1 Kedekedeo irail ahpw kohla, oh tepida padahkihong aramas akan sapwellimen Koht mahseno, pidelong nan arail sinokoke kan, oh nan imwarail akan; ei, oh irail pil padahngki mahseno pohn arail ahl akan.

2 Kedekedeo mwurin arail doadoahk laud rehrail, irail tepida pweida rehn aramas semwehmwe kan; pwe kilang, me semwehmwe kan lekdekiei sang nan arail sinokoke kan pwehki arail likou kan e sakanakan—

3 Eri irail sohte mweimweida re en pidelong nan ar sinokoke kan pwe re en kaudokiong Koht, pwehki arail kin wiahkin irail aramas samin; eri irail wia aramas semwehmwe kei; ei, riarail akan kin wiahkinirail aramas samin kei; eri irail semwehmwe ni dipwisou en sampah; oh irail pil nan kapehd karakarahk.

4 Eri, ahnsou me Alma wie padapadahk oh koasokoasoi ong aramas akan pohn dohl en Onaida, pokon ehu ahpw kohdo reh, irail iei aramas pwuko me kitail wie koasokoasoia, me ahneki mohngiong karakarahk, pwehki arail semwehmweh mehlel nan dipwisou en sampah.

5 Oh irail kohdo rehn Alma; oh emen me tieng mwohrail ahpw kalelapak reh: Kilang, dahme riei pwukat pahn wia, pwehki aramas koaros kailongkin irail pwehki ar semwehmwe, ei, ahpw mehlel rehn aht samworo kan; pwe irail kauskiht sang nan aht sinokoke kan me se doadoahk laud oh wiahkihda pein peht kan; oh irail kauskihtala pwehki aht semwehmwe mehlel; oh sohte wasa me se pahn kak kaudokiong aht Koht; oh kilang, dahme se pahn wia?

6 Eri ni en Alma eh karongehda met, e mwadangete pirekekla, oh sohpeila reh, oh e kilangada ni peren; pwe e kilang me re karakarahngkihlahr arail kahpwal akan, oh irail onopadahngehr en rong mahseno.

7 Eri e uhdihsang koasoi ong pokon teio; e ahpw kapahwei peh, oh ngihl laudida ong irail akan me e kilangada, me kohluhla mehlel, oh ndaiong irail:

8 I kilang me kumwail karakarahkalahr; ma met mehlel, meid pai kumwail.

9 Kilang riomwail ohlen nda, Dahme se pahn wia?—pwe se lekdeksangehr nan aht sinokoke kan, kahrehda se sohte kak kaudokiong aht Koht.

10 Kilang I ndaiong kumwail, kumwail lemeleme me nan sinokokehte me kumwail pahn kin kaudokiong Koht ie?

11 Oh pil ehu, I pahn idek rehmwail, kumwail lemeleme me pakete ehu nan wihk kan me kumwail pahn kaudokiong Koht?

12 I ndaiong kumwail, e mwahu amwail lekdeksang nan amwail sinakoke kan, pwe kumwail en kak karakarahkala, oh pwe kumwail en kak loalokongla; pwe e konehng kumwail en loalokongkihla, pwehki sang amwail pekausieisang nan sinakoke kan, sang riomwail kan ar kailongkin kumwail pwehki amwail semwehmwe mehlel, me kahrehieng amwail aktikitikla; pwe e konehng kumwail en karakarahkala.

13 Eri, pwehki amwail itoitehngehr karakarahkala, oh meid pai kumwail; pwe ekei pak ma aramas kin itoitehng karakarahkala, a re kin rapahki koluhla; oh met ni mehlel, mehmen me kin koluhla re kin diar kalahngan; oh mehmen me pahn diar kalahngan oh dadaurete lel ni imwi e pahn komourla.

14 Eri, ni ei ndaiong kumwail, meid pai kumwail pwehki amwail itoitehng karakarahkala, kumwail sohte kin medemedewe me kapai laud ong irail akan me kin mehlel en karakarahkiala pein irail pwehki mahseno?

15 Ei, mehmen me pahn pein karakarahkala ni mehlel, oh koluhkihla dipe kan, oh dadaur lel ni imwi, meid pai ong ih—ei, meid pai laudsang irail akan me kin itoitiong en karakarahkala pwehki arail semwehmwe mehlel.

