Pwuhk en Alma
Nein Alma Pwutak

1 Eri kedekedeo ni tepin pahr en mwehin sounkopwung kan ong aramas en Nihpai kan, sang ahnsouo kohla, nanmwarki Mosaia eh pwoulahr, oh e ketin wiahier uwen eh kak nan mour wet, oh e ketin weweidki mour pwung mwohn Koht, oh e sohte mweidohng emen en weliandi nan dewe; ahpw e ketin wiahda kosonned kei, oh aramas akan pwungki; eri irail inengieng momouriki kosonned kan me e ketin wiahda.

2 Kedekedeo ni tepin pahr en mwehin Alma nan eh wia sounkopwungo, mie ohl emen me wisikdohng reh pwe en pakadeikda, ohl men me paliwar lapala, oh e sansal me e wia ohl kehlail men.

3 Oh e kohseliher rehn aramas akan, kalokalohkihong irail dahme e kin kosekose me iei mahsen en Koht, oh kin pelipelian mwomwohdiso; kalokalohkihong aramas akan me samworo oh sounpadahk koaros anahne ndahndla; oh irail sohte konehng koadoahke pein arail mour, ahpw aramas akan me anahne sewese apwalih arail anahn.

4 Oh e pil kadehdehiong aramas akan me aramas koaros pahn komourla ni imwin rahno, oh me irail sohte anahne masak de rerrerki, ahpw irail en sarada oh perenda; pwe Kauno ketin kapikada aramas koaros, oh pil pahn komourala aramas koaros; oh, ni imwio, aramas koaros pahn alehdi mour soutuk.

5 Kedekedeo e ahpw kin kapwukapwurehiong padahngki mepwukat kahrehda tohto me kamehlele eh koasoai kan, iei uwen tohto kahrehda irail tepida utungada ih oh kihong mwohni.

6 Oh e ahpw tepida pohnmwahsohda nan eh mohngiong, oh likawih likou pweilaud, ei, oh tepida wiahda mwomwohdiso nin duwen dahme e kin padahngki.

7 Kedekedeo ni e wie kohkohlang kalohk ong irail akan me kin kamehlele eh padahk, e ahpw tuhwongdi ohl emen me tohn mwomwohdiso en Koht, iei, emen arail sounpadahk ko; oh e tepida akamaiong ih, pwe en kak kahluwahsang aramas en mwomwohdiso; ahpw ohlo pelianda, kapwungkihong mahsen en Koht akan.

8 Met eden ohlo iei Kidion; oh iei ih me wia weliepen nin limen Koht ong kahluwahsang aramas en Limai kan sang nan kalidu.

9 Eri, pwehki en Kidion e pelianki mahsen akan en Koht, e lingeringerida pahn Kidion, oh usada nah kedlahso oh tepida pele ih. Met pwehki Kidion eh likeilapalahr oh luwetilahr, e sohte kak pelian ah palapal ko, eri e ahpw mehkihla kedlahs.

10 Oh aramas en mwomwohdiso koledi ohl me kemehlao, oh wahla rehn Alma, pwe en pakadeingkihda dihp me e wiadahro.

11 Kedekedeo e ahpw uh mwohn Alma oh akupwungki pein ih ni eimah.

12 Ahpw Alma mahsanihong ih: Kilang, met iei tepin prihskrap e pwarada rehn aramas pwukat. Oh kilang, ke sohte dipanikihte prihskrap, ahpw ke pil song en kamanahkihla noumw kedlahs; oh ma prihskrap pahn kamanamanla rehn aramas pwukat e pahn kahrehda arail pahn kamwomwomwla douluhl.

13 Oh ke pil kakerehdi ntahn aramas pwung men, ei, ohl emen me wiadahr doadoahk mwahu me inenen laud rehn aramas akan; oh ma se pahn doareiukala kiht me pahn uhd alehkihdi kalokepen eh mehla.

14 Eri ke uhdahn pahn kamakamala, nin duwen kosonned me kohieng kitail sang Mosaia, kaimwiseklahn atail nanmwarkio; oh aramas pwukat wehwehki; eri aramas pwukat uhdahn pahn kapwaiada kosonnedo.

15 Kedekedeo irail ahpw koledi ohlo; oh ede iei Nior; oh wahdahla pohn kumwen dohl Mandai, oh wasao me re wiahiong, de e kasalehda, mwohn nanleng oh sampah, me dahme e padahkihong aramas akan uhwong mahsen en Koht; oh wasao e lokolongki mehla kanamenek.

16 Ahpw, met sohte kauhdi doupeseng en prihskrap nan sahpwo; pwe tohto me poakehng soang kan me mwahl en sampah, oh irail kohwei padapadahngki padahk likamw akan; oh met irail wia pwe irail en kepwehpwehla oh aramas en kepingairail.

17 Ahpw, irail sohte kak likamw, ma e pahn sansal, pwehki irail masak kosonnedo, pwe me likamw akan pahn kalokolok; eri irail kin mwomwehda me re kalohki mehkot me re kamehlele; oh pwe kosonnedo sohte kin ahneki manaman ong dahme aramas emen kamehlele.

18 Oh irail sohte kak pirap, pwe re masak kosonnedo, pwehki soahngen mwekido kin ale kalokpe; irail pil sohte men kulih, de pil kamaramas, pwe mehmen me pahn kamaramas e pahn kamakamkihla.

