1 Kedekedeo ahnsou me Moronai alehdier kisin likou wet e ahpw kehlailkihda nan eh mohngiong, oh direkihla peren kowahlap pwehki Paoran eh loaloapwoat, ni eh sohte pil iang pangala arail saledek oh doadoahk en arail wehi.

2 Ahpw e pil pahtoukihla mehlel pwehki wiewia suwed en irail akan me kihsang Paoran nan sehr en kopwungo, ei, ni mehlel pwehki irail akan me uhwongada arail wehi oh pil arail Koht.

3 Kedekedeo Moronai wahda ekei ohl, nin duwen dahme Paoran inangih, oh kihong Lihai oh Dienkom re en apwalih luhwen nah sounpei kan, oh kohla nan sahpw en Kidion.

4 Oh e ahpw kihda pilaik en mour saledek nan wasa koaros me e kin pidelong, oh kihkihpene uwen sounpei me e kak nan ah kohkohlahng nan sahpw en Kidion.

5 Kedekedeo [aramas] meh kid kei kohdo patehng ah koasoandio, oh alehda neirail kedlahs kan pwe re en doare arail saledek, pwe irail en dehr mihla nan kalidu.

6 Oh met, ahnsou me Moronai kihpenehier uwen ohl akan me e kak nan ah kohkohla, e ahpw kohdo nan sahpw en Kidion; oh kapatahiong nah sounpei kan nein Paoran irail ahpw kehlailla mehlel, iei kehlailsang nein Pakus ohl akan, me wia nanmwarki en irail me kahngohdi kan me pwakiasang aramas saledek kan nan sahpw en Saraemla oh kaunda sahpwo.

7 Kedekedeo Moronai oh Paoran iahngahki neira sounpei kan ahpw kohdihla nan sahpw en Saraemla, oh kohla nan kahnihmwo, oh tuhwongidi nein Pakus ohl akan, eri irail tepida mahwin.

8 Oh kilang, Pakus kamakamala oh nah ohl akan selidi, oh Paoran kopwurupwurieng nan ah sehren-sounkopwungo.

9 Oh nein Pakus ohl kan ahpw kohieng nan kopwung, nin duwen kosonnedo, oh pil irail aramas akan me kin uhpalihki nanmwarki me kolkoldi oh lekideklong nan imweteng; oh re kamakamala nin duwen kosonnedo; ei, nein Pakus ohl akan oh aramas me uhpalihki nanmwarki, mehmen me sohte pahn alehda dipwisou en mahwin oh doare arail wehi, ahpw uhwong, pahn kamakamala.

10 Oh met e ahpw tepida kesempwal me kosonnedo irail pahn anahne kapwaiada ni inen ong perepen arail wehi; ei, oh mehmen me pahn dierekda lahlahwe arail saledeko pahn mwadangete kamakamala nin duwen kosonnedo.

11 Oh met kaimwsekala pahr silihsek en mwehin sounkopwung kan ong aramas en Nihpai; Moronai oh Paoran ni ar kapwuredohr popohl nan sahpw en Saraemla, rehn neirail aramas, oh kemehlahier koaros irail me sohte mehleliong doadoahk en saledek.

12 Kedekedeo ni tepidahn kesilisek ehu en pahr nan mwehin sounkopwung kan ong aramas en Nihpai kan, Moronai mwadangete ruwesehiong irail en kadarala sawas en mwonge, oh pil sounpei meh wenekid pekederlahng Ilemen, pwe en sowese doandoare apali sahpwo.

13 Oh e pil ruwesehiong sounpei meh wenekid, iangahki uwen tohto mwonge me itar, en pekederla rehn sounpei kan en Lihai oh Dienkom. Kedekedeo met ahpw wiawi pwe en silehdi sahpwo sang Mehn Leimen kan.

14 Kedekedeo Moronai oh Paoran, kihdi pokon en ohl kei nan sahpw en Saraemla, oh kahrehda pokon en ohl kei kohla nan sahpw en Nihpaia, pwehki re koasonehdi me re pahn pwakiasang Mehn Leimen kan nan kahnihmwo.

15 Kedekedeo ni ahnsou me re kohkohla nan sahpwo, re ahpw kalowehdi nein Mehn Leimen kan pokon en ohl kei, oh kemehla tohto irail, oh kihsang kenerail mwonge kan oh neirail dipwisou en mahwin kan.

16 Kedekedeo mwurin arail kaloweiraildi, re wiahiong irail en wiahda inou me re sohte pahn pwurehng alehda dipwisou en mahwin oh uhwong Mehn Nihpai kan.

17 Oh ahnsou me re wiadahr inou wet re ahpw kadarirailahng re en kousoan rehn nein Amon aramas akan, oh uwen tohtohn irail meh pahkid me sohte kamakamala.

18 Kedekedeo ahnsou me re kadarirailla, re ahpw doula kohla nan sahpw en Nihpaia. Kedekedeo ahnsou me re kohla ni kahnihmw en Nihpaia, re ahpw wiahda arail impwal akan nan patapat en Nihpaia, me karanihte kahnihmw en Nihpaia.

