Keriau en Pwuhk en Nihpai

1 Kedekedeo mwurin ngehi, Nihpai, ei kaimwiseklahr ei padahk ong riei ohl oko. Aht pahpao, Lihai, pil koasoaiahieng irail soahng tohto, oh padahkiheng irail, uwen soahng tohto me Kauno ketin kupwurmwahuieki irail ni e ketin kaluhwairail sang nan sahpw en Serusalem.

2 Oh e padahkiheng ira duwen arail kahngohdi nansedo, oh sapwellimen Koht kalahngan me doarehla arail mour, kahrehda arail sohte mwowihdi nansedo.

3 Oh e padahkihong irail duwen sahpw en inouo, me irail sapwenkihla—ia uwen kalahngan en Kauno ni eh ketin kehkehlingkihong kiht sen mweselsang nan sahpw en Serusalem.

4 Pwe, kilang, e koasoaia, I kilangadahr kaudiahl ehu, me kahrehda I esehier me Serusalem kamwomwomwlahr; oh ma kitail mihmihte nan Serusalem kitail uhdahn pahn pil mehla.

5 Ahpw, e koasoaia, mendahte atail kahpwal akan, kitail sapwenkihlahr sahpw en inou ehu, sahpw ehu me wia sahpw kaselel sang sahpw teikan; sahpw ehu me Kauno Koht ketin inoukihong ie me e pahn wia ehu sahpw en sohso ong kadaudokei kan. Ei, Kauno ketin inoukihong ie sahpw wet, oh ong nei seri kan kohkohlahte, oh pil koaros me Kauno pahn ketin kahluwahdo sang nan wehi teikan.

6 Eri, ngehi, Lihai, kohpadahr nin duwen Ngehno eh kin ketin doadoahk loaleiet, me sohte me pahn kohdo nan sahpw wet ihte ma limen Kauno me ketikiniraildo.

7 Eri, sahpwet kasarawihongehr irail akan me e pahn ketikihdo. Oh ma irail pahn papahnin duwen kosonned akan me ketkihong irail, sahpwet pahn wia sahpw en saledek ong irail; eri, irail sohte pahn kin lohdi; ma ehng, a pwehki arail dihp me kahrehda; pwe ma diparail akan pahn mie a sahpwet pahn keriahla pwehki irail, ahpw ong me pwung de mwahu kan e pahn wia sahpw kapai kohkohlahte.

8 Oh kilang, e mwahu ma sahpwet pahn wie ekiek pwe wehi teikan en dehr ese; pwe kilang, wehi tohto pahn sahpwenikihla sahpwet, me pahn kak kahrehda sohla wasahn sohso.

9 Eri, ngehi, Lihai aledier inou ehu, ma aramas akan me Kauno Koht pahn ketikihdo sang nan sahpw Serusalem pahn kapwaiada sapwellime kosonned akan, irail pahn pweida nan sahpwo; oh re pahn tohrohrasang wehi teikan koaruhsie, pwe irail en kak sapwaniki sahpw wet. Oh ma re pahn peikiong sapwellime kosonned akan irail pahn kapaida pohn sahpw wet, oh sohte me pahn kak tiahksuwedihrail, de kihsang sapwarail sahpw en sohsohu; oh irail pahn koukousoan ni onekpek kohkohlahte.

10 Ahpw kilang, ahnsouo pahn leledo me irail pahn pwupwikihdi ar sohte pwoson, mwurin arail alehier kapai laud tohto sang ni limen Kauno—[irail] marainkidahr duwen kepikipikdahn sampah, oh aramas koaros, esehlahr sapwellimen Kauno doadoahk kesempwal oh kapwuriamwei kan sangete ni tapio; manaman kohiengirailehr pwe re en wia mehkoaros sang ni pwoson; re ese kosonned akan koaros sangete ni tapio, oh sang ni sapwellime kalahngan poatoapoat ong nan sahpw en inou kesempwal wet—kilang, I nda, ma rahno pahn lelodo me irail pahn soikala Me Sarawi en Israelo, Mesaia mehlelo, arail Soundoar oh arail Koht, kilang, irail pahn pakadeikada rehn sounkopwung pwungo.

11 Ei, e pahn wahdo ekei wehi kan rehrail, oh e pahn kiheng irail manaman, oh e pahn kihsang irail sapwarail sahpw en sohso kan, oh e pahn kamarakirailpeseng oh kalokeirail.

12 Ei, mahwin pahn wiwiawi mwurin ehu ehu dih kan, oh kilel tohto pahn pwarohng irail; eri, nei pwutak ko, I men kumwail en tamataman; mehlel, I men kumwail en rong mwahu ei kaweid kan.

13 Kumwail menlao pwourda; pwourdahsang amwail meirkelik, ei, sang nan amwail memeir nan ehl, oh itikasang selmete kan me salihkumwailpenehr, me wia selmete kan me kin saliedi aramas akan, me kin waikiraildilahng nan wahu en lokolok soutik oh pahtou poatoapoat.

14 Pwourda! oh kesihnenda sang nan pwehl, oh rong kaweid en amwa pahpa oh nohno me likeilapalahr, me kumwa pahn kereniongehr saripidi nan sousou me kopou oh meleilei, wasa me sohte aramas en seiloak kak pwurasang; mwurinte ahnsou kis I pahn pwuralahng nan pwehl.

15 Ahpw kilang, Kauno ketin doareiehsangehr nan ehl; I kilangehr sapwellime lingan, oh sapwellime limpoak kipeiedier kohkohlahte.

