1 Kedekedeo ni ahnsou me irail wiahdahr mwomwohdiso nan sahpwo, nanmwarki Lemonai ketin kupwurki me Amon pahn iang ih kohla nan sahpw en Nihpai, pwe en ketin kapehsehiong ih semeo.

2 Oh kapitien Kauno ahpw peidohng Amon, ketihtihki: Ke sohte pahn kohla nan sahpw en Nihpai, pwe kilang, nanmwarkio pahn song en kemeiukala; ahpw ke pahn kohla nan sahpw en Midonai; pwe kilang, Aron riomwo, oh pil Mulokai oh Amah re mihmi nan imweteng.

3 Eri kedekedeo ahnsou me Amon rongada duwen met, e ahpw ndaiong Lemonai: Kilang, rieio oh riei ohl akan mihmi nan imweteng nan Midonai, oh I pahn kohla pwe I en kak doareirailla.

4 Lemonai eri ndaiong Amon: I ese, me sang ni kehl en Kauno ke kak wia soahng koaros. Ahpw kilang, I pahn iang komwi kohwei nan sahpw en Midonai; pwe nanmwarki en sahpw en Midonai, me mwareniki Andiomno, e wia kempoakepahi men; eri I pahn kohwei nan sahpw en Midonai, pwe I en kak kaperenda nanmwarki en sahpwo, oh e pahn kapedoi sang riomw kan nan imweteng. Lemonai ahpw kalelapak reh: Ihs me patohwanohng komwi me riomw kan patpato nan imweteng?

5 A Amon sapengki: Sohte me ndaiong ie, ihte Koht; oh e ketin mahsanihong ie—Kohwei oh doarehla riomw kan, pwe irail mihmi nan imweteng nan sahpw en Midonai.

6 Met ahnsou me Lemonai karongehier met, e mahsanihong sapwellime ladu kan re en kaunopada sapwellime oahs kan oh werennansapw akan.

7 Oh e mahsanihong Amon: Kohdo, I pahn ianguhk kohdihla nan sahpw en Midonai, oh wasao I pahn peki rehn nanmwarkio pwe en kapedoi riomw kan sang nan imweteng.

8 Kedekedeo Amon oh Lemonai ahpw wie seiseiloak kohla, ira ahpw tuhwongedi semen Lemonaio, me wia nanmwarki en sahpwo pwon.

9 Oh kilang, semen Lemonai mahsanihong ih: Dahme ke sohte kohkihdo ni kamadipw en rahn kesempwalo me I koasoanehdi kamadipw ehu ong nei pwutak kan, oh ong nei aramas akan?

10 Oh e ahpw mahsanih: Ia wasa ke kahkahrehla ie Mehn Nihpai menet, me wia emen seri en aramas likamw?

11 Kedekedeo Lemonai ahpw patohwanohng ih ia wasa re kohkohla ie, pwehki e masak ede engiengda pah.

12 Oh e pil ndaiong kahrepe koaros me e mihmihki nan eh wehio, me e sohte pwarekihla ni kamadipw me semeo ketin kaunopadao.

13 Oh met ahnsou me Lemonai koasoiahiongehr mepwukat koaros, kilang, e pwuriamweiki, eh pahpao e engiengida pah, oh mahsanih: Lemonai, ke pahn pitipitte kapwurehla Mehn Nihpai pwukat, me wia seri en aramas likamwo. Kilang, e pirapa atail pahpa kahlap ako; oh met nah seri kat pil kohdo rehtail pwe sang ni arail likamw kan oh mwersuwed, irail pahn keteweikitaildi, pwe irail en kak pwurehng pirapahsang dahme atail.

14 Eri semen Lemonaio ahpw mahsanihong en kemehkihla Amon kedlahso. Oh e pil mahsanihong ih me e sohte pahn kohla nan sahpw en Midonai, ahpw e pahn iangihda pwurala nan sahpw en Ismael.

15 Ahpw Lemonai mahsanih ong ih: I sohte pahn kemehla Amon, de pil pwurala nan sahpw en Ismael, ahpw I pahn kohla nan sahpw en Midonai pwe I en kak kapitala rien Amon kan, pwe I ese me irail wia ohl pwung kei oh soukohp sarawi en Koht mehlelo.

16 Eri ni eh karongehda met, e ahpw engiengida pah, oh usada sapwellime kedlahso pwe en pelehdiong nan pwelo.

17 Ahpw Amon patohda oh ndaiong ih: Kilang, komw sohte pahn kemehla sapwellimomwi pwutaken; ahpw e pahn mwahu ma ih me mehla sang komwi, pwe kilang, e koluhkilahr dipe kan; ahpw ma komwi me pahn mehla ahnsou wet, nan omwi engieng, palingenomwen sohte kak komourla.

