1 Kilang, met kedekede mwurin nein Amon aramas akan ar soandi nan sahpw en Terson, ei, oh pil mwurin Mehn Leimen kan ar pwepwekihsang nan sahpwo, oh aramas en sahpwo sarepedi arail mehla kan.

2 Met irail sohte kak wadekedi arail mehla kan pwehki uwen arail tohto; pil duwehte ehn Mehn Nihpai kan mehla sohte kak wadawad—ahpw kedekedeo mwurin arail sarepedi arail mehla kan, oh pil mwurin rahn en arail kaisihsol, oh mwahmwahiei, oh kapakap, (oh met iei pahr eisek weneu en mwehin sounkopwung kan ong aramas en Nihpai kan) nan sahpwo pwon tepida popohl.

3 Ei, oh aramas akan nantihong kapwaiada kosonned akan en Kauno; oh irail kin poadidiong kapwaiada tiahk sarawi kan en Koht, nin duwen kosonned en Moses; pwe re padahngkiher duwen ar pahn kolokol kosonned en Moses kan lao e pahn pweida.

4 Oh met sohte pingiping nanpwungen aramas akan nan pahr eisek weneuo pwon en mwehin sounkopwung kan ong aramas en Nihpai kan.

5 Kedekedeo ni tepidahn pahr eisek isuh en mwehin sounkopwung kan, popohl pepeuslahte.

6 Ahpw kedekedeo ni imwiseklahn pahr eisek isuhwo, mie ohl emen me kohdo nan sahpw en Saraemla, oh e wia Imwintihtien Krais men, pwe e tepida kalohngkihong aramas akan soangen padahk me uhwong kokohp kan me soukohp akan kohpadahr duwen ketidohn Krais.

7 Met sohte kosonned ehu me kin uhwong dahme aramas men kamehlele; pwe e pahn uhdahn kasapwungehla mahsen en Koht ma e pahn mie kosonned ehu me kahrehda aramas akan ar pahn sapahrek.

8 Pwe pwuhk sarawi mahsanih: Pilada rahnwet, ihs me kumwail pahn papah.

9 Eri, ma aramas emen inangih papah Koht, e pahn wia kamwahupe; de ma e kamehlele Koht e pahn pil wia kamwahupe pwehki sang eh papah ih; ahpw ma e sohte kamehlele ih a sohte kosonned ehu me e pahn kalokolongki.

10 Ahpw ma e pahn kamaramas e pahn ale kalokolok en kamakamala; oh ma e pahn kulih aramas e pahn ale kalokolokpe; oh ma e pahn pirap e pahn pil ale kalokolokpe; oh ma e pahn kamwahl e pil pahn ale kalokolokpe; ei, pwe wiewia suwed pwukat koaros irail pahn alehki kalokolokperail.

11 Pwe mie kosonned ehu me aramas pahn kin pakadeingkihda diparail kan. Ahpw, sohte kosonned me kin uhwong dahme aramas kin kamehlele; eri, aramas emen kin kalokolongki dipe kan me e wiahda; eri aramas koaros pahrek.

12 Oh Imwintihtien Krais menet, me adaniki Korior, (oh kosonnedo sohte manaman powe) tepida kalohkihong aramas akan me e sohte pahn mie Krais. Eri iet mwomwen eh kin padahk oh koasokosoaiaseli:

13 Kumwail akan me sensel pahn koapworopwor likamw oh soh katepe, dahme kumwail katengehkinkumwaildi pahn soahng likamw pwukat? Dahme kumwail kin kasikasingki Krais men? Pwe sohte aramas kak ese duwen soahng kan me pahn kohdo.

14 Kilang, mepwukat me kumwail ndahki kokohp, me kumwail nda me kadakadaur kohdo sang soukohp sarawi kan, kilang, mepwukat tiahk likamw tohr en amwail pahpa kahlap ako.

15 Ia mwomwen amwail ese me re mehlel? Kilang, kumwail sohte kak ese duwen soahng kan me kumwail sohte kin kilang; eri kumwail sohte kak ese ma mehlel e pahn mie Krais.

16 Kumwail kin kasikasik oh kin kosekose me dene dipamwail kan eh lapwadahr. Ahpw kilang, met iei lipwen amwail madamadau ping; oh madamadau sahliel wet pwilisang tiahk en amwail pahpa kahlap ako, me kin kahrehda amwail kin kamehlele soahng kan me sohte mwahn kak wiawi.

17 Oh soahng tohto me e ndaiong irail, ndindahiong irail me sohte tomwpen dipen aramas kak wiawi, ahpw emen emen aramas kin lellong mour mwahu de suwed nin duwen epwelpen pein ih; eri emen emen aramas kin pweida nin duwen eh loalokong, oh emen emen aramas kin kalowehdi nin duwen eh kehlail; oh dahme aramas men kin wia sohte kin kauwehla kosonned.