16 Oh I koapworopworki me kumwa pahn tamataman oh kolokol sapwellimen Kauno koasoandi kan oh kosonned akan; kilang, met kapwunode nan ei mour sangete ni tapio.

17 Ekei pak mohngiongiet kin toutoukihla nsensuwed, pwe I periki, engieng en Kauno amwa Koht de kohdi pohmwa ni unsek pwehki keptakai en amwa mohngiong kan, kumwa eri pahn lekidekla oh kasohrala kohkohlahte;

18 De, keria ehu uhdahn pahn kohieng kumwa nan erein dihen aramas ngeder; oh kumwail pahn kin mahwin, oh lelohng nan lehk laud, oh aramas pahn kailokinkumwail, oh tepilo pahn kin sansalih oh kakahluwa kumwail ni nsene.

19 Nei pwutak ko, ele mepwukat sohte kak wiawihong kumwail, ahpw kumwail en wia aramas pilipil oh keniken rehn Kauno. Ahpw kilang, kupwure pahn pweida; pwehki sapwellime koasoandi kan kin pwung kohkohlahte.

20 Oh e mahsaniher me: Nin duwen amwail pahn kin kapwaiada ei kosonned akan kumwail pahn pweida nan sahpwo; ahpw ma kumwail sohte pahn kin kapwaiada ei kosonned akan kumwail pahn lekidekla sang mwohn sihlangi.

21 Oh met palingeni en kak perenikinkumwa, oh ei mohngiong en kak mweselsang sampah ni peren pwehki kumwa, pwe I en dehr seridi nan ei sousou ni nsensuwed oh pahtou, kesihnendahsang nan pwehl, nei pwutak ko, oh wiahla ohl, oh nantihong ahneki lamalam ehu oh mohngiong ehu, ehupene ni mehkoaros, pwe kumwail en dehr wiahla lidu;

22 Pwe kumwa en dehr riahkihla keriah kalok ehu; oh pil, kumwa de kahrehda engieng en Koht pwungo eh pahn kamwomwkumwahla, iei, kamwomwalahn palingehn oh paliwar.

23 Pwourda, nei pwutak kan; pwuhriong nan tehtehn mahwin en pwuhng. Itikasang selmete kan me salihkumwaildier, oh pidohisang nan mour likamw, oh kesihnendahsang nan pwehl.

24 Kumwa tokedihsang amwa kahngohdi ong riamwa pwutak, me kin lamalam mwahu, oh kin peikiong kosonned kan sangete ahnsouo me kitail mweselsang Serusalem; oh me wia dipwisou en doadoahk ni limen Koht, pwe en waikitaildohng nan sahpw en inou; pwe ma sohte ih, kitail mekilahr dupek nan sahpwtehno; ahpw, kumwa song kihsang ah mour; ei, oh e lokolok laud pwehki kumwa.

25 Oh I salohda kowahlap oh perikihda pwehki kumwa, pwe e de pwurehng lokolok; pwe kilang, kumwa kin karaun likamwih me e kin song en ahneki manaman pohmwa oh kaunkumwahda; ahpw I ese me e sohte kin song en ahneki manaman pohmwa oh kaunkumwahda, ahpw e kin rapahki lingan en Koht, oh kamwahupamwa kohkohlahte.

26 Oh kumwa kin lingeringer pwehki e kin koasoi inen ong kumwa. Kumwa kin nda me e kin ngihl kehlail ong kumwa; kumwa kin nda me e lingeringer pahmwa; ahpw kilang, ngihl kehlailo me iei kehlail en manaman en mahsen en Koht, me kin ieiang ih; oh dahme kumwa kahdaneki lingeringer wia koasoi mehlel, nin duwen dahme kohsang rehn Koht, me e sohte kak ekihla, me kin kasalehda ni eimah amwa wiewia suwed kan.

27 Oh e konehng manaman en Kohto en ieiang ih, iei ni ahnsou me e pahn ruwese kumwa en peikiong. Ahpw kilang, kaidehn ih [me ruweseikumwa], ahpw Ngehn en Kauno mwo me kin ketin ieiang ih, me kin ketin kasarapeseng ewe oh ketin kalokaia karehda e sohte kak nennenla.

28 Oh met nei pwutak, Leimen, oh pil Lemuel oh Sam, oh pil nei pwutak kan me wia nein Ishmael, kilang, ma kumwail pahn rong mwahu ahn Nihpai kaweid kan kumwail sohte pahn mwomwala. Oh ma kumwail pahn rong ih mwahu I pahn kihong kumwail kapai, iei, keieu en ei kapai.

29 Ahpw ma kumwail sohte pahn rong ih mwahu I pahn kihsang kumwail keieu en ei kapaio, iei, ei kapaio, oh e pahn uhd kohieng ih.

30 Oh met, Sohram, I men padahkihong uhk: Kilang, ke wia nein Leipen ladu; ahpw, ke pil iang pakahriei sang nan sahpw en Serusalem, oh I ese me ke wia kompoakepah mehlel men ong nei pwutak, Nihpai, kohkohlahte.

31 Eri, pwehki ahmw loalopwoat, kadaudokemw kan pahn kapaida rehn kadaudoke kan, irail pahn paiamwahu ahnsou reirei pohn sahpwet; oh sohte mehkot pahn kawehla de kerempwa arail paiamwahu pohn sahpwet kohkohlahte ihte wiewia suwed nan pwungarail me pahn kahrehda.

32 Eri, ma ke pahn peikiong kosonned akan en Kauno, Kauno pahn kasarawiala sahpwet pwe en wia kapaipen kadaudokemw kan iangahki kadaudoken nei pwutako.