1 Kilang, met kedekedeo mwurinte Moronai e kadaralahr nah kisin likowo ong kepina lapalapo, e ahpw alehdi kisin likou ehu sang rehn Paoran, me wia kepina lapalap. Oh iet me e ketihtihki:

2 Ngehi, Paoran, me wia kepina lapalap en sahpwet, kadaralahng Moronai, kaun lapalap en sounpei kan, koasoi pwukat. Kilang, I ndaionguhk, Moronai, me I sohte perenki omw kahpwal akan, ei, palingeniet pahtoukihla.

3 Ahpw kilang, mie ekei irail me perenki omw kahpwal akan, ei, re pil kahngohdiong ie, oh re pil kahngohgiong aramas me kin uhki saledek, ei, oh irail akan me uhwong kiht re inenen ngeder.

4 Oh iei irail akan me nannantihong en kihsang ie nan dewei ni mwoalen kopwungo me kahrehda soangen suwed laud wet; pwe re kin kadek koasoi, oh re kahluwahsang mohngiong en aramas tohto, me pahn kahrehiong atail mihla nan apwal mwuledek; irail sohte men sewesekin kitail kanatail mwenge, oh re kin kamakamasak neitail aramas akan me kin uhpalihki saledek kahrehda irail sohte kohwei rehmw.

5 Oh kilang, re kausiehla sang rehrail, oh I tangodo nan sahpw en Kidion, iangahki ohl koaros me pahn idawehn ie.

6 Oh kilang, I kadarpeseng kalohk ehu nan sahpwet pwon; oh kilang, irail kohkohpene reht rahn koaros, pwe re en iang mahwen, pwe re en doare arail wehi oh arail saledek, oh en ikihong sapwung kan me wiawihong kitail.

7 Oh irail kohdo reht, kahrehda irail akan me kahngohdiong kiht pweiek, ei, kahrehda ar masangkihtada oh sohte men kohdo mahweniong kiht.

8 Irail koledier sahpwo, de kahnimwo, en Saraemla; irail idiadahr emen nanmwarki en kaunirailda, oh e ntinglahng nanmwarki en Mehn Leimen kan, me e pahn miniminiong ih; ni ara miniminpeneo e pwungkihda me e pahn apwalih kahnimw en Saraemla, ni eh medemedewe me e pahn kahrehda Mehn Leimen kan ar pahn kalowehdi luhwen sahpw kan, oh e pahn wiahla nanmwarki en aramas pwukat ahnsou me re pahn mihla pahn manaman en Mehn Leimen kan.

9 Oh met, nan noumw kisin likouo ke lipwoare ie, ahpw e sohte mehkot; I sohte nsensuwedki, ahpw I perenki omw mohngiong mwahu. Ngehi, Paoran, sohte rapahki manaman, ihte I en kolokol dewei ni mwoalen kopwungo pwe I en kak doandoare pwuhng oh mour saledek en nei aramas akan. Palingeniet tengediong saledek me Koht ketikihong kitail en saledengki.

10 Oh met, kilang, kitail pahn peliankihda me suwed kakerehdi nta. Kitail sohte pahn kemehla Mehn Leimen kan ma re pahn mihmihte nan uhdakarailo.

11 Kitail sohte pahn kemehla riatail ko ma re sohte pahn uhwong kitail oh peikihong kitail nair kedlahs akan.

12 Kitail pahn wie liduhla ma ih me konehng pwehki sapwellimen Koht pwuhng, de ma ih me e pahn mahsanihong kitail en wia.

13 Ahpw kilang e sohte kin mahsanihong kitail me kitail pahn mihla pahn manaman en atail imwintihti kan, ahpw kitail en koapworopworki ih, oh e pahn doareikitailla.

14 Eri, riei ohl kesempwal, Moronai, kitail en pelianda me suwed, oh soangen suwed me kitail sohte kak peliankihda atail mahsen kan, ei, me rasehng mwekid en kahngohdi oh pingiping kan, kitail en peliankinirailda kedlahs, pwe kitail en kak kolokolete atail saledek, pwe kitail en kak pereperen nan atail pwuhng en nsanamwahuki atail mwomwohdiso, oh nan doadoahk en atail Soundoaro oh atail Koht.

15 Eri, mwadangete kohdo rehi iangahki ekei noumw ohl akan, oh pwilikihdi luwe kan rehn Lihai oh Dienkom; kihong ira manaman en apwalih mahwen nan wasahn, nin duwen Ngehn en Koht, me iei ngehn en saledek me kin ieiang ira.

16 Kilang I kadaralahng irail ekis kanarail mwonge, pwe re en dehr mehla lao ke pahn kak kohdo rehi.

17 Kihpene sounpei kan me ke kak ni ahmw pahn kohdo, oh kita pahn mwadangete kohla mahweniong aramas kahngohdi kan, ni roson en atail Koht nin duwen ata pwoson.

18 Oh kita pahn kapwurehsang kahnimw en Saraemla, pwe kitail en kak kalaudehla uwen mwenge me kitail pahn kadaralahng Lihai oh Dienkom; ei, kitail pahn mahweniong irail ni roson en Kauno, oh kitail pahn katokehdi soangen suwed laud wet.

19 Oh met, Moronai, I perenki ei alehdi noumw kisin likowo, pwe I pwunodki duwen dahme kitail pahn wia, ma e pahn pwung kitail en mahweniong riatail ko.

20 Apw ke koasoiahier, ma re sohte pahn koluhla Kauno ketin mahsanihonguhk me ke pahn kohla mahweniong irail.

21 Ke en kakehlaka Lihai oh Dienkom rehn Kauno; ndaiong ira en dehr masak, pwe Koht pahn doareirailla, ei, oh pil irail koaros me tengediong saledek me Koht ketikihong irail en saledengki. Oh met I kaimwiseklahr nei kisin likou ong riei ohl kesempwal, Moronai.