Guruy Ni 3: Lesson 3

Fare Gospel ku Yesus Kristus

Gidii’ Era Un Lemnag

• Mini’ ii Yesus Kristus? Urgon rayog Ninge awuyweg neg nge tabinaw rog?

• Mang ea be yip fan ninge yog ea mich rog ngak Yesus Kristus? Urgon ni mich rog ngaak ea ra’i tow’athiy yeg?

• Mang ea be yip fan ni ngan kalngan’?

• Urgon rayog ninggu thamiy ea gapas rok Got nge n’agfan napan ku rin’ binean nib kireb?

• Mang fan ni yima tawfe?

• Mang ea tow’ath ko fare Kan ni Thothup?

• Mang ea be yip fan ko athamgil nge mada’ ko tomur?

Fare gospal ku Yesus Kristus ea iraram ragon rayog ningad chichigur gad ngak Yesus. Rib moem rogon ya kemus ko bitir ma bea nangfan. Biney ea machib ea bea weliy mornga’agen Yesus, bay riy ni mornga’agen ea michmich ngak Jesus Kristus, man’agfan, tawfe, tow’ath ko fare Kan Ni Thothup, nge athamgil nge mada’ ko tomuran ea ran. Ma kabay riy ni mornga’agen urogon ni fare gospal ea ii tow’athiy fapi bitir ku Got.

Fare bugi thin gospal ea be yipfan ea “n’en nib mangil.” Fare gospal ku Yesus Kristus ea mangil ni bochan ea ma pi’ ma’arngegen a tin rib ga’fan—thin nib yul’yul—rib tu’uf ni ngad chichigur gad Ngak (muguy ko 1 Nephi 15:14). Fare gospel ea ma fil ngodad ko rogon ni ninge mangil ea par rodad. Mangil ea koth ko mornga’agen ea gospal ni bochan ea ma pii’ rogon ni ngad na’agedfan ea denen rodad nga yog ni ngad suled ngak Got.

Tomilang ko Tin Yibe Fil: Fare Gospel ku Yesus Kristus nge Machib rok Kristus

Fare gospal ku Yesus Kristus ea bay gubin binean’ riy ni rib ga’ fan ko motochiyel ni ba tu’uf ko yofas rodad, gam’ing, machib, motochiyal, nge ma’ nifan e thap nge pug ngalang rodad.

Fare gospal era ayuweg ea yofas rodad, me pii’ ngodad urngin gelngin Yesus Kristus. Gadadra muruliy rogon ea mich rodad ngak, ni fa’anra gad kalngan’ gad, migad tawfe, me yog fare tow’ath ko Kan Ni Thothup, migdad athamgil nga mada’ ko tomur (muguy ko Articles of Faith 1:4).

Ran’e ea kabwoed ea gam’ing rok Kristus. Machib ea rayog ninge awuyegdad ngad thap gad ngak Kristus (mugu’uu 1 Nephi 15:14). Pin’ey ni rib ga’fan ea kun weliy u lan Fare Babiyor Ku Mormon (muguy ko 2 Nephi 31; 32:1–6; 3 Nephi 11:31–40; 27:13–22). Fan romed ni ngam ayuweg ea gidii’ ngarbad ngak Kristus.

muguy ko rogon fapi Chep nib Thothup, “Gospal,” “Doctrine ku Kristus”; topic ko gospal, “Gospal.”

Rogon Nrayag ni Ngan Machib Nag

Giney ea ra pii’ ea ayuw ngom ko rogon ni ngam sensey. Bea pii’ rogon ea kanawo’ ko duwer nge rogon ii pining girdii’.

Garam faleag rogon ea kanawo’ ni ngam sensay ma gara yabiliy ea girdii’ nge yofas rorad. Lamnag ko urrogon nib fal’rogon ni ngam ayuwegrad. Fal’aggin rogon ii weliy rogon boech a thin ni rayog ni fa’anra dabra ninged fan. Gonopiy rogon ea time rom, dampatalin ngi ngam ngochngoch nag ea lesson roem.

Me’leg reb ea chep nib thothup ngam fil ea thin riy. Fare ”deaf ko machib” bay nib bo’or rogon ea thin u lan fare babiyor nib thothup nira awuyegney.

Lamnag ko binngan ea duwer ea ngam fith napan nigbe sensey. Pii’ ea athamgil nga laniyean’ ea girdii.’

Mu weliy nib fal’rogon ea tow’ath ku Got, mag weliy rogon ea mich rom ko tin nigbe machib nag.

Pi’nen Nrayag ni Ngam Machib Nag ngak Bea’ ko 15—25 Minut

Fek ta’areb fa boech ko tin ni ngam fil. Fare deaf ko gam’ing ea bay uroe’ ko machib nikan pii’ ko outline.

Fare Muruwel nib Thothup ku Yesus Kristus

• Got ea kea pii’ fak, ni Yesus Kristus, nga fayleng ninge na’agfan ea denen rodad ma’i tabiyuuliy dad napan gadra yim’.

• Ni Bochan ea yam’ ku Yesus, rayog ninge ma’ ea denen rodad ni fa’anra gadra kalngan’.

• Napan ni yim’ Yesus, me sul biyay ea yofas rok. Bachan ea fas ko yam Rok, gadad gubin ea gadadra fos biyay u tomuran ni kad ma’ad. Biney ea bea yip’ fan ni ya’al nga doway ea ra sul nga ta’abang, magad par nib fel’ rogon ea par rodad ko manemus.

Mich ngak Yesus Kristus

• Mich ea bin ni so’omon ea gam’ing rok fare gospal ku Yesus Kristus.

• Mich ngak Yesus Kristus ea bea yip fan ninge pagan’uy ngak ni Ir ea fare Pagal ni Fak Got nge somoel, tabiyuuliy rodad.

• Mich ngak Yesus Kristus ea ir ea gam’ing ko ngonglandad nge gelngindad.

• Ra gel ea mich rodad ni fa’anra gadra maybil, magad bi’eg fare chep nib thothup, migdad laked ea machib ku Got.

Kalngan’uy

• Mich ngak Yesus Kristus ea ma powi’iy dad ngad kalngan’ gad. Kalngan’uy ea bea yip fan ningad sap gad ngak Got migdad chuw ko denen. Napan’ ni gadra kal’nganuy, mea rogon ea mithmith nge tafiney rodad ea ra thil nge woed ngak Got.

