1 Kedekedeo nanmwarki Lemonai mahsanihong sapwellime ladu kan re en kesihnenda oh kadehdehda soahng koaros me irail kilang wiawi nan irair en ansouo.

2 Oh ni ahnsou me irail kadehdehier soahng kan me irail kilang, oh e ahpw mwahngiadahr en Amon eh loalopwoat en doarehla sapwellime pelin mahn akan, oh pil eh koahiek kehlail en peiong irail akan me song en kemehla, e pwuriamweikihla kowahlap, oh mahsanih: Mehlel, met kaidehn aramas men. Kilang, kaidehn ih Enihlapo met me kin kadarodo kalokolok laud ong aramas pwukat, pwehki arail kin kemehla aramas akan?

3 Oh irail sapeng nanmwarkio, oh patohwan: Ma ih Enihlap de aramas emen, se sohte ese; ahpw ih uwen met me se ese, me e sohte kak kamakamala pahn sapwellimen mwohnsapwoko imwintihti kan; oh pil re sohte kak pwakihpeseng sapwellimen mwohnsapwoko pelin mahn akan ma e pahn ieiang kiht, pwehki e koahiek oh kehlail mehlel; eri, se patohwan me e wia kempoakepahn mwohnsapwoko. Oh met, maing mwohnsapwoko, se sohte kamehlele me aramas emen tungoalenki soangen manaman lap wet, pwe se patohwan me e sohte kak kamala.

4 Eri, met ni ahnsou me nanmwarkio karongehier mahsen pwukat, e ahpw mahsanihong irail: Met I esehier me iei Enihlapo met; oh e ketidihdo ahnsou wet pwe en doarehla amwail mour kan, pwe I en dehr kemeikumwailla nin duwen ei wiahiongehr riomwail akan. Eri met iei Enihlapo me atail pahpa kahlap ako kin koasoia.

5 Met iei tiahk en Lemonai, me e alehdi sang semeo, me dene mie Enihlap men. Mehndahte arail kamehlele Enihlap, irail kin medewe me mehkoaros me irail kin wia me pwung; ahpw, Lemonai tepida masepwehk kowahlap, e masepwehngki e kin wiahda sapwung ni ahnsou me e kemehla sapwellime ladu ko;

6 Pwe e ketin kemehlahr tohto irail pwehki riarail akan ar kin pwakihpeseng neirail pelin mahn akan wasahn kanimpilo; oh pwehki neirail pelin mahn akan ar kin tangpeseng a irail kin kamakamala.

7 Met e kin wia ehu mwekid en Mehn Leimen pwukat en mih limwahn pihl en Sihpus pwe re en pwakihpeseng nein aramas pelin mahn akan, pwe re en kak karawanpeseng me tohto me kin uhd tangalahng nan sapwarail akan, ih mwomwen arail kin kulih irail.

8 Kedekedeo nanmwarki Lemonai keinemwe rehn sapwellime ladu ko, ketihtihki: Ia ohl menet me ahneki soangen manaman kehlail wet?

9 Oh irail patohwanohng ih: Kilang, e wie kamkamwenge sapwellimahr oahs akan. Nanmwarkio ketin mahsanihongehr sapwellime ladu ko, mwohn arail kohla kanampile neirail pelin mahn oko, me irail pahn kaunopada sapwellime oahs akan oh werennansapw akan, oh wahla ih nan sahpw en Nihpai; pwe semen Lemonai, me wia nanmwarki en sahpwo pwon koasoanehdier me kamadipw lap ehu pahn wiawi nan sahpw en Nihpai.

10 Met ni ahnsou me nanmwarki Lemonai rongada me Amon wie kaukaunopada sapwellime oahs kan oh sapwellime werennansapw akan e pil pwuriamweila mehlel, pwehki en Amon loalopwoat, e ahpw mahsanih: Mehlel me sohte emen nei ladu nanpwungen nei ladu kan me loalopwoat mehlel duwehte ohl menet; pwe e tamataman en kapwaiada ei kosonned kan koaros.

