1 Eri iet mahsen kan me Amulek kalohkihong aramas akan me mih nan sahpw en Amonaia, me ketihtihki:

2 Ngehi Amulek; Ngehi iei nein Kidona pwutak, me wia nein Ismael pwutak, me wia kadaudok en Aminadai; oh Aminadai me kawehwehda ntingko me ntingdi ni dihd en tehnpas sarawio, me ntingdi sang nin limen Koht.

3 Oh Aminadai wia kadaudok en Nihpai, me wia nein Lihai pwutak, Lihai me kohdo sang nan sahpw en Serusalem, me wia kadaudok en Manase, me wia nein Sosep pwutak, Sosep me rie ko netikihla nan Isip.

4 Oh kilang, ngehi I pil wia aramas me ndand rehn aramas koaros me kin ese ie; ei, oh kilang, ei peneinei oh kempoakepahi me tohto, oh I pil ahneki kepwe tohto sang pein ei koahiek en doadoahk.

5 Ahpw, mehndahte soahng pwukat koaros, I sohte kin wehwehki mwahu sapwellimen Kauno ahl akan, oh sapwellime me rir kan oh manaman kapwuriamwei kan. I koasoia me I sohte wehwehki mwahu mepwukat; ahpw kilang, I sapwung, pwe I kilangehr sapwellime me rir kan oh sapwellime manaman kapwuriamwei; iei, ong ni poadoandoarlahn mour en aramas pwukat.

6 Ahpw, I kakeptakaiala mohngiongi, pwe I kin alehdi malipilip pak tohto oh I sohte kin rong; eri I wehwehki duwen mepwukat, ahpw I sohte kin men ese; eri I kin wie kahkahngohdiong Koht, nan ei mohngiong eh kin suwed, lao lel kapahieu en rahn en sounpwung keisuh wet, me iei keisek en pahr en mwehin sounkopwung kan.

7 Ni ei wie kohkohlahng mwomweit rehn emen kisehi ko me keren, kilang tohnleng en Kauno men ahpw pwarohng ie oh mahsanih: Amulek, pwurowei ni pein imwomwo, pwe ke pahn kamwenge soukohp en Kauno men; ei, ohl sarawi men, me wia sapwellimen Koht ohl pilipilda; pwe e wie kaikaisihsolki erein rahn kei pwehki dipen aramas pwukat, oh e men mwengedahr, oh ke pahn kasamwohlong nan imwomw oh kamwenge, oh e pahn kapaiaiukada oh tohn imwomwo; oh kapai en Kauno pahn ieianguhk oh tohn imwomwo.

8 Kedekedeo I ahpw peikiong kepitien tohnlengo, oh pwuralahng imweio. Oh ni ei wie kohkohlahng wasao I diarada ohl me tohnlengo mahsanihong ie: Ke pahn kasamwohlong nan imwomw—oh kilang ihte ohlohte met me wie mahmahsenihiong kumwail duwen mehkan me pid Koht.

9 Oh tohnlengo mahsanihong ie me ih iei ohl sarawi men; eri I ese me ih iei ohl sarawi men pwehki tohnleng en Koht me mahsanih.

10 Oh pil, I ese me mehkan me e kadehdehkier kan me mehlel; pwe kilang I ndaiong kumwail, me nin duwen Kauno e ketin ieias, e pil ketin kadaredohr sapwellime tohnleng en kasalehiong ie mepwukat; oh e ketin wiahier ni ahnsou me Alma wie ketiket ni imweio.

11 Pwe kilang, e kapaiahdahr tohn imweio, e kapaiehda, oh nei lih akan, oh nei seri kan, oh semei oh ei peneinei kan; iei, ei keinek koaros e kapaiahda, oh sapwellimen Kauno kupwuramwahu mihmiher poht nin duwen mahsen akan me e mahsaniher.

12 Eri, ahnsou me Amulek koasoia mepwukat aramas akan tepida pwuriamwei, pwehki irail kilangehr me soun kadehde tohtohsang emen me kadehdehier soahng kan me irail dipkihdahr, oh pil kadehdehkier soahng kan me pahn kohdo, nin duwen ngehn en kokohp me mih rehra.

13 Ahpw, mie ekei rehrail me medewehda re en song kapeideki ira, pwe re en song en doadoahngki arail koasoandi en mwersuwed kan pwe re en lidipihirahdi nan ara koasoi kan, pwe re en kak wiahki mehn kedipa ira, pwe re en kak pangala rehn arail sounkopwung kan pwe ira en kak pakadeingkihda kosonnedo, oh pwe ira en kak kamakamala de lekdeklong nan imweteng, nin duwen dihp me irail pahn song en wiahiong ira de kedipahkin ira.

14 Eri ih irail aramas pwuko me songosong en kauweirahla, iei sounsawas en kosonned akan, me kin wia doadoahk de aramas akan kin pilada pwe re en katanga kosonnedo ahnsou en arail karongorong kan, de ahnsou en karongorong en dipen aramas akan mwohn sounkopwung kan.

15 Met sounsawas en kosonned pwukat loalokongkilahr wiepen widing oh pitiehdi aramas; oh met pwe en elehiong irail en kak koahiek nan arail doadoahk.

