1 Kedekedeo nan keisek ehu en pahr en mwehin sounkopwung kan ong aramas en Nihpai, ni rahn kelimau en nan keriau en sounpwungo, mwurin arail ahnekier popohl nan sahpw en Saraemla, sohte mahwen de pingiping erein sounpar kei, lao lel ni rahn kelimau en nan keriau en sounpwung en pahr eisek ehu, a mie rohng en mahwen nan sahpwo.

2 Pwe kilang, sounpei kan en Mehn Leimen kohdo sang ni pali me sallahng sapwtehno, ni irepen sahpwo, oh pidelong nan kahnihmw en Amonaia, oh tepida kemehla aramas akan oh kauwehla kahnihmwo.

3 Oh met kedekedeo, mwohn Mehn Nihpai kan ar kak kihpene sounpei pwe en itar en kak pwakihirail sang nan sapwo, irail kemehla aramas akan me kin koukousoan nan kahnihmw en Amonaia, oh pil ekei me mih ni irepen shapw en Noha, oh koledi ekei oh wahsang kohla nan sapwtehno.

4 Met kedekedeo Mehn Nihpai kan men kohla oh kapitala irail akan me wisiksang kohla nan sapwtehno.

5 Eri, me pilipilda me pahn wia kaun lapalap en sounpei en Mehn Nihpai kan, (ede iei Soram, oh nah pwutak riemen, Lihai oh Eia)—eri pwehki Soram oh nah pwutangko, ar ese me Alma wia samworo lapalap nan mwomwohdiso, oh pwehki ar rongehr me e kin alehdi ngehn en kokohp, eri irail kohla reh oh peki ma e kak esehda kupwur en Kauno duwen wasa me re pahn kohla ie nan sapwtehno rapahki riarail ko, me Mehn Leimen kan koledier oh wahsang.

6 Kedekedeo Alma ahpw kapakapkihong Kauno duwen irair wet. Oh Alma pwurodo oh ndaiong irail: Kilang, Mehn Leimen kan pahn kotehla pillap en Saidon ni palieir en sapwtehno, kodahla palilahsang irepen sahpw en Mandai. Oh kilang, kumwail pahn tuhwongiraildi wasao, ni palimesehn pillap en Saidon, oh wasao Kauno pahn ketin kapwurehiong kumwail riomwail akan me Mehn Leimen kan kalowehdi.

7 Kedekedeo Soram oh nah pwutangko kotehla pillap en Saidon, iangahki neirail sounpei kan, oh karis kohla palilahsang irepen sahpw en Mandai kolahng ni palieir en sapwtehno, me mih ni palimese en pillap Saidon.

8 Oh irail tuhwongdi sounpei en Mehn Leimen kan, Mehn Leimen kan ahpw ikiparala oh pwepwekihla nan sapwtehno; oh irail ale riarail ko me Mehn Leimen kan kalowehdi, oh sohte emen irail salongala. Oh riarail ohl akan kapwureiraildo nan pein sapwarail akan.

9 Eri met kaimwsekala pahr eisek ehu en mwehin sounkopwung kan, Mehn Leimen kan pwepwekihsang nan sapwarail, oh aramas en Amonaia kan kamwomwomwla; ei, aramas koaros me momour me wia Mehn Amonaia kan kamwomwomwla, oh pil arail kahnimw kehlailo, me re nda me Koht sohte kak kauwehla, pwehki e kehlail.

10 Ahpw kilang, rahn teieu e tehnla; oh kidih kan oh mahn lawalo en nanwel kan kangala paliwererail kan.

11 Ahpw, mwurin rahn kei kahlep en arail mehla kan koaskoasokda pohn pwehl, oh ekiste seridi. Oh met pwehki pwowe me kehlail mehlel, kahrehda aramas sohte kak kohla sapwasapw nan sahpw en Amonaia erein soupar kei. Oh e kahdaniki Tehnlahn Nior kan; pwe irail wia semen en Nior, me kamakamala; oh sapwarailo kin wie tetehnte.

12 Oh Mehn Leimen kan sohte pwurehng kohdo mahweniong Mehn Nihpai kan lao lel pahr eisek pahieu en mwehin sounkopwung kan ong aramas en Nihpai kan. Oh met erein sounpar siluh me aramas en Nihpai kan ahneki popohl nan sahpwo pwon.

13 Oh Alma oh Amulek kohwei kalokalohngki koluhla ong aramas akan nan arail tehnpas sarawi kan, oh arail ihmw sarawi kan, oh pil arail sinokoke kan, me koukouda duwehtete wiepen en mehn Suhs kan.

14 Oh irail kin wie doudoulahte kalohki mahsen en Koht rehn aramas koaros me men rong arail padahk kan, ni arail kin doudoulahte sohte lipilipilki aramas emen.

15 Oh iei me Alma oh Amulek kohwei, oh pil aramas tohto me iang pilipilda ong doadoahko, pwe en kalohki mahseno nan sahpwo pwon. Oh mwomwohdiso wiahwihda wasa koaros nan sahpwo, kapilpene nan sahpwo pwon, nanpwungen aramas en Nihpai kan koaros.

16 Oh sohte sapahrek nanpwungarail; Kauno ketin kapwilidiong wasa koaros nan sahpwo sapwellime Ngehno pwe en kaunopada madamadau en aramas akan, de en kaunopada mohngiongarail kan pwe en alehdi mahseno me pahn padahk ong irail ni ansou me e pahn ketido—

17 Pwe irail en dehr keptakai ong mahseno, pwe irail en dehr soupwoson, oh uhd mihla nan ahl en kamwomwala, ahpw re en kak pereniki alehdi mahseno, oh nin duwen ar wia ehu rah, irail pahn kapatapationg ni inondehn tuhkeo, pwe re en kak pidelong nan wasahn kommoal en Kauno arail Koht.

18 Met samworo kan me kohweiehr rehn aramas akan ahpw kin padahkihong irail re en uhdihsang likamw koaros, oh mwekid en ketewehdi koaros, oh noahrok koaros, pingiping koaros, kailok koaros, kauwe koaros, oh pirap, kawai, kulih, kam aramas, kamwahl, oh soangen mour suwed koaros, irail kalkalohngkihong irail me mepwukat sohte konehng wiawi—

19 Kasakasalehiong irail soahng kan me pahn kohdo; ei, kasakasalehiong irail duwen ketidohn Sapwellimen Kohto, sapwellime lokolok kan oh pwoula, oh pil iasadahn me mehla kan.

20 Oh aramas tohto kin wie kalekalelapak duwen wasa me Sapwellimen Kohto pahn ketido ie; oh irail alehdi padahk me e pahn pwarodo rehrail mwurin eh pahn iasadao; oh met aramas akan rong ni arail peren oh nsanamwahu.

21 Oh met mwurin mwomwohdiso eh wiawidahr nan sahpwo pwon—mwurin arail powehdier tepilo, oh mahsen en Koht wie kalokalohk ni pwung nan sahpwo, oh Kauno ketin kamwerehdiong sapwellime kapai kan rehn aramas akan—met kaimwisekalahr pahr eisek pahieu en mwehin sounkopwung kan ong aramas en Nihpai kan.