16 Eri, meid pai irail akan me kin pein karakarahkala oh sohte itoitehng karakarahkala; de met wehwehki, meid pai mehmen me pahn kamehlele mahsen en Koht, oh papidaisla oh sohte ahneki mohngiong keptakai, ei, ni e sohte me kahrehiong en esehla mahseno, de itoitehng en esehla, mwohn eh pahn kamehlele.

17 Ei, tohto me kin nda: Ma komw pahn kasalehiong kiht kilel ehu sang nanleng, a se pahn ese ni mehlel; oh se pahn kamehlele.

18 Met I kalelapak rehmwail, pwoson ieu met? Kilang, I ndaiong kumwail, Soh; pwe ma aramas men pahn ese mehkot ehu e sohte anahne kamehlele, pwe e esehier.

19 Eri, ia uwen keria laud ong aramas men me esehier kupwuren Koht ahpw sohte kin kapwaiada, sang aramas me kin kamehlelehte, de aramas me men kamehlelehte, oh pwupwudi nan dihp?

20 Soahng wet kumwail pahn anahne tenekih. Kilang, I ndaiong kumwail, me ih pahn duwen ehu irair pahn weksang ehu irair tohrohr; oh dahme pahn wiawihong emen emen aramas pahn wiawi pwehki eh wiewia kan.

21 Oh met nin duwen ei koasoiaier pwoson—pwoson iei sohte marainki duwen soahng kan ni unsek; eri ma ke ahneki pwoson ke pahn koapworopworiki soahng kan me sohte kin sansal, ahpw mehlel.

22 Oh met, kilang, I ndaiong kumwail, oh I men kumwail en tamataman me Koht kin ketin mahkohng aramas koaros me kin kamehlele mwareo; eri, mwohn mehkoaros, e ketin kupwuriki me kumwail en kamehlele, iei, sapwellime mahsen.

23 Oh met, e kin ketikihdo sapwellime mahsen rehn ohl akan sang rehn tohnleng kan, ei, kaidehnte ohl akan ahpw pil lih akan; pak tohto kisin seri kan pil kin alehdi mahsen kan, me kin kapwungala aramas erpit oh loalokong.

24 Oh met, riei ohl kesempwal akan, pwehki amwail inengieng en esehsang ie dahme kumwail pahn wia pwehki amwail lokolok oh lekdeklahr—met I sohte men kumwail en medmedewe me I songosong en kadeik kumwail nin duwen dahme mehlel—

25 Pwe I sohte koasoia me kumwail koaros itoitehng en karakarahkiala pein kumwail; pwe I kamehlele me mie ekei kumwail me pahn kak pein karakarahkala, mendahte soangen irair sohte lipilipil me irail mih loale.

26 Eri, duwen pwoson me I koasoiahiero—e sohte wehwehki me kumwail ahneki marain unsek—oh e pil pahn duwehte ei koasoi kan. Kumwail sohte kak tepte ese mehlelih ni unsek, ma e pahn laudsang pwoson a wialahr marain unsek.

27 Ahpw kilang, ma kumwail pahn kapirada oh kamwekidada amwail mehn kapehm kan, iei song ei koasoi kan oh doadoahngki ekis diperen pwoson, iei, ma kumwail kak inangiete kamehlele, mweidohng inengwet en doadoahk loalomwail, lao kumwail kamehlele pwe kumwail en kak kihong ekis dewen ei koasoi kan.

28 Ahnsou wet, kitail pahn karasahiong mahseno kisin weren tuhke ehu. Eri, ma kumwail pahn kihong dewe, pwe kisin weren tuhkeo en kak poadidi nan mohngiongamwail kan, kilang, ma e pahn wia weren tuhke mehlel, de weren tuhke mwahu, ma kumwail sohte pahn kesehiei pwehki amwail soupwoson, me pahn kahrehda amwail uhwong Ngehn en Kauno, kilang, e pahn tepida mpwospeseng nan mwaremwaramwail kan; oh ni ahnsou me kumwail pahn tepida kehn mwekimwekid en mwpwospesenget, kumwail pahn tepida nda nan loalomwail kan—E uhdahn wia weren tuhke mwahu ehu, de me mahseno mwahu, pwe e tepier katehlapahla palingeniet; ei, e tepier kamarainiehda, ei, e tepier iou ong ie.