• Got ea ra na’agfan ea denen rodad ni fa’anra kad kalngan’ gad uu fathik ea yul’yul’. Rayog ea mana’ag’fan ni bochan Yesus Kristus ea kea yim’ ni fan ko denen rodad.

• Napan ni gadra kalngan’ migdad thamiy ea gapas.

• Kalngan’uy ea binean ni yima rin’ nib nu’un napan. Got ea bea pining dad ni gubin ngiyal’ ni gadra kalngan.’ Dabi patlin nag dad.

Tawfe: Bin So’omon ea Michmicheg Rodad ngak Got

• Tawfe ea bin sommon e michmicheg dad ko thaaq rodad ngak Got.

• Tawfe ea bay l’agrow yang riy: Tawfe ko raan nge tawfe ko Kan Ni Thothup. Napan ni gadra tawfe ngan mu’ min micheg nag dad, ra ma’ ea denen rodad magdad tabab ko reb ea yofas nib bi’ech.

• Ran tawfe nag dad ni woed rogon Yesus Kristus.

• Bitir ea dabni tawfe nag rad nge mada’ ko meeruuk ea duw rorad. Bitir ni ra yim’ u mo’on ko duw rorad ea bay ii fasag nag ii Yesus Kristus.

• Gadma fek ea sacrament ko gubin ea week ni ngu’ud lamniged ea ma’ rodad ngak Got.

Fare Tow’ath ko Kan ni Thothup

• Fare kan Thothup e bin dalip e pigchalpen Got.

• Napan ni yira tawfe nigem, mea yog fare tow’ath ko Kan ni Thothup ngoem ni kan nog e gam’ing nge micheg nag ngak nga’.

• Napan gadad ra thapeged fare tawa’ath ko Kan Ni Thothup, ra’i un ngodad ko gin ngu’ud darad nga’ ni fa’anra fal’ ea mich rodad.

• Fare Kan Ni Thothup ea bea pow’iy dad ma bea ayuweg dad ngad nanged ea tin ni rib riyul.’

Athamgil nge mada’ ko Tomur

• Athamgil nga mada’ ko tomur ea mich ngak Kristus ko gubin ea ran. Ta’ fan ea pii ma’ roemew Got, kalngan’, sap nag ea puluw ko Kan Ni Thothup.

• Gadad ra laek Yesus Kristus, ma an Ga’ ea ra micheg nag ngodad ni ra fal’ ea yofas rodad nge manemus.

Fare Gospal Ku Yesus Kristus era Tow’ath Nag Gubin ea Bitir ku Got

• Gadad ra laek ea gospal ma ra’i ayuweg dad ngad fal’falean gad ma ayuweg dad ko yofas rodad.

• Gadad ra falfalean—woed la’agrow ni ta’abea’ fa tabinaw—napan ni gad ra par ko yilean ea motochoyil ku Yesus Kristus.

• U Fathik ea gospal ku Yesus Kristus, tabinaw ea kan tow’ath nag ko biney ea yofas nge bin magid u po’owchan Got.

Duwer Nrayog ni Ngam fith ko Gidii’

Tin baray ea duwer ea yalen ko rogon ni rayog ni ngam fith ko girdii’. Tiney ea duwer ea ra awuyeg nem ngam thin gad a girdii’ nib fel’ rogon.

• Mang ea gamnang ni morngaʼagen Yesus Kristus?

• Mang ea bea yip fan ni nge yog ea mich rodad ngak Yesus Kristus?

• Mang ea gaba’adag ni ngam thilyeg ko yofas rom?

• Mang ea tafiney roem ko kalnganuy?

• Mang ea tafiney roem ko tawfe? Mang ea rayog ni ngam rin’ ea chiney ni ngam ngongliy rogom u mo’on ngam tawfe?

• Urgon fare Kan ni Thothup ni ra ayuweg nem ngam sul ngak Got?

• Mang ea tin nib mo’omaw ni gur nge tabinaw rom ea gamed bea yan u fathik? Urgon nrayog ningad filed boech ea rogon ni gospal ku Yesus Kristus era ii pii’ ea ayuw?

Rogon Ningam Pining ea Gidii’

• Rayog ni ngam maybil ngam fith ngak ea an Ga’ ko tin ni kad filed ea ba riyul’? (muguy ko “Tomilang ko tin yibe fil: Maybil” Ba’ ko tomur ko section 1.)

• Rayog ni ngam un’ ko misa ko biney ea sandey ngayog ni ngam nang fan boech ea ma’arngegen ea tin ni gadad bea weliy?

• Rayog ni ngam bi’eg ea Babiyor Ku Mormon mag maybil ngam fith ngak ea an Ga’ ko tin rib riyiul’ fa danga’.? (Rayog ni ngam mog ngorad ea tin ngan ea pugruy fa verse ea rayog ni ngan use nag.)

• Garam leak kanowngin’ Yesus ngam tawfe? (Muguy ko “Fare Mulwol ko Tawfe nge Thapeg e Thothup,” ni’ir e bay ko lesson 1.)

• Rayog ni ngad fileg neew reb ea time nkug sul biyey?

Yalen e Deaf ko Machib

Biney ea guruy ea gara fil ma’arngegen a machib nge babiyor ni thothup nge yog ninge awuyeg nem ko mich rom napan nigbe fil fare gospal ngak ea girdii’.

Fare Muruwel nib Thothup ku Yesus Kristus

Got Ni Chitamangdad Nu Tharmiy ea pii’ fak, ni Yesus Kristus, nga fayleng ninge ayuweg dad nge yog reb ea yofas ngodad nib feal’ nge manemus. ”Irara’ fare gospal, … ni (Yesus Kristus) ea yib nga fayleng … ninge manna’agfan ea denen ko fayleng, mea bi’ech nag nge chuweg ma’amngin ea tagan rii’; kemus ni biroeq ea kanawo’ ea ra’ii awuyweg dad rii’.” (Doctrine nge Covenants 76:40–42).

Gadad e gidii, e gadaed gubin ni gadaed ma denen, ma gadaed gubin ni gadaedra yim’. Denen nge yam’ era tilaag dad ko yofas nib manemus machine fa’anra bay Got nge fak rodad ma ra thil ea gubin (muguy ko 2 Nephi 9). Somo’on ni Got ea fal’agin ea fayleng me me’eleg fak Yesus Kristus nge biyuuliy dad. Rib ga’ bugwon era adag rok nem, ni fol Yesus nge yib nga fayleng nge rin’ ea tin kan nog ngak. Kea fal’egin rogon ninge ma’ ea denen rodad, mea dugliy rogon ko tinra buch napan gadra fas ko yam’.

