1 Eri kilang, kedekedeo Mehn Leimen ko lingeringerkihda kowahlap pwehki arail kemelahr riarail kan; irail eri kahukihla me re pahn dupukiong Mehn Nihpai kan; eri irail uhdihsang arail song en kemehla aramas en Andai-Nihpai-Lihai kan ahnsouo.

2 Ahpw irail kahre neirail sounpei kan oh kohla ni irepen sahpw en Saraemla, oh mahweniong aramas akan me mih nan sahpw en Amonaia oh kamwomwirailla.

3 Oh mwurin mwo, irail wia mahwen tohto ong Mehn Nihpai kan, iei me irail pekeusla oh kamakamala.

4 Oh nanpwungen Mehn Leimen kan me kamakamalahr akan kereniong irail koaros me wia kadaudok en Amulon oh rie kan, me wia samworo en Noha kan, oh irail kamakamala pahn Mehn Nihpai kan;

5 A me luhwehdi kan, uhd tang kohla palimese en sapwtehno, mwurin arail mwersuwed kihsang Mehn Leiman kan manaman oh mweimwei en kaun, irail kemehkihla Mehn Leimen tohto kisiniei pwehki dahme irail kamehlele—

6 Pwe me tohto irail, mwurin arail lokolok laud oh ahneki kahpwal tohto, irail tepida tamanda mahsen en Aron oh rie kan duwen dahme irail kalohkihong irail nan sahpwarailo; irail eri tepida kelikamwe tiahk en arail pahpa kahlap ako, oh tepda kamehlele Kauno, oh me e ketikihong Mehn Nihpai kan manaman laud; oh tohto me wiliakapwala nan sapwtehno.

7 Kedekedeo, luwehdien kaun akan en keinek en seri en Amulon, karehda arail kamakamalah, mehlel, irail koaros me kamehlele mepwukat.

8 Eri kamakamala wet en irail akan me pwoson kahrehkiong me tohto lingeringerkihda; oh tepida mie lapalahn pingiping nan sapwtehno; oh Mehn Leimen kan tepida pwakihedi kadaudok en Amulon kan oh rie ko oh tepida kemeirailla; oh irail tangdoaui kohla ni palimese en sapwtehno.

9 Oh kilang Mehn Leimen kan kin raparapahkin irailte leledo rahn wet. Karehda mahsen en Apinadai kan pweidahier, me e ketin mahsanihki duwen kadaudok en samworo ko me kahrehda eh mehkihla kisiniei.

10 Pwe e mahsanihong irail: Dahme kumwail pahn wiahiong ie e pahn wia kasalepen soahng kan me pahn kohdo.

11 Oh met Apinadai me tepin kamakamkihla kisiniei pwehki eh kamehlele Koht; met iei wehwehn dahme e mahsanih, me aramas tohto pahn mehkihla kisiniei, duwehte mwomwen dahme e lokolongkier.

12 Oh e mahsanihong samworo en Noha ko me kadaudokerail kan pahn wiahiong aramas tohto en mehkihla kisiniei, duwehte eh wiawihiong ih, oh me irail pahn mwerpeseng oh kamakamala, duwehte sihpw men me sohte silepe oh mahn lawalo kan pwakihala oh kemehla; oh met kilang, mahsen pwukat pweida mehlel, pwe Mehn Leimen kan pwakihrailpeseng, oh raparapahkin irail, oh kemeirailla.

13 Kedekedeo ahnsou me Mehn Leimen kan kilang me irail sohte kak powehdi Mehn Nihpai kan irail pwurala nan pein sapwarail; oh tohto me kohdo oh kousoanla nan sahpw en Ismael oh sahpw en Nihpai, oh patehngala aramas akan en Koht, me Mehn Andai-Nihpai-Lihai kan.

14 Oh irail pil sarepidi neirail dipwisou en mahwen kan, duwehte riarail akan ar wiahier, oh irail tepida wia aramas mour pwung; oh irail weweidki koasoandi en Kauno, oh kin nantihong kapwaiada sapwellime kosonned akan oh sapwellime koasoandi kan.

15 Ei, oh irail kin kapwaiadahte kosonned en Moseso; pwe e konehng irail pahn kapwaiada kosonned en Moseso nan ahsouo, pwe kosonnedo saikinte unsekla. Ahpw mehndahte kosonned en Moseso, irail kin kasikasik ketidohn Krais, pwehki irail medewe me kosonned en Moseso wia kilel en kasalepen eh pahn ketido, oh re kamehlele me re uhdahn anahne kapwaiada doadoahk sansal en kosonnedo lao lel ahnsou me e pahn ketin pwarohng irail.

16 Eri irail sohte kamehlele me komour pahn pwilisang ni kosonned en Moseso; ahpw irail kamehlele me kosonned en Moseso kin sewese kakehlaka arail pwoson Krais; oh met irail ahneki koapworopwor sang arail pwoson, ong komour soutuk, oh koapworopworkihte ngehn en kokohp, me kin kasalehda soahng kan me pahn kohdo.

17 Oh met kilang, Amon, oh Aron, oh Omner, oh Imnai, oh riarail akan perenda kowahlap, pwehki ar doadoahk pweida rehn Mehn Leimen kan, pwehki irail kilang me Kauno ketin sapeng irail nin duwen arail kapakap kan, oh me e ketin kamehlelehiong irail sapwellime mahsen nan mehkoaros ni pisetik.