1 Kedekedeo koaros me sohte men rong en Ilemen oh rie kan ar kaweid kan kohpene pwe re en uhwong riarail ko.

2 A met kilang, re uhdahn lingeringer kowahlap, kahrehda re koasoanedier me re pahn kemeirailla.

3 Eri ohl me kakaun irail akan me lingeringerda pahn riarail akan, e wia ohl lapala oh kehlail men; oh ede iei Amelekaia.

4 Oh Amelekaia men wiahla nanmwarki men; oh aramas akan me lingeringer pil mwahuki me e pahn wiahla arail nanmwarki; oh pali moron en irail wia sounkopwung tikitik kei en nan sahpwo, oh re men kalaudehla arail manaman.

5 Oh re kin rong lokaiahn widing en Amelekaia, ma re pahn utungada ih oh koasoanehdi en wiahla arail nanmwarki, e pahn uhd kihong irail en wiahla kaun kei en aramas akan.

6 Eri irail idawehnlahr Amelekaia nan arail kahngohdi, mehndahte Ilemen oh rie kan ar kalokalohkihong irail, ei, mehndahte ar apwalih mwahu mwomwohdiso, pwe re wia samworo lapalap kei nan mwomwohdiso.

7 Oh tohto nan mwomwohdiso me kamehlele lokaiahn widing en Amelekaia, eri re pil kahngohdiong mwomwohdiso; oh met iei mwekid en aramas en Nihpai kan me uhdahn keper oh kamasepwehk, mehndahte arail pweida mehlel ni ar powehdi Mehn Leimen kan, oh peren mehlel me irail ahneki pwehki arail poadoandoarala sang nin limen Kauno.

8 Eri kitail kilangehr uwen aramas ar kin mwadang en manokehla Kauno arail Koht, ei, re kin mwadangete wiewia me suwed, oh idawehnla me suwedo.

9 Ei, oh kitail pil kilang wiewia suwed kowahlap me aramas suwed men kak kahrehiong aramas akan en wiahda.

10 Ei, Kitail kilang me Amelekaia, pwehki e wia aramas widing mwersuwed men oh wia ohl kadek koasoi en widing, kahrehda e kahluwahsangehr mohngiong en aramas tohto re en wia me suwed; ei, oh en song en kauwehla mwomwohdiso en Koht, oh kauwehla poahsoan en saledek me Koht ketikihong irail, de kapai me Koht ketikidohr pohn sahpwo pwehki me mour pwung kan.

11 Eri met kedekedeo ahnsou me Moronai, me wia kaun lapalap en sounpei en Mehn Nihpai kan, rongadahr duwen ar kahngohdi, e uhdahn lingeringer pahn Amelekaia.

12 Kedekedeo e ahpw tehrpeseng eh sekido; oh e ale kisin likou me teisang eh sekido, oh ntingihedi powe—Ong katamanpen atail Koht, atail pelien lamalam, oh mour saledek, oh atail popohl, atail pwoud kan, oh neitail serikan—oh e katengehdi ni imwin tuhke pwoat.

13 Oh e ahpw katengehdi ah lisoaropo, oh perehpen mwaremwareo, oh nah mehn sansaro, oh katengehdi tehtehn mahwen nin lukopeo; oh e ahpw wahda tuhkeo, me e katengehdiong eh likouo, (oh e kahdaneki pilaik en mour saledek) oh e ahpw itiekidi nan pwehlo, oh kapakap ong Koht ni ngidingid pwe en ketikihong rie ko kapai en mour saledek, erein aramas Kristian kan ar pahn mihmihte nan sahpwo—

14 Pwe iei met me irail akan me sohte wia tohn mwomwohdiso en Koht kin ekerki koaros me kamehlele Krais.

15 Oh koaros me iang mwomwohdiso kin loalopwoat; ei, irail koaros me kamehlele Krais ni mehlel pereniki alehda mwaren Krais, de Kristian me irail kin adaneki, pwehki arail kamehlele Krais me pahn ketido.

16 Eri, ahnsou wet, Moronai kapakap pwe doadoahk en mour en Kristian kan, oh saledek en nan sahpwo en kak pweida.

17 Kedekedeo ni ahnsou me e ngidingidkier eh kapakap ong Koht, e ahpw kahdaneki sahpw koaros me mi paleir en sahpw en Tehnla, ei, oh ni mehlel, sahpw koaros, me mi paliepeng oh palieir en adaneki—Sahpw pilipil ehu, oh sahpw en mour saledek.

