1 Ahpw, kilang, ni imwin rahn akan, de nan mwehin Mehn Liki kan—iei, wehi koaros en Mehn Liki kan oh pil mehn Suhs akan, irail koaros me pahn kohdo sahpwet oh pil irail me pahn mihmi nan sahpw teikan, iei, sahpw koaros pohn sampah, kilang, irail pahn sakaukihla wiewia suwed oh soangsoangen doadoahk suwed koaros.

2 Oh ahnsou me rahno pahn lelledo Kauno Wasa Lapalap pahn ketidohng irail, posopos en nansapwe oh rerrer en sahpw, oh e pahn ngihl laud, oh kisinieng, oh melimel, oh kisiniei kehlail.

3 Oh wehi kan koaros me pahn mahweniong Saion, oh kin kaloke, pahn [sohrala] rasehng ouraman en nihpwong ehu; ei, e pahn lelohng irail, duwehte aramas duhpeklahr men me ouramandahr me e wie mwongemwonge e ahpw pirida ni eh duhpek; de pil rasehng aramas emen me mehkilahr eh men nimpil, e ahpw ouramanda me e wie nimnimpil, e ahpw pirida nan kepinwere ngalangaladahr oh e men nimpil; iei, met me pahn wiawi ong karihs en wehi kan koaros me pahn mahweniong Nahnahn Saion.

4 Pwe kilang, kumwail koaros me kin wiewia suwed, kumwail uhdi oh pwuriamweikihla, pwe kumwail pahn weriwer laud, oh peki sawas; ei, kumwail pahn sakaula ahpw kaidehn sang wain, kumwail pahn wasasseli ahpw kaidehn sang sakau kehlail.

5 Pwe kilang, Kauno pahn ketin kupwuredahr kumwail en meirkelikla. Pwe kilang, kumwail meirpenehr, oh kumwail soikalahr soukohp akan; oh e ketin perehsangkumwailehr amwail kaun akan oh ohl sarawi kan pwehki amwail wiewia suwed.

6 Oh e pahn wiawi me Kauno Koht pahn ketikihong kumwail mahsen akan en pwuhk ehu, oh re pahn wia mahsen akan en me memeir.

7 Oh kilang pwuhko pahn katengetengpene; oh pwuhko audaudki kaudiahl sang rehn Koht, sangete ni tepin sampah lel ni imwi.

8 Eri, pwehki soahng kan me katengetengpene, soahng kan me katengetengpene sohte pahn kohda ni ahnsou me aramas akan suwedlahr oh wiewia dihp akan. Eri pwuhk ko sohte pahnkohieng irail.

9 Ahpw pwuhko pahn pekederlahng ohl emen, oh e pahn patowahnda mahsen akan en pwuhko, me wia mahsen en me memeir nan pwehl, oh e pahn kadaralahng emen [aramas] mahsen akan en pwuhko;

10 Ahpw mahsen akan me katangetengpene sohte pahn pekederla, oh pil pwuhko sohte pahn pekederla. Pwehki pwuhko pahn katengetengkipene manaman en Koht, oh kaudiahl me katengetengpene kan pahn mihmihte nan pwuhk ko lao lel ahnsou me Kauno ketin kupwuriki, me re pahn kohda; pwe kilang, re kasalehda soahng kan koaros sangete ni tepin sampah lel ni imwin sampah.

11 Oh rahno pahn kohdo me mahsen akan en pwuhko me katengetengpene pahn wadawada sang pohn ihmw koaros; oh re pahn kin wadawad sang ni manaman en Krais; oh soahng koaros me wiawihongehr aramas akan pahn kasansalohng aramas akan, oh me pahn pil wiawi lao lel imwin sampah.

12 Eri, ni ahnsouo me pwuhko pahn pekederlahng ohl emen me I koasoaiahier, pwuhko pahn wie ekiek sang mwohn mesen sampah, pwe sohte pwoaren mas ehu pahn kilangidi ihte irail meh silimen soun kadehde kan me pahn kilang, sang ni manaman en Koht, likin ih me pwuhko pahn kohieng; oh irail pahn kadehdehki ni mehlel duwen pwuhko oh audepe kan.

13 Oh sohte me pahn iang kilang, ihte ekei me Koht ketin kupwuriki, pwe re en kadehdehki duwen sapwellime mahsen ong aramas akan; pwe Kauno Koht ketin mahsaniher me kadehde kan en me pwoson kan pahn koasoaiwei duwehte sang rehn me melahr akan.

14 Eri, Kauno Koht pahn ketin doula ketikihdo mahsen kan en pwuhko; oh nan ewen soun kadehde tohto me e ketin kupwuriki e pahn ketikihda sapwellime mahsen; oh meid suwediong me pahn kasohwe mahsen en Koht!

15 Ahpw kilang, ahnsou pahn kohdo me Kauno Koht pahn ketin mahsanihong ih me e ketin kadarehng pwuhko: Ale mahsen pwukat me sohte katengetengpene oh kiheng emen, pwe en kasalehiong emen me kak wadek, [oh] ndahieng: Komw menlau wadekehng ie met. Oh me kak wadeko pahn nda: Wahdo pwuhko, I ahpw pahn wadek.

