1 Eri mwurin Alma eh koasoiadahr mahsen pwukat, irail ahpw kalkalelapak reh ma irail konehng kamehlele Kohtehmen, pwe irail en kak alehdi wahn tuhkeho me e koasoiadahro, de ia mwomwen arail pahn padokedi weren tuhkeho, de mahseno me e koasoiadahro, me e nda me anahnepen padokedi nan mohngiongirail kan; de ia mwomwen arail pahn tepida doadoahngki arail pwoson.

2 Alma ahpw ndaiong irail: Kilang, kumwail nda me kumwail sohte kak kaudokiong amwail Koht pwehki amwail lekdekiei sang nan amwail sinakoke kan. Ahpw kilang, I ndaiong kumwail, ma kumwail medewe me kumwail sohte pahn kak kaudokiong Koht, lapalahn amwail sapwungalahr, oh kumwail anahne onopki pwuhksarawi kan; ma kumwail medewe me pwuhksarawi kan padahkihong kumwail met, eri kumwail sohte wehwehki.

3 Kumwail tamataman wadek dahme soukohp en mahso, Sihnos, mahsanih duwen amwail pahn kapakap oh kaudok?

4 Pwe e ketihtihki: Komwi me diren kupwur kalahngan, Maing Koht, pwe komw ketin karonge ei kapakap, iei ni ahnsou me I mihmi nan sapwtehno; ei, komwi kupwur kalahngan ong ie ni ahnsou me I kapakapki duwen ei imwintihti kan, oh komwi ahpw ketin wekidirailla re en uhd mwahu ong ie.

5 Ei, Maing Koht, komw kupwureielahr ni ahnsou me I wie pekipek ong komwi nan ei mwahto; ni ei wie ngidingidki ei kapakap, oh komwi ahpw karonge ie.

6 Oh pil, Maing Koht, komwi kin ketinkaronge ei kapakap ni ei pwurala ni imweio.

7 Oh Maing Koht, komw kin karonge ie ni ei kin kapakapohng komwi ni rir nan ei kisin pere.

8 Ei, komw ketin kupwurehla sapwellimomwi seri kan ni arail wiepekipek rehmwi, pwe irail en rong komwi ah kaidehn aramas, oh komw ketin karonge irail.

9 Ei, Maing Koht, komwi ketin kupwureiehlahr, oh karongehier ei wie pekipek nanpwungen sapwellimomwi pokon en aramas akan.

10 Ei, oh komw ketin karongeiehier ni ahnsou me I lekideklao oh ei imwintihti kan kin kailongkinie; ei, komw karongehier ei pekipek kan, oh engiengda pahn ei imwintihti kan, oh komwi mwadangete kamwomwirailla nan sapwellimomwi engieng.

11 Komwi ahpw ketin karonge ie pwehki ei kahpwal akan oh ei ngoang; oh met iei pwehki Sapwellimomwi Iehroso me kahrehda omw kupwur kalahngan ong ie, eri I pahn ngidingidki ei pekipek ong komwi nan ei kahpwal koaros, pwe komwi me kaperenpei; pwehki omwi ketikihsang ie sapwellimomwi kalokolok, pwehki Sapwellimomwi Iehroso.

12 Eri Alma ndaiong irail: Kumwail kamehlele mahsen en pwuhksarawi kan me mehn mahs oko ntingihedi?

13 Kilang, ma kumwail kamehlele, a kumwail pahn kamehlele dahme Sihnos mahsanih; pwe, kilang e ketihtihki: Komwi ketikihsang ie sapwellimomwi kalokolok pwehki Sapwellimomwi Iehroso.

14 Eri kilang, riei ko, I pahn kalelapak ma kumwail wadekehr pwuhksarawi kan? Ma kumwail kamehlele, a ia mwomwen amwail sohte kak kamehlele Sapwellimen Kohto Iehroso?

15 Pwe e sohte ntingdi me Sihnos kelehpw me mahsanih mepwukat, ahpw Sihnok pil iang mahsanih duwen mepwukat—

16 Pwe kilang, e ketihtihki: Maing Kaun, komwi engiengda pahn aramas pwukat, pwehki irail sohte wehwehki sapwellimomwi kalahngan kan me komw ketikihong irail pwehki sapwellimomwi Iehroso.

17 A met, riei ko, kumwail kilang me keriemen en soukohp en mahs kadehdehda duwen Sapwellimen Kohto Iehroso, oh pwehki aramas sohte men wehwehki sapwellime mahsen kan irail kostakai ih oh kemehla.

18 Ahpw kilang, kaidehn ih koaros met; kaidehn irahte me koasoiada duwen Sapwellimen Kohto.

19 Kilang, Moses koasoia duwen ih; ei, oh kilang mehn karasepe ehu me e kasalehda nan sapwtehno, me mehmen me pahn kilang e pahn mourla. Oh aramas tohto kilang oh mourla.

20 Ahpw malaulau me wehwehki duwen soahng pwuko, oh met pwehki ar mohngiong keptakai kan. Ahpw me tohto irail me keptakai sohte men kilang, eri irail mehla. Eri kahrepen ar sohte men kilang pwehki re sohte kamehlele me e pahn kamwahwihirailla.

21 Riei ko, ma kumwail pahn kamwahula sang ni amwail pahn kilangkihte masamwail kan me pahn kak kahrehda amwail kak mwahula, kumwail soh pahn mwadangete kilang, de kumwail men kakeptakaila amwail mohngiong kan nan amwail seupwoson, oh pwahngahki, kahrehda amwail sohte kilang, me pahn kahrehda amwail mehla?

22 Ma ei duwen met, meid suwed ong kumwail; ahpw ma soh, eri kumwail kilangki masamwail kan oh tepida kamehlele Sapwellimen Kohto, me e pahn ketido oh doarehla sapwellime aramas akan, oh me e pahn lokolongki oh pwoula pwe en tomwkihla diparail akan; oh me e pahn iasada sang me melahr akan, me pahn tapiada iasadao, pwe aramas koaros pahn uh mwowe, pwe re en pakadeikda ni imwin rahno iei rahn en kadeik, nin duwen ar wiewia kan.

23 Eri met, riei ko, I men kumwail en padokedi mahsen wet nan mohngiongimwail kan, oh ni eh pahn tepida wosada a kumwail apwalihki amwail pwoson. Oh kilang, e pahn wiahla tuhke pwoat, kekeirda loalomwail ong mour soutuk. Oh Koht en ketin mweidohng kumwail pwe amwail toutou kan en kak marahrahda, sang ni peren en Sapwellimeo. Oh soahng pwukat koaros kumwail kak wia ma kumwail inangih. Ahmen.