19 Ahpw kedekedeo mehmen me sohte iang mwomwohdiso en Koht tepida kaloke irail akan me iangala tohn mwomwohdisohn Koht, oh me kin alehda mwaren Krais.

20 Ei, re kalokalokei irail, oh re wiahiong kapweikeng tohto, oh met pwehki arail kin mpai; pwehki arail sohte kin pohnmwahso nan masarail akan, oh pwehki arail kin ehukipene mahsen en Koht nanpwungarail, ni sohte isais de mwohni.

21 Eri mie kosonned kehlail ehu rehn aramas en nan mwomwohdiso, me koasonehdi me sohte aramas emen me towe mwomwohdiso pahn mas ilehda oh kaloke irail akan me sohte towe mwomwohdiso, oh sohte uhpene pahn kin wiawi nanpwungarail.

22 Ahpw, tohtohla nanpwungerail me tepida pohnmwahsohda, oh tepida akamaiong arail imwintihtih kan, lao re peipene; ei, irail kin pakerpene nanpwungarail.

23 Met iei keriau en pahr en mwehin Alma, oh e kahrehda kahpwal laud ong mwomwohdiso; mehlel, e kahrehda apwal mwuledek en kohieng mwomwohdiso.

24 Pwe me tohto keptakailahr, oh adarail kan irihrsang nan mwomwohdiso, pwe irail sohla iang wadawadohng sapwillimen Koht aramas akan. Oh tohto me pil pein pwilikihdi oh pedoisang irail.

25 Met e wia songosong laud ong irail akan me kehlail nan ar lamalam; ahpw, irail tengedi oh sohte mwekid sang kapwakapwaiada kosonned en Koht, oh irail kanekanengamahiong lokolok me aramas kalokehkin irail.

26 Oh ni ahnsou me samworo kan kin uhdisang arail doadoahk pwe re en kalohki mahsen en Koht ong aramas akan, aramas akan pil kin uhdisang arail doadoahk pwe re en rong mahsen en Koht. Oh ahnsou me samworo kin kanekehla kalohkihong irail mahsen en Koht irail kin pwuralahng arail doadoahngkan ni loaloapwoat; oh samworo sohte kin wiahki me e lapalapasang irail akan me rongorong, pwe sounkalohko sohte mwahusang me kin wie rongorong, pil duwehte sounpadahko sohte mwahusang tohnskuhlo; oh irail koaros duwepenehte, oh irail koaros doadoahk, emen emen irail nin duwen arail koahiek.

27 Oh irail kin kisakiskihwei arail dipwsou kan, emen emente kin kisakiski dahme e ahneki, ong me semwehmwe kan, oh me anahn akan, oh me soumwahu, oh me apwal; oh irail sohte kin likauwih likou pweilaud, ahpw irail mwakelekel oh mwohmw mwahu.

28 Oh met irail koasoanehdi koasoandi kan en mwomwohdiso; oh irail tepida pwurehng ahneki popohl, mehndahte aramas kalokalokei irail.

29 Oh met, pwehki kehlail en mwomwohdiso, irail tepida kepwehpwehla kowahlap, kepwehpwehki soahng kan koaros me irail kin anahne—kepwehpwehki pelin kou oh sihpw kan, oh soangen mahn wih koaros, oh pil kepwehpwehki werentuhke, oh kohl, oh silper, oh soahng kesempwal kan, kepwehpwehki soangen likou silik oh likou kaselel kan, oh soangsoangen likou mwahu kan.

30 Oh met, nan arail kepwehpwelahr, irail sohte kin pohnsehse me sohte arail likou kan, de me men mwengedahr akan, de me men nimpildahr akan, de me luhmwuhmw kan, de me sohte epwelperail kan; oh irail sohte kin noahrek en dipwsou; eri irail kin kadek ong aramas koaros, ong me mah oh me pwulopwul kan koaros, me sensel oh saledek, ohl oh lih koaros, me sohte iang mwomwohdiso de me iang mwomwohdiso, ni ar sohte lipilipiliki aramas koaros me mie anahn.

31 Oh met irail pweida oh kepwehpwehsang irail akan me sohte wia tohn mwomwohdiso.

32 Pwe irail akan me sohte wia tohn mwomwohdiso kin momouriki mour en wunahni, oh mour en dikadik en eni, oh koasoi mwahl, oh noahrek oh kalapw mwoarong; likilikawih likou pweilaud; re kin medemedewe me re inenen mwahu; kalokaloke aramas, likilikamw, mwermwersuwed, piripirap, wiewia tiahk en nenek kan, oh kemkemehla aramas, oh soangsoangen mwekid suwed koaros; ahpw, kosonnedo kin doadoahk ong koaros me kin kauwehla, nin duwen eh kak koaros.

33 Kedekedeo ni ansou me kosonnedo kin doadoahk ong irail, emen emen aramas kin lokolongki dahme e kauwehlao, irail ahpw kin meleileidi, oh sohte men wiahda ehu mwekid suwed ma e pahn sansal; eri, mie popohl laud rehn aramas en Nihpai kan lao lel ni pahr kelimau en mwehin sounkopwung kan.