1 Met ngehi, Nihpai, pahn kawehwehda duwen mahsen kan me I ntingihdier, me Aiseia kohpadahier. Pwe kilang, Aiseia kohpadahr soahng tohto me nei aramas tohto apwal en wehwehki; pwe re sohte wehwehki kokohp en Mehn Suhs akan.

2 Pwe ngehi, Nihpai, sohte padahkiong irail soahng tohto me pid koasoandi en Mehn Suhs akan; pwe arail wiewia kan iei wiewia rotorot kei, oh arail mwekid kan wia mwekid suwed kei.

3 Eri, I pahn ntingwohng nei aramas akan, iei irail koaros me pahn alehdi mepwukat mwuhr me I pahn ntingihdi, pwe irail en kak esehla sapwellimen Koht kadeik kan, pwe re pahn lelohng wehi kan koaros, nin duwen mahsen kan me e ketin mahsaniher.

4 Eri, kumwail nei aramas akan, rongie, [kumwail] me wia peneinei en Israel, oh rong mwahu ei kaweid kan; pwehki mahsen en Aiseia kan ar sohte wehwe ong kumwail, ahpw re kin wehwe ong irail kan koaros me kin direkihla ngehn en kokohp. Ahpw I pahn kihong kumwail ehu kokohp, nin duwen ngehno me kin ketiket loaleiet; eri I pahn kohpada nin duwen me sansal me I kin wehweki sangete ahnsou me I iang ei pahpa mweselsang Serusalem; pwe kilang, palingeniet kin pereniki [padahk] sansal akan ong nei aramas akan, pwe irail en kak esehla.

5 Ei, oh palingeniet pereniki mahsen kan en Aiseia, pwe I kohsang Serusalem, oh mesei kat kilangehr soahng kan me kohsang rehn Mehn Suhs akan, oh I ese me Mehn Suhs akan wehwehki soahng kan me kohsang rehn soukohp akan, oh sohte ekei aramas wehwehki soahng kan me kalohkohngehr Mehn Suhs duwehte pein irail, ihte ma re ale padahk nin duwen soahng kan me kohsang rehn Mehn Suhs akan.

6 Ahpw kilang, ngehi, Nihpai, sohte kaiahnehda nei seri kan nin duwen mehn Suhs akan; ahpw kilang, pein ngehi, kousonehr nan Serusalem, eri I ese duwen wasa kan me kapelpene [kanihmwo]; oh I padahkihongehr nei seri kan duwen sapwellimen Koht kadeik kan, me wiawiher ong Mehn Suhs akan, ong nei seri kan, nin duwen [soahng] koaros me Aiseia kohpadahr, oh I sohte pahn ntingiedi.

7 Ahpw kilang, I pahn doulahng pein ei kokohp, nin duwen me sansal sang rehi; me I ese me sohte aramas emen pahn sawehwehki; ahpw, ni rahn akan me kokohp en Aiseia kan pahn pweida aramas akan pahn wehwehkihda ni mehlel, ni ahnsou me kokohp akan pahn sansalada.

8 Eri, re uhdahn kesempwal ong aramas akan, oh mehmen me pahn medewe me re sohte kesempwal, I pahn koasoaiong irail ni sansal, oh [pil] kainenehiongete nei aramas akan ei koasoai kan; pwe I ese me [kokohp kan] pahn uhdahn kesempwal ong irail ni imwin rahn akan; pwe ni ahnsouo irail uhdahn pahn wehwehkihda; eri, I ntingiedi ong ni kamwahuparail.

9 Oh ni ehu dih en Mehn Suhs akan ar pahn kamwomwala pwehki arail wiewia suwed, iei pil mwomwen arail pahn kamwomwala nan ehu ehu dih nin duwen arail wiewia suwed kan; oh saikinte emen irail kamwomwala ihte ma soukohp kan en Kauno kohpada ong irail.

10 Eri, e kokohpdahr ong irail duwen kamwomwomwla me pahn wiawi ong irail, mwurinte ei pahpao e mweselsang nan Serusalem; ahpw, ar mohngiong kan keptakailahr; oh nin duwen ei kokohp re kamwomwlahr, ihte me luwehdi, irail akan me lohdier oh wesiklahr nan Papilon.

