1 Oh met kedekedeo ni tepidahn pahr silihsek en mwehin sounkopwung kan, ni keriau en rahn en keieu en sounpungo, Moronai alehdi kisin likou ehu sang rehn Ilemen, me koasoiahda irair en aramas akan ni apali sahpwo.

2 Oh iet mahsen akan me e ntingihdi, me mahsanih: Moronai, riei ohl kesempwal rehn Kauno oh pil nan ahnsou apwal en atail mahwin; kilang, riei ohl kesempwal, I men koasoiahionguhk ekis duwen atail mahwin wasaht ni pali en sahpw wet.

3 Kilang, pwutak riekid me wia nein aramas me Amon kahrehdo sang nan sahpw en Nihpai—eri ke wehwehkier me irail wia kadaudok en Leimen, me wia nein atail pahpa Lihai pwutak keieu laud;

4 Eri I sohte anahne pwurehng koasoiahionguhk duwen arail tiahk de arail soupwoson, pwe ke wehwehkier duwen mepwukat koaros—

5 Eri e itarete I en ndahwei me mwahnakapw riekid pwukat alehdahr neirail dipwisou en mahwin kan, oh irail men I en wia arail kaun; oh se kohdo iang doare atail wehi.

6 Oh met ke pil wehwehkier duwen inou me arail pahpa kan wiadahr, me re sohte pahn alehda dipwisou en mahwin kan pwe re en kakerehdi ntahn riarail kan.

7 Ahpw nan pahr rieisek wenou, ahnsou me re kilangada atail lokolok kan oh atail kahpwal akan pwehki irail, re apwtehn pahn kawehla inouo me re wiahda oh alehda neirail dipwisou en mahwin kan pwe re en doare iang kitail.

8 Ahpw I sohte men mweidehng irail en kawehla inou wet me re wiahda, pwehki I medewe me Koht pahn kakehlakahla kitail, me pahn kahrehda kitail sohte pahn lokolok laud pwehki pweidahn inouo me re wiahda.

9 Ahpw kilang, iet ehu mehkot me kitail kak perenki mehlel. Pwe kilang, nan pahr rieisek wenouo, ngehi, Ilemen, kahrehda karihs en mwahnakapw riekido kohla nan kahnihmw en Sudia, pwe sen sowese Andipus, me ke idiada en kaun aramas akan ni pali en sahpwo.

10 Oh I kapatahiong nei pwutak riekido, (pwe re warohng I en ekerkinirail nei pwutak) nein Andipus sounpei kan, me kakehlakahda Andipus ni eh peren mehlel; pwe kilang, nah sounpei ko malaulaulahr pwehki Mehn Leimen kan kemehlahr tohto neitail ohl akan, me kahrehda kitail pahn mwahieiki.

11 Ahpw, kitail kak ahneki popohl nan irair wet, pwe irail mehkihla doadoahk en arail wehi oh arail Koht, ei, oh irail peren.

12 Oh Mehn Leimen kan saliedier tohto irail, koaros me wia kaun lapalap en sounpei kan, pwe sohte likin irail me re kamaurala. Oh se medewe me ahnsou wet re mihmiher nan sahpw en Nihpai; iei met mehlel ma re sohte kamakamala.

13 Oh met iet kahnihmw kan me Mehn Leimen kan kalowehdi sang ni arail kemehkihla tohto neitail ohl komwad kan:

14 Sahpw en Mandai, de kahnihmw en Mandai, oh kahnihmw en Sihesrom, oh kahnihmw en Kumenai, oh kahnihmw en Andipara.

15 Oh ih kahnihmw pwukat me re kalohwehdi ahnsou me I lelledo nan kahnihmw en Sudia; oh I diarada Andipus oh nah ohl akan ar nannantihong nan arail doadoahk en kakehlakahla kahnihmwo.

