1 Oh met kedekedeo Alma pwurasang nan sahpw en Kidion, mwurin eh padahkihongehr aramas en Kidion kan soahng tohto me sohte kak ntingdi, oh e koasonedier koasondi en nan mwomwohdiso, nin duwen eh wiadahr nan sahpw en Saraemla, ei, e ahpw pwurala nan pein imwe nan Saraemla pwe en komoal pwehki doadoahk me e wiahier.

2 Oh met kaimwsekalahr pahr keduwau en mwehi en sounkopwung kan ong aramas en Nihpai kan.

3 Kedekedeo ni tepidahn pahr keisek en mwehi en sounkopwung kan ong aramas en Nihpai kan, Alma mweselsang mwo oh seiloakala nan sahpw en Mihlek, pali kapi en pilap en Saidon, me mih pali kapi karanihte irepen sapwtehno.

4 E ahpw tepida padahkih aramas akan nan sahpw en Mihlek nin duwen koasoandi sarawi en Koht, me e malipilipiong; oh e tepida padahkih aramas akan nan sahpw en Mihlek pwon.

5 Kedekedeo aramas akan ahpw kohdo reh sang ni irepen sahpwo wasa me salahng sapwtehno. Oh irail tohn wasa ko ahpw papidaislahr nan sahpwo;

6 Eri ni ahnsou me e kaimwsekala ah doadoahk nan Mihlek e ahpw mweselsang, oh seilongki erein rahn siluh ni paliepeng en sahpw en Mihlek; oh e kohdo nan kahnihmw ehu me kahdaniki Amonaia.

7 Met e wia tiahk en aramas en Nihpai kan en kin kahdaniki eden sapwerail akan, oh arail kahnihmw kan, oh arail kousapw akan, ei, arail kousapw tikitik koaros, eden aramas me tepin sapwasapw wasahu; oh iei met me wiawihong sahpw en Amonaia.

8 Kedekedeo ahnsou me Alma kohdo nan kahnihmw en Amonaia e ahpw tepida kalohngki mahsen en Koht ong irail.

9 Met Sehdan koledi kehlail mohngiong en aramas en nan kahnihmw en Amonaia; eri irail sohte men rong mahsen akan en Alma.

10 Ahpw Alma doadoahk laud ni palingeni, nannantihong kapakap kehlail ong Koht, pwe en ketin ketikihong sapwellime Ngehno rehn aramas akan me mih nan kahnihmwo; pwe en pil kak mweidehng en papidaisirailla sang ni ar koluhla.

11 Ahpw, irail kakeluwakala mohngiongarail kan, oh ndaiong ih: Kilang, se ese me kowe Alma; oh se ese me ke wia samworo lapalap nan mwomwohdiso me ke wiahda wasa tohto nan sahpw akan, nin duwen amwail tiahk; oh se sohte iang ahmw mwomwohdiso, oh se sohte kamehlele tiahk mwahl akan.

12 Oh met se ese me pwehki aht sohte iang ahmw mowomwohdiso se ese me sohte ahmw manaman reht; oh ke kihongehr sehr en sounkopwungo rehn Nihpaia; eri ke sohte wia aht sounkopwung.

13 Eri ni ahnsou me aramas akan ndahier met, oh pelianda ah koasoai koaros, oh kauwe, oh kandipih, oh wiahda en pakasarasang nan arail kahnihmwo, e mweselda oh kohkohlahng kahnihmw me kahdaniki Aron.

14 Kedekedeo ni ahnsou me e wie kohkohla, nan eh toutoukilahr ah pahtou, seiseiloak nan kahpwal oh lokolok ni palingehn, pwehki wiewia suwed en aramas me mih nan kahnihmw en Amonaia, kedekedeo ni ahnsou me Alma toutoukilahr eh pahtou, kilang tohnleng en Kauno men pwarohng, mahsanih:

15 Meid pai kowe, Alma; eri, sarada oh perenda, pwe mie kahrepe lap me ke pahn pereniki; pwe ke kin loaloapwoatieng kapwaiada sapwellimen Koht kosonned akan sangete ahnsou me ke tepin alehdi rohng sang ih. Kilang, ngehi me wahdo rohngo rehm.

