “wekidekla laud” en nan atail mongiong kan (Alma 5:12–14). Ni atail eseier wekidekla en mongiong wet, kitail pwurehng ipwidi ni palingehn (kilang Mosaia 27:24–26).

Sang ni koluhla, kitail kin kilangada mwahu Koht, pein kitail, oh sampah. Kitail kin pwurehng kehnda sapwellimen Koht limpoak ong kitail Sapwelime serihkan—oh limpoak en atail Sounkomour o ohng kitail. Ansou mwahu en koluhla iei ehu kapai laud me Koht ketkihong kitail sang rehn Sapwellime Iehros o.

Wiepen Koluhla

Ansou me kitail kin koluhla, kitail kin esehda dipatail kan oh ahneki pepehm en men kapwungala. Kitail kin wehkada dipatail kan ong Koht oh peki Sapwellime mahk. Kitail pil kin wehk ong dihp laud kan ong irail lapalap akan en Mwomwodisoh, pwe irail me kak seweseikitail ansou kitail koluhla. Kitail wia dahme kitail kak wia en kapwurehdo, me wehwehki songosong en kapwungala kahpwal akan me atail mwekid kan kin kahrehda. Koluhla mehlel kin sansalda sang ni mwekid pwung kan uwen ansou ieu.

Koluhla pahn kin wiewiawi rahn koaros erein atail momour. “Aramas koaros wiadahr dihp, oh dohsangehr lingan en Koht” Rom 3:23). Kitail kin anahne kolkoluhla, tamataman me kitail “kak wia soahng koaros rehn Krais me kin kakehlail ih” kitail (Pilipai 4:13). Kauno koangongehkin kitail me “ni ansou me nei aramas akan pahn koluhla ih pahn mahkikiong irail arail wihwia sapwung kan” (Mosaia 26:30).

Kapai kan en Koluhla

Koluhla wia ehu mwekid kesempwal me kin wahdo popohl oh meleilei. E kin wahdong kitail “manaman en Soundoaro, ong ni komourpen palingehn[atail] kan” (Ilemen 5:11).

Ansou me kitail kin koluhla, atail katoutou kan oh insensuwed kin mwahula mwurin ansou ieu. Kitail kin kehnda laud kapai en Ngehno. Atail ineng en idawehn Koht kin keirda kehlail.

“Aramas tohto kin medewe me koluhla wia mehn kalokolok ehu—mehkot ehu me kitail en soik. … Ahpw pepehm en kalokolok wet kin kohsang rehn Sehdan. E kin song en kauhdi atail raparapahki Sises Krais, me kesihnendahr oh kapapesengehr limeh kan, oh koapwoaroapwoarki oh inengiong en kamwahuihala, mahkohng, kamwakelahda, kakehlailihada, kamwakeleikitailda, oh kasarawihkitailla”(Russell M. Nelson, “Kitail Kak Wiahda Mwahu oh Pil Mwahu Sang,” Liahona, Mei 2019, 67).

Onop en Pwuhk Sarawi

Koluhla

• Alma 34:8–17; 36:6–21

• Doctrine and Covenants 18:10–13; 58:42–43; 61:2

• 2 Korint 7:9–10

Komourla oh Mahk

• Ilemen 5:10–11

Mahk ong Koaros Me Koluhla

• Alma 12:32–34; 42:13, 21–24

Esehla Me Tohto me pid Padahk Wet

• Mehn kaweid ong iren Pwuhk Sarawi kan: “Koluhla, Wahn Koluhla,” “Tomw, Tomwpen Dihp”

• Dikseneri en Pwuhk Sarawi: “Koluhla”

• Pwuken Kaweid, 32.1

• Oaralap kan en Rongamwahu o: “Koluhla,” “Tomwpen Sises Krais”

Pepdais: Atail Keieu en Inou ong Koht

Pwoson Sises Krais oh koluhla kin kounop kitail ohng tiahk sarawi en pepdais oh ale kisakis en Ngehn Sarawi. Pepdais me wia keieu en tiahk sarawi en rongamwahu en Sises Krais. Ni atail kin alehdi tiahk sarawi kaperen wet, kitail kin wiahda atail keieu en inou ong Koht.

