Sapta 3: Lesin 1

Pweng ke Fohlohkihnyuckyak ke Fohnlah luhn Wosasuc luhn Jisus Kraist

Mwet uh E Motko

• Kuh oasr God?

• Ngac puhla fototoi fuhkah nuh sin God?

• Ngac lotwelah fuhkah ma pwacye ke facl fohs se misenge inge?

• Alu uh e kahsreyuc fuhkah?

• Efuh puhslac kain in luhlahlfongi?

• Efuh puhslac ma upac nga puhlakihn?

• Ngac sokwack fuhkah mihs ke pacl upac uh?

• Ngac engan fuhkah?

• Mwet pahluh kahsruh fuhkah facluh misenge?

Ke muhtacwackiyacn facluh, God el ahkuhtweyac wosasuc nuh sin tuhlihk Nahtuhl yurin mwet pahluh. El oruh ma inge sin Wen Nahtuhl, Jisus Kraist. Pacl meet ah, Jisus el ahkahlwemye wosasuc nuh sin mwet pahluh oacna Adam, Noah, Abraham, ac Moses. Tuhsruhk puhs mwet tiacna eis.

Yac tausin luo tari ah, Jisus Kraist el Sifacna luti wosasuc Lal ac akiyac Alu Lal. Mwet uh tiac pac esacl Jisus. Tiac paht tukun misac Lal, puhtatlac na luhlahlp se sikyak ke ma pwacye luhn Leum ac Alu uh. Fohnlahiyen wosasuc ac kuh luhn pristut wacngihnlac fin facluh.

Yac puhs tohkoh, God el pahngon sie pacna mwet pahluh, Joseph Smith. God el fohlohkohnwack fohnlahiyen wosasuc yohrohl ac sang kuh nuh sel in sifwil akiyac Alu luhn Jisus Kraist.

Eis fohnlahiyen wosasuc luhn Jisus Kraist fin facluh el sie mwe insewowo yohk ke pacl lasr misenge. Wosasuc kahsre kuht in topuk kihsensiyuck ma kuht kwacna siyuck uh. Mwet pahluh moul kol kuht ke pacl upac se inge. Kuh luhn pristut luhn God sifwilpac na oasri fin facluh in ahkinsewowoye tuhlihk Nahtuhl.

Kahsruh nuhke Luti

Sifac srihsrihk inge ahkuhtweyac kuhtuh inkacnek ma e kahsruh kom in ahkolah in luti. El oacyacpac nwacnwack kuhtuh kihsensiyuck ac solsol ma kom kuh in orekmakihn.

Ke kom ahkolah in luti uh, pruhe in etuh elyah ac enenuh luhn nguhn luhn kais sie mwet. Sulwaclah lah piac mwe luti wowo se in orekmakihn. Ahkolah in ahkuhtweeyac kahs ma mwet ingacn tiac kahlwem kac. Plwacnelah in wo puhlan pacl kom e orekmakihn, esam in oruh in fototo lesin an.

Orekmakihn ma suhmuhslah ke kom luti an. “Pwelucng ke Wuhlweacng” ke lesin uh nwacnwack mwe rit puhs ma sang kahsruh.

Motko lah kihsensiyuck fuhkah kom e siyuck ke kom luti an. Plwacnelah atacn solsol ma kom e sang ma e pahtok kais sie in ahkfahsrye.

Luksreni ahkahlwemye mwe insewowo God el olwelah, ac akacsruhi luhlahlfongi lom ke ma kom luti.

Meac Kom E Sang Luti Mwet uh ke Miniht 15-25

Sulwaclah sie kuh puhs liki sie mwe luti tahklac inge. Pwelucng ke wuhlweacng nuh ke kais sie mwe luti inge sihmlac tukun ma inge.

God Pa Pahpah Pahkotwen Tuhmasr Inkuhsrao

• God el Pahpah Tuhmasr Inkuhsrao, ac kuht tuhlihk Nahtuhl. El orekuhtlac nuh ke Luhmahl.

• God El etekuht kais sie ac luhngse kuht.

• Mahnol God fokoko, fas ke ikoac ac sri.

• God El luhngse ahkinsewowoyekuht ke mihs ac ke engan luhlahp ne tok ma pahtpaht.

• Ke srihpen God El luhngse kuht, El suhpacma Wen Nahtuhl, Jisus Kraist, in molikuhtlac liki ma koluk ac misac.

God El Ahkahlwemye Wosasuc yurin Mwet Pahluh ke We Nuhkwewa

• God El pahngon mwet pahluh in Aholuhl fin facluh.

• Met, God El pahngon mwet pahluh oacna Adam, Noah, Abrahahm, ac Moses.

• Mwet pahluh moul se eis fwackyuck sin God in luti ac kol misenge.

Orekma ac Iwaclah lal Jisus Kraist Facluh

• Jisus Kraist el Wen nuhtin God.

• Ke orekma lal facluh, Jisus El luti wosasuc Lal ac akiyac Alu Lal.

• Jisus El pahngon Mwet Sap Singucul Luo ac sang nuh selos wal in kol Alu Lal.

• Ke sahflahiyen moul Lal, Jisus el iwaclah ma koluk lasr ke keok Lal imac Gethsemane ac ke pacl se el Srihpsrihpyak. Tukun misac lal Jisus, El sifwil moulyak.

• Ke srihpen kihsaclah muhtahl lal Jisus, kuht kuh in eis nuhnak muhnahs ac ahknwacsnwacsyeyucklac liki ma koluk lasr ac auliyak. Ma se inge use mihs nuh sesr ac oraclah fihsracsr kuht in fohlohk muhta yurin God ac eis engan wacngihn sahflahiyac.

• Ke srihpen Iwaclah lal Jisus, kuht nuhkewa e sifwil moulyak tukun kuht misac. Kalmac pa nguhn ac mahno luhn kais sie mwet e sifwil pac maeni ac tuhkweni ne tok.

Puhtatlac Sac

• Tukun Mwet Sap lal Jisus misac, oasr puhtatlac na upac se ke wosasuc ac Alu luhn Jisus Kraist.

• Ke pacl se inge, mwet uh ekuhlah atacn mwe luti na puhs. Mwet uh oacyacpac ekuhlah akwuck ke pristut, pa nuh ke pacptais. Kuh luhn pristut ac Alu se ma Jisus el akiyac ah wacngihnlac liki facluh.

