1 Oh met ngehi, Nihpai, kaimwsekalahr ei kokohp ong kumwail, riei ohl kesempwal akan. Oh kisin soahng keite me I pahn ntingih, me I ese me udahn pahn pweida; a I pahn ntingi ekeite kaweid kan me sang riei pwutak Seikop.

2 Eri, I itarki soahng kan me I ntingihediehr I itariki, ihte ekei mahsen me I pahn koasoia duwen padahk mehlel en Krais; eri, I pahn koasoi ong kumwail ni sansal, nin duwen ei kokohp sansal akan.

3 Pwe palingeniet kin pereniki [padahk] sansal akan; pwe ih mwomwen Kauno Koht kin wia sapwellime doadoahk rehn aramas akan. Pwe Kauno Koht kin ketikihdo marain pwe [aramas] en kak wehwehki; pwe e kin ketin mahsaniong aramas nin duwen arail lokaia, pwe irail en kak wehwehki.

4 Eri, I men kumwail en tamataman me I koasoiahiong kumwailehr duwen soukohpo me Kauno ketin kasalehiong ie, me pahn papidaisihla Simpwul en Koht, me pahn ketikihsang dihp en sampah.

5 Oh met, ma Sihmpwul en Koht, me ketin sarawi, anahne en papidaiskihla pihl, pwe en kapwaiada me pwung koaros, Eri ia duwe, e sou pahn konehng kitail, me sohte sarawi, en papidaisla, iei, papidaiskihla pihl!

6 Oh met, I pahn kalelapak rehmwail, riei ohl kesempwal oko, ia mwomwen Sihmpwul en Koht e ketin kapwaiada pwung koaros ni eh ketin papidaiskihla pihl?

7 Kumwail sohte ese me e ketin sarawi? Ahpw mehndahte e wia aramas sarawi men, e ketin kasalehong aramas akan me, ni pali uduk e karakarahkala mwohn Sahmo, oh kadehdehiong Sahmo me e pahn peikiong ih ni e pahn kapwaiada sapwellime kosonned akan.

8 Eri, mwurin e papidaiskilahr pihl Ngehn Sarawi ketididohng poweni mwomwen muroi men.

9 Oh met, e kasalehiong aramas akan uwen ahlo eh inen, oh tehtik en wenihmw en kehlo, wasa me re pahn pidelong ie, ih me ketin wiadahr karasaraso mwohrail.

10 Oh e ketin mahsanih ong aramas akan: Kumwail idawehn ie. Eri, riei ohl kesempwal oko, kitail kak idawehn Sises ma kitail sohte pahn inangih kapwaiadasapwellimen Sahmo kosonned akan?

11 Oh Sahmo ketin mahsanih: Kumwail koluhla, kumwail koluhla, oh papidaisla ni mwaren nei Pwutak Kesempwalo.

12 Oh pil, kepitien Iehroso peidohng ie, mahsanih: Mehmen me pahn papidaisla ni mwarei, Sahmo pahn ketikihong Ngehn Sarawi, duweiehte; eri, idawehn ie, oh wia soahng kan me kumwail kilangehr I wia.

13 Eri, riei ohl kesempwal akan, I ese me ma kumwail pahn idawehn Sapwellimeo, sang nan mohngiong unsek, sohte wiewia liksansalamwahu oh sohte widing mwohn Koht, ahpw sang ni ineng mehlel, kolkoluhkihla dipamwail kan, kadkadehdehiong Sahmo me kumwail inengieng alehda mwaren Krais, sang ni papidais—iei, sang ni amwail idawehnla amwail Kaun oh amwail Sounkomour kohdihla nan pihlo, nin duwen sapwellime mahseno, eri, kumwail ahpw pahn alehdi Ngehn Sarawi; iei, papidais en kisiniei oh Ngehn Sarawi; oh kumwail ahpw pahn kak koasoi rasohng tohnleng kan, oh weriweriki kaping ong Me Sarawi en Israelo.

14 Ahpw, kilang, riei ohl kesempwal akan, kepitien Iehroso pil peidohng ie, mahsanih: Mwurin amwail pahn koluhkihla dipamwail akan, oh kadehdehiong Sahmo me kumwail inahngih mehlel kapwaiada ei kosonned akan, sang ni amwail papidaiskihla pihl, oh alehdi papidais en kisiniei oh Ngehn Sarawi, oh kak lokaiahki lokaia kapw, ei, duwehte lokaiahn tohnleng kan, oh mwurin met kumwail ahpw sohpeisang ie, e pahn mwahute ma kumwail sohte esei ie.

15 Oh I ahpw rongadahr kepitien Sahmo, mahmahsanih: Ei, mahsen akan en nei [Pwutak] Kesempwale me mehlel oh pwung. Mehmen me pahn dadaurete lel ni imwi, e pahn komourla.

16 Oh met, riei ohl kesempwal akan, I ese me sang met ma aramas emen sohte pahn dadaurete lel ni imwi, ideidawehn karasaras en Iehros en Koht ieiaso, e sohte kak komourla.

17 Eri, [kumwail] wia soahng kan me I padahkihong kumwail me I kilangehr amwail Kaun oh amwail Soundoar pahn ketin wia; pwe, kahrepe wet me soahng pwukat kasansalohngiehier, pwe kumwail en kak ese wenihmw en kehl me kumwail pahn pidelong loale. Pwe ewen kehl me kumwail pahn pidelong loale iei koluhla oh papidaiski pihl; oh lapwapen dipamwail akan ahpw pahn wiawi sang kisiniei oh sang Ngehn Sarawi.

18 Oh kumwail ahpw pahn mih nan ahl inen oh tehtik me kahluwalahng mour soutuk; iei, kumwail ahpw pidelongehr ni ewen kehlo; kumwail kapwaiadahr kosonned akan en Sahmo oh Sapwellimeo; oh kumwail alehdier Ngehn Sarawio, me kin kadehdehki Sahmo oh Sapwellimeo, ong pweidahn inouo me e ketin wiadahr, me ma kumwail pidelong nan ahlo kumwail pahn alehdi.

19 Oh met, riei ohl kesempwal akan, mwurin amwail pidelong nan ahl inen oh tehtiko, I pahn kalelapak rehmwail ma soahng koaros mwahuer? Kilang, I ndaiong kumwail, Soh; pwe kumwail saikinte leledo wasao, ahpw e pahn sang ni mahsen en Krais iangahki amwail tengediong pwoson ih, oh koapwkoapworopworkihte kapai kan me kohsang wiewia pwung kan en ih me ketin sapwellimaniki manaman en kamourala.

20 Eri, kumwail anahne wenlahte mwowe ni amwail pahn tengediong Krais, ahneki koapworopwor unsek, oh poakehng Koht oh aramas koaros. Eri, ma kumwail pahn wenlahte mwowe, kamakamadipwiki mahsen en Krais, oh dadaurete lel ni imwi, kilang, Sahmo mahsaniher: Kumwail pahn ahneki mour soutuk.

21 Oh met, kilang, riei ohl kesempwal akan, iei met ahlo; oh sohte ehu ahl tohrohr de mwahr ehu me wiawihda pahn lahng me aramas kak komourkihla nan wein Koht. Oh met, kilang, iei met padahk mehlel en Krais, oh ihte oh udahn padahk mehlel en Sahmo, oh Sapwellimeo, oh Ngehn Sarawi, me wia Koht tehmen, kohkohlahte. Ahmen.