1 Kilang, Ngehi, Nihpai, likuweriongehr Kauno Koht, pwehki riei pwutak ko ara lingeringer.

2 Ahpw kilang, ara lingeringer pahi ahpw laudla, kahrehong ara songen kemeiehla.

3 Iei, ira kaulimahkinie, ketihtihki: Riata pwutak tikitiko kin leme me e pahn kaunkitailda; oh kahpwal laud kitail ahneki pwehki ih; eri, kitail kemehla, pwe kitail en dehr nohn lokolongki ah koasoi kan. Pwe kilang, kitail sohte pahn wiahki ih atail kaun; pwehki kitail me laud, kitail me ahneki pwuhng en kaunda aramas kat.

4 Met I sohte anahne ntingihdi pohn pileit pwukat koasoai en kaulim koaros me ira wiahiengie. Ahpw e itarete I en nda, me ira song en kemeiehla.

5 Kedekedeo Kauno ahpw kaperkinie, me I en kohkohlahsang irail oh sopohla nan sapwtehno, oh irail koaros me men iangie.

6 Eri, kedekedeo Ngehi, Nihpai, wahda ei peneinei, oh iangahki Sohram oh ah peneinei, oh riei pwutak laud me adaniki Sam oh ah peneinei, oh riei pwutak tikitik riemen me adaniki Seikop oh Sosep, oh iangahki riei serepein kan, oh irail koaros me men iangie. Oh koaros me men iangie ko iei irail me kamehlele sapwellimen Koht kehkehlik kan oh kaudiahl kan; eri, irail peikiong ei koasoai kan.

7 Oh se wahda imwat impwal kan oh soahng koaros me se kak wahda, oh seiloangki erein rahn tohto kei nan sapwtehno. Oh mwurin aht seiseiloangkiseli erein rahn tohto kei se kauwada imwat impwal akan.

8 Oh nei aramas akan pwungkihda me se pahn kiheng eden wasao Nihpai; eri, wasao adankihla Nihpai.

9 Oh irail koaros me iangiedohu kahdankinirailla aramas en Nihpai.

10 Oh se nantiheng kolokol sapwellimen Kauno kadeik pwung kan, oh koasoandi kan, oh kosonned akan ni mehkoaros, nin duwen kosonned en Moses.

11 Kauno eri ketin ieiang kiht; oh se ahpw tepda pweida kouwahlap; pwe se padokedi weren tuhke, oh se ahpw dolung wah tohto. Oh se tepda apwalihda polohnsihpw kan, oh kou kan, oh soangen mahn teikan.

12 Oh Ngehi, Nihpai, pil wahdo rekohd kan me ntingdier pohn pileit prahs kan; oh iangahki mpwei, de kompas, me kaunopdahrsang ni limen Kauno ong ei pahpao, nin duwen dahme ntingdiero.

13 Kedekedeo se ahpw tepda pweida kouwahlap, oh kaparaparala nan sahpwo.

14 Oh Ngehi, Nihpai, ale nein Leipen kedlahso, oh ahpw wiahda kedlahs tohto me duwehte naho, pwe aramas me ahnsou wet kahdanikilahr mehn Laman kande kohdo oh kemeikitala; pwe I esehier arail kailongkinie oh nei seri kan oh irail akan me wia nei aramas.

15 Oh I padahkiheng nei aramas akan irail en kauadaihmw akan, oh irail en koadoahke tuhke, oh airon, kapa, prahs, sdihl, oh kohl, oh silper, oh mete kesempwal akan, me rekla wasao.

16 Oh ngehi, Nihpai, kauada tehnpas sarawi ieu; oh I kauada ni mwomwen tehnpas sarawi en Solomon ihte e sohte wiawihkihda kidelapen dipwsou pweilaud; pwe soangen dipwsou pweilaud ko sohte kak dierek nan sahpwet, eri, e sohte kak kokouda duwehte tehnpas sarawi en Solomono. Ahpw wiepen doadoahk en kauwadao rasehngete tehnpas en Solomono; oh koasoandi en doadoahko lingan kouwalahpie.