Tiahk sarawi iei mwekid sarawi ehu de kasarawi me kin wiawi sang irail prihsduhd me ahneki mweimwei. Ekei tiahk sarawi kan, me duwehte pepdais, inenen kesempwal ohng komourpatail.

Sang tiahk sarawi kan, kitail kin wiahda inou kan ohng Koht. Inou pwukat wia inou sarawi kei nan pwungen kitail oh Koht. E ketin inoukidahr me e pahn kapaikitailda ma kitail pahn kolokol atail inou kan ohng Ih. Kitail anahne kolokol tengeteng atail inou kan ohng Koht.

Koht ketin kounopada tiahk sarawi kan oh inou sarawih kan pwe en seweseikitail en kohdo Reh oh ahneki mour soutuk. Ni atail alehdi tiahk sarawi en prihsduhd kan oh patehng kolokol inou sarawih kan, kitail kak esehla manaman en koht nan atail mour (Doctrine and Covenants 84:20).

Inou en Pepdais

Sounkomour o padahngki me pepdais udahn anahne wiawi ong kitail pwe kitail en kak pidelong nan wein nanleng (kilang Sohn 3:5). E pil kesempwal ohng kitail en wiahla towe mehlel en Mwomwohdiso en Sises Krais. Atail Sounkomour o wiadahr karasaras ehu sang ni Ah ketin pepdaislahr (kilangMadiu 3:13–17).

Ni atail pepdaisla oh kolokol atail inou kan, Koht ketin inoukihda me e pahn mahk ohng dipatail kan (kilang Wiwia 22:16; 3 Nihpai 12:1–2). Kapai laud wet kohsang ni tomwpen Sises Krais, me “poakohng kitail, oh kamwakeleikitailda sang nan dipatail kan ki pein intah”(Kaudiahl 1:5). Koht pil ketin inoukiong kitail me e pahn kapai kin kitailda Ngehn Sarawi o pwe kitail en kak sarawihla, alehdi kaweid, oh kaloalamwahu.

Atail pwukoah nan inou en pepdais o, kitail kadehde me kitail pahn aledahng kitail mwaren Sises Krais. Kitail pil inoukihda me kitail pahn tamataman Ih ansou koaros oh kolokol Sapwellime kosonned akan. Kitail inoukihda me kitail pahn poakohng oh papah meteikan, “iang irail kan me ahniki pahtou;… koaloaloamwahui irail akan me anahne koaloaloamwahu, oh wia sounkadehde en Koht ahnsou koaros oh ni mehkoaros, oh wasa koaros” (Mosaia 18:9; kilang ire tikitik 8–10, 13). Kitail kasalehda ni mehlel me kitail pahn papah Sises Krais lel ni imwin atail mour (kilang Doctrine and Covenants 20:37; Mosaia 2:17).

Atail inou sarawih kan me kitail wiahda ansou en papdaiso wia pwukoah laud ehu. Irail wia mehkot me kin kamarain oh kaperen. Irail wiahda ehupene kesempwal nan pwungen kitail oh Samatail Nanleng me sansal sang ni sapwellime limpoak me sohte wekila.

Pepdais sang Kaduhdi

Sises padahngki me kitail anahne pepdais kaduhdi pwe en wia lapwapen dipatail kan (kilang Doctrine and Covenants 20:72–74). Pepdais sang ni kaduhdi wia kilel en mehla, seridi, oh Iasada en Sises Krais (kilang Rom 6:3–6).

Pepdais kaduhdi pil wia kilel manaman ehu ong kitail. E kin weliandi mehlahn atail mour en mahso, seridien mour en mahso, oh palingenitail ah pwurehng ipwidi. Ansou me kitail pepdaislahr, kitail kin tapihada mwekid en pwurehng ipwidi oh wiahla seri ngehn kei en Krais (kilang Mosaia 5:7–8; Rom 8:14–17).

