1 Eri kitail pahn pwuralahng nan neitail poadopoad en Amelekaia oh irail akan me iang ih sopohla nan sapwtehno; pwe, kilang, e kahrehiong irail akan me iang ih, oh kohla nan sahpw en Nihpai rehn Mehn Leimen kan, oh kamwakidadahr Mehn Leimen kan pwe re en lingeringerda pahn aramas en Nihpai kan, kahrehda nanmwarki en Mehn Leimen kan kadarpesengehr kalohk ehu nan sahpwo pwon, nanpwungen sapwellime aramas koaros, pwe irail en pwurehng pokonpene pwe re en kohla mahweniong Mehn Nihpai kan.

2 Kedekedeo ahnsou me kalohko lelpesengehr nanpwungarail, re uhdahn masepwehk mehlel; ei, irail masak kansensuwedi nanmwarkio, oh re pil masak kohla mahweniong Mehn Nihpai kan pwe re de mehla. Kedekedeo irail koasoanehdi me irail sohte pahn iang, de pali laud en irail sohte men iang, peikiong sapwellimen nanmwarkio poahngoko.

3 Eri met kedekedeo nanmwarkio ahpw engiengkihda arail sapeik; eri e ahpw ketin mweidohng Amelekaia en kaunda sapwellime sounpei teiko me peikiong sapwellime poahngok, oh mahseniong ih en kohla oh idingohng irail en doadoahngki neirail dipwisou en mahwen.

4 Eri kilang, met iei dahme Amelekaia mwahuki; pwehki eh wia ohl me kadek doadoahk en mwersuwed eri e koasoanehdier nan eh mohngiong me e pahn kasapwildi nanmwarki en Mehn Leimen ko.

5 Oh met e alehier pwukoan kaunda Mehn Leimen kan me uhpalihki nanmwarkio; oh e nantiheng kenikenla rehn irail me sapeik ko; eri e kohla wasa me re kahdaniki Onaida, pwe iei wasao me Mehn Leimen kan koaros tangala ie; pwe re diarada me sounpei ko kohkohdo, oh, irail wiahki me re pahn kohdohng kemeirailla, eri irail tangala Onaida, wasahn dipwisou en mwahwen.

6 Oh re idihada emen ohl me pahn wia arail nanmwarki oh arail kaun, pwehki arail ngoangkier koasoandi ehu me re sohte pahn idihdiong kohla peiong Mehn Nihpai kan.

7 Kedekedeo irail ahpw pokonpenehr pohn kumwukumw en nahna ehu me kahdaniki Andipas, pwe irail en kaunopadahng mahwen.

8 Eri Amelekaia sohte men mahweniong irail nin duwen sapwellimen nanmwarikio poahngoko; ahpw dahme e men wia iei e men kenikenla rehn sounpei en Mehn Leimen ko, pwe en kak wiahla arail kaun oh kasapwilidihsang nanmwarkio nan dewe oh kaunda wehio.

9 Oh kilang, kedekedeo e ahpw ndaiong nah sounpei ko re en kauwada imwarail impwal kan nan wahu me karanih nahna Andipas.

10 Kedekedeo ni ahnsou me wasa pwongier e ahpw kadaradahla meninkeder pohn nahna Andipas ni rir, oh e mwahuki kaun en irail ako me mih pohn nahnao, me adaniki Liondai, en kohdihdo nin tepin nahnao, pwe e men tuhwong ih.

11 Kedekedeo ahnsou me Liondai alehdi rohng wet e sohte men kohdihla nin tepin nahnao. Kedekedeo Amelekaia pwurehng ileklahng reh keriapak, oh peki reh en kohdihdo. Kedekedeo Liondai sohte men wia; oh e pwurehng ileklahng reh kesilipak.

12 Kedekedeo ahnsou me Amelekaia diarada me e sohte kak kahrehiong Liondai en kohdido sang pohn nahnao, e ahpw kohdahla ni nahnao, karanih en Liondai kahnihmpwalo; oh e pwurehng kadarala ah pekipeko rehn Lihondai, oh peki en kohdihdo, oh kahre nah soun silasil kan.

13 Kedekedeo ni ahnsou me Liondai iangahki nah soun silasil kan kohdihdo rehn Amelekaia, a Amelekaia peki reh ma e kak kahrehdihdo nah sounpei kan nihpwong, oh kapilpene ohl akan nan kahnimpwalo me nanmwarkio ketkihong en kaunda, oh e pahn mweidohng irail pahn manaman en Liondai, ma e pahn kak wiahiong ih (Amelekaia) en wia keriau en kaun en sounpei ko pwon.

14 Kedekedeo Liondai iangahki nah ohl akan ahpw kohdihdo oh kapilpene nein Amelekaia ohl akan, pwe mwohn arail pahn pirida madahn rahno nein Liondai sounpei kan kapilirailpenehr.

15 Kedekedeo ahnsou me irail tehkadahr me re kapiliraildier, re ahpw peki rehn Amelekaia en mweidohng irail en iangala riarail ko, pwe re en dehr kamwomwala. Eri ih met me Amelekaia mwahuki en wiawi.

16 Kedekedeo e ahpw mweidala nah ohl akan, ni eh uhwong sapwellimen nanmwarikio poahngok. Ih met me Amelekaia men en wiawi, pwe en kak kapwaiada eh koasoandi en kasapwildi nanmwarkio.

17 Eri nan ehn Mehn Leimen kan tiahk, ma arail kaun lapalap kin mehla, a re kin idihada keriau en kauno en uhd wiahla arail kaun lapalap.

