1 Oh met kedekedeo ni ahnsou me Alma wie kohkohsang nan sahpw en Kidion kolahng palieir, kohkolahng sahpw en Mandai, kilang, e ahpw pwuriamweiki, e tuhwongdi nein Mosaia pwutangko arail kohkohdohng nan sahpw en Saraemla.

2 Nein Mosaia pwutangko me iang Alma ahnsou me tohnlengo tepin pwarohngo; eri Alma uhdahn perenkihda kowahlap eh kilangda rie ko; oh me pil kalaudehla eh peren, pwehki irail wie loaloapwoatete ong Kauno; ei, oh irail kehlailla nan arail marainki mehlelo; pwe irail wia ohl marain kei oh irail kin loalopwoatohng onopiki pwuhk sarawi kan, pwe irail en kak esehla mahsen en Koht.

3 Ahpw kaidehn ihte met akan; irail kin poaden kapakap, oh kaisihsol; eri irail ahneki ngehn en kokohp, oh ngehn en kaudiahl, oh ahnsou me re kin padahk, irail kin padahk sang ni manaman oh mweimwei en Koht.

4 Oh irail padapadahngkiher mahsen en Koht erein sounpar eisek pahieu rehn Mehn Leimen kan, oh arail doadoahk pweida nan ar wahdohng aramas tohto en marainkihda me mehlelo; ei, sang ni manaman en arail koasoi kan aramas tohto kohkihdo ni pei sarawi en Koht, pwe re en kapakapiong ni mware oh wehkada diparail akan mwohn sihlangi.

5 A iet irair akan me lelohng irail nan arail seiloak kan, pwe irail lelohng kahpwal tohto; irail lokolok laud, ni paliwar oh madamadau koaros, me duwehte duhpek, men nimpil oh pwangada, oh pil doadoahk laud ni palingehn.

6 Eri iet mwomwen arail seiloako: Mwurin arail kohkohsang semerailo, Mosaia, ni tepin pahr en mwehin sounkopwung kan; mwurin arail kasohwehier alehda manaman en kaunda wehio me samarail kupwurki ketikihong irail, oh iei me pil aramas akan mwahuki;

7 Re ahpw mweseldahsang nan sahpw en Saraemla, oh wahda neirail kedlahs kan, oh neirail ketieu kan, oh neirail kesik ketieu kan, neirail arep kan, oh neirail pahi kan; oh re wia met pwe re en kak saikedi kenerail mwonge ni arail pahn mihmiseli nan sapwtehno.

8 Oh irail ahpw mweselahng nan sapwtehno iangahki irail akan me re piladahr, en kohdahla nan sahpw en Nihpai, pwe irail en padahki mahsen en Koht ong Mehn Leimen kan.

9 Kedekedeo irail seiseiloangki erein rahn kei nan sapwtehno, oh irail kin poaden kaisihsol oh kapakap pwe Kauno en mweidohng irail ekis sapwellime Ngehno en ketin iang irail, oh ketiket rehrail, pwe irail en kak wia wiliepen nin limen Koht ong sewese, ma e kak, rierail Mehn Leimen kan, en marainkihda me mehlelo, oh marainkihda kasuwedpen tiahk en arail pahpa kahlap ako, me sohte pwung.

10 Kedekedeo Kauno ahpw pwarohng irail ni pali Ngene, oh mahsanihong irail: Kumwail nsenemwahula. Irail eri nsenemwahula.

11 Oh Kauno ahpw pil mahsanihong irail: Kumwail kohwei rehn riomwail Mehn Leimen kan oh padahkihong irail ei mahsen; ahpw kumwail pahn kanengamahiong lokolok oh kahpwal akan, pwe kumwail en kak kasalehda karasaras mwahu ong irail sang rehi, oh I pahn wiahiong kumwail en wia wiliepen nin limei kat ong ni komourpen aramas tohto.

12 Kedekedeo nan mohngiong en nein Mosaia pwutak ko, oh pil irail akan me iang irail, kehlailda pwe re en kohla rehn Mehn Leimen kan oh kalohkihong irail mahsen en Koht.

13 Kedekedeo ni ahnsou me re lel nan irepen sahpw en Mehn Leimen kan, irail tohrohrpeseng oh kohkohpeseng, koapwkoapworopworki Kauno me irail pahn pwurehng tuhpene ni imwin arail doadoahko; pwe re medewe me doadoahk me re pahn wia uhdahn kesempwal kowahlap.