18 Oh pil, e pahn konehng komwi en ketin pweieksang; pwe ma komw pahn ketin kemehla sapwellimomwi pwutak, ni e wia aramas mwahu men, ntah pahn kedipaikomwi rehn Kauno eh Koht sang nan pwehl, pwe en dupukiong komwi; oh komw pahn kakete mehla ni palingenomw.

19 Eri ni ahnsou me Amon koasoiahiong mepwukat, e ahpw sapeng ih, ketihtihki: I ese ma I pahn kemehla nei pwutak en, I pahn kemehla aramas mwahu; pwe kowe me song en kauwehla ih.

20 Oh e ahpw ngapalahng kemehla Amon. Ahpw Amon sarek eh palapal kan, ih eri pil pelehiong peho pwe en sohla kak doadoahngki.

21 Eri ahnsou me nanmwarkio mahsanihdahr me e sohte kak kemehla Amon, e ahpw tepida pekmahk rehn Amon me en menlau dehr kemehla.

22 Ahpw Amon ngapkipeseng nah kedlahso, oh ndaiong ih: Kilang, I pahn pelei komwihdi ma komw sohte pahn mweidala riei kan sang nan imweteng.

23 Met nanmwarkio, masakada pwe ede kamakamala, e ahpw mahsanih: Ma komw sohte pahn kemeiehla I pahn kamanahiong komwi soahng koaros me komw pahn patohwanohng ie, iei kak elep ei wehi.

24 Eri ahnsou me Amon kilangadahr me e kamasakadahr mwohnsapw likeilapo en mweidohng nin duwen nsene, e ahpw ndaiong ih: Ma komw pahn mweidala riei kan re en kapidoi sang nan imweteng, oh pil mweidohng Lemonai en kolokolete sapwellime wehio, oh me komw sohte pahn nsensuwed pah, ahpw mweidohng en momour nin duwen nsene nan pein eh saledek en madamadau, eri I sohte pahn kemeikomwihla; ma soh, a I pahn peleikomwihdiong nan pwehlen.

25 Met ahnsou me Amon patohwanda mepwukat, nanmwarkio tepida peren pwehki eh ieias.

26 Oh eri ni nanmwarkio kilang me Amon sohte inengieng en kemehla, oh e pil kilang Amon eh poakepoake mehlel nah pwutak Lemonai, e pwuriamweiki kowahlap, oh mahsanih: Pwehki ihte met me komw kupwuriki, I pahn kapidoi riomw kan, oh mweidohng nei pwutak Lemonai en wie kolokolete eh wehio, kilang, I pahn kamanahieng komwi me nei pwutak en pahn kolokolete eh wehio sang ahnsou wet oh kohkohlahte; oh e sohla pahn mih pahn ei manaman—

27 Oh I pahn pil kamanahiong komwi me riomw kan pahn saledeksang nan imweteng, oh komwi oh riomw ohl akan en patohdo rehi, nan ei wehio; pwe I udahn men tuhwong komwi. Pwe nanmwarkio pwuriamweila mehlel sang ni koasoi kan me e koasoia, oh pil koasoi kan me e koasoia mpen sapwellime pwutako Lemonai, eri e kupwuriki esehla.

28 Kedekedeo Amon oh Lemonai douluhla nan ara seiloak patpatohla nan sahpw en Midonai. Oh Lemonai kenikenla pahn nanmwarki en sahpwo; eri rien Amon kan kapidoi sang nan imweteng.

29 Oh ahnsou me Amon tuhwong irail e uhdahn pahtoukihla kowahlap, pwe kilang irail kilisou, oh kilirail kan tepwala kowahlap pwehki arail pirapirkihdi sahl kehlail. Oh irail pil lokolongki arail men mwenge, men nimpil, oh soahngen lokolok koaros; ahpw irail kanengamahiengete nan arail lokolok kan koaros.

30 Oh, met wiawi, pwehki arail usuhso inenehdi rehn aramas me keieu kahngohdi oh keptakai; eri irail sohte men rong arail padahk kan, oh kausirailla, oh kaloke irail, oh pwakih irail sang ni ehu ehu ihmw kan, oh sang ehu wasa kohla ehu wasa, lao lel arail kohdo nan sahpw en Midonai; oh wasao me irail kolkoldi ie oh lekdeklong nan imweteng, oh pirapirkihdo sahl kehlail, oh sensel nan imweteng erein rahn kei, oh Lemonai oh Amon kasaledekiraillahr.