1 Eri kedekedeo nan pahr kesilihsek en mwehin sounkopwung kan ong aramas en Nihpai kan, mwurin Moronai eh alehdier oh wadekehr nein Ilemen kisin likouo, e ahpw perenda mehlel pwehki soanerail, ei, pwehki pweida mehlel me Ilemen wia, ni ah kalowehdi sahpw akan me kohsang irail.

2 Ei, oh e kasalehiong nah aramas akan koaros, nan sahpwo pwon ni pali me e wie mihmih ie, pwe re en pil kak iang peren.

3 Kedekedeo e ahpw mwadangete kadarala kisin likou ehu ong Paoran, oh peki en kihpene ohl akan me pahn kohla oh kakehlaka Ilemen, de nein Ilemen sounpei kan, pwe en kak mengei en kolokol pelien sahpw me e kalowehdi sang ni manaman kapwuriamwei.

4 Kedekedeo ahnsou me Moronai kadaralahr kisin likou wet nan sahpw en Saraemla, e ahpw tepida wiahda pilahn pwe en kak pwurehng kalowehdi sapwarail akan oh arail kahnihmw kan me Mehn Leimen kan kihsang irail.

5 Kedekedeo ni ahnsou me Moronai wie kaukaunop en kohla mahwiniong Mehn Leimen kan, kilang, Mehn Leimen kan kohdohr oh mahwiniong aramas en Nihpaia kan, me kohpene sang nan kahnihmw en Moronai oh nan kahnihmw en Lihai oh nan kahnihmw en Moriandon.

6 Iei, irail [Mehn Leimen kan] me tangasang nan sahpw en Mandai, oh nan sahpwo pwon, re kohdohr oh patehng Mehn Leimen kan ni palien sahpw wet.

7 Oh pwehki arail pokon kowahlap, ei, oh pwehki arail kehkehlaila nan ehu ehu rahn, sang pahn kaweid en Amoron, re ahpw kohdohng aramas en Nihpaia kan, oh re tepida kemehkinirailla kamakamala lap ehu.

8 Oh pwehki neirail sounpei kan e pokon mehlel, aramas en Nihpaia kan me luhwehdi ahpw tangasang mwohrail; oh re kohdo oh patehng nein Moronai sounpei kan.

9 Oh met nin duwen Moronai eh medemedewe me e pahn konehng ohl akan re en kohla nan kahnihmw en Nihpaia, pwe re en sowese aramasoko doare kahnihmwo, oh pwehki e wehwehki me e pahn mengei ma re pahn doarehsang kahnihmwo en dehr lohdi nan pehn Mehn Leimen kan sang ma re pahn song en kihsang irail, e medewe me irail pahn mengeiki kolokolete kahnihmwo.

10 Eri e kin kihdiengete nah sounpei koaros re en apwalih wasah kan me re kin pwurehng kalowehdi.

11 Oh met, ahnsou me Moronai kilangada kahnihmw en Nihpaia kohsang irail e ahpw pahtoula kowahlap, oh tepida peikasal ma re sohte pahn kak lohdi nan pehn riarail akan pwehki wiewia suwed en aramas akan.

12 Eri iei pil pepehm en nah kaun lapalap en sounpei kan koaros. Irail peikasal oh pil pwuriamwei pwehki wiewia suwed en aramas akan, oh met pwehki pweidahn Mehn Leimen kan rehrail.

13 Kedekedeo Moronai ahpw lingeringerda pahn koapworment, pwehki arail soukautihong doandoare saledek en arail wehi.