1 Oh met I pahn koasoaienguhk, Sosep, nei me keieu tikitik. Ke ipwidi nan ahnsou me diren kahpwal nan sapwtehno; ei, ahmw nohno naitikihiukedi nan ahnsou me I ahneki kapwal laud.

2 Oh Kauno en pil ketin kasarawihkinuhkala sahpw wet, me wia sahpw ehu me keieu kesempwal, ong kadaudokemw kan oh kadaudok en riomw pwutak kan en iang sohsohki, pwe ke en nsenamwahuki kohkohlahte, ma ke pahn kin kapwaiada kosonned akan en Me Sarawi en Israelo.

3 Oh met, Sosep, nei pekindihdi, me tikada nan sapwtehn ahn ei kahpwal akan, Kauno en kupwuramwahwihiuk kohkohlahte, pwe kadaudokomw kan en dehr kamwomwomwla douluhl.

4 Pwe kilang, ke wia kadaudokei; oh ngehi emen kadaudoken Sosep me wisikla nan Isip ni eh wia lidu. Oh inou kan me Kauno ketin wiahiongehr Sosep inenen kesempwal mehlel.

5 Eri, Sosep kilangehr mehlel atail mwehi. Oh e aledier ehu inou sang Kauno, me sang nan kadaudoke kan Kauno Koht pahn ketin kasapwilada ehu kadaudok pwung en Israel; kaidehn Mesaia, ahpw ehu kadaudok me katohrohrala, ahpw, re en tamatamante me nan sapwellimen Kauno inou kan Mesaia pahn pwarohng irail ni imwin rahn akan, sang ni manaman en ngehno, ni eh pahn wairailsang nan rotorot kolahng nan marain—mehlel, sang nan rotorot oh mour en lidu kolahng nan mour saledek.

6 Pwe Sosep kadehdehki mehlel, ketihtihki: Kauno ei Koht pahn ketin kasapwilada ohl sarawi men, me pahn ketin wia ohl sarawi kesempwal men ong kadaudokei kan.

7 Ei, Sosep ketihtihki ni mehlel: Ih met mahsen en Kauno ongie: Ohl sarawi pilipilda men I pahn kasapwilada sang nan kadaudokemw kan; oh e pahn kenikenla rehn kadaudokemw kan. Oh I pahn kehkehlingkiheng me e pahn wiahda doadoahk ehu ong kadaudokemw kan, rie ohl akan, me pahn katapan mehlel ong irail, mehlel pwe en sewese irail re en esehla inou kan me I wiahiengehr ahmw pahpa kahlap oko.

8 Oh I pahn kiheng kosonned ehu me e sohte pahn wia ehu doadoahk tohrohr, ihte doadoahk me I pahn kehkehlingkihong ih. Oh I pahn wiahieng en lapalapala mwohn meseiet; pwehki e pahn wia ei doadoahk.

9 Oh e pahn lapalapala duwehte Moses, me I koasoaiahier me I pahn kasapwilada ong kumwail, pwe en kapitala nei aramas akan, kumwail peneinei en Israel kan.

10 Oh I pahn kasapwilada Moses pwe en kapitla nei aramas akan sang nan sahpw en Isip.

11 Ahpw I pahn kasapwilada ohl sarawi men sang nan kadaudokomw kan; oh I pahn kihong manaman en kalohki ei mahsen ong kadaudokomw kan—Kauno pil mahsanih, oh kaidehn kalohkihte ei mahsen, ahpw pil koangoangehkin irail ei mahseno, me pahn kalohkehng irailehr.

12 Eri, kadaudokemw kan pahn nting; oh kadaudoken Suda kan pahn nting; oh soahng kan me kadaudokemw kan pahn ntingiedi, oh pil soahng kan me kadaudoken Suda kan pahn ntingihdi, pahn ehupene, ni ahr pahn kapwungala padahk likamw kan oh kameleileiedi pingiping kan, oh wiahda meleilei nanpwungen kadaudokemw kan, oh sewesei irail re en esehla duwen arail pahpa kahlap oko ni imwin rahn akan, oh pil ei inou kan, Kauno me mahmahsen.

