1 Eri samwa, iet ekei me I pil men ndaionguhk; pwe I kasawih me ahmw madamadau pwunodki duwen iasadahn me melahr akan.

2 Kilang, I ndaionguhk, me iasadao sohte pahn wiawi—de, I pahn nda, met wehwehki, me paliwar en sampah wet sohte pahn kieweklahng paliwar poatopoat, ei paliwar me pahn mwerpeseng wet, e sohte pahn kieweklahng me sohte pahn mwerepeseng—lao lel mwurin ketidohn Krais.

3 Kilang, ih me pahn ketikihda iasadahn me melahr akan. Ahpw kilang, samwa, iasadao saikinte wiawi. Met, I pahn kasalehionguhk ehu padahk rir; ahpw, mie padahk rir tohto me wie nekinek, me sohte me ese ihte pein Koht me ketin mwahngih. Ahpw I pahn kasalehionguhk mehkot me I peki ni ngidingid rehn Koht pwe I en kak ese—me pid duwen iasadao.

4 Kilang, mie ahnsou ehu me kileldier, me aramas koaros pahn iasada sang mehla. Ahnsou wet sohte me ese iahd; ahpw Koht me ketin mwahngih ahnsou me kileldiero me e pahn wiawi.

5 Eri, sohte mwahn katepe ma e pahn wiawi pak ehu, de pak riau, de pak siluh, me aramas akan pahn iasada sang mehla; pwe Koht mwahngih mepwukat koaros; oh I itariki ei ese me iet dahme pahn wiawi—me mie ahnsou ehu me kileldier me aramas koaros pahn iasada sang mehla.

6 Eri e pahn konehng en mie ahnsou ehu nanpwungen ansou me aramas mehla oh ansou me re pahn iasada.

7 Oh met I pahn kalelapak dahme pahn wiawi ong ngenen aramas akan mwurin ahnsou me re mehla lel ahnsou me koasoandi ong iasadao?

8 Eri, mehndahte ma e tohto sang pak ehu me kileldier ong aramas kan re en iasada; pwe koaros sohte pahn mehla ahnsoutehkis, oh met sohte katepe; pwehki soahng koaros duwehte rahn teieu rehn Koht, oh sosohngpen ahnsou kin wiawi ongete aramas.

9 Eri, mie ahnsou ehu me kileldier ong aramas akan me re pahn iasada sang mehla; oh mie ahnsou ehu nanpwungen ahnsou me aramas mehla oh iasada. Oh met, pid duwen ahnsouo, dahme kin wiawihong ngehn en aramas kan iei ih met me I peki ni ngidingid rehn Kauno pwe I en ese; oh iet dahme I eseier.

10 Oh ni ahnsouo e pahn leledo me aramas koaros pahn iasada, eri irail pahn esehda me Koht ketin mwahngih koasoandi en ahnsou kan koaros me kileldier ong aramas.

11 Eri, me pid duwen ngehno nanpwungen mehla oh iasada—Kilang, tohnleng men kasalehiong ie, me ngehn en aramas koaros, ni ahnsouohte me irail kin mweselsang nan paliwar en mour wet, ei, ngehn en aramas koaros, mehndahte ma re mwahu de suwed, re kin kopwurupwurla rehn Koht me ketikihong irail mour.

12 Oh e ahpw pahn wiawi, me ngehn en irail akan me mwahu pahn kasamwolong nan mour peren, me kahdaniki paradais, mour en kommoal, mour en popohl, wasa me re pahn kommoal sang arail kahpwal kan oh sang kapwunod koaros, oh pahtou koaros.

13 Oh e ahpw pahn wiawi, me ngehn en me suwed kan, ei, irail me suwed—pwe kilang, sohte kisehn Ngehn en Kauno rehrail; pwe kilang, irail pilada wia doadoahk suwed kan sang wia me mwahu; eri ngehn en tepilo pidelong loalerail, oh kousoanla nan imwarail—oh re pahn lekdeklahng nan wasa rotorot mosul; oh re pahn sengiseng, oh weriwer, oh ngihrail kan tehtehrek, oh met pwehki arail wiewia suwed kan, pwehki arail idawehnla ineng en tepilo.