18 Kedekedeo Amelekaia ndaiong emen nah ladu ko en kihong pwoisin ekis ekis rehn Liondai, e lao mehla.

19 Eri, ni ahnsou me Lihondai mehla, Mehn Leimen kan idihada Amelekaia en uhd kaunirailda oh wiahla arail kaun en sounpei.

20 Kedekedeo Amelekaia ahpw kahluwa nah sounpei kan (pwehki dahme e mwahuki pweidahr) oh karis kohla nan sahpw en Nihpai, kohla nan kahnihmw en Nihpai, me wia kahnimw lapalap.

21 Oh nanmwarkio iangahki silepe ko ahpw kohieido pwe en tuhwong ih, pwe e medewe me Amelekaia kapwaiadahr sapwellime poahngoko, oh me Amelekaia kihpenehier lapalahn karis en sounpei ehu pwe re en kohlahng peiong Mehn Nihpai kan.

22 Ahpw kilang, ni ahnsou me nanmwarkio ketieido pwe en tuhwong ih, Amelekaia ndaiong nah ladu ko re en kohla oh tuhwong nanmwarkio. Irail ahpw kohla oh poaridi mwohn nanmwarkio, ni ar mwomwehda wauneki pwehki eh lapalap.

23 Kedekedeo ahnsou me nanmwarkio ketin kapahla limeo pwe en kasihnenihirailda, nin duwen tiahk en Mehn Leimen kan, me wia kilel en popohl, me wia tiahk me irail alasang Mehn Nihpai kan.

24 Kedekedeo ni ahnsou me e ketin kasihnenihada me tihengo sang nan pwehlo, kilang e ahpw doakoahdi mohngiong en nanmwarkio; oh e ahpw pwupwudi nan pwehlo.

25 Eri sapwellimen nanmwarkio ladu ko tang; a nein Amelekaia ladu ko ahpw werikihla, ndinda:

26 Kilang, sapwellimen nanmwarkio ladu ko doakoahdi mohngiongeo, oh e melahr oh irail tangdoaui; kilang, kumwail kohdo oh tehk.

27 Kedekedeo Amelekaia ahpw ruwesehki nah sounpei kan irail en kohla oh tehk dahme wiawihong nanmwarkio; oh ahnsou me irail kohla wasao, oh diarada me nanmwarkio wonohn nan ntah, Amelekaia ahpw mwomwehda me e lingeringer, oh nda: Mehmen me poakepoake nanmwarkio, en kohla, oh pwakihala sapwellime ladu ko pwe re en kamakamala.

28 Kedekedeo irail koaros me poakepoake nanmwarkio, ahnsou me irail rongada koasoi pwukat, irail ahpw kohla oh pwakih sapwellimen nanmwarkio ladu ko.

29 Eri ni ahnsou me sapwellimen nanmwarikio ladu ko kilangadahr sounpei kan pwakpwakih irail, re pwurehng masepwehkada, oh sopolahng nan sapwtehno, oh lellahng sahpw en Saraemla oh iangala nein Amon aramas akan.

30 Oh sounpei kan me pwakih irail pwurala, mwurin arail pwakiher irail ni soh katepe; a met sang ni ehn Amelekaia mwersuwed aramas akan koapworopworkilahr.

31 Kedekedeo mandahsang rahno e ahpw pidelong nan kahnimw en Nihpai iangahki nah sounpei ko, oh kaunda kahnihmwo.

32 Eri likendo, ni ahnsou me e rongada me nanmwarkio kamakamala—pwe Amelekaia kadarala pakair ehu rehn likendo kawehwehiong me sapwellimen mwohnsapwoko ladu ko kemehla, oh me nah sounpei kan pwaki irail, ahpw sohte koliraidi, oh irail pitila—

33 Eri, ahnsou me likendo rong mepwukat e ahpw ilekla rehn Amelekaia, oh peki re en kupwurehla aramas en kahnihmwo; oh e pil peki ma e kak kohdo reh; oh e pil peki ma e kak wahdo soun kadehde kei pwe re en kadehdehda duwen pwoulahn mwohnsapwoko.

34 Kedekedeo Amelekaia ahpw kahrehda laduohte me kemehla nanmwarkio, oh irail koaros me iang ih, oh patohla rehn likendo, wasa me e kin ketiket ie; oh irail koaros kadehdehiong ih me nanmwarkio kamakamala rehn pein sapwellime ladu kan; oh re pil patohwan: Irail tangehrdoaui; met sou kadeikiraildahr? Oh met irail kamehlelehiongehr likendo duwen pwoulahn nanmwarkio.

35 Kedekedeo Amelekaia ahpw nantihong en kenikenla rehn likendo, oh alehda en wiahla eh pwoud; oh met sang ni eh widing, oh sang ni sawas en nah ladu mwerisuwed kan, e alehdier wehio; ei, e wiahlahr nanmwarki en sahpwo pwon, aramas en Mehn Leimen pwon, me wiawihkihda Mehn Leimen kan oh Mehn Lemuel kan oh Mehn Ismael kan, oh Mehn Nihpai koaros me kahngohdi kan, sangete mwehin Nihpai kohdo lel ansou wet.

36 Eri irail pwukat me kahngohdi, alehier kaweid oh padahk duwehte Mehn Nihpai kan, ei, irail alehier kaweid ni wiepen kamarain en Kauno, ahpw, me kapwuriamwei, e sohte kin werei mwurinte arail kin kahngohdi irail ahpw kin keptakaila oh kekeluwakala, oh re inenen ketihwo, suwed mehlel oh kamasepwehk sang Mehn Leimen ko—me rasohng irail niminimala tiahk en Mehn Leimen kan; re wialahr aramas pohnkahke kei, oh aramas me direki soangen mour suwed koaros; ei, re uhdahn manokehla mehlel Kauno arail Koht.