1 Oh met kedekedeo mwurin Alma e koasoiadahr mahsen pwukat e ahpw mwohndi, oh Amulek ahpw kesihnenda oh tepida padahkihong irail, nda:

2 Riei ko, I medewe me e pahn apwal kumwail en pohnsehse soahng kan me sansalohng kitailehr duwen ketidohn Krais, me se padahngkier me iei Sapwellimen Koht Iehros; ei, I ese me mepwukat padahkohng kumwail pak tohto mwohn amwail kahngohdiong kiht.

3 Oh pwehki amwail men riei ohl kesempwalet en kasalehiong kumwail dahme kumwail pahn wia, pwehki amwail kahpwal akan; oh e song en koasoi ong kumwailehr pwe en kaunopada nan amwail madamadau kan; ei, oh e koangoangehkin kumwailehr kumwail en pwoson oh kanengamah—

4 Ei, ma kumwail pahn kak ahneki pwoson laud duwehte mahseno en kak poadidi nan mohngiongimwail kan, pwe kumwail en kak song kamwahupe.

5 Oh met se kak wehwehki kalelapak kesempwal nan amwail madamadau kan, ma iei mahseno mi rehn Sapwellimen Koht Iehroso, de ma pahn mie Krais de soh.

6 Oh kumwail pil kilangehr me riei ohl menet kawehweiong kumwailehr, pak tohto, me mahseno me pwilisang rehn Krais kin kamourala aramas.

7 Riei ohl menet koasoiadahr mahsen kan en Sihnos, me poadoandoarlao pahn pwilisang rehn Sapwellimen Koht Iehroso, oh e pil koasoiadahr mahsen en Sihnok kan; oh e pil kasaledahr duwen Moses, pwe en kasalehda me mepwukat koaros mehlel.

8 Oh met, kilang, pein ngehi pahn kadehdehiong kumwail me mepwukat mehlel. Kilang, I ndaiong kumwail, me I ese me Krais pahn ketido oh ket nanpwungen aramas akan, pwe en tounmeteikihla dipen sapwellime aramas akan, oh me e pahn tomwkihla dihp en sampah; pwe Kauno Koht ketin mahsaniher.

9 Pwe e konehng me tomw uhdahn pahn anahne en wiawi; pwe nin duwen sapwellimen Koht Soutuk koasoandi lapo, uhdahn e pahn mie anahnepen tomw en wiawi, ma soh, aramas koaros uhdahn pahn mwomwla; ei, pwehki koaros keptakailahr; ei, koaros pwupwudier oh salongalahr, oh koaruhsie pahn mwomwla ma tomw me uhdahn anahnepehu, sohte wiawi.

10 Pwe e konehng en mie meirong lapalap ehu oh me pahn keimwisekla meirong koaros; ei, kaidehn meirong en aramas ehu, de pil mahn, de soangen menpihr kan; pwe e sohte pahn wia ehn aramas meirong ehu; ahpw e uhdahn pahn anahne wia meirong ehu me soutuk oh poatopoat.

11 Oh kilang, sohte aramas emen me kak meirongkihla pein ih pwe en wia tomwpen dipen emen. Eri, ma aramas emen pahn kemehla aramas emen, kilang atail kosonnedo, me wia kosonned pwung, e kin kapwukoanki rien me kam aramaso? I ndaiong kumwail, me Soh.

12 Ahpw koasoandi en kosonnedo iei lahp me kemehla aramaso uhdahn pahn kamakamkihla; eri tomw poatopoat kelehpw me pahn kak itarohng en tomwkihla dipen sampah.

13 Eri, e konehng en mie meirong lapalap ehu oh me pahn kaimwisekla meirong koaros, oh e ahpw pahn mie, de e pahn konehng en mie, imwiseklahn meirong en nta; eri kosonned en Moseso ahpw pahn pweida; ei, mengihtik koaros en kosonnedo pahn pweida, oh sohte mengihtik kis pahn sohrala mwohn e pahn pweida.