16 Ei, oh irail pwangahdahr ni paliwar oh pil ni palingehn, pwe irail komwad en pei nan ehu ehu rahn oh nihpwong irail loaloapwoat en doadoahk pwe irail en kak kolokolete arail kahnihmw kan; oh met kahrehda ar lokolongki soangen kahpwal lap kan.

17 Eri met re koasonehdi me re pahn pweida wasahu de mehla; eri kitail kak medewe me kisin pwihn me I wahdohu, ei, nei pwutak ko, kihong irail koapworopwor laud oh peren mehlel.

18 Oh met kedekedeo ahnsou me Mehn Leimen kan kilangadahr Andipus alehdier kakehlepen nah sounpei kan, a re alehdi ruwes sang Amoron me re sohte pahn kohdohng kiht nan kahnihm en Sudia, de kodo mahwiniong kiht.

19 Oh met se ahpw kenikenla rehn Kauno; pwe ma re pahn kohdohng kiht nan aht luwet irail mwein kakete kawehla nait kisin sounpei ka; ahpw iei se poadoandoarla.

20 Re alehdi ruwes sang rehn Amoron me re pahn koledihte kahnihmw kan me re kalowehdi. Oh met kaimwsekalahr pahr rieisek wenou. Oh ni tepidahn pahr rieisek isuho se ahpw kaunopada aht kahnihmwo oh pein kiht pwe sen doare.

21 Met se inangih me Mehn Leimen kan en kohdohng kiht; pwe se sohte inangih mahwiniong irail ni ar pahn mihmi nan wasahn sileparail kehlail kan.

22 Kedekedeo se ahpw kadarpeseng soun lipoahrok kan kapilpene wasahu, pwe re en tetehk mwekmwekid en Mehn Leimen kan, pwe re sohte pahn koteikihtla nihpwong de nihrahn pwe re en mahwiniong aht kahnihmw teikan me mihmih paliepeng.

23 Pwe se wehwehki me nan kahnihmw ko, irail sohte ahneki kehlail me pahn itar en pelian irail; eri se inangih mahwiniong irail mwurirail oh pil ni ansouohte mwohrail, ma irail pahn kohdo daulih kiht. Se medewe me se kak poweiraildi; ahpw kilang, se insensuwedkihla ineng wet e sohte pweida.

24 Irail sohte men neirail sounpei kan pwon en kohdo daulih kiht, de pil ekei irail, pwe re de sohte itar oh lohdi.

25 De pil men karihsdihla nan kahnihmw en Saraemla; de pil kotehla wasa me Saidon keredohsang, kohtehla lel kahnihmw en Nihpaia.

26 Oh met re koasonehdi me re pahn koledihte kahnihmw kan me re kalowehkihdi neirail sounpei kan.

27 Oh met kedekedeo ni keriau en sounpwung en pahro, mie sawas kei me wisikdohng kiht sang rehn nei pwutak riekido arail pahpah kan.

28 Oh pil sounpei meh riekid kohdo sang nan sahpw en Saraemla. Oh met se kaunopadahr nait ohl meh nen, oh kenerail mwonge kan, oh pil ong arail pwoud kan oh neirail seri kan.

29 Oh Mehn Leimen kan, pwehki ar kilikilang nait sounpei kan arail wie tohtohla rahn koaros, oh sawaseparail kan kin kohdong irail, re tepida masepwehkada, oh tepida kin kohdohng kiht, ma e pahn kak re en kauhdihsang kiht alehdi aht sawas kan oh kakehlail kan.

30 Eri ahnsou me se kilangadahr me Mehn Leimen kan tepidahr soansuwedki mwekid wet, se ahpw medewehda wiahda koasondi ehu me pahn mie lipwe rehrail; eri Andipus ndaiong ie me I pahn karehda nei pwutak pwulopwulko oh kohla ni ehu kahnihmw me mih mpat ni aht pahn mwomwen me se wewa sawasepen kahnihmwo.

