1 Oh ngehi, Alma, alehdier mahsen en Koht me I pahn kahrehda Amulek oh kohla oh pwurehng kalohk ong aramas pwukat, de aramas akan me mih nan kahnihmw en Amonaia, kedekedeo I ahpw tepida kalohkehng irail, irail ahpw tepida akamai ong ie, ndinda:

2 Ihs kowe? Ke medewe me se pahn kamehlele ahn emen aramas ah kadehde, ni eh pahn padahkihongkiht me sampah pahn sohrala?

3 Met irail sohte wehwehki mahsen kan me re koasoia; pwe irail sohte ese me sampah pahn sohrala.

4 Oh irail pil koasoia: Se sohte pahn kamehlele ahmw koasoi kan ma ke kohpada me kahnihmw kehlail wet pahn kamwomwomwla nan rahn ehu.

5 Met irail sohte wehwehki me Koht kak wia soangen doadoahk kapwuriamwei, pwe irail wia aramas mohngiong keptakai oh tepinwar kekeluwak.

6 Oh irail nda: Ihs Koht, me kadaredo aramas emente me sohte ah manaman rehn aramas pwukat, oh en kalohkihong irail mehlel en soahng kesempwal oh kapwuriamwei kan?

7 Oh irail ahpw kesihnenda pwe irail en koliehdi; ahpw kilang, irail sohte kak. Oh I eimah nan ei kesihnen oh kalohkehng irail, ei, I kadehde ong irail ni eimah, ndinda:

8 Kilang, Kumwail dih suwed oh keptakai kei, ia duwen amwail kak monokehla tiahk en amwail pahpahko: ei, ia uwen mwadang en amwail kak monokehla sapwellimen Koht kosonned akan.

9 Kumwail sohte tamataman me atail pahpa, Lihai, wisikdo sang nan Serusalem sang nin limen Koht? Kumwail sohte ese me e ketin kahluwa irail koaros nan sapwtehno?

10 Oh kumwail mwadangen monokehla pak depe me e ketin doarehla atail pahpahko sang pahn manaman en arail imwintihti kan, oh doarehsang irail kamwomwala, iei pil sang pahn manaman en pein riarail kan?

11 Ei, oh ma sohte sampwellime manaman kehlailo, oh spawellime kalahngano, oh sapwellime kanengamah nan lokolongkinkitail, kitail sohte pahn pitsang kamakamalahsang pohn sampah mahso mwohn ahnsou wet, oh ele kohlahngehr nan mour en pahtou poatoapoat oh meid suwed.

12 Kilang, met I ndaiong kumwail me e ketin mahsanihong kumwail en koluhla; oh ma kumwail sohte pahn koluhla, kumwail sohte pahn sohsohki wehin Koht. Ahpw kilang, kaidehn ih koaros met—e ketin mahsanihong kumwail en koluhla, ma soh e pahn udahn ketin kemeikumwail sang pohn sampah; ei, e pahn pwarek kumwail nan sapwellime engieng, oh nin sapwellime engieng e sohte pahn sohpeisang.

13 Kilang, kumwail sohte tamataman mahsen akan me e mahsanihong Lihai, ketihtihki: Nin duwen amwail pahn kin kapwaiada ei kosonned akan kumwail pahn pweida nan sahpwo? Oh e pil mahsanih me: Ahpw ma kumwail sohte pahn kin kapwaiada ei kosonned akan kumwail pahn lekidekla sang mwohn sihlangi.

14 Met I men kumwail en tamataman, me nin duwen Mehn Leimen kan ar sohte kin kapwaiada sapwellimen Koht kosonned akan, irail lekidekla sang mwohng silangin Kauno. Met kitail kilang me mahsen en Kauno pweidahier ni mahsen wet, oh Mehn Leimen kan lekideksangehr mwohn sihlangi, sang ni tepin arail wiahda diparail kan nan sahpwet.

15 Ahpw I ndaiong kumwail, me e pahn ekis mengei ong irail ni rahn en kopwungo sang kumwail, ma kumwail pahn mihmihte nan dipamwail kan, ei, oh pahn pil ekis mengei ong irail nan mour wet sang kumwail, ihte ma kumwail koluhla.

16 Pwe mie inou tohtoh kan me pahn kohieng Mehn Leimen kan; pwehki tiahk en arail pahpahko me kahrehda arail mihmihte nan mour en sawehwe; eri Kauno pahn mahkehng irail oh kareireiala arail momour pohn sahpwo.

17 Oh nan ehu ahnsou irail pahn kamehlelehda sapwellime mahseno, oh esehda tiahk sapwung kan en arail pahpahko; oh irail tohto pahn komourla, pwe Kauno pahn kahkehng irail me pahn kapakapiong ni mware.

18 Ahpw kilang, I ndaiong kumwail ma kumwail pahn wenlahte nan amwail wiewia suwed kan amwail rahn akan pahn sohte reirei nan sahpwe, pwe Mehn Leimen kan pahn kohdohng kumwail; oh ma kumwail sohte pahn koluhla re pahn kohdohng kumwail nan ahnsou me kumwail sohte ese, oh kumwail udahn pahn kamwomwomwala; oh e pahn sang nin engieng en Kauno.

