1 Oh met kedekedeo Moronai sohte kommoal sang eh kaunopadahng mahwen, de sinsile nah aramas akan sang Mehn Leimen ko; pwe e koasoanediong nah sounpei ko, irail en tapiada ni tepin kerieisek en sounpar en mwehin sounkopwung kan, re en tepida koasoakehda pwehl pwe en kapilpene kahnimw koaros, nan sahpwo pwon me Mehn Nihpai kan sapweniki.

2 Oh e koasoanediong irail en wiahda kehl tuhke pohn koasoakoasoak en pwehl, ei, e pahn ilehki uwen reirei en ohl emen, kapilpene kahnimw kan.

3 Oh e koasoanediong irail en kairekala lepin tuhke kengkeng kei pohn kehl tuhke ko kapilpene; oh lepin tuhke kengkeng pwuko kehlail oh ile.

4 Oh e koasoanediong irail en kauwada wasahn doulik ile kei me pahn ilehsang lepin tuhke kengkeng kan, oh e koasoanediong irail en wiahda wasahn rukula ni wasahn doulik kan, pwe nein Mehn Leimen takai kan oh arep kan sohte pahn kak kamedekeirailla.

5 Oh irail kaunopadahr pwe re en kak koski takai sang powe, nin duwen nsenarail oh arail kehlail, oh kemehla aramas me pahn song en keihdo limwahn kehl en kahnimwo.

6 Eri Moronai kaunopadahr ar wasa kehlail kan ni kahnihmw koaros nan sahpwo pwon, pwe re en pelian ar imwintihti kan ni ar pahn kohdo.

7 Kedekedeo Moronai ahpw koasoanediong nah sounpei kan me re pahn kohla ni palimesen sapwtehno; ei, oh kohla oh kasarehla Mehn Leimen koaros me mi ni palimesen sapwtehno oh pekeuslahng nan uhdakarail kan, me mi ni palieir en sahpw en Saraemla.

8 Oh irepen sahpw en Nihpai inen sang ni sehd en palimese kohlahng palikapi.

9 Kedekedeo ahnsou me Moronai kasarehla Mehn Leimen koaros sang ni palimese en sapwtehno, me mi paliepeng en sahpw kan me re sapweniki, e ahpw koasoanediong aramas akan me mi nan sahpw en Saraemla oh nan sahpw me kapilpene, en kohla palimesen sapwtehno, iei ni irepen sapwo ni keilen oaroahro, oh kousoanla nan sahpwo.

10 Oh e pil kihdiong sounpei kei ni palieir, ni irepen wasa me re sapweniki, oh koasoanediong irail re en kauwada kelen mahwen kei pwe re en kak doarehla neirail sounpei kan oh neirail aramas akan sang arail imwintihti kan.

11 Oh met e lupukasangehr en Mehn Leimen ko ar wasa kehlail koaros ni palimesen sapwtehno, ei, oh pil ni palikapi, wiewiahda kehl kehlail ni irepen sahpw en Mehn Nihpai kan oh Mehn Leimen kan, nanpwungen sahpw en Saraemla oh sahpw en Nihpai, sang ni sehd palikapi, me peianla tepin pillap en Saidon—Mehn Nihpai kan sapwaneki sahpw en paliepeng koaros, iei, sahpw koaros me mi ni paliepeng en sahpwen Rahk, nin duwen nsenarail.

12 Eri Moronai, iangahki nah sounpei kan, me kin wie tohtohla rahn koaros pwehki ar kin koapworopworki silasil en doadoahk me e kin wia ong irail, re kin nantihong en lupukala kehl oh manaman en Mehn Leimen kan sang nan sapwarail kan, pwe re en dehr ahneki manaman pohn sapwarail kan.

13 Kedekedeo Mehn Nihpai kan tepda wiahda poahsoan en kahnimw ehu, oh re kahdaniki kahnimwo Moronai; oh e karanih sehd en palimese; oh e mi ni paliepeng limwahn irepen sapwen Mehn Leimen kan.