14 Oh kilang, met iei wehwehn kosonnedo pwon, audepe pisetik koaros kasalehda kaimwiseklahn meirong lapalapo; oh kaimwiseklahn meirong lapalapo pahn iei Sapwellimen Kohto, ei, me poatopoat oh soutuk.

15 Eri e pahn ketikihong komourpen irail koaros me pahn kamehlele mwareo; oh kahrepen kaimwiseklahn meirong wet, pwe sapwellime kupwur kalahngan en pweida, me pahn powehdi pwuhng en kosonnedo, oh kahrehiong aramas akan en kak ahneki pwoson me kahrehiong ar koluhla.

16 Eri met kalahngano pahn kak kapwaiong anahn en pwuhngo, oh kapilkinirailpene perehrehn nin lime kan, ahpw mehmen me sohte pahn ahneki pwoson me kahrehiong eh koluhla e pahn mih pahn kalokepen kosonnedo pwon oh kapwaiong anahn en pwuhng en kosonnedo; eri irailte me ahneki pwoson me kahrehiong ar koluhla me pahn alehdi poadoandoarlahn koasoandi lap soutuko.

17 Eri, rieiko, Koht en ketin mweidohng kumwail en tepida doadoahngki amwail pwoson me kahrehiong amwail koluhla, pwe kumwail en tepida likweriong ih ni mware sarawio, pwe en ketikihong kumwail sapwellime kalahngan;

18 Ei, peki reh sapwallime kalahngan; pwe e ketin sapwellimaniki manaman en kamourla.

19 Ei, kumwail karakarahkala, oh poaden kapakap ong ih.

20 Kapakap ong ih ahnsou me kumwail mi nan amwail mohs kan, ei, kapakapki noumwail pelin mahn akan.

21 Kapakap ong ih nan imwamwail kan, ei, kapakapki tohn imwamwail kan koaros, ni menseng, ni souwas, oh ni soutik.

22 Ei, kapakap pwe kumwail en kak powehdi amwail imwintihti kan.

23 Ei, kapakap pwe kumwail en kak powehdi tepilo, me wia imwintihti en mour pwung koaros.

24 Kapakapki amwail wahn sahpw akan, pwe kumwail en kak pweida loale.

25 Kapakapki noumwail pelin mahn en nan amwail mohs kan, pwe re en kak tohtohla.

26 Ahpw kaidehn ihte met; kumwail anahne ngidingidki amwail kapakap nan amwail pere tikitik kan, oh nan amwail wasa rir kan, oh nan amwail sapwtehn kan.

27 Ei, apw ma ahnsou me kumwail sohte kapakap ong Kauno, a mohngiongimwail kan en kin direkihla kapakap ong ih ahnsou koaros ong sawaspamwail, oh pil sawaspen mehn mpamwail kan.

28 Oh met kilang, riei ohl kesempwal ako, I ndaiong kumwail, kumwail dehr medmedewe me ihte met; pwe ma mwurin amwail pahn kapwaiada mepwukat koaros, ma kumwail pahn pohnsehse me anahn akan, oh me sohte ar likou kan, oh sohte pwarek me soumwahu oh me mih nan apwal akan, oh kisekisehkiong irail ekei amwail dipwisou kan, ma mie amwail dipwisou, ong irail me anahn akan—I ndaiong kumwail, ma kumwail sohte pahn wia mepwukat, kilang, amwail kapakap akan mwahl oh e sohte pahn mie katepe ong kumwail, oh kumwail duwehte aramas liksansalmwahu kan me kin kahmahmki pwosono.

29 Eri, ma kumwail kin monokehla kasalehda limpoak unsek, kumwail rasehng mete mer, me soun inihn mete men kin kesehla, (pwehki e sohlahr katepe) oh e kin kesepwekehdi wasa me aramas kin tiakpeseng.

30 Eri met, riei ko, I men kumwail en kohdo oh wahdo wahn koluhla, mwurin amwail alehdier kadehde tohto oh kumwail kilangehr me pwuhk sarawi kan kadehdehkier duwen mepwukat.

