1 Oh met ngehi, Seikop, pwurehng koasoaieng kumwail, riei ohl kesempwal oko, duwen rah pwung wet me I koasoaiadahr.

2 Pwe kilang, inou kan me kitail alehdier iei inou kei ong kitail nan mour wet; eri, nin duwen dahme I kilangehr me kidelepen neitail seri pahn mehla pwehki arail sohpwoson, ahpw, Koht pahn ketin kupwurehla me ngeder; oh neitail seri kan pahn kopwurupwurodo, pwe irail en kak alehdi dahme pahn kamarainiekin irail duwen mehlel en arail Soundoaro.

3 Eri, ni duwen ei koasoaiahieng kumwail, e kesempwal me Krais—pwe tohnlengo padahkihong ie pwohng me met iei pahn mware—[e] pahn ketido rehn mehn Suhs akan, rehn irail akan me inenen suwed nan sampah; oh irail pahn kalohpwuala ih—pwe iei me konehng atail Koht [pahn kalohpwuala], oh sohte ehu wehi nan sampah me pahn kak kalohpwuala arail Koht.

4 Pwe ma manaman kapwuriamwei kan pahn wiawihong wehi teikan re pahn koluhla, oh ese me ih iei arail Koht.

5 Ahpw pwehki prihskrap kan oh wiewia suwed kan, irail akan nan Serusalem pahn uhwong ih, pwe en kalohpwuhla.

6 Eri, pwehki arail wiewia suwed akan, kamwomwomwala kan, lehk kan, soumwahu lusulus kan, oh mahwin pahn wiawihong irail; oh irail akan me sohte pahn kamakamala pahn kamweremwerpeseng nan wehi kan koaros.

7 Ahpw kilang, Kauno Koht mahsanih: Ni ahnsou me rahno pahn leledo me irail pahn kamehlele ie, me ngehi iei Krais, eri inou me I wiahiongehr arail pahpa kahlap oko pahn pweida nan mour wet, pohn sampah, pwe irail en [alehdi] sapwerail sahpw en sohso.

8 Kedekedeo irail ahpw pahn kopwurupwurpene sang nan [wehi kan] me irail soulahngehr ie, sang pohn dekehn nan sehd akan, oh sang ni keimw pahieu en sampah; oh Kauno mahsanih me wehin Mehn Liki kan pahn linganla mwohn silangi ni arail pahn kapwureirailahng nan sapwerail sahpw en sohso.

9 Mehlel, nahnmwarki en Mehn Liki kan pahn kin apwalih irail duwehte pahpa men, oh arail lih nahnmwarki kan pahn apwalih irail duwehte nohno men; eri, inoun Kauno kan ong Mehn Liki kan inenen kesempwal, pwe ih me ketin mahsanih, oh ihs me kak uhwong?

10 Ahpw kilang, Koht mahsanih, sahpwet pahn wia ehu sapwemwail sahpw en sohso, oh Mehn Liki kan uhdahn pahn ale kupwuramwahu pohn sahpwet.

11 Oh sahpwet pahn wia sahpw en saledek ong Mehn Liki kan, oh sohte nahnmwarki men pohn sahpwet, me pahn kaunda Mehn Liki kan.

12 Oh I pahn kakehlahda sahpwet pwehn doarehsang wehi teikan.

13 Oh Koht mahsanih, mehmen me pahn mahwinieng Saion pahn kamwomwomwla.

14 Pwe mehmen me pahn kasapwilada emen nahnmwarki pwehn pelian ie pahn kamala, pwe ngehi, Kauno, nahnmwarki en nanleng, me pahn wia arail nahnmwarki, oh I pahn wia kamarainpen irail akan me kin rong ei mahsen kan kohkohlahte.

15 Eri, iei kahrepe wet, me pahn kaunsakala ei inou kan me I inoukihongehr aramas akan, me I pahn wiahiong irail nan mour wet. I pahn kawehla doahk en rotorot rir kan, oh kamaramas, oh wiewia suwed kan.

16 Eri, irail me pahn mahwinieng Saion, koaros mehn Suhs oh Mehn Liki, koaros me sensel oh me kalidu, koaros ohl oh lih, pahn kamwomwomwala; pwe iei irail me rasohng lih en netin paliwar en sampah pwon; pwe atail Koht ketin mahsanih me irail me sohte kin uhpalihkinie kin pelian ie.

17 Pwe I pahn kaunsakala ei inou kan me I inoukihohngehr aramas akan, me I pahn kapwaiong irail nan mour wet—

18 Eri, riei ohl kesempwal oko, atail Koht ketin mahsanih: I pahn kaloke kadaudokemwail akan sang ni ei pahn doadoahngki Mehn Liki kan; ahpw, I pahn kamwuterekehla ahn Mehn Liki mohngiong kan, pwe irail en kak duwehla pahpa men ong irail; eri, Mehn Liki kan pahn ale kupwur mwahu oh iang wadawadieng nan peneinei en Israel.

19 Eri, I pahn kasarawiala sahpwet ong kadaudokemwail kan, oh ong irail me pahn iang patehng wadawadieng kadaudokemwail kan nan sahpw en arail sohso kohkohlahte; pwe Koht mahsanihong ie me sahpwet iei sahpw me keniken sang sahpw koaruhsie, eri Koht mahsanih, I men aramas koaros me pahn kousoanla [nan sahpwo] en pwongih ie.

20 Oh met, riei ohl kesempwal oko, [kumwail] esehier me atail Koht kalahngano ketikihongkitailehr kamarain en soahng kopwuriamwei pwukat, kitail tamataman ih, oh pwilikihdi dipatail kan, oh dehr nsensuwed, pwe kitail sohte lekidekla; mendahte, atail pokous sang nan sapwetail sahpw en inouo; ahpw kitail kahluhlahngehr sahpw mwahu, pwe Kauno ketin kaunopadahr eletail nansed, oh kitail mihmiher pohn dehkehn nansed.

21 Ahpw mehd kapwuriamwei sapwellimen Kauno inou kan ong irail akan me mihmi pohn deke kan; eri pwehki eh mahsanih deke kan, uhdahn mie [deke] me tohtohsang met, oh riatail teikan pil wie koukousoan wasa ko.

22 Pwe kilang, Kauno Koht kin ketin kahluwahsang peneinei en Israel kan ekei ahnsou, nin duwen kupwure oh sapwellime koasondi. Oh met kilang, Kauno ketin tamataman irail koaruhsie me tipwsangehr, eri e pil ketin tamataman kitail.

23 Eri, mohngiongimwail kan en perenda, oh tamataman me kumwail ahneki saledek en pein pilada nsenemwail—en pilada ahl en mehla poatopoat de ahl en mour soutuk.

24 Eri, riei ohl kesempwal oko, kumwail kompoakepahki kupwur en Koht, a kaidehn ong nsenen tepilo oh paliwar; oh tamataman, mwurin amwail kompoakepahki Koht, [kumwail en ese] me ihte sang ni kalahngan en Koht me kumwail kak komourla.

25 Eri, sang ni manaman en iasadao, Koht en ketin kaiasada kumwail sang mehla, oh sang ni manaman en tomwo, en pil ketin komourkumwailla sang mehla poatopoat, pwe kumwail en kak pidelong nan wehi soutuk en Koht, pwe kumwail en kak kapingkihong ih sapwellime kalahngan sarawi. Ahmen.