14 Oh mehlel me doadoahko kesempwal kowahlap, pwe irail alehda pwukoa en kalohki mahsen en Koht ong aramas lawalo oh kekeluwak oh sakanakan; aramas me kin perenki kemehla Mehn Nihpai, oh pirapa oh kulih irail; oh nan kapehdarail kan tengedieng arail dipwisou kan, de arail kohl oh silper, oh takai kesempwal kan; ahpw re kin nantihong alehdi mepwukat sang ni ar kamaramas oh kulih aramas, pwe re en dehr doadoahngki pehrail kan de pein koadoahkehda arail mour.

15 Karehda irail wia aramas inenen dangahnga, pali laud en irail kin pwongih dikedik en eni kan, oh keria en Koht kohieng irail pwehki tiahk en arail pahpa kahlap ako; ahpw sapwellimen Koht inou kan kin awiawih irail ma irail pahn koluhla.

16 Eri, iei kahrepe wet me nein Mosaia pwutak kan alehkihda pwukoahn doadoahk wet, pwe mweinele re pahn kahrehiong irail en koluhla; pwe mweinele re pahn sewese irail en marainkihda koasoandi en poadoandoarlao.

17 Irail eri tohrohrpeseng nanpwungarail, oh kohwei rehn aramas akan, emen emente kelehpw, nin duwen mahsen oh manaman en Koht me kohieng irail.

18 Eri pwehki Amon eh wia kaun men nanpwungarail, de ih me kaweid irail, e mweseldahsang irail, mwurin eh kapaiairailda nin duwen arail pwukoa kan, mwurin eh ehukihong irail mahsen en Koht, de kaweid irail mwohn eh mweselda; oh met irail seiloakla nan arail ahl akan nan sahpwo.

19 Oh Amon kohla nan sahpw en Ismael, eden sahpwo wiawihda sang nein Ismael pwutangko, me pil wiahla Mehn Leimen.

20 Oh ni ahnsou me Amon lel nan sahpw en Ismael, Mehn Leimen ko koledi oh pirehdi, pwe nin duwen arail tiahk re pahn kin pirehdi Mehn Nihpai koaros me re kin koledi, oh wahla mwohn nanmwarkio; oh kupwuren nanmwarkio ma e men kemeiraila, de kaliduhwirailla, de kesehiraillong nan imweteng, de kausirail sang nan sahpwo, nin duwen kupwure oh dahme e nsenki.

21 Oh met Amon wisiklahr mwohn nanmwarki me kaun sahpw en Ismael; oh ede Lemonai; oh e wia emen kadaudok en Ismael.

22 Oh nanmwarkio keinemwe rehn Amon ma e inengieng kousoan nan sahpwo rehn Mehn Leimen kan, de rehn nah aramas akan.

23 Oh Amon ahpw sapengki: Ei, I mwahuki kousoan rehn aramas pwukat erein ahnsou ehu; ei, de lao lel ahnsou me I pahn mehla.

24 Kedekedeo nanmwarki Lemonai ahpw kupwur perenkihda Amon, oh mahsanihong re en sapwadasang selipe kan; oh e ahpw kupwuredahr Amon en ale emen sapwellime serepein ko oh pwoudkihda.

25 Ahpw Amon ndaiong ih: Soh, ahpw I pahn wia sapwellimomwi ladu. Eri Amon wiahla ladu en nanmwarki Lemonai. Kedekedeo e ahpw iangala ekei ladu ko pwukoaki kilikilang sapwellimen Lemonai pelin mahn akan, nin duwen tiahk en Mehn Leimen kan.

26 Oh mwurin eh wie papahki nanmwarkio erein rahn siluh, ni eh iang laduhn Mehn Leimen kan kahkahrewei neirail pelin mahn akan wasahn kanimpil, me kahdaniki pihl en Sihpus, oh Mehn Leimen koaros kin kahrehla neirail pelin mahn akan wasao, pwe re en kak nimpil—

27 Eri, ahnsou me Amon oh sapwellimen nanmwarkio ladu kan wie kahkahrehla neirail pelin mahn akan ni wasahn kanimpilo, kilang, ekei Mehn Leimen, me kahrelahr neirail mahn akan pwe re en kanimpile, ahpw kesihnenda oh pwakihpeseng pelin mahn me Amon oh laduhn nanmwarkio kahkahrehko, oh re pwakihpeseng lao irail tangpeseng wasa koaros.