14 Oh re pil tepda wiahda poahsoan en kahnimw nanpwungen kahnimw en Moronai oh kahnimw en Aron, a met kadokepene sahpw en Aron oh Moronai; oh re kahdaniki kahnimwo, de sahpwo, Nihpaia.

15 Oh nan pahrohte irail tepida kauwada kahnimw tohto ni paliepeng, a mie ehu soangen kahnimw me re kahdaniki Lihai, me mi paliepeng en ni keilen oaroahro.

16 Oh met kaimwiseklahr pahr kerieisek.

17 Oh nan irair en paiamwahu pwukat me aramas en Nihpai kan tepkihda kerieisek ehun sounpar en mwehin sounkopwung kan ong aramas en Nihpai kan.

18 Oh irail pweida mehlel, oh irail kepwehpwehla mehlel; ei, oh re kaparaparala oh kehlailla nan sahpwo.

19 Oh met kitail kilang ia uwen kalahngan oh pwung en sapwellimen Kauno wiewia kan koaros, ong pweidahn sapwellime mahsen kan koaros ong aramas akan; ei, kitail kak kilang me sapwellime mahsen kan pweidahr ahnsou wet, me e ketin mahsanihong Lihai, ketihtihki:

20 Meid pai kowe oh noumw seri kan; oh re pahn ale kupwuramwahu, nin duwen ar pahn kapwaiada ei kosonned akan re pahn pweida nan sahpwo. Ahpw tamataman, nin duwen ar sohte pahn kapwaiada ei kosonned akan re pahn kalipilipsang mwohn silangin Kauno.

21 Oh kitail kilang me inou pwukat pweidahr rehn aramas en Nihpai kan; pwe e kin sang ni arail akamai kan oh arail pingiping kan, ei, arail kamaramas kan, oh arail pirap kan, arail pwongih dikedik en eni kan, arail tiahk en nenek kan, oh arail tiahk suwed kan, me kin wiawi nanpwungarail, me kin kahrehda ar mahwen kan oh ar kamwomwala kan.

22 Oh irail akan me loalopwoatohng kapwaiada kosonned akan en Kauno kin poadoandoarla ahnsou koaros, nindokon kiden riarail me suwed kan me kilelehdiong nan mour en lidu, de mehkihla kedlahs, de pwupwudi nan soupwoson, oh iangala Mehn Leimen kan.

23 Ahpw kilang sangete ni mwehin Nihpaio, sohte ehu mwehi kaperen nanpwungen aramas en Nihpai kan me duwehte mwehin Moronai, iei, ahnsou wet, ni kerieisek ehun sounpar en mwehin sounkopwung kan.

24 Kedekedeo ni kerieisek riaun sounpar en mwehin sounkopwung kan pil imwiseklahr ni popohl; ei, oh pil pahr kerieisek siluho.

25 Kedekedeo nan tepin kerieisek pahieu en sounpar en mwehin sounkopwung kan, e pahn mie popohl nanpwungen aramas en Nihpai kan ma sohte pingiping ehu me wiawihda nanpwungarail me pid duwen sahpw en Lihai, oh sahpw en Moriandon, me mihte limwahn irepen sahpw en Lihai; a wasa pwuko koaros mi ni keilen oaroahro.

26 Pwe kilang, aramas akan me sapwasapw nan sahpw en Moriandon kin kosekose me sapwarail ekis sahpw en Lihai; eri irail ahpw tepida nanpwungsuwedpene, lao aramas en Moriandon kan ale neirail tehtehn mahwen kan pwe re en peiong riarail ko, oh re koasoanehdi me re pahn kemehkinirailla kedlahs.

27 Ahpw kilang, aramas me sapwasapw nan sahpw en Lihai tangdaoui tangalahng ni kahnimpwal en Moronai, oh peki sawas reh; pwe kilang sohte ar sapwung.

28 Kedekedeo ahnsou me aramas en Moriandon, me mi pahn kaweid en ohl emen me kahdaneki Moriandon, esehda me aramas en Lihai kan sopolahng ni kahnimpwal en Moronai, re uhdahn masepwehkada mehlel pwe nein Moronai sounpei kan de kohdo oh kamwomwirailla.