16 Oh kilang, I pekederido pwe I en ndaionguhk ke en pwurowei nan kahnihmw en Amonaia, oh pwurehng kalohk ong aramas en kahnihmwo; ei, kalohk ong irail. Ei, ndaiong irail, ma re sohte pahn koluhla Kauno Koht pahn kamwomwirailla.

17 Pwe kilang, irail wie koaskoasoneahnsou wet me irail pahn kawehla saledek en noumwail aramas akan, (pwe Kauno me ketin mahsanih) met kin uhwong koasondi kan, oh kopwung kan, oh kosonned akan me e ketikihongehr sapwellime aramas akan.

18 Met kedekedeo mwurin Alma eh alehdier rohngo sang tohnleng en Kauno e ahpw mwadangete pwurala nan sahpw en Amonaia. E ahpw pidelong nan kahnihmwo ni ehu ahl, ei, ni ahl me mih pali eir en kahnihmw en Amonaia.

19 Oh ni ahnsou me e pidelong nan kahnihmwo e udahn men mwonge, ih ahpw ndaiong ohl emen: Komw kak sowesehki sapwellimen Koht ladu karakarahket ekis kisin tungoal?

20 Ohlo ahpw patohwanohng ih: Ngehi emen Mehn Nihpai, oh I ese me komwi sapwellimen Koht soukohp sarawi, pwe komwi ohl me tohnlengo mahsanih nan auramano: Ke pahn kasamwoh. Eri, iang ie kohla nan imweio oh I pahn patohwanehng komwi kenei mwonge kan; oh I ese me komw pahn kapaiehda oh imweio.

21 Kedekedeo ohlo kasamwohlong ih nan imwehu; oh ohlo adaniki Amulek; e ahpw patohwandohng Alma pilawa oh uduk pwe en tungoale.

22 Kedekedeo Alma ahpw tungoalehier pilawa oh medila; oh e ahpw kapaiada Amulek oh imwehu, oh e kaping kalahngankihong Koht.

23 Oh mwurin eh mwongehier oh medila e ahpw ndaiong Amulek: Ngehi Alma, oh ngehi me wia samworo lapalap nan mwomwohdiso en Koht nan sahpw akan.

24 Oh kilang, I malipilipiong I en kalohngki mahsen en Koht rehn aramas pwukat koaros, nin duwen kaudiahl oh ngehn en kokohp; oh I kohdo nan sahpw wet oh irail sohte kasamwo ie, ahpw re kausiehla oh ngehi eri pahn sohpeisangehr sahpw wet kohkohlahte.

25 Ahpw kilang, I alehdi rohng me I pahn anahne pwurehng pwurodo oh kokohpehng aramas pwukat, ei, oh kadehdehiong irail duwen arail wiewia suwed kan.

26 Oh met, Amulek, pwehki ahmw kamwenge ie oh kasamwo ie, meid pai kowe; pwe I men mwongehda, pwehki ei kaisihsolki rahn tohto kei.

27 Oh Alma mihmi erein rahn kei rehn Amulek mwohn e tepida kalohk ong aramas akan.

28 Kedekedeo aramas akan ahpw kalaudehla arail wiewia suwed kan.

29 Oh mahsen ahpw kohdohng Alma, ketihtihki: Kohwei; oh pil ndaiong nei ladu Amulek, kohwei oh kokohpikihong aramas pwukat, ndinda—Kumwail koluhla, pwe Kauno me ketin mahsanih, ma kumwail sohte pahn koluhla I pahn pwarek aramas pwukat nan ei engieng; ei, oh I sohte pahn wekid ei engieng.

30 Oh Alma oh pil Amulek ahpw kohwei rehn aramas akan, kalkalohngkihong irail mahsen akan en Koht; oh Ngehn Sarawi ketin ieiang ira.

31 Oh manaman kohieng ira, kahrehda ira sohte kak katengetengidi nan wasahn selidi me mih pahn pwehl; oh pil sohte aramas kak keirahla; ahpw ira sohte kin doadoahngki ara manaman lao lel ahnsou me re kin selidi oh lekideklong nan imweteng. Eri, met e wiawi pwe Kauno en kak kasalehda sapwellime manaman rehra.

32 Kedekedeo ira ahpw kohwei oh tepida kalohk oh kokohp ong aramas akan, nin duwen ngehno oh manaman me Kauno ketikihong ira.