14 Met iei duwen ngehn en me suwed kan, ei, nan rotorot, oh irair apwal, kasikasik ni ar masak, engieng en Koht me rasohng karakar en kisiniei pohrail; eri re pahn mihmi nan soungen irair wet, oh me mwahu ko nan paradais pahn mihmihte nan irairo, lao lel ahnsou en iasadao.

15 Met, mie ekei me kin kawehwe me irair en peren oh irair en pahtou wet en ngehno, mwohn eh iasadao, iei keieu en iasada. Ei, I pohnese me e kakete kahdaniki iasada, me iei kodahn ngehno de palingehno oh koasoandi en ar peren de pahtou, nin duwen mahsen kan me sansalehr.

16 Oh kilang, e pil sansalehr, me mie keieu en iasada, iasadahn irail koaros me melahr, de me momour met, de me pahn ipwidi, lao lel ni ahnsou me Krais pahn iasada sang mehla.

17 Met, kitail sohte lemeleme me keieu en iasada wet, nin duwen me sansalehr ni mwohmw wet, kak en wia iasadahn palingehn kan oh koasoandi en ar peren de pahtou. Kitail sohte kak lemeleme me ih wehwehn met.

18 Kilang, I ndaionguhk, Soh; ahpw e wehwehki pwurpenehn palingehn oh paliwar, ong irail akan sang ni ahnsoun Adam kohdo lel iasadahn Krais.

19 Met, I sohte nda ma palingehn oh paliwar en irail akan me koasoiepe sansalehr, me suwed oh me mwahu, pahn pwurpene ahnsou teieu; E itar I en nda me irail koaros pahn pedoisang nan arail sousou kan; de met wehwehki, arail iasadao pahn wiawi mwohn iasadahn irail akan me mehla mwurin iasadahn Krais.

20 Eri, samwa, I sohte nda me arail iasadao pahn wiawi ni ahnsoun iasadahn Kraiso; ahpw kilang, sang pein ei lamalam, I nda me palingehn oh paliwar en me mwahu kan pahn pwurpene ni ahnsoun iasadahn Krais, oh ni eh pahn ketidahla nanleng.

21 Ahpw I sohte nda ma e pahn wiawi ni e pahn ketin iasadao de mwuhr; ahpw iet uwen dahme I pahn nda, me mie ahnsou ehu nanpwungen mehla oh iasadahn paliwar, oh irair en peren de pahtou en ngehno lao lel ahnsou me Koht ketin kilelehdi me melahro pahn pedoisang nan arail sousou kan, oh ngehno oh paliwaro pwurpene, oh pakahrdohng mwohn silangin Koht, oh pakadeingkihda arail wiewia kan.

22 Ei, met pahn elehiong kopwurupwurdohng soahng kan me soukohp akan lohkidahr.

23 Pali ngehno pahn pwuralahng paliwaro, oh paliwaro pwuralahng pali ngehno; ei, peh oh neh oh kakon kan koaros pahn kopwurupwuralahng ni paliwaro; ei, iei sohte apwoat pitenmoange pahn salongala; ahpw soahng koaros pahn kopwurupwuralahng ni pwungen dewe oh kakon unsek.

24 Eri, samwa, iei met kopwurupwurdo me soukohp akan koasoiaier—

25 Oh me mwahu kan ahpw pahn lingalingla nan wehin Koht.

26 Ahpw kilang, mehla kamasepwehk ehu pahn kohdohng me suwed kan; pwehki irail pahn mehkihla soang kan me pid duwen mour pwung; pwe irail samin, oh sohte mehkot samin kak sohsohki wehin Koht; ahpw irail pahn lekdekla, oh kohlahng ale wahn arail doadoahk kan de arail wiewia kan, me iei doadoahk suwed; oh irail pahn nimala mwoarok en kep katiko.