Serihkan

Serihkan sohte kin pepdais lahu irail lel sounpar en kakehr pilada, iei sounpar waluh (kilang Doctrine and Covenants 68:27). Serihkan me kin mehla mwohn sounpar o irail komourlahr sang ni Tomwpen Sises Krais (kilang Moronai 8:4–24; Doctrine and Covenants 137:10). Mwohn serihkan ah pahn pepdais, irail anahne kasukuhl ki duwen rongamwahu o pwe irail en kak kaunopehng dake kesempwal wet nan arail mour ni arail pahn wiahda arail inou ong Koht.

Kamadipw Sarawi

Samatail Nanleng kupwurki kitail en mehlel ohng inou kan me kitail kin wiahda ong Ih. Pwehn sewese kitail en wia met, E kangongehkin kitail en patpene oh ale kamadipw sarawi. Kamadipw sarawi iei tiahk sarawi en prihsduhd me Sises kapehseiong Sapwellime wahnparon ko mwohnte Ah pahn ketin pwoulao.

Ale kamadipw sarawi iei poahson en kaudek en kamadipw sarawi kan nan ehu ehu wihk. Pilawa oh pihl kin kapaida oh kohieng towe kan. Pilawao weliandi kahlap en Sounkomour o me meiroang lahr pwehki kitail. Pihlo weliandi Sapwellime inta, me E kakerehdi pwehki kitail.

Kitail kin ale tungoal sarawi pwukat pwe en wia ketemenpen meironglahn Sounkomour o oh kakapwa atail inou kan ong Koht. Kitail kin alehdi inou kapw me Ngehno pahn kin ieiang kitail.

Mwohn Pepdais

Mwohn irail akan me ke kin padahkong pahn pepdais, irail anahne ahneki pwoson Krais, koluhla, oh wekidala arail mour pwe irail en kak warohng pepdaisla nin duwen me kosondier nan Doctrine and Covenants 20:37. Irail anahne inoukihdi en kolokol kosonned akan oh momouriki rongamwahu en Sises Krais. Ma ke kosonedier rahn en pepdais ahpw aramas o anahne te kounopada, kasawala pepdais o lahu e onopada. Kilang iralaud 12.

Mwohn pepdais, emen emen aramas anahne:

• Alehdi padahk koaros sang misineri.

• Tuhwong preseden kan en kohrumw en elder, Pwihn en Sawas en Lih, oh pisop.

• Kin patehng tuhpene en kamadipw sarawi kan pak kei.

Mweimwei en Pepdais

Ekei aramas me kin pepdais nan ehu mwomwohdiso kak medewe dahme karehda irail anahne pwurehng pepdaiski. Pepdais oh ale kisakis en Ngehn Sarawi anahne wiawi sang irail me kolokol prishduhd me kasarwilahr en wia tiahk sarawi pwukat (kilang Iren Pwoson akan 1:5; Wiwia 19:1–6; Ipru 5:4).

Onopki Pwuhk Sarawi

Karasaras en Krais

• 2 Nihpai 31:4–18

• Madiu 3:13–17

Inou en Pepdais

• 2 Nihpai 31:13

• Mosaia 18:8–10, 13

• Alma 7:15–16

• Doctrine and Covenants 20:37

Anahn akan ohng Pepdais

• 2 Nihpai 9:23

• Mosaia 18:8–10

• Alma 7:14–15

• 3 Nihpai 11:23

• Moronai 6:1–3

• Doctrine and Covenants 20:37

• Wiwia Kan 2:37–39

Inou en Kapai kan en Pepdais

• Mosaia 4:11–12

• Moronai 8:25–26

Anahnepen Mweimwei

• Doctrine and Covenants 22

• Madiu 28:19–20

• Ipru 5:4

Sises Krais me Tapihada Kamadipw Sarawi

• 3 Nihpai 18:1–18

• Luk 22:15–20

Kapakap kan en Kamadipw Sarawi

• Moronai 4 oh 5

• Doctrine and Covenants 20:75–79

Ale Kamadipw Sarawi

• Doctrine and Covenants 27:2

• 1 Korint 11:23–29

Esehla Me Tohto me pid Padahk Wet

• Mehn kaweid ohng Pwuhk Sarawi kan: “Pepdais, Pepdais,” “Kamadipw Sarawi”