29 Eri, Moriandon kamwakidada nan kapehdirail kan me re anahne tangdaoui tangalahng nan sahpw en paliepeng, me direki lapalahn leh kei, oh sapwenikihla sahpw me mi paliepeng.

30 Oh kilang, re pahn kapwaiadahr ar koasoandio, (me pahn kansensuwed mehlel) ahpw kilang, pwehki Moriandon soangen ohl me kin ahng kehlail, kahrehda e lingeringerda pahn emen nah lidu ko, oh e ahpw keme oh kaloke.

31 Kedekedeo liduo ahpw tangasang, oh kohdo ni kahnimpwal en Moronai, oh ndaiong Moronai soahng koaros duwen dahme wiawi, oh pil duwen arail koasoandi en tangdaoui kohla nan sahpw en paliepeng.

32 Met kilang, aramas akan me mihmi nan sahpw en Rahk, de pwehki Moronai, perki re de pahn rong ehn Moriandon koasoi kan oh miniminiong nah aramas akan, oh met pahn elehiong eh pahn sapwenkihla sahpw oko, me pahn kahrehda poahsoan en kahpwal laud ong aramas en Nihpai kan, ei, soangen kahpwal me pahn kakete kalowehdi ar mour saledek.

33 Eri Moronai kadarala karis en sounpei ehu, iangahki arail dipwisou kan, pwe re en kak koanoahdi aramas en Moriandon kan, pwe re en kauhdi ar pahn tangalahng nan sahpw en paliepeng.

34 Kedekedeo re sohte koanoairaildi lao re lel ni irepen sahpw en Tehnla; oh re koanoairaildi wasao, ni sahpw tehtiko me peian sehdo kohdahla nan sahpw en paliepeng, ei, kohla nanpwungen sehd en palikapi oh palimese.

35 Kedekedeo sounpei kan me Moronai kadarala, me mi pahn kaweid en ohl me adaneki Dienkom, tuhwongidi nein Moriandon aramas akan; oh pwehki keptakai en nein Morianton aramas akan, (pwehki ar audaudiki en Moriandon kaweid suwed oh koasoi likamw kan) mahwen ahpw tepida nanpwungarail, oh Dienkom kemehla Moriandon oh kalowehdi nah sounpei kan, oh salihiraildi, oh pwurala ni kahnimpwal en Moronai. Oh met kaimwiseklahr kerieisek pahieun sounpar en mwehin sounkopwung kan ong aramas en Nihpai kan.

36 Oh aramas en Moriandon kan kopwurupwurdohr. Oh sang ni arail inoukidahr me re pahn kolokol meleilei irail kopwurupwurlahng nan sapwen Moriandon, oh miniminpene wiawi nanpwungarail oh aramas en Lihai kan; oh irail pil pwurala nan sapwarail kan.

37 Kedekedeo nan pahrohte aramas en Nihpai kan pwurehng ahneki meleilei, Nihpaia, me wie sounkopwung lapalap kerimen, kapilsalehdala, ni eh kapwaiadahr pwukoahn sounkopwungo ni pwung mehlel mwohn Koht.

38 Ahpw, e soikala alehda pwukoahn koledi poadopoad kan oh soahng kan me Alma oh eh pahpa ko kin wiahki me keieu sarawi; eri Alma kihong rehn nah pwutak, Ilemen.

39 Kilang, kedekedeo nein Nihpaia pwutak idihada en uhd wiliandi eh pahpao, wiahla sounkopwungo; ei, e pilipildahr en wia sounkopwung lapalap oh kepinahn aramas akan, a sang ni inou oh tiahk sarawi me e pahn wia kadeik pwung, oh kolokol meleilei oh saledek en aramas akan, oh mweidohng irail ar kapai sarawi en kaudokiong Kauno arail Koht, ei, en utungada oh kapwaiada doadoahk en Koht erein eh mwehio, oh en kapwungala aramas suwed kan nin duwen diparail kan.

40 Met kilang, mware iei Paoran. Oh Paoran uhd wiliandi eh pahpao, oh tapihada eh mwehi en kakaun aramas en Nihpai kan, ni imwilahn pahr karieisek pahieu.