1 Kilang, met kedekedeo aramas en Nihpai kan peren kowahlap, pwehki Kauno ketin doareirailsangehr arail imwintihti kan; eri irail kapingkalahngan ong Kauno arail Koht; ei, oh irail kaisihsol oh kapakap laud, oh irail kaudokiong Koht sang ni peren kowahlapie.

2 Kedekedeo nan kaeisek duwaun sounpar en mwehin sounkopwung kan ong aramas en Nihpai kan, Alma kohdo rehn nah pwutak Ilemen oh idek reh: Ke kamehlele dahme I ndaionguhkehr pid duwen poadopoad kan me wie nekinek?

3 Oh Ilemen sapeng patohwan: Ei, I kamehlele.

4 Oh Alma ahpw pwurehng nda: Ke kamehlele Sises Krais, me pahn ketido?

5 Oh e sapengki: Ei, I kamehlele mahsen kan koaros me ke koasoiadahr.

6 Oh Alma pwurehng ndahiong: Ke pahn kapwaiada ei kosonned akan?

7 Oh e patohwan sapeng: Ei, I pahn kapwaiada omw kosonned kan sang nan mohngiongi unsek.

8 Alma ahpw ndaiong: Meid pai kowe; oh Kauno en ketin kapaiaiuhkada nan sahpw wet.

9 Kilang, mie mehkot me I pahn kohpadahng uhk; ahpw ke sohte pahn mweseiseiki dahme I pahn kohpadahng uhk; ei, dahme I pahn kohpehng uhk sohte pahn kasansalada lao kokohp wet pweida; eri ntingihedi mahsen pwukat me I pahn nda.

10 Oh iet mahsen pwukat: Kilang, nin duwen ngehn en kaudiahl me mi rehi, I kasawiadahr me aramas pwukat, iei Mehn Nihpai kan, sounpar pahpwiki mwurin Sises Krais pahn ketin pwarohng irail, re pahn pwupwudiong nan soupwoson.

11 Ei, oh re ahpw pahn dehdehki mahwen kan oh soumwahu kan, ei, lehk oh kamaramas, iei lao aramas en Mehn Nihpa kan ahpw pahn sohrala—

12 Ei, oh met pahn wiawi pwehki arail pahn pwupwudiong nan soupwoson oh pwupwudiong nan wiewiahn rotorot kan, oh tiahk en nenek, oh soangen wiewia suwed kan koaros; ei, I ndaionguhk, me pwehki arail pahn wiahda dihp mehndahte arail marain lapalap oh loalokong, ei, I ndaionguhk, me sang rahno, iei mwohn dih kapahieu koaros pahn mehla, wiewia suwed kowahlap wet pahn leledo.

13 Oh ahnsou me rahn lapalapo pahn leledo, kilang, ahnsowo nektehn leledo me irail aramas en ahnsou wet, de kadaudok kan me iang wadawadohng aramas en Nihpai kan, pahn solahr iang wadawadohng aramas en Nihpai kan.

14 Ahpw mehmen me pahn luwehdi, oh sohte kamwomwomwla ni rahn lapalap oh kamasepwehko, re pahn iang wadawadohng Mehn Leimen ko, oh irail koaros pahn duweirailla ihte ekei me pahn kahdaniki tohnpadahk en Kauno; oh Mehn Leimen kan pahn pwakih irail lao re pahn sohrala. Oh met, pwehki wiewia suwed, me kokohp wet pahn pweikihda.

15 Kedekedeo mwurin Alma e mahsanihongehr Ilemen soahng pwukat, e kapaiada ih oh pil rie pwutak kan; oh e pil kapaiada sampah ong kamwahupen aramas me mour pwung kan.

16 Oh e ahpw nda: Kauno Koht ketin mahsaniher—Sahpwo pahn keriahla, ei, sahpw wet, ong wehi koaros, keinek koaros, lokaia koaros, oh aramas koaros pahn kamwomwala ni ar pahn dipkihda ar wiewia me suwed; oh e pahn uhdahn wiawi nin duwen dahme I koasoia; pwe iei met keria oh kapai en Koht me pahn lelohng nan sahpwo, pwe Kauno sohte kin kupwurki kisin dihp en mweimweida.

17 Eri mwurin Alma eh koasoiahda mahsen pwukat e ahpw kapaiada mwomwohdiso, ei, koaros me pahn kehlail nan ar lamalam sang ahnsowo kohla.

18 Eri ni en Alma eh wiahier met e ahpw mweseldasang nan sahpw en Saraemla, ni mwomwen me e pahn kohlongala nan sahpw en Melek. Kedekedeo sohla ronge; duwen eh mehla de seridi se sohte ese duwe.

19 Kilang, ih met me se wehwehki duwen ih, me ih ohl poadidi men; oh koasoiepe kohseli nan mwomwohdiso me Ngehno me ketikihdahla nanleng, de Kauno me ketin sarepidi, duwehte Moses. Ahpw kilang, pwuhk sarawi mahsanih me Kauno pein ale Moses; oh se medewe me e ketin alehdahr Alma sang ni ngehno, eri, ih me se sohte eseki duwen eh mehla de duwen eh seridi.

20 Kedekedeo ni tepin pahr kaeisek duwaun mwehin sounkopwung kan ong aramas en Nihpai kan, Ilemen pwarala oh kalohki mahseno rehn aramas ako.

21 Pwe kilang, pwehki arail mahwen kan ong Mehn Leimen kan oh kisin uhpene kan oh pingiping kan me kin wiawi nanpwungen aramas ako, e kin kesempwal me mahsen en Koht pahn kin pwurehng kalohkihong irail, ei, oh me doadoahk en mwomwohdiso pwurehng koasoansoandi.

22 Eri, Ilemen oh rie kan pwurehng kohkohseli oh pwurehng koasoanehdi mwomwohdiso nan sahpwo, ei, nan kahnihmw koaros nan sahpwo me aramas en Nihpai kan sapwasapw ie. Kedekedeo irail ahpw idihada samworo kan oh sounpadahk kan nan sahpwo pwon, nan mwomwohdiso kan koaros.

23 Kedekedeo mwurin Ilemen oh rie ko idiadahr samworo kan oh sounpadahk kan ong nan mwomwodiso kan a mie pingiping ehu ahpw pwarada nanpwungarail, oh irail sohte men rong en Ileman oh rie ko arail kaweid kan;

24 Ahpw re pohnmwahsola, re mwohnkihte pein irail, pwehki arail inenen kepwehpwe; eri irail kepwehpwehla nan pein meserail kan, oh sohte men rong arail padahk kan pwehn momouriki mour pwung mwohn Koht.