17 Kedekedeoh Ngehi, Nihpai, kaweidkiheng nei aramas akan re en kin pwersek, oh doadoahngki pehrail kan.

18 Kedekedeoh irail ahpw men I en wiahla arail nahnmwarki. Ahpw ngehi, Nihpai, sohte pwungki en mie nahnmwarki; ahpw, I kapwaieng irail nsenerail sang ni manman me I kolokol.

19 Oh kilang, mahsen en Kauno pweidahr rehn riei ko, nin duwen me e mahsanier, me I pahn wiahla ara kaun oh soun padahk. Eri, I wiaier ahr kaun oh soun padahk, nin duwen sapwellimen Kauno kosonned akan, lao lel ahnsou me re song en kemeiehlao.

20 Eri, mahsen en Kauno pweidahr me e ketin mahsanihongie, ketihtihki: Ma irail sohte pahn rong ahmw kaweid kan, irail pahn lekidek sang mwohn silangin Kauno. Oh kilang, irail ahpw lekideksangehr mwohn sihlangi.

21 Oh e ketin keriakinirail keria ieu me inenen kalok, pwehki arail suwed. Pwe kilang arail mohngiong kan keptakai ong ih, ihme kahrehda arail duwehla takai kekeluwak; eri, nin duwen arail pwetepwet, oh masamwahu oh lingan mehlele, Kauno me ketin kahrehda kilirail akan e tontonla pwe nei aramas akan en dehr men patehng irail.

22 Oh Kauno Koht mahsanih: I pahn kahrehda noumw aramas akan pahn kailongkinirail, ma irail sohte pahn kohluhkihla arail mour suwed akan.

23 Oh mehmen me pahn pwoudikihda emen kadaudokerail kan e pahn riahkihla; pwe re pahn alehdi soangen keriaohte. Oh e pweidahr pwehki Kauno me ketin mahsanih.

24 Oh pwehki keria me milahr pohrailo irail wialahr aramas pohnkahke kei, audaudki tiahk suwed oh widing, oh kin kohla nanwel rapahki mahn lawalo kan.

25 Oh Kauno Koht mahsanihongie: Irail pahn kin kaloke kadaudokemw kan, pwe kadaudokemw kan en kin tamatamanie; oh ma kadaudokemw kan pahn manokeiehla, oh sohte kapwaiada ei mahsen kan, re pahn kalokeirail lao irail kamwomwomwla.

26 Kedekedeoh Ngehi, Nihpai, kasarawihla Seikop oh Sosep, pwe ira en wiahla samworou oh soun padahk ong nei aramas akan nan sahpwo.

27 Kedekedeoh se nsenamwahu nan aht mour.

28 Oh sounpar silihsek ahpw douer powe mwurin aht mweselsang Serusalem.

29 Oh Ngehi, Nihpai, ntintingih rekohd kan pohn nei pileit kan, me I wiahda, duwen nei aramas akan lelodo met.

30 Kedekedeoh Kauno Koht mahsanihongie: Wiahda ekei pileit; oh ke pahn ntingihdi soahng tohto powe me mwahu mwohn sihlangi, pwe en wia kamwahupen noumw aramas.

31 Eri, Ngehi, Nihpai, kohla oh wiahda pileit kan me I ntingihdier mepwukat powe pwe I en peikieng sapwellimen Kauno kosonned akan.

32 Oh I ntingihdier soang kan me Koht kupwur pereniki. Oh ma nei aramas akan perenki kupwur en Koht akan irail pahn perenki ei nting kan me ntingdi pohn pileit kat.

33 Oh ma nei aramas akan inangih esehla duwen poadepenmehn mahs oko re anahne rapahki nan nei pileit teiko.

34 Oh I kak koasoaia me sounparehr pahisek douer powe, oh se mahweniongehr oh nanpwungsuwediong riat ko.