Yesus Kristus ea dariy ea denen rok. Tomur ko ran’ rok u roey, me yim’ u dakean ea mil’ay u Gethsemane napan nin kuruth nag (muguy ko 1 Nephi 11:33). Bo’or ea amith ni ta’ Yesus ’ni athim ni rib gel, ma ii yib ea racha’ ko gubin yang u doew” (Doctrine nge Covenants 19:18) Yesus ea sul ea yofas rok napan ni kuruth nag, meab gelngin nib gel ko yam’. Gubin uu ta’abang, mea tini buchbuch ni bo’or ngiyal ea falngin ea yam’ ni ta’ Yesus Kristus.

Denen rodad ea dabi bi’ech nag dad, ma ”Tini da’ani bi’ech ea da’abi par u to’obean Got.” (1 Nephi 10:21). Ma kun ta’areb nga’, ma bay ea motochiyal ni rib tu’uf ya bay ea tin tagan nra buch ni fa’anra un denen.

Miligach rok Yesus ea kea pii’ kanowa’en ea rogon ni ngad bi’ech gad napan ni gadad ra kalngan’. Maki pii rogon ni nge falagin ea tomalngin rogon a gubin (muguy ko Alma 42:15, 23–24). Ii yog Yesus, ”Gag … kug wan u fathik gubin ea pine’ ni fan ko gubin ea girdii,’ ni dabi mo’moew ngarod ni fa’anra yadra kal’ngan’; ma fa’anra dabra kal’ngan gad ma yadra gafgow ni rib gel” (Doctrine and Covenants 19:16–17). Fa’ani da’ani mo’ rok Yesus Kristus, ma denen ea radabi pii’ ea athamgil ko yofas ngak ii Got ni Chitamangdad u ta’abang.

Napan ni pii’ Ir ngan lii’, Yesus ea da’ani chuweg ea pufmato’owan dad ni ngad rin’ed ea birodad ea murwel. Ba tu’uf ni nge mich u wun’dad ngak, ngad kalngan’ gad, migad athamgil ngan ta’ fan ea motochiyal rok. Gadadra kal’ngan, ma Yesus era yog ea thin nib mangil ni fan ngodad ngak ea Chitamngin. (muguy ko Moroni 7:27–28). Bochan ea tin kea rin’ Yesus, Got ni Chitamangdad ea ra na’agfan ea denen rodad, nge ma’nag ea kireb uu rongrongdad. (muguy ko Mosiah 15:7–9). Ra ya’al rodad ea ra bi’ech ma royog ni ngad suled ngak ea an Ga.’

Kanowa’en Yesus era yog ninge ayuweg dad napan ni gad ra yim’. Ni bochan ea kea Yim’ kea fas, gadad ea kagadra yim’ ngad fas gad. Biney ea bea yip’ fan ni ya’al nga doway ea ra sul nga ta’abang, magad par nib fel’ rogon ea par rodad ko manemus. Fa’ani da’ani mo’ rok Yesus Kristus, yam’ ea radabi pii’ ea athamgil ko yofas ngak ii Got ni Chitamangdad u ta’abang.

Chep nib Thothup ni Ngan Fil

Got e ke Pii’ Fak

• Alma 11:40

• John 3:16–17

Wo’en e yafos ni manemus u dakean Yesus Kristus

• 2 Nephi 2:6–8; 9:21–24

• Alma 34:8–9, 14–16

• Moroni 7:27–28

• Doctrine and Covenants 45:3–5

• 1 Korinth 15:20–22

Fil Boech Marunga’agen ere Machib Ney

• “Kristus nib fas”

• Mugu’ rogon fapi chep nib thothup: “Yesus Kristus”

• Topic ko Gospel: ”Yesus Kristus”

Mich ngak Yesus Kristus

Bin So’omon ea machib ko gospal ea mich ngak fare pilung Yesus Kristus. Mich ea deaf ko gubin ea ga’ming ko gaspal.

Mich ngak Yesus Kristus ea ba tu’uf ea michan’uy ni kemus ni go’ir ea Fak Got Ni Pagal. Bay a mich ngak ni ra’ir ea Somoel nge taabiyuul—biroek ea kanawo’ ea rayog ni ngad suled ngak ea an Ga’ (muguy ko Acts 4:10–12; Mosiah 3:17; 4:6–8). Kan pining dad ni ngad murwel niged ”ea mich rodad ngak, ngad nanged ni ra’ir ea rayog ninge cha’ariy dad. (2 Nephi 31:19).

Mich ngak Yesus Kristus ea ngad nanged ni kea amith ea gafgow nge miligach rok. Ni bochan ea fan ko Miligach rok, rayog ni ngad bi’ech man biyuuliy dad ni fa’anra gadra kalngan’. Ra’un par ni yib bi’ech ra’i pii ea gapas nge athamgil ko biney ea yofas. Ma ra ayuweg dad ngad pat gad ko fal’falan napan ni gad ra yim’.

Mich ngak Yesus Kristus ea bea yip fan ni kemus ni Ir, ea ra fasag nag dad napan ni gad ra yim’. Rea mich ney era ii ayuweg nge pii’ ea gapas ko ran nib mo’omow rodad. Ma fare kirbaen’ ko yam’ era thil ni bachan fare micheg ko fare Foskoyam’.

Mich ngak Yesus Kristus ea bay riy ni nibe yog ninge michuwun’ dad ni Iir ea kea fek nga dakean ea denen nga gafgow rodad (muguy ko Isaiah 53:3–5. Ir nge murnguy rok ea manang ko urgon ninge ayuweg dad u fathik ea gafgow rodad. (muguy ko Alma 7:11–12; Doctrine and Covenants 122:8). Gadra muruliy ea mich rodad, ma Ir ea ra ayuweg dad u fathik ea gafgow.

Mich rodad Ngak, Yesus era fasog nag dad ko doew nge ya’al rodad. Kea par ningea ayuweg dad ”sap ngog ko gubin ea tafiney roem; dam patlin ma damurus” (Doctrine and Covenant 6:36).