29 Eri kilang, e sou pahn kalaudehla amwail pwoson? I ndaiong kumwail, Ei; ahpw e saikinte keirdahng marain unsek.

30 Ahpw kilang, ni ahnsou me weren tuhkeo pahn mpwospeseng, oh keirda, oh tepida lalaudla, eri kumwail pahn nda me weren tuhkeo mwahu; pwe kilang e mpwospeseng, oh keirda, oh tepida lalaudla. Oh met, kilang, e sou pahn kakehlakahla ahmwail pwoson? Ei, e pahn kakehlakahla amwail pwoson: pwe kumwail pahn nda I ese me weren tuhke wet mwahu; pwe kilang e kekeirdahr oh tepida lalaudla.

31 Oh met, kilang, kumwail ese ni mehlel me weren tuhkeo mwahu? I ndaiong kumwail, Ei; pwe weren tuhke koaros kin kadarala wah ni soangenmwomwen wahohte.

32 A ma weren tuhke pwoat pahn keirda, eri weren tuhke mwahu ieu, ahpw ma e sohte keirda, kilang e sohte mwahu, eri e kin lekdekla.

33 Oh met, kilang, pwehki amwail songehr, oh poadokedi weren tuhkeo, oh e mpwospesengehr oh kekeirda, oh tepida lalaudla, kumwail anahne ese me weren tuhkeo mwahu.

34 Oh met, kilang, amwail maraino unseklahr? Ei, kumwail marainkihdahr unsek dahme kumwail songo, oh amwail pwoson solahr doadoahk; oh met pwehki kumwail esehier, pwe kumwail esehier me mahseno katehlapahlahr palingenamwail kan, oh kumwail pil ese me e kekeirda, pwehki amwail wehweh tepier maramarainpeseng, oh amwail madamadau tepier tehlappeseng.

35 Eri, mpwukat sou mehlel? I ndaiong kumwail, Ei, pwehki e wia marain; oh mehkot me kin wia marain, e mwahu, pwehki e kin sansal, eri kumwail pahn kak ese ma e mwahu; oh met kilang, mwurin amwail songehr marain wet, amwail maraino unseklahr?

36 Kilang I ndaiong kumwail, Soh; kumwail sohte pahn pwilikihdi amwail pwoson, pwe kumwail doadoahngkihte amwail pwoson ong padokedi weren tuhkeo pwe kumwail en kak song ma weren tuhkeo mwahu.

37 Oh kilang, ni en tuhkeo e pahn tepida kekeirda, kumwail pahn nda: Kitail apwalihki epwel mwahu, pwe en kak kadarala kalowe, pwe en kak keirda, oh kadarala wah ong kitail. Oh met kilang, ma kumwail pahn apwalih mwahu e pahn kadarala kalowe, oh kekeirda, oh kadarala wah.

38 Ahpw ma kumwail pahn pohnsehse tuhkeo, oh sohte medewe apwalih, kilang e sohte pahn kadarala kalowe; oh ahnsou me ketipino kin karakar oh kamawasikahla tuhkeo, e pahn mengila pwehki sohte kalowe, oh kumwail pahn usada oh kesehla.

39 Met, kaidehn pwehki weren tuhkeo sohte mwahu, de pwehki sohte me pahn inangih tungoale wahn tuhkeo; ahpw iei pwehki amwail pwehlo me sakanakan, oh kumwail sohte men apwalih tuhkeo, eri kumwail sohte kak alehdi waho.

40 Oh met, ma kumwail sohte pahn apwalih mahseno, kasikasik waho sang ni pwoson, kumwail sohte kak dolung wahn tuhkehn komouro.

41 Ahpw ma kumwail pahn apwalih mahseno, ei, apwalih tuhkeo ni e tepida kekeirda, sang ni amwail poadidiong pwoson laud, oh kanengamah, kasikasik waho, e pahn kadarala kalowe; oh kilang e pahn wia tuhke me kekeirdahng mour soutuk.

42 Oh pwehki amwail loalopwoat oh amwail pwoson oh amwail kanengamahiong apwahpwalih mahseno, pwe en kak kadarala kalowe, kilang, ahnsou keren kumwail pahn dolung wah, me keieu kesempwal, me mem sang mem koaros, oh me pwetepwet sang pwetepwet koaros, ei, oh mwakelekel sang mwakelekel koaros; oh kumwail pahn kamadipwki waho lao kumwail pahn medila, kahrehda kumwail sohte pahn men mwenge, de pil men nimpilda.

43 Eri, riei ko, kumwail pahn dolung ketingpen amwail pwoson, oh amwail loalopwoat, oh kanengamah, oh nannanti nan ahnsou apwal, awiawih ahnsou me tuhkeo pahn kadarala wah ong kumwail.