Fohlohkihnyuckyak Wosasuc luhn Jisus Kraist sel Joseph Smith

• Joseph Smith el suk in etuh lah piac alu pwacye se luhn God ma el kuh in wi uh. Pahpah Inkuhsrao ac Jisus Kraist sikyang nuh Sel ke 1820. Pahngpahng ma se inge Aruhrruhma Se Met.

• God el pahnglol Joseph Smith elan mwet pahluh, oacna ke El pahngon mwet pahluh ke pacl meet ah.

• Wosasuc luhn Jisus Kraist sifwilpac fohlohkyak sel Joseph Smith.

• Mwet in tuhtahf inkuhsrao sahyac fohlohkohnwack pristut, ac ituckyang kuh nuh sel Joseph in akiyac Alu luhn Jisus Kraist.

• Jisus Kraist el tahfwelah in kol Alu Lal misenge yurin mwet pahluh ac mwet sap.

Puk luhn Mormon: Sie Wuhlweacng kacl Jisus Kraist

• Puk luhn Mormon el puk se ke ma suhmuhslah muhtahl sihmlac ke pacl meet ah sin mwet pahluh fin acn Macrike. Joseph Smith el luhngaslah ke mwe sang ac kuh luhn God.

• Wi Bible ah, Puk luhn Mormon fahkwack pac ke orekma, luti, ac kuhlwacnsap luhn Jisus lah El pa Mwet Lahngo.

• Kuht kuh in fototoeni nuh sin God ke kuht riti Puk luhn Mormon ac moulkihn mwe luti kac.

• Kuht kuh in etuh lah Puk luhn Mormon el kahs luhn God ke kuht riti, nuhnkuh kac, ac pruhe kac. Ohiyac se inge kuh pac in kahsre kuht in etuh lah Joseph Smith el mwet pahluh se.

Pruhe in Etuh ma Pwacye yurin Nguhn Muhtahl

• Pruhe el inkacnek in asramsrami inmahsrlon God ac tuhlihk Nahtuhl.

• Fin insacneang in pruhe, kuht kuh in etuh pweng ke Fohlohkyak ke wosasuc luhn Jisus Kraist lah pwacye.

• Ke kuht pruhe, Nguhn Muhtahl luti ac ahkkweye ma pwacye nuh sesr.

Kihsen Siyuck ma Kom Kuh in Siyuck sin Mwet

Kihsensiyuck tahklac ten inge kuhtuh kihsensiyuck ma kom kuh in siyuck sin mwet. Kihsensiyuck inge kuh in kahsrekom in oasr kalmen sramsram lom ac in kahlwem ke enenuh ac elyah luhn mwet se.

• Meac kom etuh kacl God?

• Fototo lom nuh sin God uh kahsrekom fuhkah?

• Meac kom etuh kacl Jisus Kraist? Moul ac luti Lal ahkkweyekom fuhkah?

• Kom sokwack fuhkah top in kahsrekom ke facl fohs se misenge inge?

• Kom e eis kahsruh fuhkah kom fin etuh lah oasr mwet pahluh moul se fin facluh misenge?

• Kuh kom lohng tari ke Puk luhn Mormon? Kuht kuh in elakihn lah efuh yohk srihpac?

• Kom kuh in akacsruhi etuh lom ke pruhe? Kuht kuh in akacsruhi etuh lasr ke pruhe?

Solsol ma Kom Kuh in Sang

• Kom kuh in siyuck sin God ke pruhe in kahsre kom in etuh lah ma kuht luti kom inge pwacye? (Liye “Mwe Nuhnak ke Luti: Pruhe” ke ma sahflah ke lesin se inge.)

• Kom kuh in wi kuht alu ke Sacnri se inge in etuh yohk ke ma kuht luti kom inge?

• Kom kuh in riti Puk luhn Mormon ac pruhe kac in etuh lah kahs luhn God? (Sahp kom kuh in orekmakihn kuhtuh sapta kuh fuhs ah.)

• Kom kuh in ukwe srihkasrak lal Jisus ac pacptaislac? (Liye “Solsol in Pactpaislac ac Ahkkweyeyucklac,” ma tuhkuh tukun lesin se inge.)

• Kuht kuh in oraclah sie pacl ah in sifwil fohlohk tok?

Mwe Luti ke Pwelucng

Ip se inge nwacnwack mwe luti ac ma suhmuhslah nuh sum in lutlutkihn in ahkkweye etacack ac luhlahlfongi lom ke wosasuc ac kahsrekom in luti.

God Pa Pahpah Pahkotwen Tuhmasr Inkuhsrao

God pa Pahpah tuhmasr Inkuhsrao, ac kuht tuhlihk Nahtuhl. El orekluhtlac nuh ke Luhmahl. Mahnol God fokoko, fas ke ikoac ac sri oacna mwet uh” (Doctrine and Covenants 130:22).

God El etekuht kais sie, ac El luhngse kuht yohk liki na kuht etuh uh. El kahlwem ke ma upac, ahsor, ac muhnahs lasr, ac El ahkolah in kahsrekuht ke kuht sun ma inge. El engan ke kapwack lasr ac e kasre kuht in oraclah sulwaclah pwacye. El ke sramsram nuh sesr, ac kuht kuh in sramsram nuh Sel ke pruhe.

God El use nuh sesr atac se inge fin facluh kuht in lutlut kac, kapwack, ac in kuh in oacna El. Ke luhngse pwacye suwohs, El kena kuht in fohlohk nuh Yohrohl tukun kuht misac. Tuhsruhktuh, kuht tiac kuh in sifacna oruh ma inge. Ke srihpen God El luhngse kuht, El supacma Wen Nahtuhl, Jisus Kraist, in molikuhtlac. “Tuh God El lungse faclu ouinge; El ase Wen sefanna natul, … ke srhipacl facluh fah moliyucklac” (John 3:16–17).

God El luhngse ahkinsewowoyekuht ke mihs ac in sesseslah ke engan ma wacngihn sahflahiyac. El oraclah plwacn se suc use inkacnek kuht in eis mwe insewowo inge. Pahngpahng plwacn se inge Plwacn in Molwelah (liye lesin 2).

Luhlahlfongi ke God

Lotwelah lah mwet se kom luti inge luhlahlfongi ke God. Inkaiyen mwet uh luhlahlfongi ke Mwet Fuhlwact se tuh puhs kain in nuhnak ke ohiyacn God. Tuhsruhkuht, puhs mwet tiac etuh atacn God.