Machib ko Gagyoeg nge Gelngin

Mich ngak Yesus Kristus ma powi’iy ngongolan dad. Gadma dag ea wo’en ea murwel rodad ni fa’anra gadad bea fol ko pii motochiyal ma gadad bea man gil ko gubin ea ran. kalngan’ gad ko denen rodad. Migdad yul’yul’ Ngak. Migdad athamgil ngad ta’abrogon Rok.

Migdad murwel nag ea mich rodad ngak, migdad thamiy ea gelngin Yesus u lane yofas rodad. Ra pii’ gelngin ea athamgil rodad. Ra ayuweg dad ngad palag gad ko tin nib kireb.

Gelnag e Mich Rodad

Fare profet Alma ea ii fil ni mich rodad ea rayog ni ninge tabab ”ko adag ninge mich u wun’ dad”(Alma 32:27). Rogon ninge mo’onog ea mich rodad, ea gadra tugluy ea rogon ea thin, nge tin yibe fil, nge fol ko fapi motochiyal. Alma ea ii fil ni ngad soen gad, magdad chuguluy ea thin ku Got u gumircha’an dad, ”ra yib laknginriy [mea woed] ea gak’iy ni manemus”–mea pii’ gelngin ea mich rodad (Alma 32:41; muguy ko fapi guruy ko 26–43).

Chep nib Thothup ni Ngan Fil

Mich, Gelngin, nge Wo’en e Thap

• 1 Nephi 7:12

• 2 Nephi 9:23; 25:23

• Moroni 7:33–34; 10:7

Fare Gam’ing ko Mich

• Alma 32

• Ephesians 2:8

Fapi Rogon ea Mich

• Ether 12

• Hebrews 11

Murwel nge Fol

• 1 Nephi 3:7

• Doctrine and Covenants 130:20–21

• James 2:17–26

Mich nge Kalngan’

• Alma 34

Fil Boech Marunga’agen e Biney e Machib

• Rogon fapi chep nib thothup: “Yesus Kristus,” “Bayul, Bayul,” “Mich”

• Bible Dictionary: “Mich”

• Gospel Topics: “Yesus Kristus,” “Bayul ku Yesus Kristus,” “Mich ngak Yesus Kristus”

Kalngan’uy

Mang e Kalngan’uy?

Kalngan ea bin la’agrow ea machib ko fare gospal. Mich nge adag rodad ngak Yesus Kristus era awuyeg dad ngad suled ngak (muguy ko Helaman 14:13). Kalngan’uy ea bea yip fan ningad sap gad ngak Got migdad chuw ko denen. Napan’ ni gadra kal’nganuy, mea rogon ea mithmith nge tafiney rodad ea ra thil nge woed ngak Got. Na’agfan ea denen rodad ea kea moem nag Yesus Kristus ko bochan fare miligach rok ni ta’.

Kalngan’uy ea gathi kemus ni ngad thiliyegned papngin dad ngad gel gad ko mo’owar rodad. Kalngan’uy ea ribe yip fan ni ngad sap gad ngak Kristus, nira pii’ gelngin dad ngad ’thil’ gad u lan gumircha’en dad (Alma 5:12–14). Gadad ra yan uu fathik ea pine’ mara ii thil gumircha’en dad (muguy ko Mosiah 27:24).

Napan ni gadad ra kalngan mea thil ea rogon ea sap rodad ku Got nge sap rodad ngodad nge fayleng. Gadad ra thamiy ea adag rok Got ko bitir ni fak—nge adag ko walagdad Somoel. Kalngan’uy ea kea pii’ Got ngodad u fathik Fak Ni Pagal ninge pii’ ea tin nib mangil nga lane yofas rodad.

Rogon ni ngan Kalngan’

Napan ni gadad ra kalngan, migad thamiy ea kirbean’ so’omon. Doegned ku Got ea denen rodad migad ning ea man’agfan ngak. Ma kagdad ra yoeg ea denen rodad ko bishop ko galasia nge yog ninge ayuweg dad napan gadad ra kalngan’. Gadra rin’ ea birodad ea murwel ngad filagned ea tin tagan ni kad rined nge thil papngin dad. Fa’anra karim kalngan’um ma ra ii dag u rogon ea papngin ea ngongal rom nib nu’n napan.

Kalngan’uy ea ba tu’uf ni ngan rin’ ni gubin ea ran. ”Piicha’an ni yadma denen, ea dabi guuy falngin Got.” (Roma 3:23). Tafnayem ni ngam kalngan’ ko gubin ea ran ”Rayog ni ngad rin’ed bo’or binean rok Kristus nibe pii’ gelngin dad”(Filippians 4:13). Kari micheg Got ngodad ni ”fa’anra gadra kalngan ma ra na’agfan ea denen rodad”(Mosiah 26:30).

Tow’ath ko Kalngan’uy

Kalngan’uy ea machib nima pii’ ea fal’falean nge gapas. Ma pii’ ngodad “ea gelngin fare tabiyuuliy, ko rogon wo’en yalen e yafos ni manemus ni fan ko ya’al [rodad]” (Helaman 5:11).

Napan ni gadra kalngan’, ma dabi nu’uw napan’ mea chuw ea denen rodad. Gadad ra thamiy ea Kan ni Thothup ni rib almarin. Me gelnag ea adag rodad ngak Got migad laek.

”Bo’or ea girdii’ ni mea leamnag ni Kalngan’uy ea woed ea geechig—binean ni dabni sap nga’. … Machane biney e leam e ke yib rok Mo’oniyan’. ”Bea gay rogon ninge tilagdad ngad sap gad ngak Yesus Kristus, nibe sakiy nibe pii’ pa’ ngodad, nibe adag ninge fasag, mea na’agfan, mea pii’ gelngin, nge chuweg ea kireb rodad” (Russell M. Nelson, “We Can Do Better and Be Better,” Liahona, May 2019, 67).

Chep nib Thothup ni Ngan Fil

Kalngan’uy

• Alma 34:8–17; 36:6–21

• Doctrine and Covenants 18:10–13; 58:42–43; 61:2

• 2 Korinth 7:9–10

Bayul nge Ma’anagfan

• Helaman 5:10–11

Murnguy Ko Piicha’an nima kalngan’

• Alma 12:32–34; 42:13, 21–24

Fil Boech Marunga’agen ere Machib ney

• Rogon fapi Chep nib Thothup: ”Kalngan, Kalngan’uy,” ”Bayul, Bayul”

• Bible Dictionary, “Kalngan’uy

• General Handbook, 32.1

• Topic ko Gospel: ”Kalngan’uy,” ”Bayul ku Yesus Kristus”

Tawfe: Bin So’omon ea Michmicheg Rodad ngak Got.