28 Sapwellimen nanmwarkio ladu ko eri tepida kaulim, ndinda: Met nanmwarkio pahn kemeikitailla, duwehte eh wiahiongehr riatail ko pwehki ohl suwed pwukat ar pwakihpeseng neirail pelin mahn ko. Oh re ahpw tepida sengiseng kowahlap, ndinda: Kilang, neitail pelin mahn kan tangpesengehr.

29 Met re sengisengki pwehki arail masak kamakamala. Ahpw ni ahnsou me Amon kilangada nan kapehde direkihla peren; pwe, e nda, I pahn kasalehiong iengei ladu kan ei koaihek, de koaihek me mih rehi, ong ei pahn kapwurehdo sapwellimen nanmwarkio pelin mahn akan, pwe iengei ladu kan en kak koapworopworkinie, pwe I en kak kahluwa irail en kamehlele ei padahk kan.

30 Oh met, iei en Amon madamadau, ahnsou me e kilangada kahpwal en irail kan me e kin wiahki kempoakepah.

31 Kedekedeo e ahpw kakehlaka irail sang eh koasoi kan, ndinda: Riei ko, kumwail perenda oh kitail rapahki mahn akan, oh kitail pahn kihrailpene oh kapwureiraildohng wasahn nimpihl; oh kitail pahn doarehla sapwellimen nanmwarki pelin mahn akan oh e sohte pahn ketin kemeikitailla.

32 Kedekedeo irail ahpw kohla rapahki pelin mahn akan, oh irail idawehn kaweid en Amon, oh irail mwadang kohla oh sopukala sapwellimen nanmwarkio pelin mahn akan, oh pwurehng kihrailpenehng wasahn kanimpihlo.

33 Oh ohl ako pwurehng kesihnenda pwe re en pwakih neirail pelin mahn ko; ahpw Amon ndaiong ienge ko: Kumwail kapilpene pelin mahn akan pwe irail de tang; oh I pahn kohla oh peiong ohl akan me kin pwakihpeseng neitail pelin mahn akan.

34 Eri, irail kapwaiada dahme Amon patohwan ong irail, oh e ahpw kohla oh kesihnenda pwe en peiong irail akan me kesihnen ni pihl en Sihpus; oh irail me tohto.

35 Eri irail sohte masak Amon, pwe re medewe me emente neirail ohl oko kak kemehla nin duwen me re mwahuki, ahpw re sohte ese me Kauno ketin inoukihong Mosaia me e pahn ketin doarehla nah pwutak kan sang nan pehrail; oh re pil sohte ese mehkot duwen Kauno; eri irail kin perenki kamakamalahn riarail akan; oh ih kahrepe wet me re kin kesihnenki mwo pwe re en pwakihpeseng sapwellimen nanmariki pelin mahn akan.

36 Ahpw Amon kesihnete oh tepida katehkin irail takai en nah pahio; ei, sang ni ah roson kehlail e kin katehkiniraildi takai en pahio; oh e kemehla ekei irail kahrehda re tepida pwuriamweiki uwen eh roson; ahpw re uhdahn lingeringer pwehki riarail me mehla kan, oh re koasoanehdi me e uhdahn pahn kamala; ahpw, pwehki arail kilang me re sohte kak katehkihdi neirail takai kan, irail tangkidohng mehn pok kan pwe re en pokihedi.

37 Ahpw kilang, ohl koaros me kihda peh pwe en poakih Amon, e pelehkihsang pehrail kan nah kedlahso; pwe e kauhdi arail pok kan sang ni eh pelehkihsang pehrail kan wasa keng en nah kedlahso, kahrehda irail tepida pwuriamwei, oh tepida tangasang; ei, oh irail me tohto; ahpw kehlail en peho kahrehda arail tangasang.

38 Met meh wenemen e katehkihdi nah pahio, ahpw sohte me e kemehkihla nah kedlahso ihte arail kauno; oh e pelehsang pehn irail tohto me kihda peh pwe en poaki ih, oh irail me tohto.

39 Oh ni ahnsou me e pwakihirailla sang wasao, e ahpw pwurala oh irail kanimpile neirail pelin mahn akan oh kapwureirailla nan sapwellimen nanmwarkio mohso, oh eri kohlongala rehn nanmwarkio, weuwa pehn irail akan me song kemehla Amon, me e pelehkihsang nah kedlahso, oh re wahlongala rehn nanmwarkio pwe en wia mehn kadehdepen soahng kan me re wiadahr.