Pwuhk en Omnai

1 Kilang, kedekedeo ngehi, Omnai, alehdi kehkehlik sang ei pahpa, Sarom, me I pahn anahne ntingihedi ekei padahk pohn pileit pwukat, pwe en kak kolokolete kodoudoupen aht peneinei—

2 Eri, nan ei ahnsou, I men kumwail en ese me I kalapw iang mahwenki kedlahs pwe en kak doarehla nei aramas akan, Mehn Nihpai kan, pwe re en dehr lohdieng nan pehn arail imwintihti kan, Mehn Leimen kan. Ahpw kilang, ngehi aramas suwed men, oh I sohte kin kalapw kolokol koasoandi kan oh kosonned akan en Kauno nin duwen me I konehng en kin wia.

3 Kedekedeo sounpar riepwiki isihsek wenou douwer powe, oh se ahnekipopohl erein irair en ahnsou tohto; oh se pil ahneki irair en ahnsou tohto mehlel en mahwen oh kakerehdi nta. Ei, oh ni oaralap, sounpar riepwiki welihsek riau douwer powe, oh I nekinekid pileit pwukat nin duwen kosonned en ei pahpa ko; oh I pahn kihong nei pwutak Amaron. Oh I kaeralahr.

4 Oh met ngehi, Amaron, ntingihedi soahng kei me I pahn ntingih, a audepen [ei nting] me malaulau, nan nein ei pahpa pwuhk.

5 Kilang, kedekedeo sounpar silipwiki rieisek douwer powe, oh pali laud en Mehn Nihpai kan me suwed, kamakamalahr.

6 Pwe Kauno sohte mweidehng, mwurin eh kahluwaieisang irail nan sahpw en Serusalem oh sinsile oh doandoare irail pwe re en dehr lohdiong pahn arail imwintihti kan, ei, e sohte pahn mweidehng mahsen akan en sohte pweida, me e ketin mahsanihong aht pahpa ko, me ketihtihki: Nin duwen amwail sohte pahn kapwaiada ei kosonned akan kumwail sohte pahn pweida nan sahpwo.

7 Eri, Kauno kin ketin kalokeirail; ahpw, e kin ketin doarehla me mwahu kan sang mehla, oh doareirailsang nan pehn arail imwintihti kan.

8 Kedekedeo ngehi eri wahlahng pileit ko rehn riei pwutak Kemis.

9 Met ngehi, Kemis, ntingihedi ekei kisin nting, nan pwuhkohte me riei pwutako nting loale; pwe kilang, I kilang kaimwiseklahnah nting, me pein peh me ntingihedi; oh e ntingihdi rahnohte me e kiheng ie. Oh ih mwomwen aht nekinekidpoadoapoad kan, pwehki met duwen kosonned en aht pahpa ko. Oh met I kaeralahr.

10 Kilang, ngehi, Apinadom, nein Kemis pwutak. Kilang, kedekedeo I kilahngehr mahwen oh pingiping tohto nanpwungen nei aramas akan, mehn Nihpai oh mehn Leimen; oh ngehi, kemehkilahr Mehn Leimen tohto nei kedlahs pwe I en doarehla riei kan.

11 Oh kilang, poadoapoad en aramas pwukat ntingdier pohn pileit kan me nannmwarki kan kin kolokol, nin duwen koasoandien dih kan; oh I ihte kaudiahl kan me I ese me ntingdier [powe], de pil kokohp; eri, soahng kan me kesempwal ntingdier. Oh I kaeralahr.

12 Kilang, ngehi Amalekai, nein Apinadom pwutak. Kilang, I pahn koasoiong kumwail ekis duwen Mosaiah, me wiahla nanmwarki nan sahpw en Saraemla; pwe kilang, Kauno ketin kaparkiong en sopohsang nan sahpw en Nihpai, oh aramas koaros me pahn rong kapitien Kauno pahn anahne iang ih kohkohsang nan sahpwo, kohlahng nan sapwtehno—

13 Kedekedeo e ahpw kapwaiada nin duwen Kauno e ketin mahsanihong. Oh irail mweselsang nan sahpwo kohlang nan sapwtehn, iangahki irail koaros me rong kapitien Kauno; oh re kin weweidki padahk oh kokohp tohto. Oh re kin aliale kaweid sang ni mahsen en Koht ahnsou koaros; ohmanaman en nin lime kan me kahluwa irail nan sapwtehno lao irail kohdihdo nan sahpw me kahdaniki sahpw en Saraemla.

14 Oh irail diarada aramas akan, me kahdaniki aramas en Saraemla. Eri met, aramas en Saraemla kan perenda mehlel; oh pil Saraemla perenda kouwahlap, pwehki Kauno kadaredohr sapwellimen Mosaia aramas akan iangahki pileit prahs kan me audaudikida poadoapoad en mehn Suhs akan.

15 Kilang, kedekedeo Mosaia diarada me aramas en Saraemla kohieisang Serusalem ni ahnsou me Sedekaia, nahnmwariki en Suda, sellahng nan Papilon.