Mich ngak Yesus Kristus nge Kalngan’uy era fal’egrogoy ko gam’ing ko tawfe nge micheg ngak. Tawfe ea bin so’omon ea gam’ing ko gospal rok Yesus Kristus. Gam’ing era pii’ ea athamgil ko bin so’omon ea machib nigadra micheg ngak Got.

Gam’ing ea ngongol nib thothup ni ma rrin’ e pi’cha’an nibay matwon fare priesthood rorad. Boech ea pi gam’ing, ni woed ea tawfe, ea riba tu’uf ko wo’en yalen e yafos ni manimus rodad.

Fathik ea pi gam’ing ea rayog ni ngad thil ea ma’ rodad ngak Got. Pii ma’ ney ea rib thothup ni micheg Got u thil dad. Kea micheg nag ni ra’i yibley dad. Rib tu’uf ningad dugliyed ea tin nikad micheg niged ngak Got.

Got ea kea pii kanowa’an ea gam’ing nge ma’ ninge ayuweg dad ngad suled Ngak ninge fal’ ea yofas rodad. Napan ni pii’ fare gam’ing nge ma’ ngodad ma ra’i buch ”gelngin got” u lane ea yofas rodad (Doctrine and Covenants 84:20).

Fare M’ag ko Tawfe

Fare Somoel ea kea fil ni tawfe ea rib ga’fan ngodad ni fa’anra ngad suled ngak ko tabinaw rok (muguy ko John 3:5). Rib tu’uf ni ngad manged ea gida’en ea galasia ku Yesus Kristus. Somoel rodad ea kea dag kanowa’an ko tawfe (muguy ko Matthew 3:13–17).

Gadra tawfe migad ta’fan ea pii ma’ rodad, ma Got ea ra’i na’agfan ea denen rodad (muguy ko Acts 22:16; 3 Nephi 12:1–2). Biney ea tow’ath ea yog ngodad ni bochan fare miligach ni ta’ Yesus Kristus, cha’ ni rib ”adag dad”, ni ii lukuy dad ko denen rodad ko racha’ rok” (Revelation 1:5). Got ea kea duglliy nigne tow’ath nag dad ko fare Kan ni Thothup ngeyog ni pii’ ea kanawo’ nge gapas ngodad.

Birodad ea yuyang ko ma’ag ko tawfe, ea kad guyed nigad ba’adaged ningad feketh nga dakean dad fithngan Yesus Kristus. Kad michegned ni “gubin ngiyal’ ma gadadra fol min cha’ariy fapi motochiyel rok’. Karim michegned ni ngam adaged mag med pii’pii’ ea ayuw ko gubin nibe gafgow, ”diloeloey’ gad ko tin picha’an yibe diloeloey’; … pii’ ea gapas ko picha’an nib tu’uf rorad, mag sakiy ko tin gamnang nib riyul’ uu po’owchan Got ko gubin ngiyal’ nge gubin yang (Mosiah 18:9; muguy ko fapi guruy ko 8–10, 13). Ngad diged ea adag rodad ko pigpig ngak Yesus Kristus ngani mada’ ko tin tomur ea yofas rodad (muguy ko Doctrine and Covenants 20:37; Mosiah 2:17).

Pi ma’ag rodad ni bay fan ko tawfe ea bay falngin ea murwel riy ni kan pii’ ngodad. Bay ea falngin ma kubay ea fal’falean riy. Ra’i falagin ea thil u lukngundad ea Chitamangdad nu Tharmiy ni garam gu’ niba’ ea adag rok riy.

Tawfe ran Lithaeg nga Fithik’e Raen

Yesus ea kea fil nib tu’uf ningad tawfe gad ko raan ninge ma’ ea denen rodad (muguy ko Doctrine nge Covenants 20:72–74). Tawfe ko raan ea bea yip fan ea yam’, ke’eyag, fas ko yam’ rok ii Yesus Kristus (muguy ko Roma 6:3–6).

Tawfe ko raan ea kube yip fan ea tin nib gel bugngin ngodad. Bea yip fan ni uu dam’ead’ uu so’omon, min ke’eyag dad, mid fas gad nike thil ea ya’al rodad. Ran tawfe nag dad, ma woed nike sul ea yofas rodad magad mang boch pii fak Kristus (muguy ko Mosiah 5:7–8; Roma 8:14–17).

Bitir

Bitir ea da’ani ma tawfe nag rad ngar mada’ gad ko meruk ea duw rorad ni kar ninged rogon ea murwel (muguy ko Doctrine and Covennants 68:27). Bitir ni ra yim’ uu mo’on ea ra biyuuliy rad Yesus Kristus uu fathik fare miligach ni ta’(muguy ko Moroni 8:4–24; Doctrine and Covenants 137:10). U mo’on ninge tawfe ea bitir, ma rib tu’uf ni ngan fil ngorad fare gospel ni ngayog ni ngar rrin’ed e biney ulan e yafos roraed ni ngar ngangoliyed fare m’ag u thilin raed ngak Got.

Fare Sakrament

Chitamangdad Nu Tharmiy ea ba’adag ninge mich u wan’ dad ea ma’ rodad ni kad ted Ngak uu ta’abang. Rogon rayog ni ngad rin’ed ea pin’ey ea ngad gak gad nga ta’abang migad fek fare Sacrament. Sacrament ea ba murwel nu’un pii’ ngak ea pum’on ko galasia ni dag Yesus ngak fapi apostles rok u mo’on ninge yim’.

Sacrament ea rib ga’fan ni ngu’un fek ko gubin ea week. Flowa nge raan e kan yibliy man pii’ ko gidii’ u lane mo’olung. Fare flowa ea bea yip fan doew Somoel ko fare miligach rok ni fan ngodad. Fare raan ea bea yip fan ea racha’ rok ni luul’ ni fan ngodad.

Gadma fek e sacrament ni ngan pog’uwran ngodad fare ma’ rodad ngak Got nge miligach rok Somoel ni ta’ ni fan ngodad. Ra’i bi’ech nag fare micheg ni’ud ted ko fare Thothup ni nga’i par rodad.