• Oaralap kan en Rongamwahuo: “Pepdais,” “Kamadipw Sarawi”

Kisakis en Ngehn Sarawi

Alehda Kisakis en Ngehn Sarawi

Wiepen pepdais mie pali riau. Sises padahngki me kitail anahne “ipwiki pihl oh Ngehn o” pwe kitail en kak pidelong nan wein Koht (Sohn 3:5; iren kapatapat). Sosep Smith padahngkiher, “Pepdais ki pihl wia te elep en pepdais, oh e sohte pahn mwahu ma e sohte pil alehdi elep—me iei, pepdais ki Ngehn Sarawi” (Padahk kan sang Preseden en Mwomwohdiso wet: Sosep Smith [2007], 95).

Pepdais ki pihl anahne pil kaimwsakihla pepdais ki Ngehno pwe en kak unsekla. Ni atail kin alehdi koaros pepdaisko, kitail kin mwakelekel da sang dipatail kan oh ngehnitail kin pwurehng ipwidi. Kitail eri kin tapihada ehu mour en pali ngehn nin duwen tohnpadahk en Krais kei.

Kitail kin alehdi pepdais en Ngehno sang ni tiahk sarawi en kepwilpwildien peh kan pohn moange. Tiahk sarawi wet kin wiawi sang emen me kolokol prisduhd de tohtohsang pwe irail en pwilikihdi pehrail kan pohn moange. Keieu irail kin katengehdi kitail en wiahla towe mehlel en Mwomwohdiso, oh eri irail kin kihdi kisakis en Ngehn Sarawi pohtail. Ihte tiahk sarawi et me pil wiawi nan Kadehde Kapw oh nan Pwuhk en Mormon (kilang Wiwia kan 8:14–17; 3 Nihpai 18:36–37).

Ngehn Sarawi wia towe kesilimen en Koht akan. [Karasepe Koht Sahm, Koht Nah, oh Koht Ngehn Sarawi} E kin ehu ong Samatail Nanleng oh Sises Krais. Ansou me kitail kin alehdi kisakis en Ngehn Sarawi, kitail kak wiahla kempoakepah erein atail momourki pwoson.

Ia mwomwen Ngehn Sarawi ah Kapai Kitailda

Kisakis en Ngehn Sarawi iei ehu kisakis laud en Samatail Koht. Ngehn Sarawi kin kamwakelehda oh kasarawih kitaila, wiahda kitail en sarawihla, unsekla, duwehla Koht (kilang 3 Nihpai 27:20). E kin sewese kitail en wekila oh keirida ni pali ngehn ni atail kin rapahki en idawehn kupwuren Koht.

Ngehn Sarawi kin sewese kitail en koledi oh kak kasawihada me mehlel o (kilang Moronai 10:5). E pil kin katengehdi mehlel o nan atail mohngiong oh madamadau kan. Ni kapatapat, Ngehn Sarawi o kin sewese kitail en padahngki mehlel o (kilang Doctrine and Covenants 42:14). Ni atail kin esehla oh padahngki mehlel sang ni manaman en Ngehn Sarawi o, E kin wahlong nan atail mongiong kan (kilang 2 Nihpai 33:1).

Ni atail kin ni karakarahk rapahki ahl o sang Ngehn Sarawio, E kin kaweid kitail (kilang 2 Nihpai 32:5). Met pil kin kapehm kin kitail mwomwen atail pahn papah meteikan.

Ngehn Sarawi kin kihong kitail kehlail en palingehn pwe en sewese powehdi luwet akan. E kin sewese kitail en sohpeisang kasongosong. E pil kin kaparkin kitail kahpwal en palingehn oh palinwar.