18 Oh ih met me e kalokalohkihong irail, kakahluwa mohngiong en aramas tohto ong nan ahl sapwung, kahrehda arail pohnmwahsohki arail wiewia suwed, ei, kakaluhwa lih tohto, oh pil ohl, re en iang wiewia tiahk en nenek kan—ndindahiong irail me ahnsou me aramas kin mehla, ih imwilahn eh mour.

19 Eri ohl menet pil lellahng nan sahpw en Terson, pwe en kalohngki mepwukat rehn aramas en Amon kan, irail me wia aramas en Mehn Leimen kei mahso.

20 Ahpw kilang, re me marain sang Mehn Nihpai tohto; pwe re koledi, oh salihedi, oh walahng rehn Amon, me wia arail samworo lapalap.

21 Kedekedeo e ahpw ndaiong irail en wahieisang nan sahpwo. Oh e ahpw pil kohla nan sahpw en Kidion, oh pil tepida kalohkihong irail; oh wasao e pil sohte pweida, pwe e pil kolkoldi oh pirapirdi oh wisiklahng mwohn arail samworo lapalapo, oh pil arail sounkopwung en nan sahpwo.

22 Kedekedeo samworo lapalapo ahpw mahsaniong ih: Dahme ke wie kohkohkiseli oh wie kaskasapwungehla koasoandi en Kauno? Dahme ke padahkihkihong aramas pwukat me sohte pahn mie Krais, pwe en kauwehla arail pereperen? Dahme ke uhkihong kokohp koaros en soukohp sarawi kan?

23 Met mwaren samworo lapalapo iei Kidona. Oh Korior ndaiong ih: Pwehki I sohte kin padahngki tiahk likamw en amwail pahpa kahlap ako, oh pwehki I sohte kin padahkihong aramas pwukat pwe re en katengeiraildi pahn tiahk oh koasoandi likamw akan me samworohn mahs akan koasoanehdier, pwe re en kaunirailda oh ahneki manaman pohrail, pwehn kolokol irail en mihmi nan rotorot, pwe irail en dehr pohnmwahso, ahpw re en karakarahk nin duwen omwi mahsen kan.

24 Kumwail kosekose me aramas pwukat iei aramas saledek kei. Kilang, I nda me re mihmi nan kalidu. Kumwail kosekose me kokohp en mahs akan mehlel. Kilang, I nda kumwail sohte kak ese ma re mehlel.

25 Kumwail kosekose me dene aramas pwukat iei aramas dipan oh aramas pwupwudi kei, pwehki dipen arail pahpa oh nohno. Kilang, I nda me seri men sohte dipaniki dipen eh pahpa oh nohno kan.

26 Oh kumwail pil kosekose me Krais pahn ketido. Ahpw kilang, I nda me kumwail sohte kak ese ma e pahn mie Krais men. Oh kumwail pil kosekose me e pahn kamakamkihla dipen sampah—

27 Oh iei ih mwomwen amwail kin kahluwasang aramas pwukat re en idawehn tiak likamw en amwail pahpa kahlap ako, oh nin duwen pein inengamwail; oh kumwail kin kiheng irail pahn amwail manaman, duwehte re mihmi nan kalidu, pwe kumwail en kak paiamwahukihla arail doadoahk kan, pwe irail en dehr ahneki eimah, oh irail sohte kak pereniki arail pwuhng kan oh pai kan.

28 Ei, irail sohte kak doadoahngki dahme pein arail pwe irail dehr kamwakarahda arail samworo kan, me kin kalidukin irail dahme re mwahuki, oh kahrehda arail kamehlele, sang ni arail tiahk kan oh arail ouraman kan oh audepen nsenarail kan oh arail kaudiahl kan oh padahk rir me re kin kinehda kan, ma re sohte pahn wia nin duwen dahme irail nda, a re uhdahn pahn kamwakarahda mour ehu me sarawi me aramas sohte kin ese, me irail kin kosekose me Koht—mour ehu me sarawi men me aramas saik kilang de ese duwe, me saikinte mie oh me sohte pahn mie.

29 Met ni ahnsou me samworo lapalap oh sounkopwung lapalap kilangehr keptakai en ah mohngiong, ei, ahnsou me re kilang me e lahlahwe Koht, irail sohte men sapeng ah koasoi kan; ahpw re salihedi; oh wisiklahng rehn ohpi kan, oh kadaralahng nan sahpw en Saraemla, pwe en kak wisiklahng rehn Alma, oh sounkopwung lapalap me wia kepina en sahpwo pwon.

