1 Eri kedekedeo mwurinte imwilahn Korior, Alma ahpw alehdi rohng me Mehn Soram kan kasapwungehlahr sapwellimen Kauno koasoandi kan, oh Soram, me wia arail kaun, wie kahkahluwa mohngiong en aramas akan pwe re en kin poaridi mwohn sansal takai kan, e ahpw pwurehng tepida pahtoukihla mehlel nan eh mohngiong pwehki wiewia suwed en aramas akan.

2 Pwe ih soangen mwekid pwukat me kin kahrehkiong Alma eh kin pahtouki laud ni eh kin esehda wiewia suwed me kin mihla rehn nah aramas akan; eri eh mohngiong uhdahn pahtoukila mehlel pwehki Mehn Soram kan ar tohrohrsangehr Mehn Nihpai kan.

3 Mehn Soram kan kin pokonpene nan sahpw ehu me re kahdaniki Andionum, me mih ni palimese en sahpw en Saraemla, me karanihte irepen ni oaroahro, me mih palieir en sahpw en Terson, me pil mihte ni irepen palieir en sapwtehno, wasa me diren Mehn Leimen kan.

4 Eri met Mehn Nihpai kan perikidahr Mehn Soram kan de ehuwongada Mehn Leimen kan, oh me pahn kakete kihong Mehn Nihpai kan kahpwal laud.

5 Eri met, pwehki ong ni kalohki mahseno eh kin kalapw kaluwa aramas en wia dahme pwung—ei, e kin mie lipwe laud nan en aramas madamadau kan sang ni arail pahn doadoahngki kedilahs, de soahng teikan, me kin wiawihong irail—eri ihme Alma medewekihda me e konehng irail en songkihong manaman en mahsen en Koht.

6 Eri e kahrehda Amon, oh Aron, oh Omner; oh e kihong Imnai en pwukoahki mwomwohdiso nan Saraemla; ahpw e kahrehda meh silimeno, oh iangahki Amulek oh Sihesrom, me mih nan Melek; oh e pil kahrehda nah pwutak riemen.

7 Eri nah me keieun laudo e sohte kahrehda, edeo iei Ihlemen; ahpw eden irail kan me e kahrehda en iangih iei Siplon oh Koriandon; oh ih eden irail akan me iangih kohla rehn Mehn Soram kan, pwe en kalohkihong irail mahseno.

8 Eri Mehn Soram pwukat irail alehier mahsen en Koht mwoweo oh ahpw pwupwulahr; solangalasangehr rehn Mehn Nihpai kan.

9 Ahpw irail pwupwudiong nan lapalahn sapwung ehu, pwe irail sohte kin nantihong kapwaiada sapwellimen Koht kosonned akan, oh sapwellime koasoandi kan, nin duwen kosonned en Moses.

10 De pil kapwaiada tiahk en doadoahk en mwomwohdiso, ong ni ar pahn poaden kapakap oh pwongih Koht rahn koaros, pwe irail en dehr lelohng nan kasongosong.

11 Ei, ni mehlel, irail kasapwungelahr koasoandi kan en Kauno nan irair tohto; eri, pwehki kahrepe wet, Alma oh rie kan kohla nan sahpwo pwe re en kalohkiong irail mahseno.

12 Eri, ni ahnsou me re leledo nan sahpwo, kilang, irail pwuriamweikihla ar kilangada Mehn Soram kan ar wiahda sinokoke kan, oh irail kin pokonpene pak ehu nan ehu wihk, me irail wiahki rahn en Kauno; oh irail kin kaudok ni wiepe ieu me Alma oh rie kan sohte kin kilang;

13 Pwe irail wiahda wasahn kesihnen ehu nanwerengen arail sinakoke kan, me ileilehsang moangen aramas; oh aramas emente me kak kesihnenda powe.

14 Eri, mehmen me inengieng kapakap e pahn kin kohla oh douda powe, oh kawadahwei peh kan nanleng, oh werikihla ni ngihl laud, ndinda:

15 Maing Koht sarawi, komwi me sarawi; se kamehlele me komwi Koht, oh se kamehlele me komwi me sarawi, oh me komw wia ngehn emen, oh komw pahn wia ngehn kohkohlahte.

16 Maing Koht sarawi, se kamehlele me komw ketin katohreikiht sang rehn riat kan; oh se sohte kamehlele tiahk en riat kan, me pepeusdo rehrail sang rehn arail pahpa kahlap ako me mwomwen seri; ahpw se kamehlele me komw pilkihtda pwe se en wia sapwellimwomwi seri sarawi; oh komwi pil kasalehiong kiht me e sohte pahn mie Krais.

17 Ahpw komw ketin duduwehte aio, rahnwet, oh kohkohlahte; oh komw piladahr kiht me se pahn komourla, a irail akan me kapilkihtpene pilipildahr me re pahn lekdekla nan ehl; pwehki sarawi wet, maing Koht, se kapingki ong komwi; oh se pil kapingki ong komwi pwehki omwi ketin pilkihtadar, pwe se en dehr idawehn tiahk likamw en riat kan, me katengeiraildi ong kamehlele Krais, me kahrehdahr mohngiongirail kan salongasang komwiehr, aht Koht.

