1 Eri, iet ehn Amon koasoi kan ong rie ko, me ketihtihki: Riei ohl akan oh kempoakepahi kan, kilang I ndaiong kumwail, mie kahrepe laud me kitail kak pereniki; pwe ia duwe, kitail kak medewe ni ahnsou me kitail mweseldahsang sahpw en Saraemla me Koht pahn ketikihong kitail soahngen kapai laud pwukat?

2 A met, I men idek, soahngen kapai laud dah me e ketikihong kitailehr? Kumwail kak koasoiada?

3 Kilang, I pahn sapengkin kumwail; pwehki riatail, Mehn Leiman kan, mihmi nan rotorot, iei, wasa keieu rotorot, ahpw kilang, irail meh depe me kitail sowesedahr en kilangada marain kesempwal en Koht! Oh met iei kapai me Koht ketikihongkitailehr, pwe kitail wiahla wiliepen nin limen Koht pwehn kapwaiada doadoahk kesempwal wet.

4 Kilang, irail meh kid kei wie pereperen, oh pakahrdohngehr nan sapwellimen Koht kehl.

5 Kilang, wahn mwetuwelo mahier ahnsouo, oh meid pai kumwail, pwe kumwail doadoahngki noumwail kama kan, oh kumwail en dolung wah kan sang ni amwail kak, ei, kumwail doadoahk pwerisek rahno pwon; oh kumwail kilang uwen tohtohn amwail kapakap kan! Oh re pahn rikirikpene nan ihmwen nahko, pwe re sohte pahn ohla mwahl.

6 Ei, melimel en imwin rahno sohte pahn keseiraildi; ei, de re sohte pahn pihrda nan elipip kan; ahpw ahnsou me melimelo pahn kohdo re pahn kohpene nan dewerail akan, pwe melimelo sohte pahn kak kaweirailla; ei, de pil sohte kisinieng kehlail pahn ipir iraillahng wasa me imwintihtiho men wairailla ie.

7 Ahpw kilang, irail pahn mih pahn manaman en limen Kaunen rahko, oh irail wia sapwellime; oh e pahn ketikiniraildahla ni imwin rahno.

8 Meid pahi mwaren atail Koht; kitail kapingahki koul, ei, kitail kapinga ni mware sarawio, pwe e kin ketin wia doadoahk pwung kohkohlahte.

9 Pwe ma kitail sohte kohdahdo sang nan sahpw en Saraemla, irail pwukat me wia kempoakepatail kesempwal me pil poakepoake kitail mehlel, pahn kakete audaudki kailok ong kitail, ei, oh irail pahn pil sehse Koht.

10 Kedekedeo ni ahnsou me Amon koasoiahier koasoi pwukat, rie pwutako Aron uhd kapwung ih, oh ndinda: Amon, I salohki me omw peren en kahrehdahr omw aksuwei.

11 Amon ahpw ndaiong ih: I sohte aksuweiki pein ei kehlail, de pein ei erpit; ahpw kilang, I me peren unsek, ei, ei mohngiong direkihla popohl, oh I pahn kaping ong ei Koht.

12 Ei, I ese me kaidehk ngehi mehkot; nin duwen ei kehl I me luwet; eri I sohte pahn aksuweiki pein ngehi, ahpw I pahn kapingahki ei Koht, pwe sang sapwellime rosonlap I kak wia soahng koaros; ei, kilang, doadoahk kapwuriamwei tohto me kitail wiahda sahpwet, oh kitail pahn kapikapingahki mware kohkohlahte.

13 Kilang, ia uwen kid kei en riatail kan me e ketin lapwadahsangehr medek en ehl; oh kahrehiong irail en koulki komour en limpoak, oh met pwehki manaman en sapwellime mahseno me mih rehtail, eri e soh mie kahrepen atail pahn peren laud?

14 Ei, mie kahrepe me kitail pahn kapinga ih kohkohlahte, pwe ih iei Koht Wasa Lapalap, oh e ketin lapwadahsangehr riatail akan sang selmete kan en ehl.