Luo misineri ke Puk luhn Mormon, Ammon ac Aaron, luti mwet tena Christian kuh tiac etuh ke God. Elos luti ma pwacye fihsracsr ac ngihsre mwet inge in pruhe. Ma sikyack kac an pa, Lamoni ac pahpah tuhmacl elos eklac. Lutlutkihn Alma 18:24–40 ac 22:4–23. Na topuklah kihsen siyuck ten inge:

• Meac misineri inge luti ke atacn God?

• Kom e ukwe fuhkah srihkasrak lalos?

In eis yohk etuh kac, liye “Luti Mwet Ma Tiacna Christian Wacngihn etuh Lalos ke Wosasuc]” ke sapta 10.

Lutlutkihn Ma Suhmuhslah

• 1 Nephi 17:36

• Mosiah 4:9

• 3 Nephi 14:9–11

• Liye Doctrine and Covenants 93:29; 130:22

• Liye Moses 1:39

• Liye Abraham 3:25

• Orekma 17:27–29

• Rome 8:16

• Hebrew 12:9

• Genesis 1:26–27

Luti Yohk ke Ip Yohk Se Inge

• Kolyuck nuh ke Ma Suhmuhslah: “Pahpah Inkuhsrao,” “God, Sifac ke God”

• Sifac ke Wosasuc: “Sifac ke God”

God El Ahkahlwemye Wosasuc yurin Mwet Pahluh ke We Nuhkewa

Mwet Pahluh elos Ahol God fin Facluh

Sie inkacnek yohk srihpac ma God el ahkahlwemye luhngse Lal nuh sesr pa El pahngon mwet pahluh, sang nuh selos kuh luhn pristut, ac moklwelos in sramsram Aholuhl. Mwet pahluh elos ahol God fin facluh. Mwet pahluh Amos ke Wuhlweacng Mahtuh el suhmuhslah lah “Leum God Fulat el tiac ku in oru kutena ma el fin tia akkalemye meet nuh sin mwet kulansap lal, mwet palu” (Amos 3:7). Kuhtuh mwe insewowo ma kuht eis yurin mwet pahluh moul ma tahklac ten inge.

Mwet Lohoh ke Jisus Kraist Mwet pahluh elos mwet lohoho srihyucklac kacl Jisus Kraist, fahkwack Kacl lah El pa Mwet Lahngo ac Mwet in Molwelah lasr.

Mwe Luti. Mwet pahluh elos eis kolyuck sin God in kahsre kuht sulwaclah ma pwacye liki tiac pwacye. Elos luti kuht in ahkos masap luhn God ac in auliyak ke kuht puhtatlac uh. Elos ahkahlwemye kahlwem ma koluk uh ac sensenkackihnkuht liki ma e sikyak kac uh.

Mwe luti luhn mwet pahluh sruhkuhtyak nuh yurin God ac kasre kuht in eis mwe insewowo El kena nuh sesr uh. Kuht sef na upac fin kuht ukwe kahs luhn Leum el sang nuh sin mwet pahluh Lal.

Kuh luhn Pristut. Mwet pahluh moul se pa sruok kol pristut fin facluh. Pristut uh pa wal ac kuh luhn God. Oasr kuh sin mwet pahluh in sramsram ac oruh ma ke inen God in molwelah tuhlihk Nahtuhl inge.

Kolyuck luhn Alu. Alu luhn Jisus Kraist muhsahiyuckyak ke pwelucng luhn mwet pahluh ac mwet sap (liye Ephesus 2:19–20; 4:11–14).

Mwet Pahluh ke Pacl Met ah

Adam el pa mwet pahluh se emet facluh. God el ahkahlwemye wosasuc luhn Jisus Kraist nuh sel ac sang kuh luhn pristut. Adam ac Eve luti tuhlihk nahtuhlos ke ma pwacye inge ac ahkkweyaclos in muhsahi luhlahlfongi lalos ac moulkihn wosasuc.

Mwe pahkomuhta fihl nahtuhl Adam ac Eve puhtatlac ac forlah liki wosasuc. Pahngpahng ma se inge forlah liki ma pwacye, kuh puhtatlac. Ke puhs mwet forlah liki ma pwacye, God El eislah kuh luhn pristut Lal, suc pa kuh in sang luti ac ahkfahsrye akwuck ke wosasuc.

Puhslac kain in forlah liki ma pwacye kuh puhtatlac se inge sihmlac ke Wuhlweacng Mahtuh. In tilokihnyac ma inge, God El som nuh yurin tuhlihk Nahtuhl ac pahgon mwet pahluh sasuc se. El ahkahlwemye ma pwacye ke wosasuc nuh sin mwet pahluh inge ac sang nuh selos kuh luhn pristut. Kuhtuh sin mwet pahluh inge pa Noah, Abraham, ac Moses. Mwe ahsor, kain ohiyac se pacna ma sikyak met ah, mwet inge tiac eis mwet pahluh inge ac elos som liki.

Mwe Nuhnak ke Luti

Mwet Pahluh

Eis etack sin mwet se kom luti ingacn lah meac el etuh ke mwet pahluh. Mwet ke kain in facsin elos luhlahlfongi lah mwet muhtahl kuh moklweyuck uh elos eis kain in mwe kolyuck kuh mwe luti se sin God. Tuhsruhktuh, tiac mwet moklweyuck inge nohfohn elos mwet pahluh luhn God.

Ahkuhtweyac lah tukun kais sie puhtatlac kuh forlah liki ma pwacye inge. God El fohlohkohnwack wosasuc sin mwet pahluh se. El sang nuh sin mwet pahluh se ingacn kuh luhn pristut. Mwet pahluh kahsruh mwet uh in etuh ke kuhpahsr lalos nuh sin God, weacng pacna lah elos e eis fuhkah moul ma pahtpaht ke wosasuc luhn Jisus Kraist.

Fihl in Pacl

Fihl ke wosasuc luhn Jisus Kraist el puhlan pacl se ma oasr mwet kuhlwacnsap se srihsrngiyucki sin Leum fin facluh in sruok ki luhn pristut. Plwacn in molwelah luhn Pahpah Inkuhsrao ahkahlwemyeyuck sasuc ac oacna sie nuh ke fihl nuhkewa.

Puhslac kain in fihl ke wosasuc. Adam, Enoch, Noah, Abraham, Moses, Jisus Kraist, Joseph Smith, ac kuhtuh sahyac kol fihl inge. Fihl se ma muhtacwack kacl Joseph Smith ah etweyuck muh “fihl in fohnlah luhn pacl” (Ephesus 1:10). Liye Bible Dictionary, “Dispensations,” ac Mwe Kolyuck nuh ke Ma Suhmuhslah, “Fihl in Pacl.”

