1 Eri, ni ahnsou me Amon kin padapadahkih sapwellimen Lemonai aramas akan, a kitail pahn uhd pwuralahng duwen koasoipen Aron oh rie kan; pwe mwurin e mweselsang nan sahpw en Midonai, Ngehno kahluwahla nan sahpw en Nihpai, iei kohla nan tehnpas en nanmwarki me kaunda sahpw koaros ihte sahpw en Ismael me soh; oh iei ih semen Lemonai.

2 Kedekedeo e ahpw patohlongala nan tehnpas en nanmwarkio, iangahki rie kan, oh poaridi mwohn nanmwarkio, oh patohwanohng: Kilang, Maing nanmwarki, kiht rien Amon, me komwi doarehsangehr nan imweteng.

3 Oh met, Maing nanmwarki, ma komw mweidohng se en mour, se kak wia sapwellimahr ladu. Nanmwariko ahpw mahsanihong irail: Kumwail patohda, pwe I pahn mweidohng kumwail en mour, oh I sohte pahn mweidohng kumwail en wia nei ladu; ahpw I pahn uhdahn anahne kumwail en sewese ie; pwe I ahneki pwunod nan ei madamadau pwehki en Amon koasoi kadek oh kesemwpal akan; oh I men ese dahme kahrehda e sohte iang kumwail patohdahdo sang nan Midonai.

4 Aron ahpw patohwan ong nanmwarkio: Kilang, Ngehn en Kauno poaronehla en kohla ekis wasa; e kohla nan sahpw en Ismael, pwe en padahkih nein Lemonai aramas akan.

5 Met nanmwarkio keinemwe rehrail: Dahkot met me ke apwtehn nda duwen Ngehn en Kauno? Kilang, ih met me I wie pwonopwoniki.

6 Oh pil, ia duwen met me Amon patohwan—Ma ke pahn koluhla ke pahn komourla, oh ma ke sohte pahn koluhla, ke pahn lekdekla ni imwin rahno?

7 Eri Aron ahpw sapeng oh patohwan ong ih: Komw kamehlele me mie Koht? Oh nanmwarkio mahsanih: I ese me Mehn Amelek kan kin nda me mie Koht, oh I mweidohng irail en kauwada ihmw sarawi kan, pwe irail en kak kohpene oh pwongih ih. Oh ma ahnsou wet komw pahn nda me mie Koht, kilang I pahn kamehlele.

8 Oh met ni ahnsou me Aron rongehr met, nan kapehde tepida peren, oh e ahpw patohwan: Maing nanmwarki, kilang, nin duwen omwi ieias, mie Koht.

9 Nanmwarkio ahpw keinemwe: Ih Koht me wia Eni Lap me wahdo atail pahpa kahlap ako sang nan sahpw en Serusalem?

10 Oh Aron ahpw sapeng ih: Ei, iei ih Eni Lapo, oh ih me ketin kapikada soahng koaros nanleng oh nan sampah. Komw kamehlele met?

11 E ahpw mahsanih: Ei, I kamehlele me Eni Lap me ketin kapikada soahng koaros, oh I men ke en padahkiohng ie duwen mepwukat koaros, oh I pahn kamehlele dahme ke pahn nda.

12 Kedekedeo ni ahnsou me Aron kasawihdahr me nanmwarkio pahn kamehlele eh koasoi kan, e ahpw tepida wadekohng nanmwarkio iren pwuhk sarawi kan sang ni kepikipikdahn Adam—duwen Koht e ketin kapikada aramas ni mwomwe, oh me Koht ketikihong ih kosonned akan, oh pwehki dihp aramas pwupwudi.

13 Aron ahpw kawehwehda ni pisetik ong ih duwen kepikipikdahn Adam sang nan pwuhk sarawi kan, kakawehwehiong ih duwen pwupwulahn aramas, oh arail mour en sampah oh pil koasoandi en poadoandoarlao, me kaunopada sang ni kapikpikdahn sampah, sang rehn Krais, ong koaros me pahn kamehlele mware.

14 Oh pwehki aramas ar pwupwulahr sohte pein arail manaman en alehdi kapai; ahpw lokolok oh pwoulahn Krais tomwkihla diparail akan, sang ni pwoson oh koluhla, oh soahng teikan; oh pwehki eh mweidpesengehr sahl en mehla, pwe sousou kan sohte pahn pweida, oh medek en mehla pahn sohrala pahn lingan en koapworopworo; oh Aron kawehwehda ni pisetik mepwukat koaros ong nanmwarkio.