15 Ei, rotorot oh mwomwala soutuk kapilirailpenehr; ahpw kilang, e ketin wairaildohngehr nan sapwellime marain soutuko, ei, nan komour soutuk; oh re kapilkihpenehr sapwellime limpoak kohwalap; ei, oh kitail wia mehn doadoahk nin lime kan ong wiewia doadoahk lap oh kesempwal wet.

16 Eri, kitail pereperen, ei, kitail pahn kapinga Kauno; ei, kitail pahn kapingahki atail peren diralahr; ei, kitail pahn kapinga atail Koht kohkohlahte. Kilang, ihs me pahn kak kapingahki mehlel Kauno? Ei, ihs me kak koasoi laudki mehlel duwen sapwellime manaman, oh sapwellime kalahngan, oh sapwellime kanengamah ong aramas akan? Kilang, I ndaiong kumwail, I sohte kak kasalehda ekiste uwen dahme I kehn.

17 Ihs me kak medewehiong uwen kalahngan en atail Koht ni e ketin mwadangete adihkitailsang nan atail mour sakanakan, dipan, oh samino?

18 Kilang, kitail kohkihla nan kapehdatail kan diren kailok, iangahki lokaia tohto pwe en kauwehla sapwellime mwomwohdiso.

19 O ia duwe, dahme kahrehda e sohte mweidkitailangete en kamwomwala, ei, dahme kahrehda e sohte mweidohngete kedlahs en sapwellime pwungo en kaloke kitail, oh keseikitailla nan pahtou soutuk?

20 O, palingeniet kin kereniong sohrkihla madamadau wet. Kilang, e sohte ketin doadoahngki sapwellime kalokoloko pohtail, ahpw ni sapwellime kalahngan lapo e ketikihsang kitail nan lehn mehlao oh pahtou soutuko, oh ketikinkitaillahng komourpen palingenetail kan.

21 Oh met kilang, riei ko, dah, mie aramas emen me kin momourki mour en sampah me kak ese mepwukat? I ndaiong kumwail soh, sohte me kak ese mepwukat, ihte me kin koluhla kan.

22 Ei, ih me kin koluhla oh doadoahngki pwoson, oh wiahda doadoahk mwahu kan, oh sohte kin tokedihsang kalapw kapakap—ong soahngen aramas menet e kohieng en esehla sapwellimen Koht rir kan; ei, ong soahngen aramas wet e pahn kin mweimweiong en kasalehda soahng kan me sohte kin kasansalada; ei, e pahn kohieng soangen aramaso en wahdo aramas kid kan ong koluhla, iei duwehte eh wiawihongkitailehr en wahdo riatail pwukat en koluhla.

23 A met, rieiko, kumwail tamataman ansou me kitail ndaiong riatail akan nan sahpw en Saraemla, me kitail pahn kohdahdo nan sahpw en Nihpai, en padahk ong riatail, Mehn Leimen kan, oh irail kouruhrkin kitail?

24 Pwe irail ndaiong kitail: Kumwail medewe me kumwail kak kahrehiong Mehn Leimen kan re en marainkihda me mehlelo? Kumwail medewe me kumwail kak kamehlelehiong Mehn Leimen kan tiahk sapwung kan en arail pahpa kahlap ako, ni ar wia aramas keptakai; me mohngiongarail kan pereniki kam aramas; me kin wiewia tiahk suwed kasaut kan rahn koaros; me arail wiewia kan kin duwehte aramas me kin kauwehla kosonnedo sangete ni tapio. Met riei ko, kumwail taman ih mwomwen arail lokaia ko met.

25 Oh irail pil nda: Kitail mahweniong irail, pwe kitail en kamwomwirailla oh arail wiewia suwed kan sang nan sahpwet, pwe irail de powehkitaildi oh kamwomwkitailla.

26 Ahpw kilang, riei ohl kesempwal akan, kitail kohdo nan sahpwtehn ni atail sohte medemedewe kamwomwala riatail kan, ahpw sang ni atail ingangih ma kitail sou pahn kak kamourala ekei irail.

