1 Kedekedeo Mehn Nihpai kan me sohte kamakamkihla dipwsou en mahwen kan, mwurin arail sarepedi me kamakamalahr akan—met me kamakamala kan sohte kak wadawadedi, pwehki uwen arail kidalap—mwurin arail sarepedi arail mehla kan, irail koaros pwuralahng nan sapwarail kan, ni imwarail akan, rehn arail pwoud kan, oh neirail seri kan.

2 Met, lih oh seri tohto me pil kamakamkihla kedlahs, oh pil neirail pelin sihpw oh kou tohto pil kamakamala; oh pil arail mwetuwel en werentuhke tohto pil ohla, pwehki kidalap en karis en sounpei kan tiakedi oh kumutepene.

3 Oh met, Mehn Leimen oh Mehn Amilisai tohto me kamakamala ni keilen pillap Saidon lekdekdihlahte nan pihl en Saidon; oh kilang tihrail akan mihmi wasa loal kan en nansed, oh re me tohto.

4 Oh Mehn Amilisai weksang Mehn Nihpai kan, pwe re kaweitahtala pohn tomwerail akan ni mwohmw en Mehn Leimen kan; ahpw irail sohte sehkasang piten moangerail akan duwehte Mehn Leimen kan.

5 Pwe piten moangen Mehn Leimen kan kin seiseisang; oh irail sohte kin likou, ihte kisin kilin mahn me kin pirapiriong lukoperail kan, oh pil arail tehtehn mahwen, me katengetengdiong nin lukeparail, oh neirail kesik ketieu kan, oh arep kan, oh neirail takai kan, oh neirail pahi kan, oh soahng teikan.

6 Oh kilin Mehn Leimen kan toantoal, nin duwen kilel me kohiengehr arail pahpa ko, me wia keriah ehu pohrail pwehki arail wiahda dihp oh kahngohdi ong riarail akan, me iei Nihpai, Seikop, oh Sosep, oh Sam, me wia ohl sarawi oh pwung kei.

7 Oh riarail kan song en kauweirailla, kahrehda irail riahla; oh Kauno Koht ketikihong pohn kilirail kilel ehu, mehlel, pohn Leimen oh Lemuel, oh pil nein Ismael pwutangko, oh pil lih akan me wia kisehn Ismael.

8 Oh met e wiawi pwe kadaudokerail akan en kak weksang kadaudok en riarail kan, pwe Kauno Koht en kak doarehla sapwellime aramas akan, pwe irail en dehr pwopwoudpene oh kamehlele tiahk sapwung kan me pahn kahrehda arail kamwomwomwla.

9 Kedekedeo ma mehmen me pahn kapwopwoudipene kadaudoke rehn Mehn Leimen kan, kadaudoke kan pahn pil iang ale keriape.

10 Eri, mehmen me mweidala pein ih en idawehnla Mehn Leimen kan kin kahdanikihla ahdohte, oh kilelo pil kin mihla reh.

11 Kedekedeo mehmen me sohte kin kamehlele tiahk en Mehn Leimen kan, ahpw kamehlele poadopoad kan me wisikdo sang nan sahpw en Serusalem, oh pil tiahk en arail pahpa kahlap ako, me pwung, me kamehlele sapwellimen Koht kosonned akan oh kin kapwaiada, re kin adaniki Mehn Nihpai, de aramas en Nihpai, sang ahnsouo kohla—

12 Oh iei irail me kin kolokol poadopoad mehlel en neirail aramas akan, oh pil aramas en Mehn Leimen kan.

13 Met kitail pahn kapwurelahng Mehn Amilisai kan, pwe irail pil alehdier kilel ehu poh kilirail; ei, irail kilelehki pein irail kilelo, iei, kilel weitahta me mih ni temwarail kan.

14 Eri met mahsen en Kohto pweidahr, pwe iet mahsen akan me e ketin mahsanihong Nihpai: Kilang, Mehn Leimen kan me I keriairaillahr, oh I pahn kihong irail kilel ehu me irail oh kadaudokerail akan pahn katohrohrsang uhk oh kadaudokomw kan, sang met kohla oh kohkohlahte, ihte ma irail pahn koluhkihla arail wiewia suwed kan oh sohpeido rehi pwe I en kak mahkong irail.

15 Oh pil: I pahn kihong kilel ehu pohn kilirail kan me pahn patehng kadaudoken riomw kan, pwe irail en pil iang riahla.

16 Oh pil: I pahn kihong kilel ehu pohn mehmen me pahn peiong uhk oh kadaudokomw kan.

17 Oh pil, I ndaionguhk me mehmen me pahn kohkohsanguhk pahn sohla wia kadaudokemw; oh I pahn kapaiukada, oh mehmen me pahn wiahla kadaudokemw, sang met kohla oh kohkohlahte; oh mepwukat iei sapwellimen Kauno inou ong Nihpai oh kadaudoke kan.

18 Met Mehn Amilisai kan sohte ese me mahsen en Koht pweidahier rehrail ni ahnsou me irail tepida kihong kilel pohn temwerail kan; ahpw re saledengki ar kahngohdiong Koht; eri e konehng me keriao pahn kohieng irail.

19 Met I men kumwail en kilang me pein irail me kihong irail keriah wet; oh iei pil duwehte aramas koaros me riahla kin pein kihong irail arail lokolok.

20 Met kedekedeo e saik lel rahn tohto kei mwurin arail mahwen ong Mehn Leimen oh Mehn Amilisai kan nan sahpw en Saraemla, a mie pil ehu pwihn en sounpei en Mehn Leimen kei me kohdohn peiong aramas en Nihpai kan, wasaohte me tepin sounpei ko tuhwong ie Mehn Amilisai kan.

21 Kedekedeo mie sounpei kei me pekederla pwe re en pwakihrailsang nan sapwarail.

22 Met, pwehki Alma eh sousoumwahuki eh ohla, e sohte iang kohla mahweniong Mehn Leimen kan ahnsou wet;

23 Ahpw e kadaradalahng irail karis en sounpei ehu; oh irail kohdahla oh kemehla tohtohn Mehn Leimen kei, oh pwakihasang irail me luwehdi ni irepen sahpwo.

24 Oh irail eri pwurodo oh pwurehng ahneki popohl nan sahpwo, sohla ahneki kapwunod en arail imwintihti kan nan ahnsou kis.

25 Met mepwukat koaros wiawiher, ei, mahwen pwukat koaros oh pingiping pwukat koaros tepida oh uhdi nan pahr kelimau en mwehin sounkopwung kan.

26 Oh nan pahr ehuo aramas kid kei oh nen kei pekederlahng nan wasahn mour poatopoato, pwe irail en kak ale ketingpen arail wiewia kan, ma re mwahu de ma re suwed, en ale peren poatopoat de pahtou poatopoat, nin duwen ngehno me irail peikiong, ma ngehn mwahu de me suwed.

27 Pwe emen emen aramas pahn alehdi isepe sang ih me e pilada peikiong, oh met iei duwen mahsen akan en ngehn en kohkohp; eri e pahn pweida nin duwen me mehlelo. Oh met kaimwsekelahn pahr kelimau en mwehin sounkopwung kan.