1 Eri kedekedeo Mehn Leimen kan me kohla mahweniong Mehn Nihpai kan ahpw pwurala nan sahpw en Nihpai pwehki arail apwaliki kemeirailla, oh me sohte katepe arail songosong en kamwomwirailla.

2 Kedekedeo pwehki Mehn Amelekai kan ar pehrdi, irail lingeringerda mehlel. Oh ni ahnsou me re kilang me irail sohte kak dupukohng Mehn Nihpai kan, re tepida kamwakidada aramas akan re en lingeringerda oh uhwohng riarail akan, aramas en Andai-Nihpai-Lihai kan; eri irail pwurehng tepida kamwomwirailla.

3 Eri, aramas pwukat kahng peiong irail, oh irail kin mweidala pein irail en kamakamala nin duwen ineng en arail imwintihti kan.

4 Eri, ni ahnsou me Amon oh rie kan kilangehr kamwomwalahn aramas en Andai-Nihpai-Lihai akan me irail poakepoake mehlel, oh aramas en Andai-Nihpai-Lihai kan poakohng mehlel irail—pwe re kin kesempwalkin irail duwehte tohnleng kei me pekederdosang rehn Koht pwe en doareirailsang kamwomwala soutuk—eri, ni ahnsou me Amon oh rie kan kilangadahr doadoahk en lapalahn kamwomwala wet, irail poakepoakeirailda, oh irail ndaiong arail nanmwarkio:

5 Kitail kapokonepene sapwellime Kauno aramas pwukat, oh kitail kohdihla nan sahpw en Saraemla rehn riatail Mehn Nihpai kan, oh sopohsang atail imwintihtih kan, pwe kitail en dehr kamakamala.

6 A nanmwarkio ahpw mahsanihong irail: Kilang, Mehn Nihpai kan pahn kemeikitala, pwehki aht kamaramas tohto oh dihp me se wiahiong irail.

7 Eri Amon patowan: I pahn kohla oh kalelapak rehn Kauno, oh ma e pahn mahsaniong kitail, kohdihla rehn riatailko, komwi pahn ketla?

8 Nanmwarkio ahpw mahsaniong: Ei, ma Kauno ketin mahsanih se en kohla, se pahn iang kohdihla rehn riatail kan, oh se pahn wie liduhla pahrail lao se kapwungala aht kamaramas tohto oh dihp me se wiahiong irail.

9 Amon sapeng, patowanohng: E uhwong en riatail ko arail kosonned, me semeio koasonehdi, me irail pahn kin kaliduwih aramas nanpwungarail; eri kitail kohdihla oh liki kalahngan en riatail akan.

10 Nahnmwariko ahpw mahsanihong: patohwan kalelapak rehn Kauno, oh ma e ketin mahsanihong kitail en kohla, kitail pahn kohla; ma soh eri se pahn mehla nan sahpwet.

11 Kedekedeo Amon ahpw kohla oh patohwan kalelapak rehn Kauno, oh Kauno ketin mahsanihong ih:

12 Kahluwa sang aramas pwukat nan sahpwet, pwe irail en dehr mehla; pwe Sehdan koledier mohngiong en Mehn Amelek kan, me kin koamwoarongehda Mehn Leimen kan ren lingeringer pahn riarail akan oh kemeirailla; eri kohkohlahsang nan sahpwet; oh meid pahi aramas pwukat nan dih wet, pwe I pahn doareirailla.

13 Kedekedeo Amon kohla oh patowanohng nanmwarkio mahsen koaros me Kauno ketin mahsanihong.

14 Eri irail kapokonepene neirail aramas akan koaros, ei, sapwellimen Kauno aramas koaros, oh kihpene neirail pelin sihpw oh kou kan koaros, oh mweselsang nan sahpwo kohlahng nan sapwtehno wasa me irepeseng sahpw en Nihpai sang sahpw en Saraemla, oh kohdo karanih irepen sahpwo.

15 Kedekedeo Amon ndaiong irail: Kilang, ngehi oh riei kan pahn kohla nan sahpw en Saraemla, oh kumwail pahn awih kiht wasaht lao se pwurodo; oh se pahn kasawiada audepen mohngiong en riatail kan, ma re pahn kak mweidohng kumwail en kohdo nan sahpwet.