Lutlutkihn Ma Suhmuhslah

• Jacob 4:4, 6

• Mosiah 8:13–18

• Liye Doctrine and Covenants 1:37–38

• Luke 1:68–70

• Orekma 10:34–43

• Ephesus 4:11–14

• Amos 3:7

Luti Yohk ke Ip Yohk Se Inge

• Mwe Kol nuh ke Ma Suhmuhslah: “Mwet Pahluh”

• Sifac ke Wosasuc: “Mwet Pahluh,” “Fohlohkyak luhn Wosasuc”

Luti ac Iwaclah lal Jisus Kraist Facluh

Jisus Kraist pa Wen nuhtin God. Jisus ac Iwaclah Lal yohk srihpac nuh ke plwacn luhn God nuh sesr. Iwaclah lal nwacnwack keok Lal in Imac Gethsemane, keok ac misac Lal ke sahksin soko ah, ac Sifwilpac Moulyak Lal.

Ke pacl se lal Adam ac Eve ah, mwet uh elos tuhpan tuhkuh luhn Jisus Kraist in pa Mwet Lahngo ac Mwet in Molwelah lalos. Pahpah Inkuhsra El suhpaclma Jisus nuh facluh ke yac 2,000 somlah ah.

Jisus Kraist El moulkihn sie moul suwohs, nwacsnwacs. El luti wosasuc Lal ac akiyac Alu Lal. El pahngon Mwet Sap singucul luo ac sang nuh selos kuh luhn pristut elos in luti ac oruh akwuck muhtahl, suc pa nuh ke pacptais. El oacyacpac sang nuh selos wal in kol Alu lal.

Ke sahflahiyacn moul Lal, Jisus el misac ke ma koluk lasr ke El keok Gethsemane ac ke Srihpsrihpyak El ah. Ke srihpen kihsackuhnlah muhtahl lal Jisus, kuht kuh in nwacsnwacslah liki ma koluk lasr ke kuht auliyak uh. Ohiyac se inge ahkfihsracsryelah kuht in fohlohk weluhl God muhta ac eis engan ne tok.

Tukun uniyucki Jisus ah, El sifwil moulyak, eis kuhtanglah liki misac ke kuh lal Pahpah Inkuhsrao. Ke srihpen Sifwil Moulyak luhn Jisus, kuht nuhkewa e sifwil moulyak tukun kuht misac. Kalmac pa nguhn ac monun kais sie mwet e sifwil fohlohkeni, ac kais sie sie e muhta ne tok ma pahtpaht ke moul fas se, mahno sifwil moulyak se. (Liye “Iwaclah lal Jisus Kraist” ke lesin ahk 2.)

Mwet pahluh Joseph Smith el luti: “Mwe luti yohk srihpac ke luhlahlfongi lasr pa fahkwack luhlahlfongi luhn Mwet Sap ac Mwet Pahluh, kacl Jisus Kraist, muh El misac, pihkihnyucki, ac sifilpac moulyak ke lwen se ahktolu, ac sowack nuh lucng; ac ma nuh kwewa sahyac suc ma ke luhlahlfongi lasr uh ma na weacng” (Teachings of Presidents of the Church: Joseph Smith [2007], 49).

Lutlutkihn Ma Suhmuhslah

• 2 Nephi 2:6–8; 9:1–24; 31

• Alma 7:11–13; 11:40; 34:8–10

• 3 Nephi 11:31–41; 27:1–22

• Doctrine and Covenants 19:15–19; 45:3–5

• John 3:16–17

• Sie Corinth 15:1–4, 20–22

• Sie John 1:7

Luti Yohk ke Ip Yohk Se Inge

• Mwe Kolyuck nuh ke Ma Suhmuhslah: “Jisus Kraist,” “Iwe, Iwaclah”

• Bible Dictionary: “Atonement”

• Sifac ke Wosasuc: “Jisus Kraist,” “Iwaclah luhn Jisus Kraist”

Puhtatlac Sac

Tukun misac lal Jisus Kraist, Mwet Sap Lal suk in sruokyac na mwe pwacye luhn Kraist ac in ahkfahsrye na suwohos ke Alu uh. Tuhsruhktuh, puhs mempucrs ke Alu uh forlah liki Mwet Sap ac mwe luti ma Jisus El luti ah.

Tukun Mwet Sap inge uniyucki, puhtatlac na upac se ke wosasuc luhn Jisus Kraist osraclihk acn uh. Puhtatlac se inge pahngpahng Forlah liki Ma Pwacye. Ke srihpen ma se inge, God el eslah kuh luhn pristut Lal liki facluh. Alal lah se inge nwacnwack pacna kuh in kol Alu uh. Sahflahiyac ah, Alu se ma Jisus El muhsaheack ah wacngihnlac liki facluh.

Ke pacl se inge, mwet uh ekuhlah kain in luti ke wosasuc. Inkayen ma etweyuck ke atac pwacye luhn Pahpah Inkuhsraok, Jisus Kraist, ac Nguhn Muhtahl wacngihnlac kuh tuhlac. Mwet uh oacyacpac ekuhlah akwuck ke pristut, pa nuh ke pacptais.

Yac puhs tok, mukul ac muhtwacn wowo elos srihke in fohlohkohnwack mwe luti ac atac ma eklac inge Elos suk kahlwem yohk ke nguhn, ac kuhtuh selos sruhmuhn enenuh se nuh ke fohlohkyak luhn ma pwacye. Kampare lalos kohlah oraclah kain in luhlahlfongi puhs.

Pacl se inge oruh yohkwelihk sukohsohk in alu, suc ikacslah inkacnek se in fohlohkwack ma pwacye ac kuh luhn God.

Mwet pahluh ac mwet sap elos tuh sruhmuhn puhtatlac se inge (liye Luo Thessalonica 2:1–3). Elos oacyacpac sruhmuhn lah wosasuc ac Alu luhn Jisus Kraist e fohlohkyak nuh fin facluh (liye Orekma 3:20–21). Fin wacngihn forlah kuh puhtatlac se inge, fohlohkyak se inge e tiac enenweyuck.

Mwe Luti Loac: Puhtatlac Sac

Luti puhtatlac se inge nuh sin mwet uh ke etuh fal se ma elos enenuh ac kahlwem kac. Kahsrelos in kahlwem ke enenuh ke Fohlohkyak luhn wosasuc luhn Jisus Kraist.