31 Ei, I men kumwail en kohdo oh dehr kakeptakaila mohngiongimwail kan; pwe kilang, met iei ih ahnsou oh rahn en amwail pahn komourla; eri, ma kumwail pahn koluhla oh dehr kakeptakaila mohngiongimwail kan, koasoandi lap en poadoandoaro pahn mwadangete wiawihong kumwail.

32 Pwe kilang, nan mour wet iei ahnsou me aramas kan pahn kaunopada en tuhwong Koht; ei, kilang rahn en mour wet iei rahn ong aramas akan re en wia arail doadoahk kan.

33 Oh met, duwehte ei ndaiong kumwailehr mwoweo, ni amwail alehdier kadehde tohto, eri, I peki rehmwail kumwail en dehr kasakasaula rahn en amwail koluhla lao lel imwio; pwe mwurin rahn en mour wet, me kohieng kitailehr pwe kitail en kaunopada ong mour soutuk, kilang, ma kitail sohte pahn kamwahwiala atail ahnsou nan mour wet, a pwohng rotoroto ahpw pahn leledo ni ahnsou me solahr doadoahk kak wiawi.

34 Kumwail sohte kak nda, me ni ansou me kumwail pahn pakahrdohng ahnsou apwalo, me I pahn koluhla, pwe I en kak pwuralahng rehn ei Koht. Soh, kumwail sohte kak nda met; pwe ngehnohte me mihlahr nan paliweremwail kan ahnsou me kumwail kohsang nan mour wet, pil ih ngehnohte me pahn ahneki manaman pohn paliweramwail nan sampah soutuko.

35 Pwe kilang, ma kumwail pahn kasakasau rahn en amwail koluhla lao lel mehla, kilang, kumwail pahn mihla pahn manaman en ngehn en tepilo, oh e pahn katengekumwaildi en wiahla nah; eri, Ngehn en Kauno pahn kohsang kumwail, oh e sohla pahn ketiket rehmwail, oh tepilo pahn ahneki manaman koaros pohmwail; oh met pahn wia imwilahn mour en me suwed akan.

36 Oh met I ese, pwehki Kauno ketin mahsanih me e sohte kin ketiket nan tehnpas samin kan, ahpw nan mohngiong en me mour pwung kan me e kin ketiket ie; oh e pil ketin mahsanih me mour pwung kan pahn iang mwohd nan sapwellime wehi, sohla pwurehng pwurala liki; ahpw arail likou kan pahn pwetepwetkihla ntahn Sihmpwulo.

37 Eri met, riei kesempwal ako, I men kumwail en tamataman mepwukat, oh kumwail en koadoahke komourpamwail sang ni lemmwiki Koht, oh kumwail dehr kahmahmki ketidohn Krais;

38 Pwe kumwail en dehr pelian Ngehn Sarawi, ahpw kumwail en alehda, oh alehda mwahr en Krais; pwe kumwail en karakarahkdihla nan pwelpar, oh kaudokiong Koht, nan wasa sohte lipilipil me kumwail mi ie, ni ngehn oh ni mehlel; oh kumwail momouriki kaping kalahngan rahn koaros, sang ni kalahngan tohto oh kapai kan me e ketikiong kumwail.

39 Ei, oh I pil koangoangehkin kumwail, riei kan, me kumwail en tamataman kumwail en kapakap ahnsou koaros, pwe kumwail en dehr lohdi pahn kasongosong kan en tepilo, pwe en dehr ahneki manaman en poweikumwaildi, pwe kumwail en dehr wiahla nah ni imwin rahno; pwe kilang, sohte mehkot mwahu me e pahn kihong kumwail.

40 Eri met, riei kesempwal ko, I pahn kangoangehkin kumwail en ahneki kanangamah, oh kumwail en dadaurete soangen kahpwal kan koaros; oh kumwail en dehr pelian irail akan me kasareikumwailla pwehki amwail semwehmwe, pwe kumwail de duwe irailla me dipan;

41 Ahpw kumwail en kin kanangamah, oh kehlail nan kahpwal akan, iangahki koapworopwor kehlail pwe ehu rahn kumwail pahn kommoal sang amwail kahpwal akan.