U Mm’on ko Tawfe

U mo’on ningam fil ngak ea girdii’ ni kan tawfe nag, mab tu’uf niba’ ea mich rorad, ma kar kalngan’ gad, makar thiliyeg ned ea yofas rorad nga yog ningan tawfe nag rad Doctrine and Covenants 20:37. Mangil ni yadra micheg niged ni yad ra ta’fan ea pii motochiyal ko fare gospal ku Yesus Kristus. Fa’anra dawri fal’agragon bea’ napan ra taw ko tawfe rok but rani yinini’ran ea tawfe nga mada’ ko ngiyal’ nike fal’aginragon. Muguy ko guruy ,12.

Mo’on ran tawfe, gubin ea girdii’ ma ba tu’uf ni ngan:

• Fil ngorad ea fapi lesson ko missionary.

• Mangu’ ea elders quarum ko president, Relief Society President nge Bishop.

• Nga’um un ko mo’olung ko sacrament.

Mat’owan ninge Tawfe

Bay boch ea gidii’ ni ra’un lamniged ko mangfan ni ngar tawfe gad ni fa’anra kan mu’i tawfe nag rad ko reb ea galasia nib thil. Tawfe nge tin ni kan dugliy ea rib tu’uf ni pum’on nibay ea priesthood rok ea rayog ninge ngongliy ea pii gam’ing nem (muguy ko Articles of Faith 1:5; Acts 19:1–6; Hebrews 5:4).

Chep nib Thothup ni Ngan Fil

Kanowa’an Kristus

• 2 Nephi 31:4–18

• Matthew 3:13–17

Fare M’ag ko Tawfe

• 2 Nephi 31:13

• Mosiah 18:8–10, 13

• Alma 7:15–16

• Doctrine and Covenants 20:37

Tin ni Ngam Rrin’ Ngayog ni Ngan Tawfe Nigem

• 2 Nephi 9:23

• Mosiah 18:8–10

• Alma 7:14—15

• 3 Nephi 11:23

• Moroni 6:1–3

• Doctrine nge Covenants 20:37

• Acts 2:37–39

Tawa’ath nikan Micheg nifan e Tawfe

• Mosiah 4:11–12

• Moroni 8:25–26

Rib Tu’uf ni Ngan Pii’ Mot’owan

• Doctrine and Covenants —22

• Matthew 28:19–20

• Hebrews 5:4

Yesus e ke Tabolngin nag fare Sakrament

• 3 Nephi 18:1—18

• Luke 22:15—20

Meybil ko Sakrament

• Moroni 4 nge—5

• Doctrine and Covenants 20:75–79

Thapeg fare Sakrament

• Doctrine and Covenants 27:2

• 1 Korinth 11:23–29

Fil Boech Marunga’agen ere Machib ne’

• Rogon fapi chep nib thothup: ”Tawfe, Tawfe nag,” ”Sacrament”

• Topic ko fare gospal: ”Tawfe,” ”Sacrament”

Fare Tow’ath ko Kan ni Thothup

Yognag ea Tawa’ath ko Kan ni Thothup

La’agrow guruy ea Tawfe. Yesus ea kea fil ngodad nib tu’uf ningad ”suum gad ko raan nge fare Kan ni Thothup” ngayog ningad suled ko tabinaw ku Got (John 3:5; bay boach ni kan ta’ nga’). Josef smith ea ii fil ni, ”tawfe ko rann ea woed ea balay’ ea tawfe, da’ani fal’ ni fa’anra dariy reb ea balay rii’—ni tawfe ko fare Kan Ni Thothup” (tin nibe fil fapi president ko galasia: Joseph Smith [2007], 95).

Ran Tawfe ko raan ma karan tawfe ko fare Thothup ngayog ninge gaman. Napan rayog la’agrow fare tawfe ngodad, mea bi’ech ea ya’al rodad mea ma’ ea denen rodad. Migad mang reb pi chalpen Yesus ko yofas nib thothup.

Ra yog ea tawfe ko Thothup u lane fare gam’ing ni kan pii’ mot’owan. Biney ea gam’ing ea ra’i falagin ea pumo’on nibay ea priesthood rok ninga tay pa’ nga dakean loelgey. So’omon ea ran pii’ mot’oway ngan mang reb ea gida’en ea galasia, nge mu’ fin pii’ fare tow’ath ko Kan Ni Thothup ngodad. Ta’areb rogon ea biney gam’ing ni kan weliy u lan fare New Tastament nge Fare Babiyor Ku Mormon (muguy ko Acts 8:14–17; 3 Nephi 18:36–37).

Fare kan Thothup e bin dalip e pi gachalpen Got. Kan ni Thothup, Chitamangdad nu Tharmiy nge Yesus Kristus ea yad ma murwel uu ta’abang. Kan ni Thothup ea ra’i par rodad ni fa’anra gadra rin’ ea tin nib mangil, ra par ni irr reb ea puluw rodad.

Rogon nima tow’ath nagdad ea Kan ni Thothup

Kan Ni Thothup ea tow’ath ko Chitamangdad Nu Tharmiy ni rib ga’. Kan ni Thothup ea ra’i bi’ech nag ea ya’al rodad, ngea yo’or boch ea thothup rodad, magad gamon ko tin nib mangil, woed buchuy ngak Got (muguy ko 3 Nephi 27:20). Ra ayuweg dad ngad thil gad napan ni ngad bea leak kanowa’an Got.

Kan ni Thothup ea ma ayuweg dad ngad nanged ea tin riy’ul (muguy ko Moroni 10:5). Ma yoeg ea tin riy’ul ko gumircha’en nge tafiney rodad. Kan Ni Thothup, ea ra ayuweg dad ngad nigned ea tin bin riy’ul’. (muguy ko Doctrine and Covenants 42:14). Gadad ra fil min sensey nag ea tin nib riy’ul ko fare Kan ni Thothup, ma gadra thamiy uu gumircha’an dad (muguy ko 2 Nephi 33:1).

Gadad ra munguy nag ea tafiney rodad ngad fol ko kanowa’an fare Kan Ni Thothup, ma ra’i pii’ ea Kanawo’ ngodad (muguy ko 2 Nephi 32:5). Kube un nga’ ko urgon ni gadad bea pii’ ea ayuw ko girdii’.