18 Oh e ahpw patohwan: Mehlel Koht sohte pahn mweidohng kitail, me aramas kin kauwe pwehki atail alehda mwaren Krais, en tiatihdi oh kamwomwmwomwla, ihte ma kitail pahn pwupwukihdi dipatail kan.

19 Oh mwurin Moronai eh patohwan mahsen pwukat, e ahpw kohla rehn aramas akan, oh kauwada nan wehwe eh likou me e tehrasang ni eh likowo, pwe koaros en kak kilang nting me e ntingihedi pohn likou teio, oh e ahpw ngihl laudida, patohwan:

20 Kilang, mehmen me pahn lirohrohki oaralap en nting pwukat nan sahpw wet, a en patohdo sang ni roson lapalap en Kauno, oh inoukihda me re pahn lirohrohki arail pwuhng kan, oh arail pelien lamalam, pwe Kauno Koht en ketin kupwuramwahwih irail.

21 Kedekedeo ni ahnsou me Moronai kalohkier mahsen pwukat, kilang, aramas akan tangpene ni ar katengehdiong arail tehtehn mahwen nin lukoparail kan, oh tetehrasang arail likou kan pwe en wia kilel, de inou, me re sohte pahn manokehla Kauno arail Koht; eri, met wehwehki, ma re pahn kauwehla kosonned akan en Koht, de pwupwudi nan dihp, oh namenengki alehda mwaren Krais, Kauno pahn tehrirailpeseng duwehte arail tehrasang ar likou kan.

22 Met iei inouo me re wiahdahr, oh re kesehdi arail likou kan mwohn nehn Moronai, ndinda: Se inoukihong aht Koht, ma se pahn pwupwudi nan dihp, a se pahn kamwomwmwomwala, iei duwehte riat ko nan sahpw en paliepeng; ei, e kak ketin keseikitala mwohn nehn aht imwintihti kan, duwehte aht kesehdier aht likou kan mwohn nehmw kan pwe en tiatipeseng, ma se pahn pwupwudi nan dihp.

23 Moronai ahpw patohwanohng irail: Kilang, kitail wia luhwen kadaudok en Seikop; ei, kitail wia luhwen kadaudok en Sosep, me rie ko tehrpeseng eh sekido; ei, eri met kilang, kitail anahne kolokol kosonned akan en Koht, ma soh, a riatail kan pahn tehrpeseng atail likou kan, oh kitail pahn lekdekiong nan imweteng, de netila, de kamakamala.

24 Ei, kitail doarehla atail mour saledek nin duwen atail wia luhwen kadaudok en Sosep; ei, kitail tamataman mahsen kan en Seikop, mwohn eh kapilsalehdala, pwe kilang, e kilangada wasa kis me luhwehdi ni ehn Sosep sekido me mwamwahute oh sohte ohla. Oh e ahpw mahsanih—Nin duwen wasa me sohte ohla ni ehn nei pwutak likou wet, ih pil pahn mwomwen luhwen kadaudok en nei pwutak eh pahn poadoandoarala nin limen Koht, oh pein ih me pahn ketin aleirailda, oh me luhwehdi en kadaudok en Sosep kan pahn mwomwala, iei duwehte wasa me ohla kan ni eh likouo.

25 Eri kilang, me wet katoutouwihala ngeni; ahpw, ngeniet pereniki nei pwutaket, pwehki palien kadaudoke kan me Koht pahn ketin alehda.

26 Eri kilang, iei met duwen sapwellimen Seikop mahseno.

27 Eri mweinele luhwen kadaudoken en Sosep, me pahn mwomwala rasehng eh likouwo, iei irail akan me kahngohdiong kitail? Ei, oh kitail kakete kahngohdi ma kitail sohte pahn tengediong atail pwoson Krais.

28 Eri kedekedeo ahnsou me Moronai patohwan mahsen pwukat e ahpw kohwei, oh pil kadarpeseng wasa koaros nin sahpwo ong towe me kahngohdi kan, oh kapokonepene irail koaros me men lirohrohki arail mour saledek, en pelianda Amelekaia oh irail koaros me kahngohdi kan, me kahdaneki Mehn Amelek.