11 Oh met I koasoaiawei pwehki ngehno me mihmi loaleiet. Oh mendahte ar wisiksangehr re udahn pahn pwurehng pwurala, oh sapwenkihla sahpw en Serusalem; eri, re pahn pwurehng kopwurupwurdohng nan sapwarail sahpw en sohso.

12 Ahpw, kilang, re pahn kin mahwin, oh e pahn mie rohng en mahwin kan; oh ni ahnsou me rahno pahn lelodo me sapwellimen Sahmo Iehroso, iei Sahm en nanleng oh sampah, pahn ketin kasalehiong irail pein ih ni paliwar, kilang, re pahn soikala ih, pwehki ar wiewia suwed akan, oh keptakain ar mohngiong kan, oh lamalam kesihnen.

13 Kilang, irail pahn kalohpwuala ih; oh mwurin eh pahn nekinekdi nan sousou erein rahn siluh, e pahn ketin iasadahsang mehla, iangahki [manaman en] kamwahuiala nan sapwellime pehn pihr kan; oh irail koaros me pahn kamehlele mware pahn komourla nan wein Koht. Eri, palingeniet pereniki kohpada duwen ih, pwe I kilangehr ah mwehi, oh mohngiongi kin kepikepinga mware me sarawio.

14 Oh kilang [ahnsou] pahn leledo me mwurin Mesaiao eh pahn ketin iasadahsang mehla, oh ketin kasalehda pein ih ong sapwellime aramas akan, ong koaros me pahn kamehlele mwareo, kilang, Serusalem pahn pwurehng kamwomwala; pwe meid suwed ong irail me pahn pelianda Koht oh aramas akan en sapwellime mwomwohdiso.

15 Eri, mehn Suhs akan pahn kamweremwerpeseng nan wehi kan koaros; ei, oh Papilon pil pahn kamwomwala; eri, ekei wehi teikan pahn kamwerepeseng mehn Suhs akan.

16 Oh mwurin arail pahn mwerpeseng, oh Kauno Koht ketin kalokehkinirail wehi teikan erein dih kei, ei, sang ehu dih lel ehu dih lao irail tepida pwoson Krais, Sapwellimen Kohto, oh tomwo, me poatopoat ong aramas koaruhsie—oh ni ahnsouo me rahno pahn leledo me re pahn pwoson Krais, oh pwongih Sahmo ni mwareo, sang nan mohngiong mehlel, oh peh mwakelekel, oh solahr kasik emen Mesaia, eri, ni ahnsouo, rahno pahn leledo me e pahn konehng me re pahn kamehlele mepwukat.

17 Oh Kauno pahn ketin pwurehng ketikihwei limeo pwe en kapwurehdo sapwellime aramas akan sang arail salongala oh mour pwupwilao. Eri, e pahn ketin doula wia doadoahk kapwuraimwei oh lingan rehn aramas akan.

18 Eri, e pahn ketin kapwarehda sapwellime mahsen akan ong irail, iei mahsen akan me pahn kadeikirailda ni imwin rahno, pwe irail pahn alehdi [mahsen ko] pwe en kak kadehdehiong irail duwen Mesaia mehlelo, me irail soikalao; oh en kadehdehiong irail me re solahr anahne kasikasik emen Mesaia me pahn ketido, pwe e sohte pahn wiawi, ihte Mesaia likamw me pahn pitiedi aramas akan; pwe emente Mesaia me soukohp akan kokohpkidahr, oh Mesaia wet iei ih me Mehn Suhs akan soikalahro.

19 Pwe nin duwen mahsen akan en soukohp akan, Mesaiao pahn ketido sounpar wenepwiki sang mwurin ei pahpao mweselsang Serusalem; oh nin duwen mahsen akan en soukohp akan, oh pil mahsen en tohnleng en Kohto, e pahn mwareniki Sises Krais, Sapwellimen Kohto.

