1 Kedekedeo sounpar silihsek pahieu ahpw imwiseklahr, oh pil sounpar silihsek limau, oh kilang tohnpadahk en Sises kan wiadahr mwomwohdisohn Krais nan sahpwo pwo. Oh koaros me kohdo rehrail, oh koluhkihla mehlel diparail kan, kin papidaisla ni mwaren Sises; oh irail ahpw alehdi Ngehn Sarawio.

2 Kedekedeo nan pahr silihsek wenouo, aramas akan koaros weliakapwalahng Kauno, pohn sahpwo pwon, koaros Mehn Nihpai kan oh Mehn Liemen kan, oh sohte pingiping oh akamai nan pwungarail, oh aramas koaros kin doadoahkpene mwahu.

3 Oh irail ahneki soahng koaros duwepenehte nan pwungarail; eri sohte me kepwehpwe oh semwehmwe, de me kalidu oh saledek, ahpw irail kaoros kasaledeklahr, oh alehdier kisakis en nanleng.

4 Kedekedeo sounpar silihsek isuh ahpw pil imwiseklahr, oh popohl pepeusweite nan sahpwo.

5 Oh sapwellimen Sises tohnpadahngko wiahda doadoahk kesempwal oh kapwuriamwei kan, lao irail kamaiauda me soumwahu kan, kamaurada me mehla, oh kahrehda me mwoatoar kan aluhda, oh me maskun kan kilangada wasa, oh me salengepon kan rongada wasa; oh soahngen kapwuriamwei tohto me irail wiahda rehn aramas akan; oh sohte mehkot kapwuriamwai me irail kin wiahda ihte sang ni mwaren Sises.

6 Oh met ahpw pil kaimwsekalahr pahr silihsek waluh, oh pil pahr silihsek duwao, oh pahisek ehu, oh pahisek riau, iei lao le pahisek duwao imwiseklahr, oh pil limeisek ehu, oh limeisek riau; iei, lao lel limeisek duwao en pahr pil imwisekla.

7 Oh Kauno kapaiada irail nan sahpwo ni mehlel; ei, lao irail pwurehng wiahda kahnihmw kan wasa me kahnihmw kan isihsla.

8 Iei, kahnihmw lap en Saraemla irail pwurehn onehdasapahlih.

9 Ahpw tohto kanihmw kan me kihrlahr, oh pihl akan mihla wasa re kokouda ie; eri kahnihmw pwukat sohte kak pwurehn onohnda.

10 Oh met, kilang, kedekedeo aramas en Nihpai kan ahpw kehlailla, oh ahpw kaparaparala mwadang mehlel, oh wiahla aramas masamwahu oh lingan mehlel.

11 Oh irail kin kapwopwoud, oh ale mweimwei en kapwopwoud, oh kapaida nin duwen reken inou kan me Kauno ketin wiahiong irail.

12 Oh irail sohlahr idawehn koasondi kan oh tiahk en kosonned en Moseso; ahpw irail kin weweidiki kosonned kan me irail alehdier sang rehn Kauno oh arail Koht, kin kalapw kaisihsol oh kapakap, oh kalapw ehupene wielamalamki arail kapakap oh rongorongo mahsen en Kauno.

13 Kedekedeo sohte pingiping rehn aramas akan koaros, nan sahpwo pwon; ahpw sapwellimen Sises tohnpadak kan wia manaman kapwuriamwei kei.

14 Kedekedeo pahr isihsek ehu ahpw pil imwiseklahr, oh pil pahr isihsek riauo, ei, oh ni mehlel, lao lel pahr isihsek duwao pil imwiseklahr; iei, sounpar epwiki imwiseklahr, oh sapwellimen Sises tohnpadahngko, me e ketin malipehda ko, koaros samwalahr nan paradais en Koht, ihte meh silimeno me mihmi; oh mie ekei tohnpadahk me kasarawihlo oh welianiraildi; oh pil tohto aramas en diho pil mehlahr.

15 Kedekedeo sohte pingiping nan sahpwo, pwehki limpoak en Koht me mihmi nan mohngiong en aramas kan.

16 Oh sohte noahrok, de aklemei, de moromor, de wiewiahn nenek kan, de likamw kan, de kam aramas kan, de soangen ineng suwed kan; oh mehlel sohte aramas peren nan pwungen aramas koaros me Koht ketin kapikada duwehte irail.

17 Sohte aramas lipirap, de kamaramas, de pil Mehn Leimen kan, de pil ehu pwihn tohrohr; ahpw irail koaros ehute, sapwellimen Krais aramas, oh me pahn sohsohki wehin Koht.