19 Pwe e sohte pahn mweidehng kumwail e momour nan amwail wiewia suwed kan, pwe kumwail en kawehla sapwellime aramas. I ndaiong kumwail, Soh; e pahn mweidehng Mehn Leimen kan en kamwomwla sapwellime aramas en Nihpai kan koaros, ma irail pahn pwupwidieng nan dihp akan oh kaukauwehla kosonned akan, mwurin arail pahn alehdier marain laud oh loalokong laud kohieng irail sang Kauno arail Koht;

20 Ei, mwurin arail wia aramas keniken laud rehn Kauno; ei, mwurin arail kenikenlahsang wehi teikan koaros, keinek koaros, lokaia koaros, oh aramas koaros; mwurin soahng koaros e sansalehng irailehr, nin duwen insenerail kan, oh arail pwoson, oh kapakap akan, ong dahme wiawiher, oh me wiwiawi, oh me pahn kohdo;

21 Mwurin Ngehn en Koht eh pwarek irailehr; mwurin arail koasoiengehr tohnleng kan, oh mwurin kepitien Kauno mahseniong irailehr; oh irail alehdier ngehn en kokohp, ngehn en kaundiahl, oh pil kisakis tohto kan, kisakis en koasoakoasoiki lokaia teikan, oh kisakis en kalkalohk, oh kisakis en Ngehn Sarawi, oh kisakis en kawehwehdi lokaia;

22 Ei, oh mwurin Koht e ketin wairailsang nan sahpw en Serusalem, sang nin limen Kauno; mwurin arail kamourla sang lehk, oh sang luhmwuhmw, oh soangsoangen soumwahu kan koaros; oh irail kakehlailla nan mahwin, pwe irail en dehr kamakamala; mwurin arail kapitsangehr nan mour en kalidu nan ahnsou kan, oh mwurin arail silasildi oh poadoandoarla lel met; oh irail pweida lao irail kepwehpwehla nan soahngen dipwisou koaros—

23 Oh met kilang I ndaiong kumwail, ma aramas pwukat, me alehdier kapai tohto kan sang nin limen Kauno, pahn wiahda dihp ong marain oh loalokong me irail alehdier, I ndaiong kumwail ma met pahn wiawi, ma re pahn pwupwidi nan dihp, e pahn ekis mwahuong Mehn Leimen kan sang irail.

24 Pwe kilang, sapwellimen Kauno inou kan kaunopehngehr Mehn Leimen kan, ahpw e sohte pahn kohieng kumwail ma kumwail wiahda dihp; pwe Kauno sou kin inouki ni sansal oh mahsanih ni inen, me ma kumwail pahn uhwong ih kumwail udahn pahn kamwomwalahsang pohn sampah?

25 Eri pwehki kahrepe wet, me kumwail sohte pahn kamwomwkihla, Kauno ketin kadaredo sapwellime tohnleng en pwarek sapwellime aramas tohto, kalkalohkihong irail me re pahn anahne kohwei oh kalohk kehlail ong aramas pwukat, ndinda: Kumwail koluhla, pwe wehin nanleng kerendohr;

26 Oh ahnsou kerendohr me Sapwellimen Kohto pahn ketido nan sapwellime lingan; oh sapwellime lingan pahn sang lingan en Iehros en Sahmo, diren kalahngan, pahrek, oh mehlel, diren kanengamah, mahk, oh kanengamah nan lokolok, kin mwadang en rong pekipek en sapwellime aramas akan oh sapeng arail kapakap akan.

27 Oh kilang, e pahn ketido pwe en kamaurala irail akan me pahn papidaisla sang ni ar koluhla, pwehki ar pwoson mwareo.

28 Eri, kumwail kaunopada ahl en Kauno, pwe ahnsou kerendohr me aramas koaros pahn ale isepen arail doadoahng kan, nin duwen dahme irail wia—ma irail wiewia pwung irail pahn ale komourla ong palingenerail akan, nin duwen manaman oh komour en Sises Krais; oh ma irail wiewia suwed irail pahn ale lekideklahn palingenerail akan, nin duwen manaman oh kalidu en tepilo.

29 Met kilang, iet kepitien tohnlengo, me kalikalohngkihong aramas akan.

30 Oh met, riei ohl kesempwal akan, pwe kumwail iei riei, oh kumwail kesempwal, oh kumwail anahne kohdo wia doadoahk kan me konehng ong koluhla, pwehki amwail mohngiong kan udahn keptakaila ong mahsen en Koht, oh pwehki kumwail aramas salongala oh pwupwidi.

31 Met kedekedeo ahnsou me ngehi, Alma, koasoiahier mahsen pwukat, kilang, aramas ko lingeringerda pahi pwehki ei ndaiong irail me re wia aramas mohngiong keptakai oh tepinwar kekeluwak.

32 Oh pil pwehki ei ndaiong irail me re wia aramas salongala oh pwupwidi irail udahn lingeringer pahi, oh song en koliehdi, pwe irail en kak keseiehlong nan imweteng.

33 Ahpw kedekedeo Kauno sohte mweidehng irail en aleie ahnsouo oh keseiehlong nan imweteng.

34 Kedekedeo Amulek kohla oh kesihnenda, oh pil tepida kalohk ong irail. Oh met mahsen kan en Amulek sohte ntingdi ni unsek, ahpw ekei eh mahsen kan me ntingdi nan pwuhk wet.