16 Oh irail seiloak nan sapwtehn, ohsang nin limen Kauno re kotehla madau kan, kohdohng nan sahpw me Mosaia ketin diarirailda; oh irail kin koukousoan wasao sang ahnsouo kohdo.

17 Oh ni ahnsou me Mosaia ketin diarirailda, irail inenen ngederlamehlel. Ahpw, re pil wiaier mahwen tohto oh pingping laud, oh mie me kamakamkihla kedlahs ekei ahnsou; oh arail lokaia wekilahr; oh irail sohte wahdo neirail poadoapoad; oh irail kahmahmkihla ieias en arail Sounkipikipiko; oh Mosaia, oh sapwellime aramas akan, sohte kak wehwehki arail lokaia.

18 Ahpw kedekedeo Mosaia koasoanehdi me irail anahne ale padahkpen sapwellime mahsen. Oh kedekedeo mwurin arail padahngkier sapwellimen Mosaia mahsen, Saraemla padokada wadawad en peneinei en ah pahpa ko, nin duwen eh tamataman; oh re ntingdi, ahpw kaidehn pohn pileit pwukat.

19 Kedekedeo aramas akan en Saraemla, oh Mosaia, ehupene; oh Mosaia kileldi en wiahla arail nanmwarki.

20 Kedekedeo nan mwehin Mosaia, mie lapalahn pelien takai me mie nting powe wisikdohng reh; oh e kawehwehda nting kan sang ni kisakis oh manaman en Koht.

21 Oh e kasalehda duwen ohl emen ede Koriandamer, oh duwen kamakamalahn nah aramas akan. Oh aramas en Saraemla kan diaradahr Koriandamer; oh e koukousoan rehrail erein wadepen maram duwau.

22 E pil kasalahdahr ekis duwen koasoiepen ah pahpa ko. Oh tepin ah pahpa oh nohno me kohdo sang ni imwen doulik [nan Papilon], ahnsou me Kauno ketin kapingada en aramas arail lokaia; oh kalokolok me Kauno ketikihong irail nin duwen sapwellime kadeik, me pwung; oh tihn paliwararail kan mihseli ni paliepeng en nan sahpwo.

23 Kilang, ngehi, Amalekai, ipwidi nan mwehin Mosaia; oh I momour oh kilangidi sapwellime pwoula; oh sapwellime pwutak, Pensamin, weliandi wiahla nahnmwarki.

24 Oh kilang, I kadehdehier, nan ahnsou en nahnmwariki Pensamin, mahwen kehlail oh kakerehdi nta laud wiawi nanpwungen Mehn Nihpai kan oh Mehn Leimen kan. Ahpw kilang, Mehn Nihpai kan kaloweiraildi; mehlel, kahrehda nahnmwariki Pensamin kasareirailsang nan sahpw en Saraemla.

25 Kedekedeo I tepida mahlahr; oh, sohte wahwahi seri, oh pwehki ei ese me nahnmwariki Pensamin wia ohl pwung men mwohn Kauno, eri, I pahn wahla reh pileit pwukat, [I] koangoangehki aramas koaros re en kohdo rehn Koht, me Sarawi en Israel-o, oh kamehlele kokohp, oh kaudiahl akan, oh doadoahk en tohnleng kan, oh kisakis en lokaiaki mahsen kapwonopwon, oh kisakis en kawehwehda mahsen kan, oh soahng koaros me mwahu; pwehki soahng koaros me mwahu kin pwilisang rehn Kauno; oh me suwed kan kin pwilisang rehn tepilo.

26 Oh met, riei kesempwal ko, I men kumwail en kohdo rehn Krais, me Sarawi en Israelo, oh alehda sapwallime komouro, oh sapwellime manaman en doarehlao. Ei, kohdo reh, oh meirongkihong ih palingenemwail ni unsek, oh nantihong kasihsol oh kapakap, oh daudaurete lel ni imwi; oh nin duwen Kauno e ketin ieias kumwail pahn komourla.

27 Oh met I men koasoia ekis duwen ekei [aramas] me kohdahla nan sapwtehn oh pwurala nan sahpw en Nihpai; pwehki aramas ngeder men pwurala oh sapwasapw nan sapwarail sahpw en sohso.

28 Eri, irail kohdahla nan sapwtehno. Oh arail kauno emen ohl kehlail oh kommwad, oh ohl keptakai men, eri e kahrehda pingiping nanpwungarail; oh irail koaros kamakamala, ihte meh limehk me luhwehdi, nan sapwtehno, oh irail pwurehng pwurodo nan sahpw en Saraemla.

29 Kedekedeo irail ahpw kahluwahla aramas ngeder, oh pwurehng seiloaklahng nan sapwtehno.

30 Oh ngehi, Amalekai, rianiki pwutak emen, me pil iangirailda; oh lel met I saikinte ese dahme wiawi ong irail. Oh kereniongehr I pahn seridi nan ei sousou; oh pileit pwukat diralahr. Oh I pahn kaimwiseklahr ei koasoi.