18 Oh ia uwen meid pai me irail ahneki! Pwe Kauno ketin kapaiada irail nan arail wiewia kan koaros; iei, irail kapaida oh keirda loa sounpar epwiki eisek imwiseklahr; oh keieu en dih sang rehn Krais mehlahr, oh sohte pingiping nan sahpwo pwon.

19 Kedekedeo Nihpai, ih me wiahda lahs en intingpwukat, (oh e ntingihdi pohn pilei ten Nihpai) kapilsalehdalahr, oh nah pwukat Eimos weliandi oh ntingih; oh e pil intingih pohn pilei ten Nihpai.

20 Oh e kolokolki sounpar welihsek pahieu, oh popohl mimiehte nan sahpwo, ihte pwihn en aramas ehu me uhwongadahr mwomwohdiso oh alehdahr eden Mehn Leimen kan; eri Mehn Leimen kan tepida mie nan sahpwo.

21 Kedekedeo Eimos pil mehla, (oh sounparehr epweiki duweisek sang ahnsou me Krais ketido) oh nein Eimwos pwutak weliandi kolokol poadoapoad kan; oh e pil nting pohn pileit en Nihpai; oh e pil ntingih nan pwuhk en Nihpai, me iei pwuhk wet.

22 Kedekedeo sounpar riepwiki ahpw imwiseklahr; oh keriau en dih koaros pil mehla ihte ekei me luhwe.

23 Oh met ngehi, Mormon, me kumwail en ese me aramas akan pokonlahr mehlel, lao irail kohpeseng nan sahpwo pwon, oh irail kepwehpwehla mehlel, pwehki arail pweida rehn Krais.

24 Oh met, nan pahr riepwiki ehuo e tepidahr mie nan pwungarail irail akan me pohnmwahsodahr, nan arail likawih likou pweilaud kan, oh soahngen takai kaselel kan koaros, oh soahngen dipwisou en sampah kaselel kan.

25 Oh sang ahnsou kohla irail ahpw tepida wekpeseng nan arail dipwisou kan oh dipwisou teikan me irail ahneki.

26 Oh irail tepidahr katohrohr nan pwungarail; oh irail tepida wiahda mwomwohdiso kan ong pein irail pwe irail en kepwehpwehkihla, oh tepida lahlahwe mwomwohdiso mehlel en Krais.

27 Kedekedeo ahnsou me sounpar riepwiki eisek imwiseklahr, mwomwohdiso tohto wiawihdahr nan sahpwo; ei, mwomwohdiso tohto kin kalohngki me irail ese Krais, ahpw irail lahlahwe pali laud en rongamwahuo, kahrehda irail kin alehda soangen wiewia suwed kan, oh kihong me sarawio rehn irail me sohte mweimwei pwehki arail sohte warohng.

28 Oh mwomwohdiso wet wie tohtohla pwehki wiewia suwed, oh pwehki manaman en Sehdan me koledier mohngiongarail kan.

29 Oh pil, mie ehu mwomwohdiso me lahlahwe Krais; oh irail kin kaloke mwomwohdiso mehlel en Kraiso, pwehki arail akitikitik oh arail kamehlele Krais; oh irail kin kailongkinirail pwehki manaman kapwuriamwei me wiawi rehrarail.

30 Eri irail kin doadoahngki manaman oh mweimwei pohn tohnpadahk kan en Sises me mihmih rehrail ko, oh irail keseiraillong nan imweteng; ahpw sang ni manaman en mahsen en Koht, me mih rehrail, imweteng kan kin mweredi, oh irail kohwei wiwia manaman kapwuriamwei rehn aramas akan.

31 Ahpw, oh mehndahte manamn kapwuriamwei pwukat, mohngiong en aramas akan keptakaila, oh song en kemeirailla, duwehte mehn Suhs akan nan Serusalem arail song en kemehla Sises, nin duwen sahpwellime mahsen.

32 Oh irail kesehlong irail nan kisiniei mwehl, oh irail pidohisang loale sohte mwasikala.

33 Oh irail pil kesehlong irail nan keleen mahn lawalo kan, oh irail mwadongehng mahn akan duwehte kisin seri men rehn sihmpwul men; oh irail kohsang rehrail sohte ohla.

