1 Met kedekedeo ahnsou me Moronai alehdi kisin likou wet e udahn lingeringerda, pwehki e ese me Amoron wehwehki unsek eh mwersuwed; ei, e ese me Amoron wehwehki me e sohte wia koasondi pwung ehu me re kohkihdo mahwin ong aramas en Nihpai kan.

2 Oh e ahpw nda: Kilang, I sohte pahn kaweliali me selidi ong Amoron ihte ma e pahn kapweiekwei ah koasondi, nin duwen ei koasoia nan nei kisin likouo; pwe I sohte pahn mweidehng en ahneki manaman laudsang dahme e ahnekier met.

3 Kilang, I ese wasa me Mehn Leimen kan kin sinsile nei aramas me re saliedi kan; oh pwehki Amoron sohte men kapwaiodo nin duwen nei kisin likouo, kilang, I pahn wiahiong ih nin duwen ei koasoi kan; ei, I pahn rapahkihong irail mehla lao re pahn peki popohl.

4 Oh met kedekedeo ahnsou me Moronai ndahier koasoi pwukat, e ahpw ndaiong iraile en rapahki nan pwungen nah ohl akan, ma e pahn kak diar emen aramas me wia kadaudoken Leimen rehrail.

5 Kedekedeo re ahpw kilangada emen, me kahdaniki Leimen; oh e wia emen ladu en nanmwarkio me Amelekaia kemehlahu.

6 Met Moronai ahpw ndaiong Leimen oh ekei nah ohl akan re en kohla rehn sounpei kan me sinsile Mehn Nihpai kan.

7 Met Mehn Nihpai kan silasildi nan kahnihmw en Kid; eri Moronai kihong Leimen oh kapatahieng ekei nah ohl akan re en iangih.

8 Oh ahnsou me e soutikpene Leimen kohla rehn sounsilasil kan me kin sinsile Mehn Nihpai kan, oh kilang, re kilangada eh kohkohdo oh re ahpw eker ih; ahpw e ndaiong irail: Kumwail dehr masak; kilang, ngehi emen Mehn Leimen. Kilang se tangasang Mehn Nihpai kan, oh re memeir; oh kilang se tangahkihsang nimarail wain kan oh wahdo.

9 Met ahnsou me Mehn Leimen kan rongadahr koasoi pwukat re perenda nan ar kasamwo; oh re ndaiong ih: Kihiong kiht wain en, pwe se kak nim; se pereniki ahmw wahdo wain pwe kilang se pwangadahr.

10 Ahpw Leimen nda ong irail: Kitail koledi nimatail wain ka lao kitail pahn kohlahng mahwiniong Mehn Nihpai kan. Ahpw koasoi wet kahrehda arail inangihda laud re en nim waino;

11 Pwe, re nda: Se pwangada, eri mweidehng kiht sen nim wainen, oh mwurin ahnsou kis a kitail pahn alehdi sawasepatail kan, me pahn kakehlakahla kitail en kohlahng Mehn Nihpai kan.

12 Oh Leimen ahpw ndaiong irail: Kumwail kak wia nin duwen nsenamwail kan.

13 Kedekedeo re ahpw ale waino ni saledek; oh nemeneme udahn iou ong irail, eri re ale laud; oh e udahn kehlail, pwehki ar kaunopada en kehlail.

14 Kedekedeo irail ahpw niminim oh wie pereperen, oh mwurin ahnsou kis re ahpw sakaula.

15 Oh met ahnsou me Leimen oh ienge ohl akan kilangehr me irail koaros sakaulahr, oh re meirkeliklahr, re ahpw pwurala rehn Moronai oh ndaiong ih soahng koaros me wiawiher.

16 Oh met iei duwen koasondi en Moronai. Oh Moronai kaunopada nah ohl akan iangahki neirail dipwisou en mahwin kan; oh e ahpw kohla nan kahnimw en Kid, ni ahnsou me Mehn Leimen kan wie memeirkelik oh sakaula, oh kihong dipwisou en mahwin me sensel kan, lao irail koaros koledier dipwisou en mahwin;

17 Iei, ong neirail lih akan, oh neirail seri kan koaros, koaros irail me kak doadoahngki dipwisou en mahwin, ahnsou me Moronai kihongehr me sensel kan dipwisou en mahwin; oh mepwukat koaros wiawi ni meleilei mehlel.

