1 Kedekedeo nan mwein nahnmwarki en Suda, Ahas nein Sodam, nein Usaia. [Nan mwehio] Resin, nahnmwarki en Siria, oh Peka nein Remalaia, nahnwarki en Israel, kohdahla Serusalem pwe re en mahwiniong, ahpw re sohte kak kalowehdi.

2 Oh rohng ehu lelohng kadaudoken Depito, me ketihtihki: Siria ehuongehr Ipram. Ih oh sapwellime aramasoko ahpw salohkihda, duhwehte tuhkekan ahr kin mwekid nan kisinieng.

3 Kauno eri mahsanihong Aiseia: Kowe oh noumw pwutak Searsasup kohwei oh tuhwong Ahas, [kumwa pahn tuhwong] ni imwin warawar me uhdihdohsang ni lehn powe nan ahl en sounwia likou kan.

4 Oh ndaiong ih: Mwasamwasahn, oh meleilei; dehr masak, de nan kapehd tikitikla pwehki engieng en Resin iangahki Siria, oh nein Remalaia pwutakrasohng imwin mehn ser riapwoat me ediniei laud.

5 Pwehki Siria, Ipram, oh nein Remalaia pwutak, wiadahr inou suwed ehu en pelian uhk, [re] koasoakoasoia:

6 Kitail kohdahla pelianda Suda oh kawehla, oh kitail kaloweiraildi, oh koasonehdi emen nahnmwarki rehrail, iei, nein Tapeel pwutako.

7 Kauno Koht mahsanih: E sohte pahn pweida, de pil wiawi.

8 Pwe Damaskus me moangmoange Siria, oh Resin me moangmonage Damaskus; oh mwurin sounpar weneisek limau Ipram pahn mwomwala oh sohla aramas.

9 Oh Sameria me moangmoange Ipram, oh nein Remalaia pwutak me moangmonage Sameria. Ma kumwail sohte pahn kamehlele a kumwail udahn pahn sohte soandi.

10 Kauno ahpw pwurehng mahsanihong Ahas, ketihtihki:

11 Peki kilel ehu sang rehn Kauno ahmw Koht; peki mehnda ma e loal, de ileilehda powe.

12 Ahpw Ahas patohwan: I sohte pahn peki, de pil song Kauno.

13 Oh e patohwan: Kumwail rong mahs, kumwail kadaudoken Depit kan; kumwail sohte itarki amwail kapwangahdahr aramas, ahpw kumwail pil men kapwangahda ei Koht?

14 Eri, pein Kauno pahn kasalehiong kumwail kilel ehu—Kilang, meipwon men pahn liseianda, oh naitikihada pwutak emen, oh e pahn kiheng mware Emanuel.

15 Pwete oh sukehn longalap me e pahn kin sakan, pwe en kak soikala me suwed oh pilada me mwahu.

16 Pwe mwohn seri menet e pahn esehla soikala me suwed oh pilada me mwahu, nahnmwarki en sahpw me kumwail kin kailongki pahn tehnla.

17 Kauno pahn ketkihdo pohmw, oh pohn noumw aramas akan, oh pohn peneinei en ahmw pahpao, rahn [apwal] kei me sohte kin pwarada ni ahnsou me Ipram tohrohrsang Judah, nahnmwarki en Asiria.

18 Oh ni rahno e pahn lelledo me Kauno pahn ketin malipehdo loahng me mih wasa doh kan koaros nan Isip, oh loahngalap en nan sahpw en Asiria.

19 Oh irail pahn kohdo, oh koaros irail pahn koamoaldi nan wahu tehnla kan, oh nan pwoar en paip kan, oh pohn [tuhke] tekatek kan, oh pohn tuhke kan.

20 Ni rahnohte Kauno pahn ketin [doadoahngki] sounseisei men, me sang irail me kin mih palio pilapo, limwahn nahnmwarki en Asiria, en koakoahsang pitenmoangerail kan, oh wunen nehrail kan; oh e pahn pil kihsang alis kan.

21 Oh ni rahno, aramas emen pahn apwalih kou pwul men oh sihpw riemen;

22 Oh ni ahnsouo, e pahn sakan pwete pwehki diren milik me re pahn kihong; pwehki koaros me luhwehdi nan sahpwo pahn kin tungoalehte pwete oh sukehn longalap.

23 Oh ni rahno, wasa koaros me mie tuhkehn wain kid me uwen pweine silper kid, e pahn dipwidipwkihla dihpw tekatek oh dihpw suwed kan.

24 Aramas akan pahn kohdo wasahu wa neirail kesik ketieu oh arep kan, pwehki nan sahpwo pwon dipwidipwkihla dihpw tekatek oh dihpw suwed kan.

25 Oh dohl koaros me uhpwelkihda mehn deipwel kan, dihpw tekatek oh dihpw suwed kan pahn osada wasahu; ahpw kou kan pahn wiahkihla arail wasahn mwonge, oh sihpw oh kuht kan pahn wiahkihla arail wasahn kokohseli.