30 Kedekedeo ni ahnsou me e wisikdohng mwohn Alma oh samworo lapalapo, e pwurehng wia soangen koasoiohte me e wia nan sahpw en Kidion; ei, e ahpw doula nan eh koasoi en lahlahwe.

31 Oh e ngihl laudida ni eh koasoi mwohn Alma, oh kauwe samworo kan oh sounpadahk kan, kedkedipahkin irail me re kin kakahluwa aramas akan en idawehn tiahk likamw en arail pahpah kahlap ako, pwe re en kak paiamwahukihla ahn aramas akan doadoahk.

32 Eri Alma ndaiong ih: Ke wehwehki me se sohte kin paiamwahkihla ehn aramas pwukat doadoahk; pwe kilang I kin doadoahk iei sangete ni tepin mwehin sounkopwung kan lao lel ahnsou wet, I kin mourki sang ni pein ei doadoahk, mehndahte ei kin kalapw seiloakseli nan sahpwet pwe I en kalohki mahsen en Koht ong nei aramas akan.

33 Oh mehndahte doadoahk tohto me I kin wia nan mwomwohdiso, sohte kisin sihnain kis me I kin alehdi sang ni ei doadoahk; pil duwehte riei kan, ihte ansou me se kin wia doadoahk en nan sehr en kopwungo; oh se kin alehdi isepen uwen ansou me se kin doadoahngki nin duwen kosonnedo.

34 Oh met, ma se sohte kin alehdi mehkot nan aht doadoahk nan mwomwohdiso, soangen pai dah me se kin paiki nan aht doadoahk nan mwomwohdiso, ihte aht kin kalohki mehlelo, pwe se en kak perepereniki peren en riat akan?

35 Eri dahme ke kin ndahki me se kin kalohk ong aramas pwukat pwe sen ale isais, ni ahmw pein ese me se sohte kin ale isais? Eri, ke kamehlele me se kin pitih aramas pwukat, me kin kahrehda peren nan mohngiongirail kan?

36 Oh Korior sapengki ih, Ei.

37 Oh Alma ahpw ndaiong ih: Ke kamehlele me mie Koht?

38 Oh e sapengki, Soh.

39 Eri Alma ndaiong ih: Ke pahn pwurehng kahmahmki me mie Koht, oh pil kahmahmki Krais? Pwe kilang, I ndaiong uhk, I ese me mie Koht, oh me Krais pahn pil ketido.

40 Eri soahngen kadehde dah me ke ahneki me kasalehda me sohte Koht, de Krais sohte pahn ketido? I ndaiong uhk me sohte, ihte pein ahmw koasoi kan.

41 Ahpw, kilang, soahng koaros kadehdeda me mepwukat mehlel; oh ke pil ese soahng koaros kadehdehiong uhk me re mehlel; oh ke pahn kahmahmki? Ke kamehlele me mepwukat mehlel?

42 Kilang, I ese me ke kamehlele, ahpw ngehn likamw mihmi rehmw, oh ke pwilikihdi Ngehn en Koht kahrehde e sohte kak ketiket rehmw; ahpw tepilo ahneki manaman pohmw, oh e kakahreiukseli, wiewia doadoahk kan me e pahn kauwehkihla sapwellimen Koht seri kan.

43 Oh met Korior ndaiong Alma: Ma ke pahn kasalehiong ie ehu kilel, pwe I en kak kamehlele me mie Koht, ei, kasalehiong ie me ke ahneki manaman, oh I ahpw pahn kamehlele me ahmw koasoi kan mehlel.

44 Ahpw Alma ndaiong ih: E itarehr kilel kan me ke kilangehr; ke pahn pil kasongosonge ahmw Koht? Ke pahn pil nda, kasalehiong ie ehu kilel, ni ahmw kilangehr kadehdeh kan en riomw kan, oh pil kadehdehn soukohp sarawi kan koaros? Pwuhk sarawi kan miher mwohmw, ei, soahng koaros kasalehda me mie Koht; iei, sampah, oh audepe kan koaros, ei, eh kin mwekimwekid, ei, oh pil sampah teikan me kin mwekimwekid nin duwen ar koasoandi kin kadehdehda me mie Sounkepikpik Lapalap men.

45 Oh met ke wie kohkohseli, kakahluwa mohngiong en aramas pwukat nan ahl sapwung, kadekadehdehiong irail me sohte Koht? Oh ke pahn pil kahmahmkihla kadehde pwukat koaros? Oh e ahpw sapeng nda: Ei, I pahn kahmahmkihla, ihte ma ke pahn kasalehiong ie kilel ehu.

46 Eri kedekedeo Alma ndaiong ih: Kilang, I nsensuwedkihla pwehki keptakai en ahmw mohngiong, ei, me kahrehda amw wie kaskasohwehte ngehn en mehlelo, me pahn kahrehda palingenomwen pahn mwomwala.