18 Ahpw ma re kapirada Mehn Leimen kan, kilang irail sakau oh Mehn Nihpai kan kakete kemeirailla.

19 Ahpw kilang, met kaidehn ihme Moronai inangih en wiawi; e sohte kin pereniki kamaramas de kakerehdi nta, ahpw pereniki kamaurala aramas sang kamwomwala; oh kahrepe wet pwe en dehr wiahiong pein ih mwekid sapwung, kahrehda e sohte men peiong Mehn Leimen kan oh kemeirailla nan arail sakaula.

20 Ahpw e kapwaiada eh inengo; pwe e kihongehr dipwisou en mahwin ong mehn Nihpai me selidi kan me mihmi nan kehl en kahnihmwo, oh kihong irail manaman en ahnekihla soahng kan me mihmi nan kehlo.

21 Oh e ahpw wiahiong ohl akan me iang ih re en ekis keisang irail, oh kapilpene sounpei en Mehn Leimen kan.

22 Kilang met e wiawi nihpwongo, kahrehda ahnsou me Mehn Leimen kan pwourda nimensengo re kilangada me Mehn Nihapi kan kapilirailpenehr, oh me neirail me selidi kan kolokolehr dipwisou en mahwin loale.

23 Oh met re kilangadahr me re milahr pahn manaman en Mehn Nihpai kan; oh nan soangen irair pwukat re pehm me e sohte konehng re en peiong Mehn Nihpai kan; eri arail kaun lapalap en sounpei kan ruwese ren ale neirail dipwisou en mahwin kan, oh re ahpw wahdo oh kesehdi ni nehn Mehn Nihpai kan, oh pekipeki mahk.

24 Kilang, met iei ineng me Moronai ahneki. E alehdi me selidi sang mahwin kan, oh kalowehdi kahnihmwo, oh kahrehda me selidi koaros pahn saledekla, me wia Mehn Nihpai kan; oh re patehng nein Moronai sounpei kan, oh kakehlakahla nah sounpei ko.

25 Kedekedeo e ahpw kahrehda Mehn Leimen kan, me e salidier kan, me re pahn tepida wia doadoahk en kakehlakahla wasahn silasil kan me kapilpene kahnihmw en Kid.

26 Kedekedeo ahnsou me e kakehlakahla kahnihmw en Kid, nin duwen eh ineng kan, e ahpw koasonehdi me selidi ko pahn wisikla nan kahnimw en Rahk; oh e pil silehkihdi kahnihmwo pwihn en sounpei kehlail kowahlap.

27 Kedekedeo mehndahte Mehn Leimen kan ar kin songosong en keteweirail, ahpw re kin kolokol oh sinsile me lohdi kaoros me re kin koledi, oh sinsilehte wasa koaros me irail pwurehng kalowehdi oh paiamwahukihda.

28 Kedekedeo Mehn Nihpai kan pwurehng tepida pweida, oh pwurehng alehdi arail pwuhng kan oh arail saledek en pai kan.

29 Pak tohto Mehn Leimen kan kin song en kapilirailpene nihpwong, ahpw ahnsou koaros me re kin song tohto irail kin lohdi.

30 Oh pak tohto re kin song en kihong nimarail wain kan rehn Mehn Nihpai kan, pwe re en kak kaweirailla sang ni poisin de sakaula.

31 Ahpw kilang, Mehn Nihpai kan sohte kin pwand en tamataman Kauno arail Koht nan arail ahnsou apwal wet. Re sohte kak pitida nan arail lidip kan; ei, re sohte kin alehda arail wain kan, ihte ma re kin tepte kihong mahs ekei Mehn Leimen me senselko.

32 Oh re kin kanaiehng pwe sohte poisin pahn kohieng rehrail; pwe ma arail wain kan pahn poisinihdi emen Mehn Leimen e pahn pil poisinihdi Mehn Nihpai; oh ih mwomwen arail kin song arail sakau kan koaros.

33 Oh met kedekedeo e konehng Moronai en kaukaunop en mahwiniong kahnihmw en Moriandon; pwe kilang, Mehn Leimen kan, sang ni arail doadoahk, re kakehlakalahr kahnihmw en Moriandon lao e wiahla ehu wasa kehlail.

34 Oh re wie wahwahdo pwihn en sounpei kapw nan kahnihmwo, oh pil iangahki arail dipwisou en sawas akan.

35 Oh met kaimwsekalahr pahr rieisek duwau en mwehin sounkopwung kan ong aramas en Nihpai kan.