11 Met I esehier me Enihlapo met, oh I men en ketilongodo rehi, ahpw I saloh.

12 Kedekedeo ni ahnsou me Amon kaunopadahr sapwellimen nanmwarikio oahs kan oh werennansapw kan oh sapwellime ladu kan, e ahpw patohlongala rehn nanmwarkio, oh kilangada me pohn wasa ilehn nanmwarkio wekilahr; eri ni ah pahn pidohilahsang wasahu.

13 Oh emen sapwellimen nanmwarkio ladu ko ndaiong ih, Rapana, me wehwehki, me lapalap de nanmwarki lap, nin duwen arail kin medewe me arail nanmwarki kan me lapalap; eri e ahpw ndaiong ih: Rapana, nanmwarkio kupwuriki ke en mihmi.

14 Eri Amon sohpeilahng nanmwarkio, oh patohwanohng ih: Dahme komwi kupwuriki I en wia ong komwi, Maing wasalapalap? Oh nanmwarkio sohte ketin sapeng ih erein awa ehu, nin duwen arail wadek ansou, pwe e sohte mwahngih dahme e pahn keinemwe reh.

15 Eri, Amon ahpw patohwanong ih: Dahme komw kupwuriki sang rehi? Ahpw nanmwarkio sohte ketin sapeng ih.

16 Kedekedeo pwehki Amon audaudkihda Ngehn en Koht, eri e ahpw kasawihda sapwellimen nanmwarkio madamadau kan. E ahpw patohwanohng ih: Kaidehn pwehki omw karongehda me I doarehla sapwellimahr ladu kan oh sapwellimahr pelin mahn akan, oh kemehkihla riarail meh isimen nei pahi oh kedlahs, oh pelehsang pehn ekei irail, pwe I en kak doarehla sapwellimahr pelin mahn kan oh sapwellimahr ladu kan; kilang, iei met me kahrehda omwi pwuriamwei?

17 I ndaiong komwi, ia duwe, dahme komw nohn pwuriamweiki? Kilang, ngehi aramas men, oh ngehi iei sapwellimahr ladu; eri, I pahn kapwaiada mehkoaros me komwi kupwuriki me pwung.

18 Ni ansou me nanmwarkio karongehier koasoi pwukat, e pwurehng pwuriamweiki, pwe e kilang me Amon kak kasawih eh madamadau kan; ahpw mehndahte met, nanmwarki Lemonai mahsenda, oh keinemwe reh: Ihs komwi? Komwi iei Enihlapo, me mwahngih soahng kan koaros?

19 Amon ahpw sapeng oh patohwanohng ih: Kaidehn ngehi ih.

20 Eri nanmwarkio mahsanih: Ia mwomwen omw mwahngih pepehm kan en nan ei mohngiong? Komw mahsen ni eimah, oh mahsanihong ie duwen mepwukat; oh pil mahsanihong ie duwen sang ni manaman dah me komwi pelehsang pehn riei kan me kin pwakihpeseng nei pelin mahn kan—

21 Eri, ma komw pahn kak mahsanihong ie duwen mepwukat, I pahn kihonguhk soahng koaros me komw kupwuriki; oh ma komw anahne, I pahn silehkin komwi nei sounpei kan; ahpw I ese me komw kehlail sang irail koaros; ahpw, I pahn mweidohng komwi soahng koaros me komw kupwurki.

22 Eri, met pwehki Amon eh loalokong, ahpw sohte keper, e ahpw patohwanong Lemonai: Komw pahn karonge ei koasoi kan ma I pahn ndaiong komwi sang ni manaman dah me I kak wiahki mepwukat? Oh met iei dahme I mwahuki sang rehmwi.

23 Oh nanmwarkio ahpw ketin sapeng ih, oh mahsanih: Ei, I pahn kamehlele omw mahsen kan koaros. Oh met e ahpw lohdier nan koasondio.

24 Eri, Amon tepida koasoi ong ih ni eimah, oh ndaiong ih: Komw kamehlele me mie Koht?

25 E ahpw sapeng, oh mahsanih ong ih: I sohte ese ia wehwehn men.

26 Amon ahpw nda: Komw kamehlele me mie Enihlap?

27 Ih eri sapeng, Ei.

28 Oh Amon nda: Met iei Koht. Oh Amon pwurehng potowanong ih: Komw kamehlele me Enihlap, me iei Koht, me ketin kapikada soahng koaros me mih nanleng oh nin sampah?