19 Met Moronai inangih me Mehn Leimen kan pahn kohdo oh mahwiniong irail, nan patapato; ahpw Mehn Leimen kan, pwehki ar wehwehki me re ahneki eimah mehlel, oh pwehki ar kilang uwen arail tohto, eri re sohte men kohieidohng irail; eri re sohte kohiei oh mahwin rahno.

20 Oh ahnsou me e soutikpene, Moronai kohieila nihpwongo, oh douda pohn kehlo pwe en lipoahroke dehnen nan kahnihmwo me Mehn Leimen kan kapweidi neirail sounpei kan.

21 Kedekedeo e ahpw diarada me re mihmi ni palimese, nimwahn ewen kehlo; oh irail koaros memeir. Oh met Moronai pwurala rehn nah sounpei kan, oh ndaiong irail re en kaunopada sahl kehlail kan oh kehndake kan, pwe en kak doukihdi sang pohn kehlo ni masloalen kehlo.

22 Kedekedeo Moronai ahpw kahrehda nah ohl kan re en kohla oh douda pohn kehlo, oh doudihla nan kahnihmwo, iei, wasa me salahng palikapi, wasa me Mehn Leimen kan sohte kapweidi neirail sounpei kan.

23 Kedekedeo irail koaros ahpw doudihla nan kahnihmwo nihpwongo, sang ni neirail sahl kehlail kan oh arail kehndake kan; eri ahnsou me e wasarahnpeseng irail koaros mihmi nan kahnihmwo.

24 Oh met, ahnsou me Mehn Leimen kan pwourda oh kilangada me nein Moronai sounpei kan mihmi nan kehlo, re ahpw masepwehkda mehlel, kahrehda re tangeiei ni ewen kehlo.

25 Oh met ahnsou me Moronai kilang me re wie tangatangasang mwohrail, e ahpw ruwesehiong nah ohl akan re en mahwiniong irail, oh kemehla tohto, oh koledi tohto irail, oh saliedi irail; oh irail akan me luhwehdi tang kohla nan sahpw en Moronai, me karahnih irepen sahpwo ni oaroahro.

26 Eri met Moronai oh Paoran kalowehdier kahnihmw en Nihpaia ni sohte emen irail mehla; oh tohto Mehn Leimen kan me kamakamala.

27 Met kedekedeo tohto Mehn Leimen kan me selidi ko inangih re en iangala nein Amon aramas akan oh wiahla aramas saledek.

28 Kedekedeo koaros me kin inangih, e kin mweimweiong irail nin duwen arail ineng.

29 Eri, me selidi koaros me wia Mehn Leimen kan iangala nein Amon aramas akan, oh tepida doadoahk mehlel, koadoahke wahn sahpw, padokedi soangen werentuhke koaros, oh apwali pelen sihpw kan oh kou kan koaros; oh met kahrehda Mehn Nihpai kan ar kasaledeksang katoutou lap ehu; ei, kahrehda irail kasaledek sang neirail Mehn Leimen me selidi kan koaros.

30 Kedekedeo Moronai, mwurinte e kalowehdi kahnihmw en Nihpaia, mwurin eh saliedier tohto, me katikala nein Mehn Leimen kan sounpei kan kowahlap, oh mwurin eh kapitalahr tohto Mehn Nihpai me selidi kan, me pil kakehlakahla nein Moronai sounpei kan kowahlap; eri Moronai ahpw kohwei sang nan sahpw en Nihpaia kohla nan sahpw en Lihai.

31 Kedekedeo ahnsou me Mehn Leimen kan kilangadahr Moronai kohkohdohng irail, re ahpw pwurehng masepwehkada oh tangasang mwohn nein Moronai sounpei kan.

32 Kedekedeo Moronai oh nah sounpei kan ahpw pwakih irail sang nan ehu kahnihmw kohla nan ehu, lao re tuhwongidi Lihai oh Dienkom; oh Mehn Leimen kan tangasang Lihai oh Dienkom, iei kohdihla ni irepen sahpwo ni oaroahro, lao re kohdo nan sahpw en Moronai.

33 Oh nein Mehn Leimen sounpei kan koaros pokonpenehr, kahrehda irail koaros wiahda ehu pokon nan sahpw en Moronai. Met Amoron, nanmwarki en Mehn Leimen kan, pil iang irail.

34 Kedekedeo Moronai oh Lihai oh Dienkom kapweidi neirail sounpei kan kapilpene irepen sahpw en Moronai, kahrehda Mehn Leimen kan mihla nanpwungarail ni irepen sapwtehno palier, oh irepen sapwtehno ni palimese.

35 Oh met irail pweidi pwohngo. Pwe kilang, Mehn Nihpai kan oh pil Mehn Leimen kan pwangada pwehki arail wie pwepwekiseli; eri re sohte wiahda koasondi nihsoutiko, ihte Dienkom; pwe e udahn lingeringer pahn Amoron, kahrehda e keinahki me Amoron, oh Amelekaia riehu, me kahrehda mahwin lap oh werei wet nan pwungarail oh Mehn Leimen kan, me kahrehda mahwin tohto oh nta kerala, ei, oh lehk lap.