Ip Yohk Kom Enenuh in Luti

• Inkaiyen mwet uh sruhnga Jisus Kraist ac Mwet Sap Lal (liye Matthew 24:9; 1 Nephi 11:32–34; 2 Nephi 27:5). Tukun misac luhn Mwet Sap, pristut tuhlac liki facluh. Wacngihnlac kuh in pacptais ac kol Alu uh.

• Roman Empire, suc el pa emet sruhnga mwet Christian, tohkoh orekmakihn Christianity. Kihsensiyuck yohk srihpac ke luhlahlfongi tohuyak akuhkuhinkihnyuck liki na fwackyuck sin God. Wuhlweacng ac akwuck amacinkihnyuck ac ikihlyucklac in fal nuh ke etuh luhn facluh. Kain in luhlahlfongi, kuh kahs in etuh, oreklac wiwina sulwaclah luhn u in mwet (liye Joseph Smith—History 1:19).

• Kuhtuh mwet ah srihke in ekuhlah Christianity ke elos ahkpwacyei ma oasr tari. Tuhsruhktuh, ke srihpen wacngihn kuh luhn God fin facluh, kuh in fohlohkuhnwack ma pwacye tiac enenweyuck in akiyac Alu luhn Jisus Kraist.

Lutlutkihn Ma Suhmuhslah

• 2 Nephi 28

• Matthew 24:9–11

• Orekma 20:28–30

• Galatia 1:6–9

• Luo Thessalonica 2:1–12 (Joseph Smith Translation, fuhs 2, 3, 7–9)

• Luo Timothy 4:3–4

• Luo Peter 2:1–2

• Amos 8:11–12

Luti Yohk ke Ip Yohk Se Inge

• Mwe Kol nuh ke Ma Suhmuhslah: “Forlah liki Ma Pwacye”

• Topical Guide: “Apostasy of the Early Christian Church”

• Sifac ke Wosasuc: “Forlah liki Ma Pwacyey”

Fohlohkihnyuckyak luhn Wosasuc luhn Jisus Kraist sel Joseph Smith

Aruhrruhma se met ac Pahng nuh sel Joseph Smith elan Mwet Pahluh

Ke puhlan pacl se ma wacngihn fohnlahiyen wosasuc fin facluh, Pahpah Inkuhsrao el sikalweni na in liye tuhlihk Nahtuhl. Pacl nuhkewa, El ahkolah inkacnek tuh elos in kuh in sifwil ahkinsewowoyeyuck ke fohnlahiyen wosasuc Lal. Ke pacl uh wo ac fal, El pahnglol Joseph Smith elan mwet pahluh suc ke wosasuc ac Alu luhn Jisus Kraist fohlohkyak.

Joseph Smith el muhta kuhtuhlacp iyacn acn Macrike ke pacl se ma puhs kain in luhlahlfongi sikyak. Mempucrs ke sucu lal elos etuh kacl God ac suk ma pwacye. Puhslac alu fahk lah ma pwacye oasr yohrohlos, ac Joseph el kena etuh lah piac selos fal pwacye (liye Joseph Smith—History 1:18). Pwacpuhl uh luti lah “oasr Leum sefanna, lulalfongi sefanna, baptais sefanna” (Ephesus 4:5). Ke Joseph el wi kain in alu, el fohsack lah piac ma elac welah uh. Tok el fahk:

“Oasr tari fohs yohk ac akuhkuhin inmahsrlon kain in u uh, ma oruh upac nuh sin mwet fuhsr se nga inge…in otwelah lah suc pwacye ac suc stuhuh uh. …

“Ke infulwen mweun ke kahs ac fohswack in sulwaclah inge, nga kwacna siyuck sihk sifacna: Meac enenuh in orek uh? Piac sin u inge pwacye; kuh, nohfohn tuhkweni suhtuhuh? Fin sie selos pwacye, piac kac, ac nga kuh in etuh fuhkah?” (Joseph Smith—Sramsram Mahtuh 1:8, 10).

Oacna mwet puhs, oasr kihsen siyuck lal Joseph Smith ke moul ma pahtpaht ac ke moul lal. El kena tuh ma koluk lal in ahknwacsnwacsyeyucklac ac elan eis nuhnak muhnahs ye muhtuhn God. El etuh lah wacngihn etwacack yohrohl, oruh el ukwe fahk se in Pwacpuhl muh, “Fin oasr suwos suc wacngihn etwacack yohroh, lwelah elan siyuck sin God, suc sang nuh sin mwet nuh kwewa sukohsohk, ac tiac sruh; ac fah ituckyang” (James 1:5

Ke srihpen pohloh kahs se inge, Joseph el sulwaclah in siyuck sin God lah meac el enenuh in oruh. Ke spring 1820, el som nuh in acn puhslac sahk kac sisken lohm sel ac sikuck muhtuhnte pruhe. Oasr ip ahkosr ma tuhkuh ke aruhrruhma se inge, sihmlac sel Joseph Smith kuh ke ma suhmuhslah ye kolyuck lal (liye Gospel Topics Essays, “First Vision Accounts”). Ma sikyak oreklac nuh ke ma suhmuhslah, el ahkuhtweyac ma el puhla sun ohinge:

“Nga liye koan kahlwem soko suwohsi fin sifuck, yohk liki kahlwem luhn faht uh, suc puhtati kahkahsrihki ne ke na srweyucwi. … Ke kahlwem sac srweyucwi ac nga liye Mwet luo, suc kahlwemiyac ac wolacnaiyac ah ahluhkwelah ma kuh in ahkuhtweyucki kac uh, tulac lucng likiyuc ke yen engyeng uh. Sie selos sramsram nuh sihk, pahngon inek ac fahk, srihsrngiyac mwet se sahyac ah—Pa inge Wen Kuloh Nuhtihk uh. Prongel!” (Joseph Smith—History 1:16–17).

Ke Aruhrruhma se inge, God Pahpah ac Wen Nahtuhl, Jisus Kraist, sikyang nuh sel Joseph Smith. Mwet Lahngo El fahk nuh sel elan tiac wi oacna sie luhlahlfongi.

Sie pac ma sikyak ke aruhrruhma se inge, Joseph el akacsruhi lah Mwet Lahngo el fahk nuh sel: “Nuhnak muhnahs ma koluk lom. … Liye, Nga pa Leum luhn wolacna. Nga tuh acnwucki ke srihpen facluh, tuh mwet nuhkwewa suc luhlahlfongi ke Inek fah eis moul ma pahtpaht.”