15 Kedekedeo mwurin Aron eh kawehwehdahr mepwukat, nahnmwariko ahpw mahsanih: Dahme I pahn wia pwe I en kak alehdi mour soutuk wet me ke koasoiadahr? Eri, dahme I pahn wia pwe I en kak ipwisang rehn Koht, oh usadahsang ngehn suwed wet nan kapehdiet, oh alehdi sapwellime Ngehno, pwe I en kak direkihla peren, pwe I en dehr lekdekila ni imwin rahno? Kilang, I pahn kesehla soahng koaros me I ahneki, ei, I pahn pwilikihdi ei manaman en kaunda wehi, pwe I en kak alehdi peren lap wet.

16 Ahpw Aron ndaiong ih: Ma komw kupwuriki soahng wet, ma komw pahn poaridi mwohn Koht, iei, ma komw pahn koluhkihla dipomw kan koaros, oh poaridi mwohn Koht, oh eker mwareo ni pwoson, kamkamehlele me komw pahn alehdi, eri komwi ahpw pahn alehdi koapworopwor me komwi kupwuriki.

17 Kedekedeo ni ahnsou me Aron koasoiahier koasoi pwukat, nanmwarkio ahpw kelipwikihdi oh poaridi mwohn Kauno; iei, wendi nan pwehlo, oh loulou kehlail ni ngil laud, ketketihtihki:

18 Maing Koht, Aron patohwan padahkihong ie me mie Koht; oh ma mie Koht, oh ma komwi me Koht, komw menlau ketin kasalehiong ie duwen komwi, oh I pahn kesehla dipei koaros pwe I en kak esehla komwi, oh pwe I en kak iasada sang mehla, oh komourla ni imwin rahno. Oh met ni ahnsou me nanmwarkio mahsaniher koasoi pwukat, e ahpw pwonla likamwete e mehla.

19 Kedekedeo sapwellime ladu kan ahpw tangala oh ndaiong lih nanmwarkio soahng koaros me wiawihong nanmwarkio. E ahpw kohdo rehn nanmwarkio; oh ni ahnsou me e kilangada eh wonohn mwomwen mehla, oh pil Aron oh rie kan wie keskesihnen mwomwen irail me kahrehiong eh pwupwudier, e ahpw engiengda pahrail, oh mahsanihong sapwellime ladu kan, de sapwellimen nanmwarkio ladu kan, re en koleiraildi oh kemeirailla.

20 Ahpw ladu ko kilangehr kahrepen nahnmwariko eh pwupwudi, eri irail sohte men doahke Aron oh rie kan; oh irail peki rehn lih nanmwarkio patohwan: Dahme komw mahsanihki se en kemehla ohl pwukat, ni aht kilang me emente irail me kehlail sang kiht koaros? Eri se uhdahn pahn kamala pahrail.

21 Eri ni ahnsou me lih nanmwarkio kilangadahr ladu kan ar masepwehk e pil tepida masepwehk kowahlap, pwe mehkot suwed de wiawihong ih. E ahpw mahsanihong sapwellime ladu kan en kohla oh ekeredo aramas akan, pwe irail en kak kemehla Aron oh rie kan.

22 Met ni ahnsou me Aron kilangadahr koasoandi en lih nanmwarkio, oh pwehki ih e wehwehki keptakai en nan mohngiong en aramas akan, e periki pokono de pokonpene wiahda pingiping lap oh uhpene nanpwungarail; eri e kihla peho oh kapwourda nanmwarkio sang nan pwehlo, oh patohwanohng: Komw ninlengida. Ih ahpw ninlengihda, oh kehlailda.

23 Met e wiawiher mwohn lih nanmwarkio oh ladu tohto. Oh ni ahnsou me re kilangehr irail pwuriamweikihla mehlel, oh tepida masepwehk. Eri nanmwarkio ahpw ninlengida, oh tepida kalohkihong irail. Eri, e ahpw ketin kalohkong irail, lao towe koaros nan tehnpese wiliakapwalahng Kauno.

24 A met mie pokon lap ehu pokonpene pwehki lohk me lih nanmwarkio mahsaniho, oh e tepida mie kaulim mehlel nanpwungen aramas ako pwehki Aron oh rie kan.

25 Ahpw nanmwarkio ninlengida mwohrail oh ketin sewese kaweidihirail. Irail ahpw meleileidi ong Aron oh irail akan me iang ih.

