1 Pwe Kauno pahn mahkohng Seikop, oh pahn pilada mehn Israel, oh koasoaneiraildi nan pein sapwerail, oh mehn liki kan pahn patohdo oh iang irail kousoan wasao, oh irail pahn wiahla kisehn peneinei en Seikop.

2 Oh aramas [en liki kan] pahn ale irail oh wa iraildohng nan arail wasa; ei, sang wasa doh kan ni keimw en sampah pwon; oh irail pahn pwurodohng nan sapwarail sahpw en inou kan. Oh peneinei en Israel pahn sapwankihla, oh sapwellimen Kauno sahpwo pahn mie ladu ohl oh lih akan; oh irail pahn kalewehdi irail akan me kaloweiraildi; oh irail pahn kaunda irail me kin kaloke irail.

3 Oh ni rahno e pahn lelledo Kauno pahn ketin kakomoaleiuk, sang ahmw pahtou, oh sang ahmw masak, oh sang kaludu apwal me [soun kalokoloko] kin wiahiong uhk.

4 Oh ni rahno e pahn lelledo, me ke pahn alehda lepin kahswet oh kahskihong nahnmwarki en Papilon, oh patohwan: Ia mwomwen soun kalokoloko eh uhdi, kahnihmw kohlo e uhdi?

5 Kauno ketin kawelahr nein me suwedo nah tuhkehu, [E ketin kawelahr] nein kaun akan reirieso kan.

6 Mehmen me kin lingeringer oh kalapw kemekeme aramas, oh mehmen me kin angkehlailih wehi kan me e kakaun, e pahn kalokolok, oh sohte me pahn kauhdi.

7 Sampah pwon wie komkomoal, oh meleilei; irail wiakintehiu kokoul.

8 Ei, tuhke pir kan perenkinuhkadahr, oh pil tuhke sidar kan en Lepanon, ndinda: Pwehki omwi mehlahr sohte me pahn kohdo peleikihtdi.

9 Nan ehl onopadahr en kasamwoiuklong ni omw pahn lella; e kapiradahr me melahr akan ong komwi, iei soumas akan koaros en sampah; e kapwaurdahr sang nan mwolerail akan nahnmwarki koaros en wehi kan.

10 Koaros irail pahn mahsenihong komwi: Komwi pil luwetala duwehte kiht? Komwi pil duwehla kiht?

11 Omwi lingan seridi nan sousou; ngihlen keseng [en omw kamadipw] sohla ronge; mwahs pahn doupeseng pahmw, oh mwahs pahn kipeiukedi.

12 Ia mwomwen ahmw pwupwidihsang nanleng, Luhsiper, usuhn rahn lingan! Komwlekidekdi nan pwehl, komwi me kaluwetelahr wehi kan!

13 Pwe komwi patohwan nan omwi mohngiong: I pahn kohdahla nanleng, I pahn kalapalapiala mwoleiet mwohn sapwellimen Koht usu kan.

14 I pahn kihehda ileilehsang depwek ileile kan; I pahn duwehla me Keieu Lapalapo.

15 Ahpw komwi pahn lekidekdihla nan ehl, wasa keieu loalo.

16 Irail akan me pahn kilang komwi pahn kadehdei komwi, oh pahn kasawi komwi, oh pahn nda: Ih ohl me kin kahrehda sampah eh kin rerer, me kin itikada wehi kan?

17 Oh wekidohng sampah en duwehte sapwtehn, oh kawehla kahnihmw kan, oh sohte ritingada imwen me sensel kan?

18 Nahnmwarki kan koaros en wehi kan, ei, irail koaros, nekinekidi nan lingan, emen emente nan pein imwe.

19 Ahpw komwi lekidekieisang nan omwi sousou duwehte rah suwed ehu, oh luwen irail akan me kamakamalahr, dongkihdi kedlahs, me kohdihla pohn takain nan pwoaro; rasohng paliwar mehla ehu me tiatipeseng.

20 Komwi sohte pahn patehng irail nan wasahn nekinekidi, pwehki omwi kawehla sapwomw sahpw oh kemehla noumw aramas akan; wahn wiewia suwed akan e sohte pahn mie wahupe.

21 Kaunopada kamakamalahn sapwellime seri kan pwehki dipen arail pahpa ko, pwe irail en sohte pweida, de sapwaniki sahpw, de pil kadirehkihla sampah arail kahnihmw kan.

22 Kauno Wasa Lapalap ketin mahsanih, pwe I pahn engiengda pahrail oh lepukasang Papilon ahdo, oh luhwehkan, oh pwutak, oh pwutak me re pahn nainiki kan, Kauno mahsanih.

23 I pil pahn wiahiong en wiahla dowen mehn pihr en pohn pihl, oh lehpwel; oh I pahn kamwomwala duwehte koakoahngki kepennok, Kauno Wasa Lapalap me ketin mahsanih.

24 Kauno Wasa Lapalap ketin kahulahr, mahsanih: Mehlel nin duwen ei medewehda, ih pahn mwomwen e pahn pweida; oh nin duwen ei koasonehdi, e udahn pahn pweida—

25 Me I pahn wahdo mehn Asiria nan sapwei, oh tiakpeseng ih pohn ei nahna kan; e ahpw pahn kihsang mehn wisiko pohrail, oh ah katoutouo pahn kohsang pohn pwopwe kan.

26 Met iei kahrepehu me koasondi ong sampah pwon; oh met iei limehu me kapahweiehr pohn wei kan koaros [pwehn kaloke].

27 Pwe Kauno Wasa Lapalap me ketin koasonehdi, oh ihs me pahn kak kasapwungehla? Oh lime kan kapakapahweite [pwehn kaloke], oh ihs me pahn katokihedi?

28 [Rohng] katoutouwet [lohkdahr] nan pahr me nahnmwarki Ahas ketin sipalla.

29 Mehn Palisdia pwon, kumwail dehr perenkihda tuhkehn kamakamo eh ohla; pwe sinek men eh kin mehla emen sinek me suwed sang kin wiliandi, oh wah kan pahn wia ehu soangen sinek kamasepwehk.

30 O mesenih en me semwemwe kan pahn mwonge, oh me anahn akan pahn wendi nan onepek mwahu; oh I pahn kemehkihla kalewemwail [mehn Pilisdia] lehk lapalap ehu, oh e pahn kamwomwala luwomwail kan.

31 Kowe ewen kehl, werwerda; Kowe kahnihmw, weriwer; kumwail, mehn Palisdia pwon, mwerpesengehr; pwe mie depwek en pwelipar ehu kohkohdohsang paliepeng, oh sohte emen pahn kelehpwla nan ahnsou me koasondi kan.

32 Soangen pasapeng dah me meninkeder en wehi kan pahn wia? Me Kauno ketin koasonedier Saion, oh sapwallime aramas semwemwe kan pahn koapworopworki.