Tukun aruhrruhma se inge, Joseph el nuhnkuh, “Nguhnihk seseslah ke luhngse, ac ke lwen puhs nga kuh in kaksak ke engan luhlahp ac Leum el wiyuc” (Joseph Smith History, circa Summer 1832, 3, josephsmithpapers.org; spacl ac atacn kahs inge ahksasucyeyucklac).

Ke aruhrruhma se inge, Joseph Smith el sie mwet lohoh lal Jisus Kraist ac lotwelah ma yohk srihpac pwacye ke Godhead[Sifac ke God]. Pa nuh ke, el lotwelah lah Pahpah Inkuhsrao ac Jisus Kraist mahno luo. Ke Elos pahnglol ke inel, el lotwelah lah Elos etacl na pwacye. Ke fwackyuck nuh sel Joseph muh el eis nuhnak muhnahs, el lotwelah lah God el pahkotwen. Ohiyac se el puhla sun inge nwackuhlah ke engan.

Oacna ke God el oruh nuh sin mwet pahluh puhs meet, El pahnglol Joseph Smith elan mwet pahluh se ma srihpacl fohnlahiyen wosasuc e sifwil fohlohkyak nuh facluh. Fohlohkyak se inge e kahsruh tuhlihk nuhtin God in sokwack engan ke moul se inge ac moul ma pahtpaht ke facl se tok—ma nuhkwewa tuhkuh kacl Jisus Kraist.

Kaliyac Joseph Smith—Sramsram Mahtuh 1:16–17

Kaliyac ahkuhtweyac lal Josehp Smith ke el liye Pahpah ac Wen (Joseph Smith—Sramsram Mahtuh 1:16–17). Ahkolah pacl nuhkwewa in ahkuhtweyac Aruhrruhma se Met orekmakihn kahs lal Joseph sifacna. Fahkwack ma kom etuh ke pwacyeiac ac efuh yohk srihpac nuh sum.

Fohlohkyak luhn Pristut ac Pristut Ki

Tukun sikyak lal Pahpah ac Wen, mwet tuhtahf pac sahyac inkuhsrao suhpweyuckme nuh yohrohl Joseph ac mwet in kahsruh se lal Oliver Cowdery. John the Baptist el sikyak pac ac sang Aaronic Pristut ac ki ah nuh selos. Aaronic Pristut pa wal ma kuh in pacptais.

Tiac paht tohkoh, Peter, James, ac John—tolu Mwet Sap weluhl Kraist ah—sikyak atacn mwet ac sang Melchizedek Pristut ac ki kac ah nuh sel Joseph Smith ac Oliver Cowdery. Pristut inge oacna kuh se pacna ma Kraist El sang nuh sin Mwet Sap lal ah met.

Ke Tempuhl Kirtland, Moses, Elias, ac Elijah sikyang nuh sel Joseph Smith ac Oliver Cowdery ac sang nuh selos pac kuh ac pristut ki ma ahkfahsrye orekma luhn God ke lwen sahflah. Moses el akmuhsraelah ki in oracni Israel. Elias el akmuhsraelah fihl ke wosasuc lal Abraham. Elijah el akmuhsraelah ki ke kuh luhn sil. (Liye Doctrine and Covenants 110:11–16; liye pac General Handbook, 3.1.)

U ke Alu uh

Kolyuck Joseph Smith elan sifwil akiyac Alu luhn Jisus Kraist fin facluh. Kacl, Jisus Kraist El sifil pahngon Mwet Sap Singucul Luo.

Mwet pahluh ke pacpuhl in pacl met luhma pacl ma kuht oasr kac inge muh lwen sahflah kuh pacl sahflah. Pacl se meet liki Tuhkuh Ahkluo luhn Jisus Kraist. Pa srihpac se oruh Alu uh pahngpahng Alu luhn Jisus Kraist luhn Mwet Luhlahlfongi ke Lwen-sahflah (liye Doctrine and Covenants 115:3–4; liye pac 3 Nephi 27:3–8).

Mwet Pahluh ac Mwet Sap Moul Misenge

Oacna ke Jisus el pahngon Mwet Sap ke pacl El moul fin facluh in kol Alu Lal, El oacyacpac pahngon Mwet Sap in kol misenge. Prestuhnsi Se Met ac U luhn Mwet Sap Singucul Luo elos pa mwet pahluh, mwet liyacten, ac mwet eis fwackyuck.

Mwet Sap se ma mahtuh ememt ah pa mwet pahluh ke srihpen el pa lie ma nuhkwewa ke Alu uh ac el sriyucklac in sramsram ahol Leum. El pa mwet se solac in kol tahfwelah Joseph Smith. El ac Mwet Sap ingena inge orekmakihn kuh lalos kacl Jisus Kraist ye sucl fokoko se ma nwacnwack akwuck muhtacwacack ke pacl se Joseph Smith el akmuhsralah ye kohkoh luhn mwet sap inkuhsrao.

Lutlutkihn Ma Suhmuhslah

• 2 Nephi 3

• 3 Nephi 27:3–8

• Liye Doctrine and Covenants 27:12–13; 112:30–32; 115:4

• Joseph Smith—Sramsram Mahtuh 1:68–72

• Orekma 3:19–22

• Ephesus 4:5

• James 1:5

Luti Yohk ke Ip Yohk Se Inge

• Me Kolyuck nuh ke Ma Suhmuhslah: “Fohlohkyak luhn Wosasuc”

• “Fohlohkihnyuckyak ke Fohnlah luhn Wosasuc luhn Jisus Kraist: Sie Mwe Fahkwack in Ahkfuhlwactye Yac Ahk Lofoko nuh fin Facluh”

• Sifac ke Wosasuc: “Fohlohkyak luhn Alu,” “Fohlohkyak luhn Pristut”

Puk luhn Mormon: Sie Wuhlweacng kacl Jisus Kraist

Puk luhn Mormon pa ma suhmuhslah mahtuh muhtahl ma oacna Bible uh. Bible el sie lohoh kal Jisus Kraist, ac Puk luhn Mormon el mwe lohoh ahkluo ke orekma Lal, luti Lal, ac kunohkohn Lal ekihn Mwet Lahngo lasr.

Joseph Smith el kolyuck sin mwet tuhtahf inkuhsrao se inel pa Moroni nuh ke inging se ma ma sihmlac mahtuh inge pihkihnyucki an yac puhs we. Ma sihmsihyucklac inge, afyucflac ke plet gold se (osra), nwacnwack sihm luhn mwet pahluh ke kolyuck luhn God nuh sin kuhtuh mwet met muhta fin acn Macrike. Joseph Smith el luhngaslah ma sihmihsyucklac inge ke mwe sang ac kuh luhn God.