Ngehn Sarawi pahn kin sewese kitail nan kahpwal akan en mour. E pahn kin koalolamwahuih kitail nan ansou en kahpwal de insensuwed, audehkin kitail ki koapwoaroapwoar (kilang Moronai 8:26). Sang ni Ngehn Sarawi, kitail kak kehn limpoak en Koht ong kitail.

Kaweid sang Ngehn Sarawi

Aramas akan me ke padapadahki kak kehn wahn Ngehn Sarawi ni ansou me ke tuhwong irail oh ansou me re onopikiher oh kapakapkiher. Kawehweiong irail ma irail men doulahte oh kehn pepehm mwahu pwukat, irail anahne wadek Pwuhk en Mormon, kapakap, iang towehda kamadipw sarawi, oh peikiong kosonned akan.

Kawehwehda me sang ni pepdaisla oh alehda kisakis en Ngehn Sarawi pahn kiong irail kapai en alialehdi kaweid kan en Ngehn Sarawi.

Ma mie anahnepe, padahkiong aramas o mwomwen kapakap. Kilang “Kapakap ki en Esehla Mehlel o sang Ngehn Sarawi” nan mehn kaskuhl 1 oh “Poaden Kapakap” nan mehn kaskuhl 4 mehn kaweid en sewese aramas emen en esehla kapakap.

Onopki Pwuhk Sarawi

Momour en Ngehn Sarawi

• Doctrine and Covenants 8:2–3; 130:22–23

• Luk 24:31–32

• Sohn 3:5–8

• Kalesia 5:22–23

Kapai kan oh Mwekid sang Ngehn Sarawi

• 2 Nihpai 32:1–5; 33:1–2

• 3 Nihpai 27:13–22 (ire tikitik 20)

• Moses 6:61

• Sohn 14:26

Kesempwalpen Kisakis en Ngehn Sarawi

• 2 Nihpai 31:11–12, 18, 21

• 3 Nihpai 18:36–37; 19:13; 27:19–20

• Doctrine and Covenants 19:31; 20:38, 41; 33:15

• Wiwia kan 19:1–6

Esehla Laud me pid Padahk Wet

• Mehn Kaweid ohng Pwuhk Sarawi kan: “Ngehn Sarawi,” “Kisakis en Ngehn Sarawi”

• Dikseneri en Pwuhk Sarawi: “Ngehn Sarawi”

• Oaralap akan en Rongamwahu o: “Ngehn Sarawi,” “Kisakis en Ngehn Sarawi kan”

Dadaurete lel Imwi

Ni ansou me kitail kin pepdais oh ale kisakis en Ngehn Sarawi, kitail kin wiahda inou ong Koht. Me sohte patehng mepwukat, kitail inoukihda me kitail pahn kolokol Sapwellime kosonned akan oh papah Ih erein atail mour (kilang Mosaia 18:8–10, 13; Doctrine and Covenants 20:37).

Mwurin atail kin miher nan ahl en rongamwahu o sang ni pepdais oh ale kisakis en Ngehn Sarawi, kitail kin wia uwen atail kak koaros en dehr pwupwila. Ni atail kin sohpeisang ahlo mendahte ma e tikitik, kitail kin uhd doadoahngki atail pwoson Krais ni atail kin koluhla. Kapai en koluhla kin sewesei kitail en kak pwurala nan ahl en rongamwahu o oh pilehu alehda kapai kan en atail inou sarawih kan ong Koht. Ni atail kin koluhla ni mehlel, Koht kin ketin mahk ong kitail oh kasamwohikitail ong reh.

Dadaurete lel ni imwi wehwehki ahniki pwoson Koht erein atail mour—nan ansou mengei oh apwal, ni ansou en pweida oh ni ansou en kahpwal akan. Kitail kin mweidehng Krais en kin kamwahuihkitaila oh wiaikitailda en duehla Ih. Kitail kin kilenglahng Krais ni pwoson, likilik, koapwoaroapwoar mendahte dahme kin wiawiheng kitail nan atail mour kan.