34 Ahpw, mohngiong en aramas akan keptakaila, pwe irail ideidawehn samworo tohto oh soukohp likamw akan pwe re en wiahda mwomwohdiso tohto kan, oh wia soahng wiewia suwed tohto. Oh irail kin pohr sapwellimen Sises aramas akan; ahpw sapwellimen Sises aramas akan sohte kin kapwurehiong irail. Oh met irail pwupwidi nan sohpwoson oh wiewia suwed kan, sang ehu pahr kohlahng ehu pahr, lao sounpar riepwiki silihsek imwisekla.

35 Oh kedekedeo nan pahret, ei, nan pahr riepwiki silihsek ehu, mie tohrohrpeseng laud nan pwungen aramas akan.

36 Kedekedeo nan pahrete mie aramas kei me tepida kahdanikinirail Mehn Nihpai, oh irail kin wia aramas poadidi ong Krais mehlel kei; oh pil mie ekei rehrail ma kahdanikinirail Mehn Leimen—Mehn Seikop, Mehn Sosep, oh Mehn Soram;

37 Eri irail akan me kin poadidi ong Krais ni mehlel, oh irail me kin loaloapwoat en pwongih Krais, (iei irail me tohnpadahk en Sises kan kin mihmi rehrail) me kahdaniki Mehn Nihpai, oh Mehn Seikop, oh Mehn Sosep, oh Mehn Soram.

38 Kedekedeo irail me kin kasohwe rongamwahuo iei me adaniki Mehn Leimen, oh Mehn Lemuel, oh Mehn Ismael; oh irail sohte pwupwidi sang ni arail sohpwoson, ahpw irail uhwong mehlel rongamwahu en Krais; oh irail padahkihong neirail seri kan en dehr kamehlele, duwehte arail pahpa kahlapoko me pwupwidi sangete ni tapio.

39 Oh met pwehki wiewia suwed oh tiahk suwed en arail pahpa kahlapoko, duwehte ni tapio. Oh irail kaiahnkihda re en kailongki sapwellimen Koht aramas akan, duwehte Mehn Leimen kan arail kaiahnkihda re en kailongki aramas en Nihpai sangete ni tapio.

40 Kedekedeo sounpar riepwuki pahisek pahieu ahpw imwiseklahr, oh met iei wiewiah kan en aramas akan. Oh palilaud en aramas suwed akan wie kehkehlaila, oh tohtohla sang sapwellimen Koht aramas akan.

41 Oh irail ahpw doulahte kaukauada mwomwohdiso kan ong pein irail, kapatahkinirail soahngen dipwisou kesempwal akan. Oh met sounpar riepwiki limeisek imwiseklahr, oh pil sounpar riepwiki weneisek imwiseklahr.

42 Kedekedeo pwihn suwed en aramas akan tepida pwurehng kapwurehda kahula oh tiahk suwed rir kan en Kadiendon.

43 Oh pil aramas akan me kahdaniki aramas en Nihpai kan tepida pohnmwahso nan mohngiongarail kan, pwehki arail kepwehpwelahr mehlel, oh tepida likamw duwehte riarail akan, Mehn Leimen kan.

44 Oh sang ahnsou wet tohnpadahk kan tepida pahtoula pwehki dihp akan en sampah.

45 Kedekedeo ahnsou me sounpar silipwiki imwiseklahr, koaros aramas en Mehn Nihpai oh Mehn Leimen kan wialahr aramas suwed mehlel ekeite duwehte ekei.

46 Kedekedeo pwihn lipirap en Kadiendon kan ahpw kohpeseng wasa koaros pohn sahpwo; oh sohte emente me mwahu likin tohnpadahk en Sises ko. Oh kohl oh silper me irail katohtohwehla mehlel, oh kin netinetpene ni soangen wiepen netinet koaros.

47 Kedekedeo mwurin sounpar silipwiki limao imwiseklahr, (oh aramas akan wiwiahte arail wiewia suwed kan) Eimwos ahpw mehla; oh rie pwutak, Amaron, ahpw weliandi kolokol poadoapoad kan.

48 Kedekedeo ahnsou me sounpar silipwiki rieisek imwiseklahr, Amaron, alehdi kaweid en Ngehn Sarawi, en ekihla poadoapoad kan me sarawi—iei, koaros poadoapoad sarawi kan me me kin kadakadaur kohdo sang ehu dih kohdohng ehu, me sarawi—iei lao lel sounpar silipwiki rieisek sang ahnsou me Krais ketidohu.

49 Oh e nekidala ong Kauno, pwe en kak kohdohng irail akan me wia luhwen kisehn peneinei en Seikop, nin duwen sapwellimen Kauno kokohp kan oh inou kan. Oh met kaimwsekalahr inting kan en Amaron.