16 Oh met, pwehki kalinganpen sampah oh kepwepwehla me re pahn nda ki met, ahpw kaidehn ong nikalinganpen Koht.

17 Oh ohlo pahn nda: I sohte kak wahdo pwuhko, pwehki e katengetengpene.

18 Eri me ese wadeko pahn nda: I sohte kak wadek.

19 Eri ahnsouo pahn leledo, me Kauno Koht pahn ketin pwurehng ketikihong pwuhko oh mahsen ko ong ih me sehse wadawad; oh ohl me sehse wadawado pahn nda: I sehse wadawad.

20 Kauno Koht ahpw pahn mahsanihong: Me ese wadek sohte pahn wadek, pwe re soikalahr, oh I kak pein wia ei doadoahk; eri ke pahn wadek mahsen akan me I pahn kihong uhk.

21 Dehr doahke soahng kan me katengetengpene, pwe I pahn kapwarehdaahnsou ehu me I pahn koasoanehdi; pwe I pahn kasalehiong aramas akan me I kak pein wia ei doadoahk.

22 Eri, ahnsou me ke pahn neksang wadek mahsen akan me I pahn ketkihong uhk, oh alehdi kadehdehn sounkadehdeh kan me I inoukihong uhk, ke ahpw pahn pwurehng katengepene pwuhko, oh nekidala rehi, pwe I pahn nekidala mahsen akan me ke saik wadek, lao lel ahnsou me I koasoanehdi sang ni ei eripit me e pahn kasansaliong aramas akan soahng kan koaros.

23 Pwe kilang, Ngehi iei Koht; oh Ngehi iei Koht me kin wia doadoahk kapwuriamwei kan; oh I pahn kasalehiong sampah me I duduwehte aio, rahnwet, oh kohkohlahte; oh I sohte kin wia doadoahk ong aramas akan ihte sang ni arail pwoson.

24 Oh pil ahnsouo pahn kohdo me Kauno pahn mahsanihiong ih me pahn wadek mahsen akan me pahn pekederlareh:

25 Ma aramas pwukat pahn karanih ie sang ni arail koasoai, oh arail lokaia kan kin waunekinie ahpw mohngiongirail akan dohsang ie oh arail lemwikin ie kin sang padahk en aramas akan—

26 Eri, I pahn doula oh wia doadoahk kapwuriamwei ehu rehn aramas pwukat, mehlel, doadoahk kapwuriamwei oh lingan ehu, pwe eripit en neirail aramas loalokong oh koahiek kan pahn mwomwala, oh marain en neirail aramas koahiek kan pahn ekiekla.

27 Oh meid suwediong irail akan me kin soang en karirihala arail koasoandi kan sang Kauno! Oh arail doadoahk kan kin mih nan rotorot; oh irail kin nda: Ihs me kak kilang kiht, oh ihs me pahn esei kiht? Oh irail pahn pil nda: Mehlel, ahmw pahn wekidada soahng kan pahn rasohngete pwehl wiahda einpwoat? Ahpw kilang, Kauno Wasa Lapalap ketin mahsanih, I pahn kasalehiong irail me I ese arail doadoahk kan koaros. Pwe mie doadoahk ehu me kak ndahieng ih me wiahda, kaidehn kowe me wiaiehda? De dahme wiawihda kak ndahieng me wiahdao, ke sohte ese dahme ke wiewia?

28 Ahpw kilang, Kauno Wasa Lapalap ketin mahsanih: I pahn kasalehieng aramas akan me mwurin ahnsou kis oh Lepenan pahn wiahla mwetuwel wahn ehu; oh mwetuwel wahno pahn kesempwal duwehte nanwel ehu?

29 Oh ni ahnsouo irail me salengepon kan pahn rongada mahsen en pwuhko, oh pwoaren mesen me maskun kan pahn kilangada wasa sang nan wasa rotorot akan.

30 Oh me mpai kan pahn keirda, oh arail peren pahn pwilisang Kauno, oh me semwehmwe rehn aramas akan pahn perenkihda me Sarawi en Israelo.

31 Pwe nin duwen Kauno e ketin ieias irail pahn kilang me kamasepwehko e pahn sohla katepe, oh me kin kauwe e pahn isihsla, oh kasarehla koaros me kin tetehkete ahnsou en wiahda tiahk suwed;

32 Oh irail me kin karaunlikamwih aramas pwehki ar koasoai, oh kaunopada lidip pwe en lidipiheki me kin kapwungirailla, oh sohte katapaniki mehkot pwung.

33 Eri, Kauno me ketin doarehla Eipram, ketin mahsanih, duwen peneinei en Seikop: Seikop sohte pahn namenekla, de pohn mese ahnsou wet sohte pahn reidi.

34 Ahpw ahnsou me e pahn kilangada nah seri kan, iei doadoahk en nin limei kat reh, re pahn sarawihkihla mwareiet, sarawihkihla Me Sarawi en Seikop, oh pahn masak Koht en Israel.

35 Irail me pil kin salongala nan palingehn pahn esehla wehwehki, oh irail me kin akupwungkan pahn esehla padahk mehlel.