1 Mahsen en Seikop, rien Nihpai, me e kaweidkihong aramas en Nihpai kan:

2 Kilang, riei ohl kesempwal akan, Ngehi, Seikop, Koht ketin malipeie, oh kasarawielahrni wiepen sapwellime koasoandi sarawio, oh kamanamanla sang rieio, Nihpai, me kumwail kin wiahki amwail nahnmwarki de silepemwail, oh me kumwail kin koapworopworki en wia doarepemwail, pwe kilang kumwail ese me I kaweidkinkumwailehr soangen kaweid tohtoh kouwalahpie.

3 Ahpw, I pwurehng kaweid kumwail; pwe kamwahupen palingenimwail akan me I nsenohki. Iei, I inenen pwunodkin kumwail; oh kumwail esehier met. Pwe I kin ngoangkipanawi kumwail; oh I padahkihong kumwail mahsen en ei pahpao; oh I padahkiheng kumwail duwen soahngkan koaros me ntingdier, sangete ni kepikipikdahn sampah.

4 Oh met, kilang, I pahn kaweidkin kumwail duwen soahng koaros me wiewiawi met, oh me pahn wiawi mwuhr; eri, I pahn wadekehng kumwail mahsen en Aiseia. Oh mahsen pwukat me riei pwutako mwahuki I en kaweidkin kumwail, pwe en wia kamwaupemwail, pwe kumwail en kak esehla oh kawauwieki mwaren Koht.

5 Oh met, mahsen me I pahn wadekada kan iei mahsen kan me Aiseia ketihtihki duwen peneinei en Israel kan; eri, kumwail en karasahiong pein kumwail, pwe kumwail wia kisehnpeneinei en Israel. Oh soahng tohto me Aiseia ketihtihkier me kumwail me kumwail kak karasahiong pein kumwail, pwe kumwail iei peneinei en Israel.

6 Oh Iet mahsen oko: Kauno Koht mahsanih: Kilang, I pahn kapahwei limeiet pohn wein mehn liki kan, pwehn kasalehda ei koasoandi sansal kan ong aramas akan; oh irail ahpw pahn kol pehn noumwail pwutak kan oh kahreirail, oh pahn wa noumwail serepein kan pohn pwopwerail akan.

7 Oh nahnmwarki kan pahn kinapwalih kumwail duwehte pahpa kan, oh lih nahnmwarki kan pahn kin apwalih kumwail duwehte nohno kan; irail pahn poaridi mwohmmwail, oh kamwakelehsang pwelipar en patehn nehmmwail kan; oh kumwail pahn dehdeki me ngehi me Kauno; pwe mehmenme kasikasikie sohte pahn namenekla.

8 Oh met Ngehi, Seikop, pahn kawehwehda duwen mahsen kat. Pwe kilang, Kauno ketin kasalehongie irail ko me mehn Papilon ko kemelahr oh salihdier, me mih Serusalem, iei, wasa me se kohsangie.

9 Ahpw, Kauno ketin kasalehongie me irail pahn pwurehng pwurodo. Oh e pil ketin kasalehongie me Kauno Koht, Me Sarawi en Israelo, pahn ketin pwaredohng irail ni paliwar; oh mwurin eh pahn pwaredohng irail, irail pahn kaloke oh kalohpwuala ih, nin duwen dahme tohnlengo padahkihongie.

10 Oh mwurinarail pahn kasalehong Me Sarawi en Isrealo arail keptakai oh pohnmwahso, kilang, e pahn ketin kadeik irailda. Rahno pahn kohdo me irail pahn lokolok oh ahneki kahpwal.

11 Eri, mwurin arail pahn pekousla, tohnlengo mahsanih, tohto irail pahn lokolongki, ahpw sohte pahn mehkihla, pwehki ahn me loaloapwoat kan arail kapakap akan; irail pahn mwerpeseng, oh kamakam, oh kailok; ahpw, Kauno pahn ketin mahkohng irail, ma irail pahn kamehlele arail Sounkomouro, irail pahn pwurehng pwurpene nan sapwerail sahpw akan me re sohsohki.

12 Oh meid pahi mehn Liki Kan, me soukohpo ntingihdier duwe; pwe kilang, ma re pahn koluhla oh sohte mahwiniong Saion, oh dehr iangala mwomwohdisolahlahwe lapo, irail pahn komourla; pwe Kauno Koht pahn ketin kapwaiala sapwellime inouo me e ketin inoukihongehr sapwellime seri kan; oh kahrepe wet me soukohpo ntingiekihdi mepwukat.

13 Eri, irail me pahn mahwiniong Saion oh sapwellimen Kauno aramas en inouo pahn kamwakelehsang pwelipar en patehn nehnrail akan; oh sapwellimen Kauno aramas akan sohte pahn namenekla. Pwe aramas me kin kasikasik Kauno iei irail sapwellime; pwe irail me kin kaskasikte ketdohn Mesaiao.

14 Oh kilang, nin duwen mahsen en soukohpo, Mesaiao pahn ketdo keriau pwehn ketin kapwurepene sapwellime aramas akan; eri, e pahn ketin pwarohng irail ni manaman oh lingan kouwahlap, oh kamwomwala arail imwintihti kan, eri ni ahnsou me rahno pahn lelodo irail ahpw pahn kamehlehla; oh e sohte pahn kamwomwala irail akan me kamehlele.

15 Oh irail me sohte kamehlele pahn kamwomwomwla, nan kisiniei, oh melimel, oh rerrer en sahpw, oh kakerehdi nta, oh soumwahu, oh lehk. Oh irail ahpw pahn dehdehki me Kauno Koht, iei Me Sarawi en Israel.

16 Dipwisou kan pahn kapwurupwursang me lapalap, de me sensel kan pahn lapwada?

17 Kauno me Mahmahsen: Irail akan me sensel pahn me lapalap akan pahn saledekla, oh dipwisou lohdi kan me aramas lemei kalowehdi pahn kopwurupwursang; pwe Koht Wasa Lapalahpie pahn kapitala sapwellime aramas en inouo. Kauno me Mahmahsen: I pahn pelian irail akan me pahn pelian kumwail—

18 Oh irail me kin kalokeikumwail, I pahn kamwengehkin irail pein udukerail; oh irail pahn sakaukihla pein ntahrail rasehng wain me iou; oh koaros pahn dehdehki me Ngehi Kauno iei ahmwail Sounkomour oh Soundoar, Wasa Lapalahpie en Seikop.