29 Kedekedeo ahnsou me Amelekaia dehdehki me nein Moronai aramas akan tohtohsang Mehn Amelek kan—oh pwehki e pil kilang me nah aramas akan peikasalki duwen pwuhng en mwekid me re tapiada—eri, pwehki eh perki me ar mwekido de pweida, e ahpw kahrehiong nah aramas ako me men iangih kohkolahng nan sahpw en Nihpai.

30 Met Moronai medewehda me e sohte mwahu ma Mehn Leimen ko pahn wie kehkehlailla; eri e medewehda en sopukala nein Amelekaia aramas akan, de koliraildi oh kapwureiraildo, oh kemehla Amelekaia; ei, pwehki e wehwehki me Amelekaia pahn kamwakidada Mehn Leimen kan pwe re en lingeringer pahrail, oh kahrehiong ar pahn kohdo mahweniong irail; oh e wehwehkier me Amelekaia pahn wia met pwe en kak kapwaiada eh koasoandi kan.

31 Eri Moronai medemedewe e pahn mwahu ma e pahn kahrehiong nah sounpei kan, me pokonpenehr, oh kalikawihkinirailda ar tehtehn mahwen kan, oh inoukidahr en doandoare meleilei—kedekedeo e ahpw kahrehda nah sounpei ko oh wahda arail impwal kan karis kohla nan sapwtehno, pwe irail en sopukala Amelekaia wasa me re keid ie nan sapwtehno.

32 Kedekedeo e ahpw wiahier nin duwen ah pepehm kan, oh karis kohla nan sapwtehno, oh nantihong en sopukala nein Amelekaia sounpei kan.

33 Kedekedeo Amelekaia ahpw sopohla iangahki ekei nah ohl ako, oh irail me luhwehdi kolkoldi oh wisikdohng pahn manaman en Moronai oh kopwurupwurla nan sahpw en Saraemla.

34 Eri, pwehki sounkopwung lapalap kan idiadahr Moronai oh e pilipiladahr rehn aramas akan, eri e ahneki manaman en kamwakid sounpei en Nihpai kan nin duwen nsene, pwe en kak ahneki manaman en koasoanehdi oh kaun irail.

35 Kedekedeo mehn Amelek kan me sohte pahn inoukihda me re pahn utungada doadoahk en mour saledek, pwe irail en kak kolokolete kopworment me saledek, e pahn kamakamala; oh irail me kasohwe inou en saledeko me malaulau.

36 Kedekedeo e ahpw pil koasoanehdi me pilaik en oaralap en mour saledeko pahn epida pohn wasahn doulik koaros me mi nan sahpwo, me Mehn Nihpai kan sapwahneki; oh met Moronai poadokedier koasoandi en mour saledeko rehn Mehn Nihpai kan.

37 Oh irail tepida pwurehng ahneki popohl nan sahpwo; oh met irail kolokolete popohl nan sahpwo lao ni imwin keisek duwaun sounpahr en mwehin sounkopwung kan.

38 Oh Ilemen oh samworo lapalap kan pil kolokolete koasoandi mwahu nan mwomwohdiso; ei, nan erein sounpar pahieu re ahneki popohl laud oh pereperen nan mwomwohdiso.

39 Kedekedeo irail tohto me mehlahr, ni arail tengediong ar kamehlele me Kauno Sises Krais ketin doarelahr ngenirail kan; eri irail mweseldahsangehr pohn sampah ni ar pereperen.

40 Oh mie ekei me mehkihla soumwahu karakar, me kin kalapw wiawi nan sahpwo nan ekei ahnsou nan ehu pahr—ahpw re sohte kin kalapw mehkihla soumwahu karakar, pwehki tohtohn tuhke kan oh kalowe kan me inenen kaselel mehlel me Koht ketin kaunopadahr pwe en kak kamwahuwihala soumwahu kan, me aramas akan kin iangada pwehki iren ahnsou—

41 Ahpw tohto me mehla ni ar mahlahr; oh duwen me kitail pahn medemedewe, irail akan me mehla ni ar pwoson Krais ahneki peren reh.