Mwet pahluh ke Puk luhn Mormon elos etuh ke kunohkohn lal Jisus Kraist ac luti wosasuc Lal. Tukun Jisus el sifwilpac moulyak, El sikyang nuh mwet inge ac lotwelah sifacna. El lotwelos ac akiyac Alu Lal.

Puk luhn Mormon kahsre kuht in fototoeni nuh sin God ke kuht luti, kahlwem kac, ac orekmakihn mwe luti kac inge. Mwet Pahluh Joseph Smith el fahk lah “mukul [kuh muhtwacn] ac kuh in fototoyang nuh sin God ke el muhta na ke mwe luti [ke puk] se inge, liki na kuhwena puk sahyac” (Teachings: Joseph Smith, 64).

In etuh lah Puk luhn Mormon el kahs luhn God, kuht enenuh in riti, motko kac, ac pruhe kac. Mwet pahluh ke Puk luhn Mormon palyei lah God elac ahkahlwemye ma pwacye lal ke puk se inge nuh sesr ke kuht pruhe ke inse pwacye, kena in etuh na pwacye,, ac luhlahlfongi Kraist (liye Moroni 10:3–5). Lutlut ke Puk luhn Mormon yohk srihpac in sang kuhtanglah sramsram inmahsrlon mwet.

Ke kuht riti Puk luhn Mormon ac pruhe kac, kuht e etwaclah ma pwacye kacl Jisus Kraist ma e ahkinsewowoye moul lasr. Kuht e oacyacpac etaclah lah Joseph Smith el mwet pahluh se luhn God ac wosasuc luhn Jisus Kraist fohlohkihnyuckyak sel.

“Nga olwelah lah ke kowos lutlutkihn ac pruhe lwen nuh kwewa, ke Puk luhn Mormon, kowos ac oruh sulaclah wo likina—lwen nuh kwewa. Nga olwelah ke kowos motko ma kowos lutlutkihn, winto inkuhsrao fah ikacklah, ac kowos ac eis top nuh ke kihsen siyuck lowos ac kolyuck ke moul sifacna lowos. Nga olwelah lah ke kowos eiskowosyang nuh ke Puk luhn Mormon, kowos kuh in kohsrkohsrlah liki ma koluk ke lwen sacn” (Russell M. Nelson, “The Book of Mormon: What Would Your Life Be Like without It?” Liahona, Nohfuhmpuh. 2017, 62–63).

Mwe Nuhnak ke Luti

Ahkuhtweyac pacl se Emet Puk luhn Mormon nuh sin Mwet

Ke kom ahkuhtweyac Puk luhn Mormon nuh sin mwet, ahkuhtweyac lah ma sihmlac muhtahl sin God nuh sin kuhtuh mwet fin acn Macrike puhs liki na yac tausin. Kuht kuh in kapsra ma ingacn ac orekmakihn misenge.

Ahkuhtweyac lah srihpac luhn Puk luhn Mormon pa in fahk nuh sin mwet nuhkwewa lah Jisus pa Kraist (liye Sifen Sra). Oacna ke tahfuhn sifac sacn fahk, puk se inge el “siepac wuhlweacng ke Jisus Kraist.” Olwelah nuh sin mwet uh lah elos kuh in etuh yohk kacl Mwet Lahngo elos fin riti.

Ke kom kihte Puk luhn Mormon nuh sin mwet, fahk nuh selos kuh luhn nguhn ma kom puhla kac uh. Akacsruhi sie kuh luo sramsram kuh kahs loac ingacn ma oasr srihpac nuh sum ac nuh selos. Ke pacl kom lutlut sifacna kuh wi kampacnion lom an, Nguhn e kahsre kom sokwack fuhs ma e kahsruh ac ahkkweye mwet sahyac.

Ahkkweye mwet ingacn in riti Puk luhn Mormon lwen nuhkwewa. Ke elos riti ac kapsra orekma mwe luti loac ingacn, elos e ahkinsewowoyeyuck ac puhla fototoi nuh sin God.

Puk luhn Mormon Ahkpwacyei Ma Pwacye ke Fohlohkyak

Kom kuh in orekmakihn kain in kahs inge in kahsruh mwet in kahlwem lah Puk luhn Mormon ahkpwacyei Fohlohkyak luhn wosasuc luhn Jisus Kraist.

“Puk luhn Mormon el sie pac inkacnek God el ahkahlwemye nuh sihk ke ma pwacye ke ma kuht fahk inge. Kom kuh in nuhnak muhnahs riti paragraph luo sahflah ke acn se ma Ikucslah ke puk se ingacn?”

Ahkuhtweyac kalmen kais sie mwe luti ke kewana paragraph ingacn. Suli elos kom luti ingacn in riti ma sihmlac ke Puk luhn Mormon ac kapsra mwe luti ke paragraph luo inge. Ke elos puhla nguhn ac ma pwacye ke Puk luhn Mormon, elos kuh in etuh lah Joseph Smith el mwet pahluh luhn God.

Lutlutkihn Ma Suhmuhslah

• Sifen sra puk ke Puk luhn Mormon

• Ikucslah nuh ke Puk luhn Mormon, paragraph 1–7

• Moroni 10:4–5

• Liye Doctrine and Covenants 1:17–23; 20:1–12

• Joseph Smith—Sramsram Mahtuh 1:27–62

Luti Yohk ke Ip Yohk Se Inge

• Mwe Kolyuck nuh ke ma Suhmuhslah: “Puk luhn Mormon”

• Sifac ke Wosasuc: “Puk luhn Mormon”

Pruhe in Etuh Ma Pwacye yurin Nguhn Muhtahl

Ke srihpen God pa Pahpah tuhmasr, El kuh in kahsre kuht in etuh ke ma pwacye. Kuht kuh in etuh lah pweng ke Fohlohkyak luhn wosasuc luhn Jisus Kraist pwacye ke kuht riti Puk luhn Mormon ac pruhe nuh sin God. Ke kuht pruhe ke luhlahlfongi ac ke inse pwacye, El ac topuk siyuck lasr ac kol moul lasr.

