1 Oh, riei ohl ako, I men amwail madamadau kan en medewe mahso ni ahnsou me Kauno Koht ketikihong sapwellime serihkan kosonned pwukat; oh I men kumwail en tamataman me Kauno Koht ketin kasarawiala samworo kan, nin duwen sapwellime koasoandi sarawio, me wia koasoandi en Sapwellimeo, pwe en padahkih mepwukat ong aramas akan.

2 Oh samworoko kin kasarawiala nin duwen koasoandi en Sapwellimeo, ni wiepe me aramas akan pahn kak esehki dahme irail pahn kasikasik sang rehn Sapwellimeo ong ni komourala.

3 Oh iet wiepe me irail kasarawihong—Irail malipilipda oh kaunopda sangete ni tepin sampah eh wiawihda nin duwen kupwurokong en Koht me ketin mwahngi mehkoaros, pwehki sang ni arail pwoson mehlel oh doadoahk mwahu kan; ni tapio irail ahneki saledek en pilada me mwahu de me suwed; eri irail pilada me mwahu, oh pwehki arail doadoahngki arail pwoson lap mehlel, irail malipilipiong nan malipilip sarawi, ei, sang ni malipilip sarawio me kaunopdahr iangahki kaunop en poadoandoarparail, oh nin duwe.

4 Eri irail malipilipdahr ong malipilip sarawi wet sang ni arail pwoson, a ekei irail kasohwe Ngehn en Koht sang ni arail keptakai en mohngiongarail oh lamalam rotorot, ma irail sohte wia met irail kak iang ahneki kapai laud duwehte riarail kan.

5 De ni mehlel, irail mih nan soangen irair ehute rehn riarail akan sangete ni tapio; eri malipilip sarawi wet kaunopdahr sang ni tepin sampah eh wiawihda ong irail me sohte pahn ahneki mohngiong keptakai, nin duwen oh sang ni tomw en Sapwellime Ieroso, me kaunopdahro—

6 Oh eri irail malipilipda sang ni malipilip sarawi wet, oh kasarawihongehr nan prihsduhd ileile en koasoandi sarawi en Koht, pwe en padahngki sapwellime kosonned akan ong aramas akan, pwe irail en pil kak iang pidelong nan sapwellime wasahn kommoal—

7 Prihsduhd lapalap wet iei ih koasoandi en Sapwellime Iehros, me wia koasoandi ehu me sangete ni tepin sampah eh wiawihda; met wehwehki, me sohte tapi de imwi, e kaunopda sang mwohn kawa oh pil kohkohlahte, nin duwen sapwellime kupwurokong ong soahng kan koaros me pahn kohdo—

8 Eri irail kasarawihalahr ni wiepe wet—sang ni arail malipilipkihda malipilip sarawi ehu, oh kasarawihkihla tiahk sarawi ehu, oh alehda prihsduhd lapalap en koasoandi sarawio, me wia malipilip, oh tiahk sarawi, oh prihsduhd lapalap, me sohte tapi de imwi—

9 Eri irail wiahla samworo lapalap kohkohlahte, nin duwen koasoandi en Sapwellimeo, Iehros en Sahmo, me sohte tapi de imwi, me diren kalahngan, pahrek, oh mehlel. Oh iei ih duwehn met. Ahmen.

10 Eri, nin duwen ei koasoia koasoandi sarawio, de prihsduhd lapalap, me tohto me kasarawihala oh wiahla samworo lapalap en Koht; oh e kin sang ni arail pwoson mehlel oh koluhla, oh arail mour pwung mwohn Koht, irail pilada en koluhla oh wia doadoahk en mour pwung sang mehla;

11 Eri irail malipilipda nin duwen koasoandi sarawi wet, oh sarawihkihla, oh arail likou kan pwetepwetkihla ar kamwakelda sang ni ntahn Sihmpwulo.

12 Eri mwurin arail sarawikilahr Ngehn Sarawi, oh arail likou kan pwetepwetalahr, mwakelekelahr oh sohte samin kis mwohn Koht, re sohte kak medewe dihp ihte kailongki; oh irail me tohto mehlel, me mwakelekella oh pidelong nan wasahn kommoal en Kauno arail Koht.

13 Oh met, riei ohl ako, I men kumwail en karakarahkala mwohn Koht, oh wahdo wahn amwail koluhla, pwe kumwail en pil kak pidelong nan wasahn kommoalo.

14 Ei, aktikitikla duwehte aramas akan nan mwehin Melkisedek, me pil wia samworo lapalap nin duwen koasoandi wet me I koasoiadahr, me pil alehdahr prihsduhd lapalapo kohkohlahte.

15 Oh ihte Melkisedeko me Eipraam pwainohng meirong; iei, atail pahpa Eipraam pwainehng meirong en eisek kis ehu en soahng kan koaros me e ahneki.

