1 Oh met, riei ohlakan, kilang, I koasoi ong kumwail, nin duwen Ngehno e ketin koangoahngehkin ie; eri, I ese me re udahn pahn wiawi.

2 Oh soahng kan me pahn ntingda sang nan pwuhko pahn kesempwal mehlel ong aramas akan, ahpw mehlel ong kadaudokatail akan, me ieikisehn luhwen peneinei en Israel.

3 Pwe ahnsouo pahn leledo me mwomwohdiso kan me wiawihda, ahpw kaidehn ong Kauno, ahnsou me emen pahn kin ndahieng ekei: Kilang, ngehi, ngehi me sapwellimen Kauno; oh mehtei kan pahn kin nda: ngehi, ngehi me sapwellimen Kauno; oh ih met me mwomwohdiso koaros me wiawihda pahn kin ndinda, ahpw kaidehn ong Kauno—

4 Oh irail pahn kin akamaipene nan pwungarail; oh neirail samworo kan pahn kin akamaipene; oh irail pahn kin padahk ki pein arail loalokong, oh soikala Ngehn Sarawio, me kin ketikihla kaweid.

5 Oh irail soikala manaman en Koht, Me Sarawi en Israelo; oh irail ndahieng aramas akan: Kumwail rong kiht, oh rong aht padahk; pwe kilang sohte Koht rahnwet, pwe Kauno oh Soundoaro ketin kaimwsekalahr sapwellime doadoahk, oh e ketikihongehr sapwellime manaman ong aramas akan;

6 Kilang, kumwail rong [aht] padahk; ma re pahn nda me mie manaman kapwuriamwei ehu wiawi sang ni limen Kauno, dehr kamehlele; pwe rahnwet Koht solahr wia manaman kapwuriamwei; e ketin kaimwsekalahr sapwellime doadoahk.

7 Ei, oh me tohto pahn kin nda: [Kitail] kamadipw, sakau, oh pereperen, pwe lakapw pali kitail pahn mehla; oh e pahn mwahu ong kitail.

8 Oh me tohto pil pahn nda: Kitail kamadipw, sakau, oh pereperen; ahpw, kitail anahne masak Koht—e pahn ketin mahkohng kisin dihpatail kan; ei, kitail kak ekis likamw, kulih mehteikan pwehki arail koasoi kan, weirada pwoar en lidip ong mehn mpomw; pwe sohte kasuwedpe; oh kitail wia mepwukat koaros, pwe lakapw kitail pahn mehla; oh ma mehlel kitail sapwung, Koht pahn ekiste kemeikitail, oh mwuri kitail pahn komourla nan wein Koht.

9 Ei, oh me tohto pahn kin wiewia padahk ni mwomw wet, padahk sapwung, mwahl, oh likamw, oh pahn pohnmwahso nan mohngiongarail kan, oh pahn kin song en kaririala arail koasoandi kan sang Kauno; oh arail doadoahk kan pahn mihmi nan rot.

10 Oh ntahn souleng kan pahn likwer sang nan pwehl pwehn kedipa irail.

11 Ei, irail koaros salongasangehr ahlo; irail wialahr aramas sapwung.

12 Pwehki pohnmwahso, oh pwehki sounpadahk likamw kan, oh padahk likamw, arail mwomwohdiso kan sapwungalahr, oh arail mwomwohdiso kan aklapalapalahr; pwehki arail pohnmwahso irail aklapalap mehlel.

13 Irail kin pirapa me semwehmwe kan pwehki arail wasahn sarawi kaselel kan; irail kin pirapa me semwehmwe kan pwehki arail likou kaselel kan; oh irail kin kaloke me mpai kan oh me nan mohngiong karakarak kan, pwehki arail pohnmwahso re kin aklapalap.

14 Re keptakai oh re mas ile; mehlel, pwehki pohnmwahso, oh dihp, oh wiewia suwed kan, oh tiahken netiki paliwar, irail koaros salongala ihte me malaulau, me kin karakarahk ideidawehn Krais; ahpw, pwehki kaweid me re kin alehsang padahk en aramas, kahrehda re kin kalapw sapwung.

15 Kumwail me erpitlahr, oh me loalokonglahr, oh me kepwepwelahr, me aklapalapalahr nan amwail mohngiong kan, oh koaros me kalohngki padahk likamw kan, oh koaros me kin netiki paliwararail kan, oh wekidalahr koasoandi pwung en Kauno, meid suwed, meid suwed, meid suwed ong kumwail, Kauno Koht Wasa Lapalap me ketin mahsanih, pwe kumwail pahn lekdekla nan ehl!