27 Eri ni ahnsou me atail mohngiong kan pahtoula, oh kitail medewehda pwurala, kilang, Kauno kaloalamwahui kitail, oh ketin mahsanih: Kohwei rehn riomwail, Mehn Leimen kan, oh kanengamah nan amwail lokolok kan, oh I pahn ketikihong kumwail en pweida.

28 Oh kilang, kitail kohdohier, oh miher rehrail; oh kitail kanengamah nan atail lokolok kan, oh kitail lokolongkier soangen anahn koaros; ei, kitail kolahngehr ehu ehu ihmw, koapworopworki kalahngan en sampah—kaidehnte kalahngan en sampah ahpw kalahngan en Koht.

29 Oh kitail pidelong nan imwarail akan oh padahki irail, oh kitail padahki irail nan arail ahl akan; ei, oh padahki irail pohn dohl akan; oh kitail pil pidelongehr nan arail tehnpas sarawi kan oh arail sinakoke kan oh padahki irail; eri kitail lekdekiei, oh re kapailoke kitail, oh kandipih kitail, oh pohr masatail akan; oh re kostakai kitail, oh ale kitail oh pirehkihdi sahl kehlail kan, oh keseikitailong nan imweteng; oh sang ni manaman oh kupwurokong en Koht kitail pwurehng saledekla.

30 Oh kitail lokolongki soahngen kalokolok koaros, oh kitail wia mepwukat koaros, pwe kitail en kak kamourala ekei aramas; oh kitail medewe me atail peren uhdahn pahn unsek ma kitail pahn kak sewese kamourala ekeite.

31 Eri kilang, kitail kak kilengla oh kilang wahn atail doadoahk kan; ia duwe, re malaulau? I ndaiong kumwail, Soh, mie wah tohto; ei, oh kitail kak dehdehki arail mehlel, pwehki arail limpoak ong riarail akan oh pil ong kitail.

32 Pwe kilang, irail men mweidala arail mour sang arail pahn kemehla arail imwintihti; oh irail sarepidier neirail dipwisou en mahwen kan wasa loal nan pwehl, pwehki arail limpoak ong riarail akan.

33 Oh met kilang, I men idek rehmwail, mie soahngen limpoak lap wet nan sahpwo pwon? Kilang, I ndaiong kumwail, Soh, saikinte mie, pil lel rehn Mehn Nihpai kan.

34 Pwe kilang, irail pahn mahweniong riarail kan; re sohte pahn mweidohng pein irail en kamakamala. Ahpw kilang ia uwen tohtohn irail akan me pwilikihdi arail mour kan; oh kitail ese me irail kohla rehn arail Koht, pwehki arail limpoak oh arail kailongki dihp.

35 Eri e sou mie kahrepen atail perenda? Ei, I ndaiong kumwail, sohte aramas men me ahneki kahrepen ar pahn perenda duwehte kitail, sangete ni tepin sampah; ei, oh ei peren doulihala, iei ong aksuweiki ei Koht; pwe e ketin sapwellimaniki manaman koaros, erpit koaros, oh kupwurokong koaros; e ketin mwahngih soahng koaros, oh ih iei Koht kalahngan men, ong komourpen, irail akan me pahn koluhla oh kamehlele mware.

36 Eri ma iei aksuwei met, a I uhdahn pahn aksuwei; pwe ih ei mour met oh ei marain, ei peren oh ei komour, oh ei poadoandoarla sang me suwed poatopoat. Ei, meid pai mwaren ei Koht, me kin ketin loaloale aramas pwukat, me wia ehu rahn tuhkehn Israel, oh salongasang uhdake oh sansalongseli nan sahpw liki; ei, I nda, meid pai mwaren ei Koht, me kin ketin loaloale kitail, aramas kakahnseli nan sahpw liki.

37 Eri met riei kan, kitail kilang me Koht ketin loaloale aramas koaros, sohte lipilipil sahpw me irail kin mih ie; ei, e ketin wadekedier sapwellime aramas akan, oh sapwellime kupwur kalahngan mih wasa koaros nan sampah. Iei met ei peren, oh ei kapingkalahngan mehlel; ei, oh I kapingkihong ei Koht kohkohlahte. Ahmen.