47 Ahpw kilang, e pahn mwahu ma palingenomwen me pahn salongala sang ma ke pahn kahrehda palingehn en aramas tohto en kamwomwomwla, sang ni ahmw likamw kan oh sang ni ahmw lokaian widing kan; eri ma ke pahn pwurehng kahmahmki, kilang Koht pahn kalokeiuk, me ke pahn lohtengla, kahrehda ke sohla pahn kak lokaia, pwe ke en dehr pwurehng pitihdi aramas pwukat.

48 Met Korior ndaiong ih: I sohte kahmahmki me mie Koht, ahpw I sohte kamehlele me mie emen Koht; oh I pil nda, kumwail sohte kak ese ma mie Koht; oh ihte ma kumwail kasalehiong ie ehu kilel, I sohte pahn kamehlele.

49 Met Alma ndaiong ih: Iet me I pahn kihong uhk en wiakilel ehu, me ke pahn lohtengla, nin duwen ei koasoi; oh I patohwan, ni mwaren Koht, ke pahn lohtengla, pwe ke en sohla kak lokaia.

50 Met ni ahnsou me Alma koasoaia mepwukat, Korior lohtengla, kahrehda e sohla kak lokaia, nin duwen dahme Alma koasoiaier.

51 Eri ahnsou me sounkopwung lapalap udiahlehr met, e kapahla lime oh nting ong Korior, mahsanih: Met ke kamehlele manaman en Koht? Me ke inangih Alma en kasalehiong uhk sapwellime kilel? Ke men en pil kaloke mehtei kan, pwe en kasalehionguhk kilel? Kilang, e kasalehionguhkehr ehu kilel oh met ke pahn pil akakpwungte?

52 Oh Korior kapahla peho oh ntingihedi: I ese me I lohtenglahr, pwe I sohte kak lokaia; oh I ese me manaman en Kohtohte me kak kihong ie kahpwal wet; ei, oh I uhdahn kin ese me mie Koht.

53 Ahpw kilang, tepilo pitiehdi; pwe e pwarohng ie ni mwohmw en tohnleng, oh ndaiong ie: Kohwei oh kapwungala aramas akan, pwe irail koaros salongalahr, raparapahki Koht emen me sohte me ese. Oh e ndaiong ie: Me sohte Koht; ei, oh e padahkihong ie dahme I pahn nda. Oh I padahngkier eh koasoi kan; oh I padahngki pwehki e ngoaramwahu ong aramas me mour en sampah; oh I padahngkiseli lao I pweida mehlel, lao I kamehlele me re mehlel; oh kahrehkiong ie ei pelian me mehlelo, lao I lohdiong pahn keria mwuledek wet.

54 Mwurin eh koasoia mepwukat, e peki rehn Alma ma e kak kapakapkihong Koht, pwe en kapwurehsang keriao.

55 Ahpw Alma ndaiong ih: Ma keria wet pahn kohsang uhk ke pahn pwurehng kahluwa mohngiong en aramas pwukat nan ahl sapwung; eri, dahme pahn wiawihong uhk me kupwur en Kauno.

56 Kedekedeo keriao sohte kohsang rehn Korior; ahpw e lekdekiei sang wasao, oh e kin pekipekiseli kene mwenge ni ehu ehu ihmw kan.

57 Met rohngen dahme wiawihong Korior mwadangete lolohkseli nan sahpwo pwon; ei, kalohko pekederla sang rehn sounkopwung lapalap en aramas akan en nan sahpwo, kalokalohkihong irail akan me kamehlele ahn Korior koasoi kan pwe irail en mwadangete koluhla, pwe soangen pakadeikohte dehr lellohng irail.

58 Kedekedeo irail pwon kamehlele duwen wiewia suwed en Korior; eri irail koaros pwurehng weliakapwalahng Kauno; oh met kaimwiseklahr mwekid en wiewia suwed en Korior. Oh Korior kin pekipeki sawasepen kene mwenge ni ehu ehu ihmw kan.

59 Kedekedeo ni eh kohkolahng rehn aramas akan, ei, rehn aramas akan me katohreirailsang rehn Mehn Nihpai kan oh kahdaniki pein irail Mehn Soram, me ohl emen adaniki Soram me kaunirailda—oh ni eh kokolahng rehrail, kilang, irail tangada powe oh idangidi, lao e mehla.

60 Oh met kitail kilang imwilahn aramas me kin kaskasapwungehla koasoandi en Kauno; oh met kitail kilang me tepilo sohte pahn sewese nah seri kan ni imwin rahno, ahpw e pahn mwadangete waikiraildihla nan ehl.