16 Meid suwediong irail me pahn sohpeisang me pwung kolahng me sohte katepe oh uhwong me mwahu, oh nda me [mwahuo] sohte katepe! Pwe rahno pahn leledo me Kauno Koht pahn ketin mwadangete pwaredohng aramas en sampah; oh rahno me re pahn dipanla mehlel, re pahn kamakamala.

17 Ahpw kilang, ma aramas en sampah pahn kohluhkihla diparail kan oh arail wiewia suwed kan irail sohte pahn kamwomwala, Kauno Wasa Lapalap ketin mahsanih.

18 Ahpw kilang, mwomwohdiso kehlail oh suwedo, lih me kin netiki paliwar en sampah pwon, pahn pwupwudinin sampah, oh lapalahn pwupwudi ieu pahn wiawi.

19 Pwe wehin tepilo pahn itikekda, oh irail akan me kin patehng pahn anahne kamwakidada pwe re en koluhla, pwe tepilo de katengehkiniraildi nah selmete poatoapoat kan, oh kamwakidadaren lingeringer, oh mehla;

20 Pwe kilang, ni ahnsouo e pahn kawehla nan mohngiong en aramas akan, oh kamwakidadaren lingeringerda pahn me mawahu.

21 Oh e pahn kaperenih ekei, oh kahluwairaillahng nan onepek en momour en sampah, pwe irail pahn nda: Soahng koaros mwahu nan Saion; ei, Saion kekeirda, soahng koaros mwahu—oh iei duwen tepilo eh pitihiraildier, oh kakahluwairaildilahng nan ehl ni keneinei.

22 Oh kilang, e kahluwahsang ekei sang ni eh koasoi en lidipih irail, oh ndaiong irail me sohte ehl; oh e kin ndaiong irail: Kaidehn ngehi tepil, pwe sohte tepil—oh iei met me e kin mwengininginkihong nan salengerail kan, lao e kolkinirailpene nah selmete kamasepwek kan, wasa me sohte me kak pitisang.

23 Ei, irail katengetengidi nan mehla, oh ehl; oh mehla, oh ehl, oh tepilo, oh koaros me kolkoldi wasao anahnepato mwohn mwoalen Koht, oh pakadeingkihda arail wiewia kan, sang mwo irail pahn kohla nan wasa me kaunopadahngirailehr, iei nan lehn kisiniei oh suwepel, me iei lokolok poatoapoat.

24 Eri, meid suwediong aramas me kin komkommoal nan Saion!

25 Meid suwediong aramas me kin ndinda: Soahng koaros mwahu!

26 Ei, meid suwediong aramas me kin rongala ehn aramas padahk kan, oh soikala manaman en Koht, oh kisakis en Ngehn Sarawio!

27 Ei, meid suwediong aramas me kin nda: Se alehdier, oh se sohlahr anahne kapatahieng!

28 Oh ni mehlel, meid suwed ong koaros me rerrer, oh lingeringerki mehlel en Koht! Pwe kilang, mehmen me kokouda pohn paipo e pahn alehdi [mehlelo] ni peren; oh mehmen me kokouda pohn poahsoan en pihk pahn rerrer pwe e de pwupwidi.

29 Meid suwediong ih me pahn nda: Se alehdier mahsen en Koht, oh se sohlahr anahen ekei mahsen en Koht, pwe se itarikier!

30 Pwe kilang, Kauno Koht ketin mahsaniher: I pahn kihong aramas akan ehu ehu ire, ehu ehu padahk, ekis wasaht oh ekis wasahu; oh meid pai irail me pahn rong mwahu ei padahk kan, oh kin rong ei kaweid, pwe irail pahn marainkihla erpit; pwe mehmen me pahn alehda I pahn kapatahieng ekei; oh me pahn kin nda, Se solahr anahne, soahng kan me mih rehrail pahn kopwurupwursang.

31 Mehmen me kinlikiala kehl en aramas e kin riahkihla, de kehliki pein ah kehlail, de pahn rongala padahk en aramas akan, ihte ma arail padahk kan kohsang ni manaman en Ngehn Sarawio.

32 Kauno Koht Wasa Lapalap ketin mahsanih, meid suwediong Mehn Liki kan! Pwe mendahte ei kin kapahwei pehikat ong irail rahn koaros, irail kin soikiehla; ahpw, I pahn mahkohng irail, Kauno Koht mahsanih, ma irail pahn koluhla oh kohdo rehi; pwehki ei kapkapahweite pehikat rahn ehu pwon, Kauno Koht Wasa Lapalap me mahmahsen.