18 Oh se pwureng kapinga komwi, maing Koht, pwehki aht wia aramas pilipilda oh sarawi. Ahmen.

19 Eri kedekedeo mwurin Alma oh ienge ohl akan oh nah pwutangko ar rongehr kapakap pwukat, irail ahpw malamalawangkihla.

20 Pwe kilang, emen emen aramas kin kohdahla wademen oh wia soangen kapakapohte.

21 Eri wasao e kahdaniki Ramiemdom, me wehwehki, pei sarawi.

22 Eri, sang pohn pei wet emen emen aramas kin kesihnenda powe oh wia soahngen kapakapohte ong Koht, kapkapingkihong Koht me e ketin pilirailda, oh me e sohte ketin kahluwa iraillahng tiahk en riarail akan, oh me mohngiongirail kan sohte kin iang kamehlelehda soahng kan me pahn kohdo, me irail sohte wehwehki duwe.

23 Met, mwurin aramas akan koaros ar kin wia arail kaping kan ni mwomw wet, irail kin pwurala ni imwarail akan, oh sohte pwurehng koasoia duwen arail Koht lao irail kin pwurehng pwurpene ni pei sarawio, pwe re en pwurehng wia arail kaping ni soangen mwohmwo.

24 Eri ni ahnsou me Alma kilangada duwen mwekid wet, e inenen pahtoukihla nan eh mohngiong; pwe e kilang me irail wia aramas suwed oh kahngohdi kei; ei, e kilang me mohngiongirail kan kin inengiengte kohl, oh silper, oh soahngen dipwisou kaselel kan koaros.

25 Ei, oh e pil kilangada me irail kin mas ilehki ar aksuwei, nan arail pohnmwahso.

26 Oh e ahpw ngihl laudida ong nanleng, oh weriweriki, patohwan: Maing, ia uwen werei, Maing Kaun, me komw pahn mweidohng sapwellimomwi ladu kan re en momour nan paliwar, oh kilang soahngen suwed mwuledek pwukat rehn aramas akan?

27 Kilang, Maing Koht, irail kin kapakap ong komwi, ahpw arail pohnmwahso powehdier mohngiongarail kan. Kilang, Maing Koht, irail kin kapakap ong komwi sang ni ewerail akan, ahpw irail aklapalapkihla mehlel soahng mwahl akan en sampah.

28 Maing ei Koht, komw mahsanih, arail likou pweilaud kan, oh neirail rihng kan, oh neirail luwou kan, oh arail mehn kapwat kohl kan, oh neirail dipwisou kesempwal akan me irail kin kapwatiki; oh komw mahsanih, mohngiongirail kan kin uhlahng wasa me arail kepwe kan mi ie, oh ahpw met irail kin kapakap ong komwi oh ndinda—Se kapingkiong komwi, maing Koht, pwe kiht aramas pilipilda kei ong komwi, nindoken mehteikan ar pahn melahr.

29 Ei, oh re pil nda me komwi kasalehiong irail me e sohte pahn mie Krais.

30 Maing Kauno Koht, ia uwen werei omwi pahn mweidohng soangen wiewia suwed wet oh soaloalopwoat wet en mie rehn aramas pwukat? Maing ei Kaun, komw kak ketkihong ie kehl, pwe I en kak powehdi ei luwet kan. Pwe I me luwet, oh soangen wiewia suwed wet rehn aramas pwukat kin kamedekehla palingeniet.

31 Maing ei Kaun, mohngiongiet inenen toutoukilahr; komw ketin kaloalamwahwih palingeni rehn Krais. Maing ei Kaun, komw ketin mweidohng ie pwe I en kak ahneki kehl, pwe I en kak ahneki kanengamah ni ei pahn lokolongki kahpwal akan me pahn kohdohng ie, pwehki wiewia suwed en aramas pwukat.

32 Maing ei Kaun, komw kak kaloalamwahwih palingeni, oh kupwure ie en pweida, oh pil iengei tohn papah pwukat me ieiang ie—ei, Amon, oh Aron, oh Omner, oh pil Amulek oh Sihesrom, oh pil nei pwutak riemenet—ei, irail pwukat komw kak ketin kaloalamwahwih irail, Maing ei Kaun. Ei, komw kak kaloalamwahwih palingenerail kan rehn Krais.

33 Komw kak ketin mweidohng irail en ahneki kehl, pwe ren kak kanengamah nan arail kahpwal akan me pahn kohdo pohrail pwehki wiewia suwed en aramas pwukat.

34 Maing Kaun, komw ketin mweidohng kiht se en kak pweida ni aht pahn kapwureiraildohng komwi rehn Krais.

35 Kilang, Maing Kaun, palingenerail kan me kesempwal, oh tohtohn irail me riat; eri, komw ketkihong kiht, Maing Kaun, manaman oh erpit pwe se en kak kapwurehdo riat pwukat ong komwi.

36 Eri kedekedeo ni ahnsou me Alma ndahier mahsen pwukat, e ahpw pwil peh kan pohn irail kan koaros me iang ih. Oh kilang, ni ahnsou me e pwil pehkan pohrail, irail direkihla Ngehn Sarawi.

37 Oh mwurin mwo irail ahpw kohpeseng, ni arail sohte medewe dahme irail pahn tungoale, de dahme irail pahn nim, de dahme irail pahn likawih.

38 Kauno ahpw ketin sewese irail kahrehiong arail sohte men mwenge, de men nimpil; ei, oh e pil ketikihong irail kehl, kahrehda irail sohte kehn soangen lokolok kan, ahpw irail direkilahr popohl en Krais. Met sang nin duwen en Alma kapakap; oh met pwehki e kapakap ni pwoson.