Kan Ni Thothup ea ma pii’ gelngin dad nge ma’ ea mo’owar rodad. Ma ayuwed dad dab rin’ed ea togan. Ma ra’i pugnowan dad ko tin bin fal’ nge tin nib kireb.

Kan Ni Thothup ea ra’i ayuweg dad ko tin ni gadad bea gafgow rii’ u lane yofas rodad. Ra’i pii’ ea gapas nge athamgil u fathik ea gafgow rodad (muguy ko Moroni 8:26). Fathik fare Kan Ni Thothup, ea gadra thamiy ea adag rok Got ni ba’ ngodad.

Kan’owngin fare Kan Ni thothup

Pi cha’an nigbe sensey nag rad ea bay boach ii yad ni kar ninged ea amthun ea Kan Ni Thothup ni sana bochan ni kar filed makar yabliyed kar ninged. Moeg ngorad ni kab tu’uf ni ngar laked ea athemthem rorad nib fal’ miyad bi’eg Fare Babiyor Ku Mormon, miyad maybil, man un ko mo’olung ko sacrament man ta’ fan fare motochiyal.

Moeg ni rani tawfe nigey ma Kan Ni Thothup ea ra’i pii’ ea tow’ath manichubog.

Napan ni ba tu’uf, ni ngam fil ngorad ni ngan maybil. Muguy ko ”Maybil ngam nang ea tin nib riy’ul u fathik fare Kan Ni Thothup”bay ko lesson ,1 ngemaybil ni bo’or yaay”bay ko lesson 4 ko kanowa’in rogon ni ngam ayuweg bea’ nge maybil.

Chep nib Thothup ni Ngan Fil

Ragon fare Kan Ni Thothup

• Doctrine and Covenants 8:2–3; 130:22–23

• Luke 24:31–32

• John 3:5–8

• Galatians 5:22–23

Tow’ath nge Rogon Ma’amngin fare Kan Ni Thothup

• 2 Nephi 32:1–5; 33:1–2

• 3 Nephi 27:13–22 (verse 20)

• Moses 6:61

• John 14:26

Tin nib Ga’fan ko fare Tow’ath ko Kan ni Thothup

• 2 Nephi 31:11–12, 18, 21

• 3 Nephi 18:36–37; 19:13; 27:19–20

• Doctrine and Covenants 19:31; 20:38, 41; 33:15

• Acts 19:1–6

Fil Boech Marunga’agen ere Machib ney

• Rogon fapi Chep nib Thothup: ”Kan ni Thothup,” ”Tow’ath ko fare Kan ni Thothup Kan”

• Bible Dictionary, “Kan ni Thothup”

• Topic ko gaspal: ”Kan ni Thothup,” ”Tow’ath ko Ya’al”

Athamgil nge mada’ ko Tomur

Napan ran tawfe nag dad, magad yan nga’ lan reb ea ma’ ni fan ngak Got. Kubay boch binean nib yo’or ni gadra rin’ ni fan ngak, machane kad dugliyed ni ngad ted fan ea motochiyal magad pigpig gad Ngak nga manemus ko yofas rodad (muguy ko Mosiah 18:8–10, 13; Doctrine and Covenants 20:37).

Napan ran tawfe man pii’ fare kan ni thothup, gadad ra athamgil ngan par nga.’ Gadra chuw uu dakean a kanawo’ demturug ni fa’anra buchiyang, ma gadad ra murwel nag a mich rodad ngak Kristus man kalngan’. Fare tow’ath ko kalngan’ ea ra’i gagiyog nag dad ngad suled ko fare kanawo’ ko gospal ma’i par nib mangil ea ma’ rodad ngak Got. Ra riy’ul ni kad kalngan’ gad, ma Got ra pining dad ma ra na’agfan ea denen rodad.

Ngan athamgil nge mada’ ko tomur ea ran ea bea yip’ fan ninge michan’ gadad ngak Got u lanea yofas rodad—ko tin nib mangil ea ngiyal’ nge tin nib kireb ea ngiyal’, nge uu fathik ea gafgow ngea fala’ab. Gadadra ta’ar laniyan’dad ngad laked Kristus ngad boeded boch iir. Gadma sap ngak Kristus ko mich, yul’yul’, nge athamgil ni demturug ko mang ea ra buch u lane ea yofas rodad.

Athamgil gad nga mada’ gad ko tomur ea darbe yip’ fan ni kemus ninge chichi’pa’dad nge mada’ ko ngiyal’ ni kad ma’ad. Bea yip’ fan, ni nge sap owchidad, tafiney rodad, nge papngin dad ngak Yesus Kristus. Ma kabe yip fan ningan murwel nag ea mich ngak Kristus ko gubin ea rran. Ma karan ul’ul’ nag ea kalngan’uy, ta’ fan fapi ma’ rok Got, mag gaay ea puluw roem ko fare Kan Ni Thothup.

“Ere, thingar mu pii’ed iyaen nga mo’on u fathik’ e yul’yul’ romed ngak’ Kristus, nibmachalbog laniyaen’med ko athap, nge t’ufeg rok’ Got ngak’ gubin e gidii’.” Chitamangdad Nu Tharmiy ea kea micheg nag ni fa’anra gadra athamgil nge mada’ ko tomur, ma “rayog ea yofas ngadad ko manemus”(2 ,Nephi 31:20).

Chep nib Thothup ni Ngan Fil

Athamgil nge Mada’ ko Tomur

• 2 Nephi 31:14–20

• 3 Nephi 27:13–22

• Matthew 10:22

Tow’ath ko Pi Cha’an ni Yadma Athamgil

• 1 Nephi 13:37; 22:31

• 3 Nephi 15:9

• Doctrine and Covenants 14:7

Fil Boech Marunga’agen ere Machib ney

• Topic ko gaspal: ”Magawon”

• Rogon fapi chep nib thothup:“Athamgil,” “Magawon”

Gospel rok Yesus Kristus ea ma Pii’ ea Tow’ath ko Gubin pifak Got

Fare gospel ku Yesus Kristus ea fan ngak gubin pifak. Fare babiyor nib thothup ea bay riy ni ”gadad ta’areb ngak Got” demturug ko uw gin ni kad bad riy fa uw rorgon ea par rodad. Bea pining ”gubin nigne yib ngak ngan nang fal’ngin; ma dabi tileag bea ninge un’ ngak” (2 Nephi 26:33).