Dadaurete lel ni imwi sohte wehwehkihte en kolokol lahu kitail mehla. Ahpw, e wehwehki ken nantieng ahmw mour, madamadau, oh wiewia en kilenglahngete Sises Krais. E pil kapataieng dadaurete ahmw pwoson Krais nan ehu ehu rahn. Kitail pil kin kolkoluhlahte, kolokol atail inou sarawih ong Koht, oh rapahki Ngehn Sarawi o en wiahla kempoakepahmw.

Dadaurete lel ni imwi kapatahieng “nan[tihlahte] mwowe ni amwail tengediong rehn Krais, sang ni koapwoaroapwoar unsek, oh poakohng Koht oh aramas koaros. Samatail Nanleng inoukieng kitail ni atail pahn dadaurete lel ni imwi, kitail “pahn ahniki mour soutik” (2 Nihpai 31:20).

Onopiki Pwuhk Sarawi

Dadaurete lel ni Imwi

• 2 Nihpai 31:14–20

• 3 Nihpai 27:13–22

• Madiu 10:22

Kapai kan ong irail akan me Dadaurete

• 1 Nihpai 13:37; 22:31

• 3 Nihpai 15:9

• Doctrine and Covenants 14:7

Esehla Me Tohto me pid Padahk Wet

• Oaralap kan en Rongamwahu o: “Kahpwal”

• Mehn Kaweid ohng Pwuhk Sarawi kan: “Dadaurete,” “Kahpwal”

Rongamwahu en Sises Krais kin kapaiada sapwellimen Koht Serihkan koaros

Rongamwahu en Sises Krais iei ohng Sapwellimen Koht serihkan koaros. Pwuhk Sarawi padahngki me “kitail koaros soahngetehiou rehn Koht” mendahte iawasa kitail kohsangie de dahme kitail mihmi loale. E ketin luke “koaros en kohdo reh oh alehda me mwahu kan sang reh; oh E sohte kin soikala irail akan me kin kohdo Reh” 2 Nihpai 26:33).

Rongamwahu o pahn kapaikitailda nan mourwet oh lelohng mour soutik. Kitail udahn pahn peren—ni atail kelehpw oh nin duwen peneinei—ansou kitail kin momouriki padahngkan en Sises Krais (kilang Mosaia 2:41; “Peneinei: Kalohk Ehu Ohng Sampah,” ChurchofJesusChrist.org). Momouriki rongamwahu o kin kaloalehla atail popohl, kamarainihada atail wiewiah kan, oh kalaudehla atail ehupene kan.

Momouriki rongamwahuo pil kak doreikitail sang nan pilipil me pahn kaweikitaila ni paliwar oh palingehn. E kin sewesei kitail en ahniki kehlail nan ansou en apwal akan oh insensued kan. E kin kiong kitail ahl kolahng mour en popohl soutik.

Ehu iren kaweid me sang rongamwahu kapwurpwurdo wet iei me kitail koaros wia kisehn peneinei en Koht. Kitail iei Sapwellime seri kan. Mendahte atail kahpwal en nan peneinei pohn sampah wet, emen emen kitail wia kisehn peneinei en Koht.

Pil ehu iren kaweid mwahu iei me peneinei kak mihmi pene soutik. Peneinei koasoandihsang Koht. Samatail Nanleng pilahn en peren kin kahrehieng ehupenehn nanpwungen peneinei en kak doulahte mwurin mehla. Tiahk Sarawi kan en nan tehnpas sarawi oh inou kan karehda peneinei ah kak mihmipene soutik.

Sang ni marain en rongamwahu o, peneinei kak kapwungala sohte wehwehpene, uhpene, oh kahpwal akan. Peneinei me kin mwerkipeseng insensued kak mwahula sang ni koluhla, mahk, oh pwoson tomwpen dihp en Sises Krais.