29 E ahpw mahsanih: Ei, I kamehlele me e ketin kapikada soahng koaros nan sampah; ahpw I sohte ese duwen nanleng.

30 Oh Amon ahpw patohwanohng ih: Nanleng iei wasa me Koht kin ketiket ie oh pil sapwellime tohnleng sarawi kan.

31 Oh nanmwarki Lemonai keinemwe: E mih pohnangin sampah?

32 Oh Amon nda: Ei, oh e kin ketin mahmahsendiong pohn aramas akan koaros; oh e mwahngih madmadau oh ineng en mohngiong koaros; pwe sang nin lime me soahng koaros kepikipikihda sang ni tapio.

33 Oh nanmwarki Lemonai mahsanih: I kamehlele mepwukat koaros me ke koasoiahier. Ke pekederdo sang rehn Koht?

34 Amon ahpw patowanong ih: Ngehi aramas men; oh aramas kepikipikda ni mwohmw en Koht sang ni tapio, oh I alehdi malipilip sang sapwellime Ngehn Sarawi, I en padahkihong mepwukat aramas akat, pwe irail en kak wehwehkihda dahme pwung oh mehlel;

35 Oh kisehn Ngehno kin ketiket rehi, me kin ketikihong ie marain, oh pil manaman sang ni ei pwoson oh ineng kan me mih rehn Koht.

36 Eri met, ni ahnsou me Amon ndahier mahsen pwukat, e tepida padahk sangete ni kepikipikdahn sampah, oh pil kepikipikdahn Adam, oh ndaiong ih duwen soahng kan koaros me pid pwupwudi en aramas, oh koasoiahda oh kasalehiong ih poadopoad kan oh pwuhk sarawi kan en aramas akan, me soukohp akan mahsaniher, lao lel ahnsou me arail pahpa, Lihai mweselsang Serusalem.

37 Oh e pil koasoiahiong irail (pwe e koasoieng nanmwarkio oh sapwellime ladu ko) duwen seiloak me arail pahpa ko wia nan sapwtehno, oh arail lokolok en men mwenge oh men nimpihl koaros, oh arail nsensuwed, oh soahng teikan.

38 Oh e pil koasoiahiong irail duwen kahngohdi kan en Leimen oh Lemuel, oh nein Ismael pwutak kan, ei, arail kahngohdi kan koaros e padahkiong irail; oh e kawehwehiong irail poadoapoad koaros oh pwuhksarawi kan sang ni ahnsou me Lihai mweselsang Serusalem lel ansou wet.

39 Ahpw kaidehn ih koaros met; pwe e kawehwehiong irail duwen koasoandi en poadoandoarlao, me kaunopdahr sangete ni kapikipikdahn sampah; oh e pil padahkiong irail duwen ketidohn Krais, oh sapwellimen Kauno doadoahk koaros e padahkiong irail.

40 Kedekedeo mwurin eh koasoiahier mepwukat koaros, oh kawehwehiongehr nanmwarkio, nahnmwarkio ahpw kamehlele ah koasoi kan koaros.

41 Oh e ahpw tepida kapakap ong Kauno, ketketihtihki: Main Kaun, komw ketin kupwure kalahngan; nin duwen sapwellim reken kalahngan akan me komw ketikihongehr aramas en Nihpai kan, [komw] ketikihong ie, oh nei aramas akan.

42 Oh met, ni ahnsou me e mahsaniher met, e ahpw pwupwudi nan pwehlo, duwehte e mwomwen mehla.

43 Kedekedeo sapwellime ladu ko ahpw ale ih oh patohwanla rehn sapwellime likend, oh kaunehdi pohn pehto; oh e wonohn duwehte me e pwoulahr erein rahn riau oh pwohng riau; oh likendo, oh sapwellime pwutak kan, oh sapwellime serepein kan mwamwahieiki nanmwarkio, nin duwen tiahk en Mehn Leimen kan arail kin mwahieiki arail mehla.