Fare gospal era tow’athiy dad u lane ea biney ea yofas nge manemus. Rayog ningad fal’falan’ gad—ta’abang ko tabinaw fa yigoeg dad—ni fa’anra ran rin’ ea tin kea fil Yesus Kristus (muguy ko Mosiah 2:41; “The Family: A Proclamation to the World,” ChurchofJesusChrist.org). Ran par uu tamun u lan fare gospal mara pii’ ea fal’falan, mea pii’ ea athamgil ko tafiney nge papngin dad, mea fal’eagin rogon ea tha’ rodad.

Ran par uu tamun u lan fare gospal rok Yesus Kristus mara ayuweg dad nge dabi buch ea tin binean nib kireb rodad. Ra’i pii ea gelngin nge athamgil rok ngodad u fathik a gafgow. Ra dag rogon ea fal’falean ni manemus.

Reb ea binean ni rib mangil ko fare gospal nike sul ea gadad mang reb pi’en ea tabinew rok Got. Gadad pifak ni gubin ni pagal nge bpin. Demturug rogon ea ya’an ea tabinaw rodad uu fayleng, ya ra bagdad ma iir ea mang reb gida’en ea tabinaw rok Got.

Reb nib mangil ko thin ni gamad bea thapag ea tabinaw ea ra sul nga ta’abang ko manemus. Got e ke gayog nag ea Tabinaw. Fal’falean ni kea gagyong nag Chitamangdad nu Tharmiy ea ma fal’agin ea tabinaw nge par uu ta’abang napan rama’ ea yam’. Murwel u lane ea temple ea bea gagiyog nag rogon nge sul ea tabinaw nga ta’abang.

Fare gospal ea ra’i, awuyeg ea tabinaw ngan ngongliy rogon ea tin dar ninged fan, pii cham rorad, nge magawon ni yedbe yan uu fathik. Tabinaw nikea cham ea rayog ni ngan sulweg ko fare Bayul rok Yesus Kristus u fathik ea kalngan’uy nge man’agfan.

Fare gospal ku Yesus Kristus ea ma fal’agin ea tabinaw nge gel u ta’abang. Tabinaw ea gin nib mangil ni ngan fil ma’arngagen ma’amngin fare gospal rii’. Tabinaw nima ma’ing ko fare gospal ea ra par ni gin yima yib nga’ ni dariy binean ninge buch roem nib kireb. Ginef ea rayog ninge yib ea ya’al nib mangil nge an Ga’ nga’.

Ba tu’uf ea minangfan roem fa’anragbe fil ma’arngagen ea Tabinaw ngak boech ea girdii’.

Fa’anra gabe fil nag ma’arngagen ea tabinaw kubea’, dam patlin ni bay boach ii yad ni dawri mabgol, fa faka’ ea bitir, fa fal’ ea tha’ ko tabinaw rok. Moeg nib fal’rogon ni Got ea ba’adag rad me yad gidii’an reb ea tabinow rok. Mu ayuweg rad ngar ninged fan ni fare gospal ea ra’i tow’athiy rad demturug ko uw rorogon ea tabinaw rorad. Fa’anra bay ea mich rorad, ma Got ea ra pii’ ea tow’ath nge adag ko tabinaw ngorad uroe’ ko biney ea yofas fa bin magid ninge yib.

Chep nib Thothup ni Ngan Fil

• 2 Nephi 25:26

• 3 Nephi 18:21

• Doctrine and Covenants 68:25

• Moses 2:27–28; 5:1

• Abraham 2:11

• Efesians 3:14–15

• Genesis 12:3

Fil Boech Marunga’agen ea ra Machib ney

• Rogon fapi chep nib thothup: “Gospal”

• “Fare Tabinaw: Bugi thin ni fan ko fayleng”

• General Handbook, Guruy 2 nge 16

• Topic ko gospal: “Gospal,” “Tabinaw”

Babyor ko Machib nib Achichig fa rib Fel’ N’umngin

Tin magid ea rayog ni ngam fil ngak bea’ ni fa’anra kabay ea time rii’. Fa’anra gabe use nag ea biney ea outline, mag fek ta’areb fa boech ea tin ni ngam sensey nag. Fare deaf ko ma’arngagen ea gam’ing ea ran pii’ ko bin so’omon ea machib.

Napan nigbe sensey ma garam fith ea duwer, mag matoyil. Faleag rogon ni ngam pining ea girdii’ ninge nang fan mea chuchgur ngak Got. Bin rib ga’fan ni ngam fith ni napan nigbe poeng ea fa’anra yog ninge guyem biyay. N’umngin ea machib ea bea taga’ ko duwer roem nge motoyil nigbe ta’.

Pi’nen Nrayag ni Ngam Machib nag Ngak Bea’ ko 3–10 Minut

• Got ea kea pii’ea pagal ni fak, Yesus Kristus, nga fayleng ninge na’agfan ea denen rodad ma’i tabiyuuliy dad napan gadra yim’.

• Mich ngak Yesus Kristus ea ir ea gam’ing ko ngonglandad nge gelngindad. Mich ea pii’ gelngin Somoel ngodad u lane yofas rodad.

• Mich ngak Yesus Kristus ea ma powi’iy dad ngad kalngan’ gad. Kalngan’uy ea bea yip fan ningad sap gad ngak Got migdad chuw ko denen. Napan’ ni gadra kal’nganuy, mea rogon ea mithmith nge tafiney rodad ea ra thil nge woed ngak Got.

• Got ea ra na’agfan ea denen rodad ko ngiyal’ ni gadra kalngan’. Rayog ea mana’ag’fan ni bochan Yesus Kristus ea kea yim’ ni fan ko denen rodad.

• Tawfe ea bay la’agrow yang rii’: Tawfe ko raan nge tawfe ko Kan Ni Thothup. Napan ni gadra tawfe ngan mu’ min micheg nag dad, ra ma’ ea denen rodad magdad tabab ko reb ea yofas nib bi’ech.

• Napan ni yira tawfe migad micheg niged ngak, ma ra yog fare tow’ath ko Kan ni Thothup ni kan noeg e pii gam’ing nge michniged ngak.

• Gadra laked ea kanowa’ngin ea gospal nge mada’ ko tomuran ea ran, ma Got ea bea micheg nag ni rayog ea yofas ni manemus ngodad.