16 Kedekedeo irail ahpw tepida peidek rehn Amulek, pwe re en kak wiahiong en sapwungala nan eh koasoi, de kasapwungepeseng mahsen akan me e pahn koasoia.

17 Ahpw irail sohte ese me Amulek kak wehwehki arail koasoandi widing kan. Ahpw ni ahnsou me irail tepida peidek reh, eh wehwehki arail madamadau kan, e ahpw ndaiong irail: Kumwail dih mwersuwed oh dipan, kumwail sounsawas en kosonned oh aramas liksansalamwahu kei, pwe kumwail wiewiahda poahsoan en tepilo; pwe kumwail wiwiahda lidip kan oh nsar akan pwehn koledi me sarawi kan en Koht.

18 Kumwail kin koasoanehdi koasoandi kan pwehn kasapwunge koasoandi pwung kan, oh pahn kahrehiong engiengin Koht eh pahn kohdiong pohmwail, lao aramas pwukat uhdahn pahn kamwomwomwla.

19 Ei, e pwung dahme Mosaia, me wia kaimwiseklahn atail namwarikio, mahsanihero, ni ansou me e pahn pwilikihdi pwukoahn wehio, pwehki sohte me e pahn kasapwiliong, oh e koasonehdi me aramas pwukat en mih pahn manaman en arail pilipil—ei, e pwung ni eh mahsanih me e pahn lel ahnsou me aramas akan pahn tepida pilada wiewia suwed, iei me, ma ahnsouo pahn leledo me aramas pwukat pahn pwupwudiong nan dihp, irail pahn nektehn kamwomwomwla.

20 Oh met I ndaiong kumwail me Kauno kin ketin kadeik amwail wiewia suwed kan nin duwen me pwung; e kin ketin kapitie laudida mahsanih ong aramas pwukat, sang ni mahsen en sapwellime tohnleng kan mahsanih: Kumwail koluhla, koluhla, pwe wehin nanleng kerendohr.

21 Ei, e pwung eh ketin kapitie laudida, sang ni mahsen en sapwellime tohnleng kan mahsanih: I pahn kohdihwei nanpwungen nei aramas akan, oh kapwungki pahrek oh pwung nan ei manaman.

22 Ei, oh I ndaiong kumwail ma sohte kapakap en aramas me mour pwung kan, me kin mihmi nan sahpwet, kumwail pahn kamwomwomwlahr ahnsou wet; ahpw e sohte pahn sang ni nohlik, duwehte me wiawihong aramas nan mwehin Noha, ahpw e pahn sang ni lehk, oh soumwahu lusulus, oh mahwen.

23 Ahpw sang ni kapakap en me mour pwung kan me kin doandoarei kumwail; eri met, ma kumwail pahn kasarehla me mour pwung kan rehmwail, eri sohte me kak pelianda kupwuren Kauno; ahpw e pahn ketin kaloke kumwail nan sapwellime engieng kowahlap; kumwail ahpw pahn lokolongki lehk, oh soumwahu lusulus, oh mahwen; oh e kereniongehr pahn wiawi ihte ma kumwail kohluhla.

24 Oh met aramas ako uhdahn lingeringerda pahn Amulek, oh irail werikihla, ndinda: Ohl menet kauwe atail kosonned akan me pwung, oh kauwe neitail sounsawas en kosonned loalokong kan me kitail piladahr.

25 Ahpw Amulek kapahwei peh kan, oh ngihl laudidi werkihong irail: Kumwail dih mwersuwed oh dipan, dahme kahrehda Sehdan koledi teng nan mohngiongamwail kan? Dahme kumwail men mweidohng Sehdan en ahneki manaman pohmwail, en karotongehla masamwail kan, pwe kumwail en dehr wehwehki mahsen kan me kumwail kin rongrong, nin duwen eh mehlel?

26 Pwe kilang, dah, I kadkadeik amwail kosonned? Kumwail sohte wehwehki; kumwail nda me I kadkadeik amwail kosonned; ahpw kaidehn me I wia, ahpw ei koasoi utungada amwail kosonned, a kumwail pahn pakadeingkihda.

27 Oh met kilang, I ndaiong kumwail, me poahsoan en kamwomwomwalahn aramas pwukat e tepier wiewiawihda sang noumwail sounsawas en kosonned oh sounkopwung mwersuwed kan.

28 Oh met ni ahnsou me Amulek koasoiahier mahsen akan, aramas ako werkihong, ndinda: Met kitail esehier me ohl menet seri en tepilo, pwe e likamw; pwe eh kadkadeik atail kosonned. Oh met e nda me eh koasoi sohte uhwong.

29 Oh pil, e lahlahwe neitail sounsawas en kosonned akan, oh atail sounkopwung kan.

30 Kedekedeo sounsawas en kosonned akan koasoanehdi nan mohngiongarail kan me re pahn tamataman mepwukat pwe re pahn kedipahki ih.

31 Oh mie emen rehrail me adaniki Sihesrom. Met ih me keieu song en kedipa Amulek oh Alma, pwehki e wia emen me keieu semen nan pwungarail, oh pwehki e kin kalapw wia doadoak rehn aramas akan.

32 Eri kahrepen sounsawas en kosonned ar kin wia arail doadoahk iei pwe irail ale isais; oh irail kin alehkihdi isais sang nin duwen ar doadoahk me re wia.