31 Oh se pahn keid limwahn kahnihmw en Antipara, mwomwen me se pahn kohla ni kahnihmw me mih palio, ni keilen oaroahro.

32 Oh kedekedeo se ahpw karihs kohla nan kahnihmwo, ni mwomwen me se wa aht sawas akan.

33 Kedekedeo Andipus ahpw kahrehdahr ekei nah sounpei ko oh karihs kohla, a luhwehko mihmih nan kahnihmwo. Ahpw e sohte kohla lao nei kisin sounpei ko tihengla, oh kohla karanih kahnihmw en Andipara.

34 Eri met, nan kahnihmw en Andipara nein Mehn Leimen pwihn en sounpei keieu kehlail kin sinsile mwo; ei, me keieu pokon.

35 Kedekedeo ahnsou me neirail lipoahrok kan ndahiong irail, irail ahpw kohieido iangahki neirail sounpei ko oh pwakih kiht.

36 Kedekedeo se ahpw tangasang irail, kohla paliepeng. Oh met se ahpw kahluwahsangehr nein Mehn Leimen pwihn sounpei me keieu kehlail;

37 Ei, uwen dohlahieu, kahrehda ahnsou me re kilangada nein Andipus sounpei kan wia arail kak koaros en pwakipwakih irail, irail sohte pirekekla pali koahiek de pali soakoahiek, ahpw re kohweite nan ar pwepwekio nan ahl inen mwurit; oh, se medewe, me re inangih re en kemeikihtla mwohn Andipus pahn koliraildi, pwe nait aramas kan dehr kapil irailpene.

38 Eri met pwehki Andipus eh kilangadahr keper me se mih loale, e ahpw kamwadangahieng nah sounpei kan. Ahpw kilang, e nihpwongdi; eri re sohte kolkihtdi, oh pil Andipus sohte koliraildi; eri se ahpw pweidi nihsoutuko.

39 Kedekedeo mwohn e pahn nimensengda, kilang, Mehn Leimen kan ahpw tepida pwakpwakih kiht. Eri se sohte pahn kak pelian irail; ei, oh I sohte men mweidehng nei pwutak tikitik kan en pwupwidi nan pehrail kan, eri se peusehla aht tango, oh se ahpw kohkohla nan sapwtehno.

40 Eri re sohte men sohpeila pali koahiek de pil pali soakoahiek pwe re de lohdi; oh I pil sohte men sohpeila pali koahiek de pil pali soakoahiek pwe irail de kolkihtdi, oh se sohte pahn kak pelian irail, ahpw se pahn kamakamala, oh irail pahn kak pitila; oh se ahpw tangatang rahno pwon nan sapwtehno, lao e rotorotala.

41 Kedekedeo ahnsou me e pwurehng marainpeseng se kilangada Mehn Leimen kan kohkohdohng kiht, oh se pwurehng tangasang irail.

42 Ahpw kedekedeo re uhdi pwakih kiht ahnsou werei; oh met iei ni menseng en kesiluh en rahn en keisuhn sounpwungo.

43 Oh met, ma Andipus koliraildier se sohte ese, ahpw I ndaiong nei ohl akan: Kilang, kitail sohte ese ma irail sou uhdi pwe re men kitail en pwuralahng irail, pwe irail en kaloweikitaildi nan arail lidip;

44 Eri dahme kumwail pahn nda, nei pwutangko, kumwail pahn kak kohla oh mahwiniong irail?

45 Oh met I ndaionguhk, riei ohl kesempwal Moronai, me I sohte kin kilang soangen eimah lap wet, soh, sohte rehn Mehn Nihpai kan koaros.

46 Pwe ni ei kin kalapw ekerkin irail nei pwukat kan (pwe irail koaros me pwulopwul) iei re ahpw pil ndaiong ie: Pahpa, kilang atail Koht ieiang kitail, oh e sohte pahn mweidehng kitail en pwupwidi; eri kitail kohwei; kitail sohte pahn kemehla riatail akan ma re pahn uhdihsang kedirapwa kitail; eri kitail kohwei, pwe re de kalowehdi nein Andipus sounpei kan.

