Iralaud 23
Kamwomwomwlahn Papilon e pahn rasohng kamwomwomwlahn ni ahnsou en Ketido Keriauo—E pahn wia rahn en engieng oh kalokolok—Papilon (sampah) pahn pwupwidi kohkohlahte—Karasahiong Aiseia 13. Ele Sounpar 559–545 Mwohn Krais.
1 [Met iei] kahpwal en Papilon, me Aiseia nein Eimwos kilangadahr.
2 Kumwail apihada noumwail pilaik pohn nahna ile, lukuweri irail, oalekinirail pehmwail, pwe irail en kohlongala nan ewen kehl en sohpeidi kan.
3 I ruwesehier nei me kasarawilahr akan, I pil malipehier nei me kehlail kan, pwehki ei engieng sohte mih pohn irail akan me kin wahunki ei lapalap.
4 [Rohng] en ngihl en pokono pohn nahna kan duwehte [ngihlen] aramas kehlail, ngilen mwoarong en wei kan pokopokonpene, Kauno Wasa Lapalap ketin kaukaunopada sapwellime sounpei en mahwen kan.
5 Irail kohdo sang nan sahpw doh kan, sang wasa keieu doh pah lahng, ei, Kauno, oh sapwellime dipwsou en mahwen en eh engieng, pahn kamwomwala sahpwo pwon.
6 Kumwail weriwer, pwe rahn en Kauno leledohr; e pahn kohdo duwehte kamwomwomwla ehu sang me Lapalapo.
7 Eri peh kan koaros pahn mwoatoredi, nan kapehden aramas akan pahn luwetala;
8 Oh irail pahn masepwehkada; irail pahn ahnekdi medek mwuledek oh nsensuwed; irail pahn pwurupwuriamweipene; pohn mesarail akan pahn duwehla lulul en kisiniei kan.
9 Kilang, rahn en Kauno pahn leledo, [rahn] kamasepwehk en kalokolok oh engieng mwuledek, sahpwo pahn tehnla; oh e pahn ketin kamwomwala me dipan akan koaros.
10 Pwe usu kan koaros nanleng pahn sohla lingerail; ketipino pahn rotorot ni eh pahn dakadak, oh maram pahn sohla marain.
11 Oh I pahn kaloke sampah pwehki suwed, oh me suwed akan pwehki arail dipan; I pahn kauhdi aklapalap en pohnmwahso kan, oh kauhdi lemei en aramas kamasepwehng kan.
12 I pahn wiahda aramas en kesempwalasang kohl; iei e pahn kohl en Opihr.
13 Eri, I pahn karerehda nanleng, oh sampah pahn pwupwisang nan dewe, ni rahno me Kauno Wasa Laplap pahn engiengda.
14 E pahn duwehte ahnsou me tie men kin tangasang soun kesik, oh duwehte sihpw me sohte silepe; oh koaros aramas pahn pwuralahng neirail aramas, oh pein sapwarail.
15 Koaros me pohnmwahso pahn dokidi; ei, oh koaros me pahn iangala me suwed akan pahn mehkihla kedlahs.
16 Neirail seri kan pahn kamakam mwohn mesarail akan; pirap pahn wiawiong imwarail akan oh ahngkehlail pahn wiawiong arail pwoud kan.
17 Kilang, I pahn kamwakidada mehn Media kan en uhwong irail, re sohte pahn katapaniki silper oh kohl, de pereniki.
18 Neirail kesik ketieu kan pahn kaskihdi pwutak pwulopwul kan; oh irail sohte pahn poakehla seri pwelel; meserail akan sohte pahn men kamaurala seri kan.
19 Oh Papilon, me wia linganpen wehi kan, me wia kaselelpen mehn Kaldia kan, [e] pahn duwehte ahnsou me Koht kamwomwala mehn Sodom oh Gomorrah.
20 Sohla me pahn men kousoan mwo, oh sohla me pahn mihmi wasahu mwurin dih kei: oh mehn Arepia kan sohte pahn wiahda arail impwal wasao; oh silepen sihpw kan sohte pahn wahla neirail pelen sihpw akan wasao.
21 Ahpw mahn lawalo kan en nan sapwtehn pahn pweidi wasao; oh imwarail akan pahn direkihla mahn kamasepwehk kan; oh lukoht kan me pahn kin kousoan wasao, oh kuht ohl kan pahn kahkahlek wasao.
22 Oh ngilen mahn lawalo kan en pohn deke kan pahn kohsang nan imwarail ihmw tehnla kan, oh dirahken kan sang nan tehnpasarail akan; oh eh ahnsou kerendohr, oh eh rahno sohte pahn kareireila. Pwe I pahn kamwomwala ahnsou mwadang; ei, pwe I pahn mahkohng nei aramas akan, ahpw me suwed kan pahn mehla.