1 Mahseno me Aiseia, nein Amoz, kilangada me pid Suda oh Serusalem:

2 Oh nan keimwseklahn rahn akan me pahn kohdo, ni ahnsou me sapwellimen Kauno tehnpas [sarawio] pahn kokouda pohn nahna kan, oh pahn ilehsang dohl akan, oh wehi koaros pahn kin pokondohng ie.

3 Oh aramas tohto pahn kohla oh nda, Kumwail kohdo, oh kitail kohdahla pohn nahna en Kauno, ong ni tehnpas en Koht en Seikop; oh e pahn ketin mahsaniheng kitail sapwellime koasoandi kan, oh kitail pahn keid nan sapwellime ahl akan; pwe kosonnedo pahn kohsang Saion, oh sapwellimen Kauno mahsen sang Serusalem.

4 Oh e pahn ketin kopwung wehi kan, oh ketin angiangih aramas tohto: oh irail pahn wekidohng mehn deipwel neirail kedilahs akan, oh neirail ketieu kan ong naipokos—sohte ehu wehi pahn pelianda ehu wehi, oh re sohlahr pahn kaunop ong mahwin.

5 Kumwail kadaudoken Seikop kan, kumwail kohdo oh kitail keid nan marain en Kauno; ei, kumwail kohdo, kumwail koaruhsie me salongalahr nan amwail wiewia suwed akan.

6 Eri, Maing Kaun, komw ketin likidmelielahr sapwellimwomwi aramas akan, kadaudoken Seikop kan, pwehki re audaudkilahr koasoandi en mehn palimese kan, oh idawehnlahr soun kosetipw kan duwehte mehn Pilisdia kan, oh irail kin perenki wiewia tiahk en aramas en liki kan.

7 Sapwerailo pil direkilahr silper oh kohl, oh sohte me kak wadekada uwen tohtohn arail dipwisou kesempwal akan; sapwerailo pil direkihla oahs, oh wararail werennansapw en mahwin kan pil tohto mehlel.

8 Sapwarailo pil direkihla dikadik en eni kan; irail kin pwongih mehkan me pein perail kin wiahda, me pein sendinpehrail kan wiahda.

9 Oh aramas lemei men sohte kin kanengamah, oh aramas lapalap men sohte kin karakarahkala, eri, komw dehr mahkohng irail.

10 Kumwail me suwed kan, kumwail pidolong nan pwoahr en paip akan, oh kumwail rukula nan pwehl, pwe lemwiki Kauno ohlingan en sapwellime roson lapalap pahn kalokeikumwail.

11 Oh ehu rahn pahn leledo me aklapalap en aramas pahn imwisekla, oh pohnmwahso en aramas pahn sohrala, oh Kauno kelehpw me pahn ketin lapalapala ni rahno.

12 Pwe rahn en Kauno Wasa Lapalap kerendohongehr wehi koaros, ei, wehi koaros; ei, me pohnmwahso oh aklapalap, oh aramas koaros me lapalap pahn tikitkla.

13 Ei, oh rahn en Kauno pahn leledohong pohn tuhke sidar koaros en Lepanon, me reireilahr oh lapalalahr; oh pohn tuhke ohk koaros en Pasan;

14 Oh pohn nahna ileile koaros, oh pohn kisin dohl akan, oh pohn wehi kan koaros me aklapalapalahr, oh pohn aramas koaros;

15 Oh pohn wasahn doulik ile koaros, oh kehl en mahwin koaros;

16 Oh pohn sohp koaros en nansed, oh pohn sohp koaros en Darsis, oh pohn wasa lingan koaros.

17 Oh aklapalap en aramas pahn imwisekla, oh pohnmwahsohn aramas pahn sohrala; oh Kauno kelehpw me pahn ketin lapalapala ni rahno.

18 Oh dikadik en eni kan e pahn ketin kasohrehla douluhl.

19 Oh irail pahn rukula nan pwoahr akan nan takai kan, oh nan pwoahr en paip akan en sampah, pwehki [arail] lemwiki Kauno pahn kipeiraildi oh lingan en sapwellime roson lapalap pahn ketin kaloke irail, ni ahnsou me e pahn ketido oh itikada sampah.

20 Ni rahno aramas emen pahn kesehla ah dikadik en eni silper, oh ah dikadik en eni kohl, me e pein wiahda pwe en pwongih, [re pahn keselahng] pwehk oh kelumwud kan;

21 [Oh re pahn] duwallong nan pwoahr en takai kan, oh nan paip pohn dohl takai kan, pwehki lemw en Kauno eh pahn kipeiraildi oh sapwellime lingan lapalap pahn kalokeirail, ni ahnsou me e pahn ketido oh itikada sampah.

22 Dehr [koapworopworki] aramas, me kin mourki ar esingek; pwe dahme re kak wia?