God El kwacna topuk pruhe lasr uh yurin Nguhn Muhtahl. Ke kuht pruhe, Nguhn Muhtahl luti ac ahkpwacyei ke ma pwacye. Akohnohki nuh sin Nguhn Muhtahl kuh na fokoko se. Elos kwacna tuhkuh puhla na mihs se ke ma pwacye nuh ke ma kuht puhla, nuhnkacsr, ac etuh lasr (liyeSie Tokosra 19:11–12; Helaman 5:30; Doctrine and Covenants 8:2).

Sikwaleni lutlutkihn ma suhmuhslah (yohk na Puk luhn Mormon), wi sacracmacn miting ke wik nuhkwewa, ac pruhe ke inse pwacye kahsre kuht in puhla kuh se ke Nguhn Muhtahl ac in sokwack ma pwacye.

Mwe Nuhnak ke Luti

Pruhe

Oacna Joseph Smith, puhs mwet suk top ke siyuck yohk srihpac ac in puhla fototo nuh sin God. Ahkacsruhi lah pruhe kahsre kom fuhkah in puhla fototoi nuh sin God. Akacsruhi lah kom eis fuhkah top ac kolyuck ke kom lutlutkihn ma suhmuhslah ac pruhe.

Ahkuhtweyac lah pruhe el inkwacnek se inmahsrlom mwet ac God. Suli mwet kom luti ingacn in siyuck sin God ke kahsruh ac kolyuck. Suli mwet ingacn in pruhe el sie solsol yohk srihpac ma kom enenuh in ngihsre. Ke elos eis top, elos e etaclah lah elos tuhlihk luhngseyuck nuhtin God ac Elac kahsrelos.

Puhs sin mwet kom luti inge e tiac etuh pruhe. Ma wowo se in kahsrelos in lotwelah pruhe ac ikacslah mwe insewowo ke pruhe nuh ke moul lalos. Pruhe el pa inkacnek se use lohoh nuh sesr ke ma pwacye luhn nguhn.

Luti mwe uh atacn pruhe ke ip ekahsr ten inge:

• Ikacslah pahngon Pahpah Inkuhsrao.

• Sruhmuhn ma kom nuhnkuh insiom, pa nuh ke in kaksak ke mwe insewowo kom eis.

• Kihsen siyuck, suk kahsruh, ac siyuck ke mwe insewowo kom enenuh.

• Ahksahfye kaliyac “Ke inen Jisus Kraist, amen.”

Suli mwet in pruhe ke elos riti Puk luhn Mormon in kahsrelos in etuh lah puk se ingacn kahs luhn God ac fahkwack kacl Jisus Kraist.

Pacl se luti mwet uh in pruhe, orekmakihn kahs fihsrwacsr elos in kuh in orekmakihn pac ke elos pruhe. Oruh in fototo pruhe ingacn.

Suli mwet se kom luti ingacn in kaliyac pruhe ke sahflahiyen lesin lowos an. Fahkwack lah God El lohng ac topuk pruhe lasr.

Inse Pwacye

Kalmen riti ke inse pwacye pa oasr kena se in kapsra mwe luti ingacn ac orekmakihn ke moul lom an. Kalmen pruhe ke inse pwacye pa in oasr kena sie in oruh top ma eis yurin God.

Lutlutkihn Ma Suhmuhslah

• Moroni 10:3–5

• Alma 5:45–46

• Liye Doctrine and Covenants 8:2–3

• John 14:26

• Ikacslah ke Puk luhn Mormon, paragraph 8–9

Luti Yohk ke Ip Yohk Se Inge

• Mwe Kol luhn Ma Suhmuhslah: “Pruhe”

• Bible Dictionary: “Pruhe”

• Sifac ke Wosasuc: “Pruhe”

Outline ke Mwe Luti Fototo nuh ke Ma na Fal se

Outline se ten inge atac se ma kom kuh in luti nuh sin mwet fin kihtin pacl na pa oasr yurum uh. Fin orekmakihn outline se inge, sulwaclah sie kuh puhs mwe luti kom in orekmakihn. Pwelucng ke ma pwacye ke kais sie mwe luti inge oreklac tari oasr ke lesin met ingacn.

Ke kom luti an, siyuck kihsen siyuck ac lihpsre. Oruh nguhsr kuh solsol ma e kahsruh mwet ingacn in lotwelah in puhla fototoi nuh sin God. Sie solsol kuh nguhsr yohk srihpac ah pa ngac komtacl e sifwil ohsun uh. Lusen lesin se ingacn e fahsr fal nuh ke kihsensiyuck ma kom siyuck ac puhlan pacl kom lihpsre an.

Meac Kom E Sang Luti Mwet ke Mihniht 3-10

• God pa Pahpah tuhmasr Inkuhsrao, ac El luhmwekuhtlac ke Luhmahl sifacna. El etwekuht kais sie ac luhngse kuht. El ke ahkinsewowoyekuht ke mihs ac engan ne tok ma wacngihn sahflahiyac.

• Jisus Kraist pa Wen nuhtin God. Orekma lal pa in oraclah in fihsrwacsr nuh sesr in nwacsnwacslah liki ma koluk lasr, kuhtanglah misac, ac eis moul ma pahtpaht.

• God el pahngon mwet pahluh in Aholuhl fin facluh. Met, El pahngon mwet pahluh pa Adam, Noah, Abrahahm, ac Moses. Mwet pahluh moul se eis fwackyuck sin God in luti ac kol kuht misenge.

• Ke moul in kuhlwacnsap lal Jisus facluh, El akiyac Alu Lal. Tukun Mwet Sap lal Jisus misac, oasr puhtatlac na upac se ke wosasuc ac Alu luhn Jisus Kraist. Mwet uh ekuhlah mwe luti puhs ke wosasuc ac kuh ke pristut, pa nuh ke pacptais.

• God El pahnglol Joseph Smith elan mwet pahluh, oacna ke El pahngon mwet pahluh in pacl met ah. Pahpah Inkuhsrao ac Jisus Kraist sikyang nuh sel. Wosasuc luhn Jisus Kraist sifwil fohlohkyak ke srihpacl.

• Puk luhn Mormon el sie pac puk ke ma suhmuhslah. Oacna Bible ah, el sie pac wuhlweacng kacl Jisus Kraist ac kahsre kuht in fototoeni nuh sin God ke kuht riti ac kapsra mwe luti kac. Joseph Smith el luhngaslah ke mwe sang ac kuh luhn God.

• Fin kuht sang insiacsr in pruhe, kuht kuh in sramsram sel God. Kuht kuh in etuh lah pweng ke Fohlohkyak luhn wosasuc luhn Jisus Kraist pwacye.