Rongamwahu en Sises Krais kin sewesei kitail en kak kauwada ehupenehn peneinei kehlail. Wasahn kousoan iei wasa keioun mwahu en padahngki oh esehla padahk lap en rongamwahu o. Nihmw ehu me pahn kin poasenkihda rongamwahu en padahk lap pahn wia wasahn rukula oh poadondoarala. E pahn wia wasa me Ngehn en Kauno pahn ketketie.

Kanaiohng Ansoun ahmw Padahngki duen Peneinei kan

Ansoun ahmw padahngki duen peneinei, kanaiohng ma aramaso sohte pwopwoud, sohte kak naineki seri, de ahniki kahpwal ohng tohn ah peneinei. Kasalehiong irail me Koht poakohng irail oh irail wia kisehn Sapwellime peneinei. Sewese irail en ese ia mwomwen rongamwahu o ah kin kapai irailda mendahte soangen irair kan me arail peneinei mihmi loale. Ni arail pahn loaloapwoat, Koht pahn ketin kounopohng irail en ahneki kapai kan en peneinei limpoak, mendahte ma nan mour wet de nan mour me pahn kohdo mwuhr.

Onop en Pwuhk Sarawi

• 2 Nihpai 25:26

• 3 Nihpai 18:21

• Doctrine and Covenants 68:25

• Moses 2:27–28; 5:1

• Abraham 2:11

• Episos 3:14–15

• Senesis 12:3;

Esehla Me Tohto me pid Padahk Wet

• Mehn kaweid ohng Pwuhk Sarawi kan: “Rongamwahu”

• “Peneinei: Kalohk Ehu Ong Sampah”

• Pwuken Kaweid, ire laud kan 2 oh 16

• Oaralap kan en Rongamwahu o: “Rongamwahu,” “Peneinei”

Koasoandi en wiepen mehn kaskuhl mwotomwot lel nanpwunge

Koasoandi en mehn kaskuhl iei karasepen dahme ke pahn padahngki ohng emen ma ahmw ansou mwotomwot. Ni ahmw pahn doadoahngki mehn kaskuhl wet, pilada ehu padahk de me tohtohsang me ke pahn padahngki. Poahsoan en padahk mehlel ong ehu ehu padahk kodahr nan mehn kaskuhlet.

Ni ahmw pahn padahk, idek peidek kan oh kin rong. Wia luhk me pahn kak sewese aramas akan en karanihala Koht. Ehu luhk kesemwpwal iei aramaso en kak pilehu tuhong komwi. Reirei en padahko pahn sang ni peidek me ke pahn idek oh mwomwen ahmw rongorong.

Dahme ke kak padahkiheng aramas nan erein minit 3–10

• Koht ketkihdo Sapwellime Ieros, Sises Krais, pohn sampah pwe en doareikitaila sang dihp oh mehla.

• Pwoson Sises Krais iei padahk lap me pid wiewia oh manaman. Pwoson sewesei kitail en esehla sapwellimen Sounkomouro manaman nan atail mour.

• Pwoson Sises Krais pahn kaluwahieng kitail en koluhla. Koluhla wia mwekid en sohpeilahng Koht oh sohpeisang dihp. Ni atail kin koluhla, atail wiewiah kan, atail ineng kan, oh atail madamadau kan kin perenkihla wia kupwur en Koht.

• Ni atail kin koluhla, Koht kin ketin mahk ohng kitail. Mahk kin kak pweida pwehki Sises Krais ketin tomwkihlahr dipatail kan.

• Pepdais kin wiawi ni soangen wiepe riau: pepdaiski pihl oh Ngehn Sarawi. Ni atail pahn kin pepdaisla oh alehda kisakis en Ngehn Sarawi, kitail kin mwakelekeldahsang nan dipatail kan, me kihong kitail en tapihada ehu mour kapw.

• Mwurin atail pahn pepdaiskiher pihl, kitail pahn alehda kisakis en Ngehn Sarawi sang ni tiahk sarawi en kepwilpwildien peh kan pohn moange.

• Ni atail pahn loaloapwoat kokohwei pohn ahl en rongamwahu o lao lel ni imwin atail momour, Koht ketin inoukiher me kitail pahn ahniki mour soutik.