16 Kedekedeo, ni ahnsou me Amon wie kohkohla nan sahpwo, ih oh rie ko ahpw tuhwongidi Alma, wasa me koasoiepe wiawiher; oh kilang, irail peren mehlel ni ar tuhpene.

17 Eri Amon direkilahr peren laud mehlel; iei, eh audaudkidahr peren pwehki eh Koht lao e solahr angi; ih ahpw pwupwukihdi nan pwehlo.

18 Eri, kaidehn ih peren kowahlap met? Kilang, soahngen peren wet pahn kohwohngete irail akan me kin rapahki peren sang ni ar men koluhla mehlel oh opampap.

19 A met en Alma peren ni eh tuhwong rie kan inenen laud mehlel, oh pil en Aron peren, Omner, oh Imnai; ahpw kilang ar peren sohte kihsang angirail.

20 Eri kedekedeo, Alma kahrehla rie ko ni imwe nan sahpw en Saraemla; Oh irail kohla oh patowanohng sounkopwung lapalapo soahng koaros me wiawihong irail nan sahpw en Nihpai, rehn riarail akan, Mehn Leimen kan.

21 Kedekedeo sounkopwung lapalapo ahpw kadarpeseng kalohk ehu nan sahpwo pwon, pwe en esehda en aramas akan ar pilipil pid duwen arail pahn mweidelong riarail akan, me wia aramas en Andai-Nihpai-Lihai.

22 Kedekedeo, aramas akan ahpw ehukihda ar koasoandi, me dene: Kilang, se pahn mweidala sahpw en Terson, me mih palimese karanih sehdo, me kadokepene sahpw en Rahk, me mih palieir en sahpw en Rahk; oh sahpw en Terson iei sahpw me se pahn kihong riat akan pwe irail en sapwankihla.

23 Eri, met se pahn kadarahla nait sounpei kan nanpwungen sahpw en Terson oh sahpw en Nihpai, pwe se en kak sile riatail akan nan sahpw en Terson; oh met se pahn wiahiong riatail kan, pwehki arail salohki ale neirail dipwisou en mahwen oh pelian riarail akan pwe irail de dipada; oh re salohda kowahlap pwehki kamedek en koluhla mehlel me re wiahier, pwehki arail kamaramas tohto oh arail mwekid suwed mwuledek.

24 Eri kilang, ih met me se pahn wiahiong riat kan, pwe irail en kak sapwenkihla sahpw en Terson; oh se pahn sile irail sang arail imwintihti kan, ni arail pahn kihdo ekei arail dipwisou kan pwe en kak sewese kiht apwalih nait sounpei kan.

25 Eri, kedekedeo me ni ahnsou me Amon rongehr met, e ahpw pwurala rehn aramas en Andai-Nihpai-Lihai ko, oh Alma pil iang ih kohla nan sapwtehno, wasa me irail kauwada ie arail impwal akan, oh kasalehiong irail mepwukat koaros. Oh Alma pil koasoiaiong irail duwen eh weliakapwalao, ni eh iang Amon, Aron, oh riarail kan.

26 Kedekedeo, met ahpw kahrehda peren laud rehrail. Oh irail kohdihla nan sahpw en Terson, oh sapwankihla sahpw en Terson; oh Mehn Nihpai kan kin kahdanikin irail aramas en Amon; eri irail kin sansalki ahdwet sang ahnsouo kohla.

27 Eri, irail ahpw patehng aramas en Nihpai kan, oh pil iang wadawadohng aramas akan me wia tohn mwomwohdiso en Koht. Oh irail pil kin sansalki arail kin loalonohng Koht, oh pil ong aramas akan; pwe irail kin mehlel ni unsek oh inen nan soahng koaros; oh irail tengeteng nan arail pwoson Krais, lao lel ni imwi.

28 Oh irail kin wiahki kakerehdien ntahn riarail akan mehkot me irail kailongki mehlel; oh sohte me kak itonehng irail en mahwenong riarail akan; oh irail sohte kin masak mehla, pwehki arail koapworopworki oh marainki Krais oh iasadao; eri, ong irail mehla sohte wia mehkot pwehki Krais powehdier.

29 Eri, irail kin lokolongki soangen mehla me keieu kamedek oh kalokolok me kin wiawi sang riarail akan, mwohn arail kin ale neirail kedlahs de naipakos oh peleiraildi.

30 Oh met irail wia aramas loalopwoat oh kesempwal kei, iei sapwellimen Kauno aramas keniken mehlel kei.