13 Oh e pahn kehlailla sang ni powehdi luwet, ni rahno me ei doadoahk pahn tepda rehn nei aramas akan koaros, pwehn onehda sapahl, kumwail peneinei en Israel, Kauno me mahmahsen.

14 Oh iei met kokohp en Sosep, me ketihtihki: Kilang, Kauno pahn ketin kapaiada ohl sarawio; oh irail akan me pahn song kemehla pahn lohdi; pwe inou wet, me I aledier sang rehn Kauno, ong kadaudokei kan pahn pweida. Kilang, I ese mehlel duwen inou wet eh pahn pweida;

15 Oh edeo pahn duwehte edeiet; oh e pahn duwehte eden ah pahpao. Oh e pahn duweiehte; pwe dahme Kauno pahn ketikihdo sang ni limeo, sang ni manaman en Kaunopahn kamourala nei aramas akan.

16 Iei, ih met me Sosep kohpadahr: I kamehlele met, duwehte ei kamehlele inou en Moses; pwe Kauno me ketin mahsanihongie, I pahn kolokol kadaudokemw kan kohkohlahte.

17 Oh Kauno mahsanih: I pahn kasapwilada Moses; oh I pahn kiheng ah manaman nan sokon pwoat; oh I pahn kiheng ih ei koasoandi en tenek ni nting. Ahpw I sohte pahn lapwahda lewe, pwe en kalapw lokolokaia, pwe I sohte pahn wiahieng en wiahla aramas kadek lokaia. Ahpw I pahn ntingieng ei kosonned, sang ni pein sendinpehi; oh I pahn kihong emen uhneipwa.

18 Oh Kauno ahpw pil mahsanihongie: I pahn kasapwilada emen kadaudokemw kan; oh I pahn kiheng emen uhneipwa. Oh ngehi, kilang, I pahn kiheng en ntingihda nting kan en kadaudokemw kan, me pahn kohieng kadaudokemw kan; oh wiliepe uhneipwa en kadaudokemw kan pahn pakairki.

19 Oh mahsen kan me e pahn ntingiedi pahn iei mahsen kan en ei erepit me I kesempwaliki pahn kalohk ong kadaudokemw kan. Oh e pahn duwehte kadaudokemw kan arail lukulukuwer sang nan pwelpar; pwe I ese arail pwoson.

20 Oh irail pahn lukuwer sang nan pwelpar; iei, mehlel ong riarail ohl akan, mendahte dih tohto melahr mwohrail. Oh e pahn wiawi me mwurin arail lukuwer pahn kohwei, nin duwen arail koasoai sansal kan.

21 Pwehki arail pwoson arail koasoai kan pahn peiwei sang nan eweiet ong riarail ohl akan me wia kisehn kadaudokemw; oh arail soakoahiek en koasoai kan I pahn kakehlakahla nan arail pwoson, ni arail pahn tamataman inou kan me I wiahiong arail pahpa kahlap oko.

22 Oh met, kilang, nei pwutak Sosep, iei duwen me ei pahpa kahlap oko kohpadahr.

23 Eri, ke kapaidahr pwehki inou wet; pwe kadaudokemw kan en dehr kamwomwomwla, pwe irail pahn rong mahsen kan en pwuhko.

24 Oh mie emen me kehlail nanpwngarail pahn sansalada, me pahn wiahda doadoahk mwahu, ni koasoai oh ni wiewia, e pahn wiahla dipwisoun doadoahk ni limen Koht, ni pwoson kehlail, pwe en wiahda doadoahk kapwuriamwei kan, oh wia soahng kan me kesempwal mwohn silangin Koht, pwehn kapwaiada onohnsapahl en peneinei en Israel kan, oh kadaudoken riomw kan.

25 Oh met, meid pahi kowe, Sosep. Kilang, ke pwulopwul; eri rong mwahu kaweid en riomw pwutak, Nihpai, oh mahsen kan me I ndahieng uhk pahn pweiong uhk. Tamataman mahsen kan en ahmw pahpa me pahn nektehn mehla. Ahmen.