1 Oh met, Seikop padahkihong nei aramas akan soahng tohto ni ahnsouo; ahpw ihte mepwukat me I koasoanedi me pahn ntingdi, pwe I itariki soahng kan me I ntingihdier.

2 Oh met ngehi, Nihpai, ntingihdi pil ekei ahn Aiseia koasoai kan, pwe loaleiet uhdahn pereniki ah koasoai kan. Pwe I pahn karasahiong ah koasoai kan nei aramas akan, oh I pahn kadaralahng rehn nei seri kan koaruhsie, pwe e kilangehr ei Soundoaro, duwehte ei kilangehr ih.

3 Oh riei pwutak, Seikop, pil kilangehr Soundoaro duwehte ei kilangehr ih; eri, I pahn kadarala rehn nei seri kan ara koasoai kan pwe en kadehdehiong irail me ei koasoai kan mehlel. Eri, sang ni kadehde kan en [aramas] silimen, Koht ketin mahsanih, ei mahsan kan pahn pweida. Ahpw, Koht kin ketin kadarodohr soun kadehde tohto, oh e kin ketin kadehdehda sapwellime mahsen koaros.

4 Kilang, loaleiet kin pereniki kadehdehiong nei aramas akan duwen mehlel en ketidohn Krais; pwehki, kahrepe wet me kosonned en Moses wiawihkihda; oh soahng koaros me Koht ketikihongehr aramas sangete ni tepin sampah, kin kasalehda duwen ih.

5 Oh loaleiet pil kin perenikihda sapwellimen Kauno inou kan me e ketin wiahongehr atail pahpa kahlap oko; mehlel, loaleiet kin perenikihda sapwellime kalahngan, oh nan sapwellime pwuhng pahrek, oh manaman, oh mahk [me mih] nan koasoandi soutuk oh kesempwal en powehdi mehla.

6 Oh loaleiet pereniki kadehdehiong nei aramas akan me ma Krais sohte pahn ketido, aramas koaros uhdahn pahn mehla.

7 Pwe ma sohte Krais sohte Koht; oh ma sohte Koht sohte kitail, pwe kepikipikda sohte pahn wiawi. Ahpw mie Koht men, oh ih iei Krais, oh e pahn ketido ni unseklahn pein sapwellime ahnsou.

8 Oh met I pahn ntingihdi ekei ahn Aiseia koasoai kan, pwe nei aramas akan me pahn kilang mahsen pwukat en perenda kouahlap oh nsenamwahu pwehki aramas akan koaros. Oh met iei mahsen akan, oh kumwail en karasahiong irail kumwail oh aramas koaros.