47 Eri re saikinte iang mahwin pak ehu, ahpw re sohte masak mehla; oh re kesempwaliki saledek en arail pahpa kan sang pein arail mour; ei, arail nohno kan kaweidkinirail, ma re pahn sohte peikasal, Koht pahn doareirailla.

48 Oh re kin kapwkapwurehiong ehn arail nohno kan koasoi, ndinda: Se sohte peikasal, aht nohno kan ese.

49 Kedekedeo ngehi eri pwurala iangahki nei sounpei riekido pwe sen pelian Mehn Leimen kan me pwakipwakih kiht. Eri kilang, nein Andipus sounpei kan konoiraildier, oh mahwin keper ehu apw tepida.

50 Oh nein Andipus sounpei kan pwehki arail pwangadahr, sang ni arail pwakih iraildo sang wasa doh nan erein ahnsou mwotomwot, re kereniong lohdieng pahn manaman en Mehn Leimen kan; oh ma I sohte pwurikihdo nei sounpei riekido irail pahn pahn pweidahr nan dahme re mwahuki.

51 Pwe Andipus kamakamkilahr kedlahs, oh tohto nah kaun en sounpei kan, pwehki arail pwangada, sang ni ar seimek nan ar pwepwekio—eri nein Andipus ohl akan, pwehki ar pingkidahr arail kaun kan ar mehla, re tepida pweiek mwohn Mehn Leimen kan.

52 Kedekedeo Mehn Leimen kan ahpw loalapada, oh tepida pwaki irail; eri met Mehn Leimen kan pwakipwakihkin irail ar kehlail ni ahnsou me Ilemen pwarada mwurirail iangahki nah meh riekido, Oh tepida kemeirailla ni mehlel, kahrehda nein Mehn Leimen kan sounpei ko pwon uhdi oh sohpeidohng Ilemen.

53 Met ahnsou me nein Andipus aramas akan kilangada me Mehn Leimen kan pwuralahr mwuri, re ahpw kihpene neirail ohl akan oh kohdohng mwurin Mehn Leimen kan.

54 Oh met kedekedeo kiht, aramas en Nihpai kan, nein Andipus aramas akan, oh ngehi iangahki nei sounpei riekido, kapilpenehr Mehn Leimen kan, oh kemeirailla; ei, lao re idihdiong en pwilikihdi neirail dipwisou en mahwin kan oh pil wiahla aramas selidi sang nan mahwin.

55 Oh met kedekedeo ahnsou me irail mweidala re en mih pahn aht manaman, kilang, I wadekedi irail mwahnakapw kan me iangie mahwin, pwehki ei salohki me tohto irail mwein kamakamala.

56 Ahpw kilang, I perenda mehlel, pwehki sohte emen irail me pwupwidi nan pwehl; ei, oh irail pei duwehte sapwellimen Koht roson ketiket rehrail; ei, sohte ohl men me dehdehki eh mwahwin duwehte soangen roson kapwuriamwei wet; oh soangen manaman kehlail re peikihong Mehn Leimen kan, kahrehda irail kamasakada irail; oh met kahrehda Mehn Leimen kan lohdieng re en wia aramas selidi nan mahwin.

57 Oh sohte dowen nait me selidi kan, pwe sen kak sile irail pwe irail en dehr pwurala rehn nein Mehn Leimen sounpei kan, eri se kin kadarirailla nan sahpw en Saraemla, oh ekei nein Andipus ohl akan me sohte kamakamala, en iangirail; oh luhwehkan I ale irail oh kapatahieng nei mwahnakapw en Mehn Amon kan, oh pwurehng karihs kohla nan kahnihmw en Sudia.