26 Kedekedeo ni ahnsou me nanmwarkio kilang me aramas akan meleileidi, e kupwuriki Aron oh rie kan en kesihnenda nanpwungen pokono, pwe irail en padahkihong pokono mahseno.

27 Kedekedeo nanmwarkio ahpw ketin kadarpeseng kalohk ehu nan sahpwo pwon, rehn sapwellime aramas akan koaros me mih nan sapwellime sahpw koaros, me mih ni irepen sapwo, me pil kohlahng ni sehd, sang ni palimese lel palikapi, me irepesengki sahpw en Saraemla sapwtehn tehtikitiko, me kohsang ni sehd en palimese kolahng ni sehd en palikapi, oh ni irepen oaroahr akan, oh ni irepen sapwtehn me mih ni paliepeng en sahpw en Saraemla, kokohlahng ni irepen Mandai, karanih wasa me pillap en Saidon pwilidohsang ie, kerekeredohsang palimese kolahng palikapi—oh ih mwomwen Mehn Leimen kan oh Mehn Nihpai kan ar tohrohrpeseng.

28 Eri, pali laud en Mehn Leimen me kin dangahnga kin kousoan nan sapwtehno, oh re kin mih nan impwal; oh irail mihseli palikapi en nan sapwetehno, nan sahpw en Nihpai; ei, oh pil palikapi en sahpw en Saraemla, ni irepen oaroahr en sehdo, oh pil palikapi en sahpw en Nihpai, wasa me arail pahpa kahlap ako tepin sohsohki, me kokohlahng ni irepen oaroahr en sehdo.

29 Eri, pil Mehn Leimen kan tohto me mih palimesehn oaroahr en sehdo, wasa me Mehn Nihpai kan kalipeiraillang. Oh met Mehn Leimen kan kereniong kapilpene Mehn Nihpai; ahpw Mehn Nihpai kan sapwanikihla sahpw akan koaros me mih paliepeng en sahpwtehno, wasa me pillap en Saidon pwildohsang ie, sang ni palimese kohla ni palikapi, kapil apali sapwtehno; ni paliepeng, lao irail kolahng ni sahpw me re kahdaniki Sahpwen Rahk.

30 Oh e peiante sahpw me re kahdaniki Sahpwen Tehnla, pwehki eh dohdahla paliepeng eri e lella nan sahpw me aramas koasounla ie mahs ahpw kamwomwomwlahr, me tihrail kan koasoiepe wiawiher, me aramas en Saraemla kan diarada, pwehki wasao wia wasa me re tepin peidi ie.

31 Oh irail kohsang wasao kohdahla ni palieir en sapwtehno. Eri sahpw en paliepengo kahdaniki Sahpwen Tehnla, oh sahpw en palieir kin kahdaniki Sahpwen Rahk, pwehki e wia sahpwtehn me diren soangsoangen mahn lawalo kan, ekei irail kohsang nan sahpw en paliepeng pwehki repen mwenge.

32 Eri met, uwen dohn wasao Mehn Nihpai kin seiloangki rahn ehu elep, ni lain me katohrepeseng Sahpw en Rahk oh Sahpw en Tehnla, sang palimesen nansed kohla paliepeng en nansed; oh pihl eri kereniong kapilpene sahpw en Nihpai oh sahpw en Saraemla, oh mie sahpw tehtikitik ehu me katohrepeseng sahpw en paliepengo oh sahpw en palieiro.

33 Kedekedeo Mehn Nihpai kan kousoanlahr nan Sahpw en Rahk, sang ni palimese kohla ni sehd en palikapi, oh met sang ni loalokong en Mehn Nihpai kan, neirail sounsilasil kan oh sounpei kan, silehdi Mehn Leimen kan ni palieir, pwe irail en dehr iang sapwasapw ni paliepeng, pwe irail en de sapwanikihla sahpw en paliepeng kan.

34 Eri Mehn Leimen kan sohte kak sapwasapw ihte nan sahpw en Nihpai, oh pil wasa kan nan sapwtehno. Met iei loalokong en Mehn Nihpai kan—pwehki Mehn Leimen kan ar wia arail imwintihti, re sohte pahn mweidohng arail kahpwal akan en mih pali koaros, oh pil en mie ehu wasa me re pahn kak tangala ie, nin duwen arail ineng kan.

35 Eri, mwurin ei koasoiahdahr met, I pahn pwuralahng koasoiepen Amon oh Aron, Omner oh Himnai, oh riarail kan.