36 Kedekedeo Dienkom ni eh lingeringer e ahpw kohla wasa me Mehn Leimen kan pweidi, ih eri douda oh doudi nan kehl en kahnihmwo. Oh e kohkihla sahl ehu, oh e kohwei nan ehu ehu wasa, lao e diar nanmwarkio; oh e ahpw katehki ketieu ehu, me doakoahdi karanih eh mohngiongo. Ahpw kilang, nanmwarkio kapwourada nah ladu ko mwohn e mehla, kahrehda re pwakihdi Dienkom, oh kemehla.

37 Met kedekedeo ahnsou me Lihai oh Moronai esehda me Dienkom mehla re pahtoukihla kowahlap; pwe kilang, e wia ohl emen me kin loalloapwoat mahwinki eh wehi, ei, kompoakepah mehlel en mour saledek; oh e pil lokolongkier kahpwal kalok mehlel tohto. Ahpw kilang, e mehlahr, oh seridier nan pwehl wasa me koaros pahn kohla.

38 Met kedekedeo mandahn rahno Moronai ahpw karihswei, oh kohlahng Mehn Leimen kan, kahrehda e kemehkinirailla kamakamala lap ehu; oh re pwakiasang irail nan sahpwo; oh re tang, kahrehda irail sohte pwurehng pwurodohng Mehn Nihpai kan ahnsouo.

39 Oh met kaimwsekalahr pahr silihsek ehu en mwehin sounkopwung kan ong aramas en Nihpai; oh iei mwomwen arail mahwin kan, oh kamaramas kan, oh lehk, oh kahpwal, nan erein sounpar tohto.

40 Oh kamaramas, oh pingiping, oh pwupwila kan wiawi, oh soahngen wiewia suwed koaros rehn aramas en Nihpai; ahpw pwehki memour en me pwung kan, ei, pwehki ahn me pwung kan kapakap, kahrehda re komourla.

41 Ahpw kilang, pwehki uwen werei en ahnsou en mahwino nanpwungen Mehn Nihpai kan oh Mehn Leimen kan tohto keptakaikihla, pwehki werei en ahnsou en mahwino; oh tohto me mwuterekda pwehki arail kahpwal akan, kahrehda re karakarahkala mwohn Koht, iei ni mehlel en ohpampap.

42 Kedekedeo mwurin Moronai e kakehlakahla silepen sahpwo me keieu karanih Mehn Leimen kan, lao kakehleparail itar, e ahpw pwurala nan kahnihmw en Saraemla; oh pil Ilemen pwuralahng wasahn eh sohso; oh popohl pwurehng miehda rehn aramas en Nihpai kan.

43 Oh Moronai kasapwilieng pwukoahn kaweid sounpei kan nah pwutak, me adaniki Moronaia; oh e ahpw komoaldi ni pein imwe pwe en kak mihmi nan popohl erein luhwen ah rahn kan.

44 Oh Paoran pwurehng pwuralahng nan ah sehr en sounkopwung; oh Ilemen pwurehng alehda pwukoahn kalohk ong aramas akan mahsen en Koht; pwehki mahwin tohto oh pingiping kan e konehng koasondi kan pahn pwurehng wiawihda nan mwomwohdiso.

45 Eri, Ilemen oh riehkan kohwei, oh kalohngki mahsen en Koht sang ni manaman ong kasalehiong aramas akan arail wiewia suwed kan, me kahrehda arail koluhkihla diparail kan oh pepdaisla ong Kauno arail Koht.

46 Kedekedeo re ahpw pwurehng wiahda mwomwohdiso en Koht, nan sahpwo pwon.

47 Ei, oh koasondi kan wiawihda nin duwen kosonnedo. Oh arail sounkopwung kan, oh arail sounkopwung lapalap kan pilipilda.

48 Oh aramas en Nihpai kan tepida pwurehng keirda nan sahpwo, oh tepida kaparaparala oh pwurehng kehlaila kowahlap nan sahpwo. Oh re pwurehng tepida kepwepwehla mehlel.

49 Ahpw mehndahte ar kepwehpwe, de nan ar kehlail, de ar pweida, re sohte pohnmwahsohla nan masarail kan; oh re pil sohte pwand en tamataman Kauno arail Koht; ahpw re karakarahkala mehlel mwohwe.

50 Ei, re tamataman uwen soahng kapwuriamwei kan me Kauno ketin wiahiong irail, me e ketin doarehsang irail mehla, oh sang pirapirdi, oh sang selidi, oh sang soangen kahpwal kan koaros, oh e doarehsang irail nan pehn arail imwintihti kan.

51 Oh re kin kalapw kapakap ong Kauno arail Koht, kahrehda Kauno ketin kapai irail, nin duwen sapwellime mahsen, kahrehda re kehlaila oh pweida nan sahpwo.

52 Kedekedeo mepwukat koaros wiawiher. Oh Ilemen kapilsalehdala, nan pahr silihsek limau en mwehin sounkopwung kan ong aramas en Nihpai.