16 Eri tiahk sarawi pwukat kin wiawi ni wiepe wet, pwe aramas akan en kak kasikasik Sapwellimen Kohto, ni e wia kilel en sapwellime koasoandio, de iei ih sapwellime koasoandio, oh met pwe irail en kak kasikasik ih pwe re en ale lapwepen diparail akan, pwe re en kak pidelong nan wasahn kommoal en Kauno.

17 Eri Melkisedek menet wia nanmwarki men nan sahpw en Seilem; oh sapwellime aramas akan kehlailla nan arail wiewia suwed oh mour suwed; ei, irail koaros salongala; irail direkihla soangen wiewia suwed koaros;

18 Ahpw pwehki Melkisedek eh doadoahngki pwoson kehlail, oh alehdi ohpis en prihsduhd ileilehu nin duwen koasondi sarawi en Koht, padahngki koluhla ong sapwellime aramas akan. Oh kilang, re koluhla; oh Melkisedek kahrehiong popohl nan sahpwo nan eh mwehi; eri e pil kahdaniki nanmwarki en popohl, pwehki e wia nanmwarki en Seilem; oh e kakaun pahn manaman en seme.

19 Eri, mie me tohto me kohdo mwowe, oh pil aramas tohto me kohdo mwuri, ahpw sohte me lapalap sang; eri, ih me re ntingihdi duwe ni sansal.

20 Eri I sohte anahne pwurehng koasoia duwe; dahme I koasoiahier e itar. Ahpw, pwuhksarawi kan mih mwohmwail; ma kumwail pahn wekidala wehwe kumwail pahn kamwomwomwkihla.

21 Oh met kedekedeo ni ahnsou me Alma ndaiong irail mahsen pwukat, e ahpw kapahwei peh pohrail oh ngihl laudida werikihla, ndinda: Met iei ahnsou en koluhla, pwe rahn en komouro kerendohr;

22 Ei, oh kapitien Kauno, sang ni ewen tohnleng kan, kalokalohkiong wehi kan koaros; ei, kalokalohki, pwe irail en kak ahneki rohng kaperen en peren lap; ei, oh e kin ketin pakapakairiki rohng kaperen pwukat rehn sapwellime aramas koaros, iei, koaros me parpeseng wasa koaros nan sampah; eri irail kohdo rehtail.

23 Oh re kin sansalohng kitail ni nting de lokaia sansal, pwe kitail en kak wehwehki, pwe kitail en dehr sapwungala; oh met pwehki atail sansalongseli nan ehu sahpw; eri, kitail kenikenla mehlel, pwe kitail alehdi rohng kaperen me kalohkohng kitail wasa koaros nan atail mwaht.

24 Pwe kilang, tohnleng kan wie kalokalohkihong aramas tohto ahnsou wet nan sapwatail; oh kahrepe wet pwe en kaunopada mohngiong en aramas akan pwe re en alehdi sapwellime mahsen ni ahnsou me e pahn ketido nan sapwellime lingan.

25 Eri met kitail awiawihete pwe kitail en rong rohng kapereno eh pahn pakair ong kitail sang rehn tohnleng kan, duwen sapwellime ketido; pwe ahnsouo kohkohdo, kitail sohte ese ia uwen keren. I mentehn Koht en wia nan ei rahn akan; ahpw ma e pil wiawi anhsou keren de pwand, I pahn pereperenkihte.

26 Oh e pahn kasansalohng ohl pwung oh sarawi kan, sang rehn tohngleng kan, ni ahnsou en sapwellime ketido, pwe mahsen akan en atail pahpa kahlap ako en kak pweida, nin duwen dahme re koasoiadahr duwen ih, me sang nin duwen ngehn en kokohp me kin ieiang irail.

27 Oh met, riei ohl ako, I inengieng sang nan kapehdiet unsek, ei, sang ni ei pwunod laud me kaweikek, pwe kumwail en rong ei koasoi kan, kesehsang kumwail dipamwail akan, oh dehr kasakasaula rahn en amwail koluhla;

28 Ahpw kumwail en aktikitikla mwohn Kauno, oh ekerki ni mware sarawio, oh kalapw mwasamwasahn oh kapakap, pwe kumwail en dehr ahneki koasongosong laud sang uwen me kumwail kakohng, oh Ngehn Sarawi en kahluwa kumwail, pwe kumwail en wiahla aramas aktikitik, mpai, me kin mweidala nsene, kanengamah, diren limpoak oh nannanti nan apwal koaros;

29 Oh pwoson Kauno; ahneki koapworopwor me kumwail pahn alehdi mour soutuk; ahneki limpoak en Koht ahnsou koaros nan mohngiongamwail kan, pwe kumwail en kak kohdahla ni imwin rahno oh pidelong nan sapwellime wasahn kommoal.

30 Oh Kauno en ketin mweidehng kumwail en koluhla, pwe kumwail en dehr elehda sapwellime engieng pohmwail, pwe kumwail en dehr lohdi nan selmete en ehl, pwe kumwail en dehr mehkihla mehla keriauo.

31 Oh Alma koasoiahiong aramas akan mahsen tohto, me sohte ntingdi nan pwuhk wet.