20 Oh met, riei ohl akan, I koasoaiadahr ni sansal pwe kumwail en dehr sapwungala. Oh nin duwen Kauno Koht e ketin ieias me kahluwa Israel sang nan sahpw en Isip, oh ketkihong Moses manaman pwe en kak kamwahuiala tohn wehi kan [en Israel] mwurin sineik poisin kan ar ngalisiraildi, ma re pahn kilenglahngete sineik me e kihda mwohrailo, oh pil ketkihong ih manaman pwe en poakih paipo oh pihl ahpw pahn kusieisang; mehlel, kilang I ndaiong kumwail, me mepwukat mehlel, oh nin duwen Kauno Koht e ketin ieias, e sohte pahn mie ehu mwahr tohrohr pohn sampah likin Sises Krais, me I koasoaiahier, me aramas pahn kak komourkihla.

21 Eri, iei kahrepewet me Kauno Koht inoukihong ie me mepwukat me I ntingihdi pahn kolkoldi oh nekinekla, kohieng kadaudokei kan, sang ehu dih kohlang ehu dih, pwe inouo en kak pweida ong Sosep, me kadaudoke kan sohte pahn mehla erein sampah eh pahn mimiehte.

22 Eri, mepwukat pahn kohwei sang nan ehu dih kolahng ehu dih erein sampah eh pahn mimiehte; oh re pahn kohkohwei nin duwen kupwur oh koasondi en Koht; oh wehi kan me pahn kolokol pahn pakadeingki nin duwen mahsen akan me ntingdi.

23 Pwe se kin loaloapwoationg [aht] doadoahk en nting, pwe se en koangoangehki nait seri kan, oh pil riat akan, re en kamehlele Krais, oh re en kompoakepahki Koht; pwe se ese me iei sang kalahngan [en Koht] me kitail komourkihla, mwurin [soahng kan] koaros me kitail kak wia.

24 Oh, mendahte aht kamehlelehier Krais, se kin kapwaiada kosonned en Moseso, oh kasikasik Krais ni loalopwoat, lao kosonnedo pahn kaimwsekla.

25 Pwehki kahrepe wet me kosonnedo wiawihkihda; eri ong kiht, kosonnedo sohralahr, oh se momourki Krais pwehki aht pwoson; ahpw se kin kapwaiadahte kosonnedo pwehki koasoandi kan.

26 Oh se kin koasoaia Krais, se kin perenki Krais, se kin kalohngki Krais, se kin kohpada duwen Krais, oh se kin ntingihdi nin duwen aht kokohp akan, pwe nait seri kan en kak ese mehnia mehn sawas me re pahn alehki lapwepen diparail akan.

27 Eri, se koasoaia duwen kosonnedo pwe nait seri kan en ese duwen sohralahn kosonnedo; oh irail en ese me sang sohralahn kosonnedo, [re] en kilenglahng mouro me sang rehn Krais, oh ese kahrepen kosonnedo eh wiawihda. Oh mwurin kosonnedo eh pahn pweida rehn Krais, re sohte pahn kakeptaikaiala mohngiongarail kan ong ih ahnsou me kosonnedo pahn sohrala.

28 Oh met kilang, nei aramas akan, kumwail wia aramas tepinwar kekeluwak; I koasoiong kumwail ni sansal, pwe kumwail en sohte pwonopwonki. Oh mahsen akan me I koasoaiadahr pahn wia mehn kadehde ong kumwail; pwe re itarohng kaweid aramas sohte lipilipil nan ahl pwungo; pwe ahl pwungo iei en kamehlele Krais oh dehr kahmahmkihla; pwe ma kumwail kahmahmki a kumwail pil kahmahmkihla soukohp ko oh kosonnedo.

29 Oh met kilang, I ndaiong kumwail me ahl pwungo iei en kamehlele Krais, oh dehr kahmahmkihla ih; oh Krais iei me Keieu Sarawi en Israel; eri kumwail anahne poaridi mwowe, oh pwongih sang nan amwail kehl unsek, madamadau, oh roson, oh palingenemwail usek; oh ma kumwail pahn wia met kumwail sohte pahn lekidekla.

30 Oh, erein eh pahn konehng, kumwail pahn kolokolete sapwellimen Koht doadoahk kan oh tiahk sarawi kan lao kosonnedo me kohieng Moses pahn pweida.