Iralaud 3: Mehn kaskuhl 4 [kapahieu]

Wiahla Tohnpadahk en Sises Krais en Erein mour kei

Padahngki Mehn Kasukuhl Wet

Pepdais wia tiahk sarawi kaperen ehu me kin wiahda koapwoaroapwoar. Ansou kitail pahn pepdaisla, kitail kasalehda atail ineng en idawehn Koht oh alehda ahl me kolahng mour soutik. Kitail pil kin kasalehda atail poadidi en wiahla Sapwellimen Sises Krais tohnpdahk kei.

Mehn kasukuhl wet wiawihda ong inou sarawi kan kitail kin wiahda ni atail pepdaisla. E iangahki pali pwukat, me ehu ehu mie iretikitik kei:

• Atail Inou Sarawi kan En Inangih Alehieng Pohtail Mwaren Sises Krais

• Atail Inou Sarawi kan en Kapwaiada Sapwellimen Koht Kosonned akan

• Atail Inou Sarawi kan en Papah Koht oh Mehteikan

• Atail Inou Sarawi kan en Dadaurete lel ni Imwi

Sewese aramas en wehwehki me padahk oh kosonned akan me kumwail kin padahngki wia kisehn inou sarawi irail pahn wiahda ni arail pahn pepdaisla. Kasalehieng irail duwen ehu ehu kisehn mehn kasukuhl wet pahn sewese irail “kohdo rehn Krais … oh alehda sapwellime komour” (Omni 1:26; pil kilang 1 Nihpai 15:14).

Ke pahn men padahngki mehn kasukuhl wet nan padahk kei. Pak malaulau me amwail pahn kin pwarek oh padahk pahn kin daulihala minit 30 [silihsek]. E kin mwahu amwail pahn kin pwarek oh padahk en kin mwotomwot apw dod oh kin padahngki ekis ekis sang nan iren padahk kan.

Koasoanehdi dahme ke pahn kaskuhlki, ansou da ke pahn kaskuhlki, oh ia wen reirei en ansou ke pahn wia kaskuhlo. Medewe mwahu anahn akan en aramas ke pahn padahkih kan, oh peki kaweidpen Ngehno. Ke ahneki koahiek en kak padahngki dahme pahn keiou sewese mwahu aramas en kaunopehng pepdais oh kasarawihla.

Ekei pali nan mehn kaskuhl wet iangahki luhk mengihtik kei. Rapahki kamarain ong koasoanepen mwohmw oh ansoun wiahda luhk kan. Ese uen me emen emen aramas wehwehki. Sewese aramaso en kin ekis ekis kalaudehla ah momourki rongamwahuo.

Atail Inou sarawi en Inengieng Alehieng Pohtail Mwaren Sises Krais.

Ansou kitail pepdaisla, kitail inoukihda me kitail pahn idawehn Sises Krais “ni loaletail unsek.” Kitail pil kadehdehki me kitail “inengieng alehieng [pohtail] mwaren Sises Krais” 2 Nihpai 31:13; pil kilang Doctrine and Covenants 20:37).

Alehieng pohtail mwaren Sises Krais wehwehki me kitail tamataman Ih oh nanantiheng momour duwen atail wia Sapwellime tohnpadahk kan. Kitail kin mweidehng Sapwellime marain en marainlahng mehteikan sang rehtail. Kitail ese me kitail wia Sapwellime oh kiheng Ih keiou nan atail mour kan.

Nan pali pwukat kasalehda mwohmw riau me kitail kin tamanki oh idawehn Sises Krais.

Poaden Kapakap

Kapakap kak wia koasoakoasoai mengei ehu ong Sahm Nanleng me kohsang nan mohngiong. Nan kapakap, kitail kin koasoai ieng Ih ni sansal oh mehlel. Kitail kin kasalehda atail limpoak ong Ih oh kaping pwehki atail kapai kan. Kitail pil kin peki sawas, perehre, oh kaweid. Ni atail kin ritingidi atail kapakap kan, kitail anahne wiahda ansou en uhdi oh rong mwahu.

Sises ketin padahngkiher, “eri kumwail en kin poaden kapakap ong Sahmo ni edei” (}3 Nihpai 18:19, kesempwalpe kapatapatehng; pil kilang Moses 5:8). Ni atail kin kapakap ni mwaren Sises Krais, kitail kin taman koaros Ih oh Sahm Nanleng.

Sises ketin wiahng kitail karasaras me kitail en idawehn ni atail kapakap. Kitail kak esehla me tohto me pid duwen kapakap sang atail pahn onopki sapwellimen Sounkomouro kapakap kan nan pwuhk sarawi kan (kilang Madiu 6:9-13; Sohn 17).

Atail kapakap kan kak iangahki pali pwukat:

• Tepkihda ni omw pahn kos mwarih Sahm Nanleng.

• Kasalehda pepehm kan en ahmw mohngiong, me duwehte kaping ong kapai kan kitail alehdier.

• Idek peidek kan, rapahki kaweid, oh peki kapai kan.

• Imwikihla ni omw pahn inda,“Ni mwaren Sises Krais, ahmen.”

Pwuhk sarawi kan kin kangoangei kitail en kapakap nimenseng oh ni soutik. Ahpw, kitail kak kapakap ansou sohte lipilipil oh wasa sohte lipilipil. Ong pein atail kapakap oh kapakap en peneinei kan, e kak udahn sang nan mohngiong ansou kitail kelepwidi oh kapakap. Kitail anahne ansoun koaros en ahneki kapakap ehu nan atail mohngiong kan. (Kilang Alma 34:27; 37:36-37; 3 Nihpai 17:13; 19:16.)

Atail kapakap kan anahne en koasoandi mwahu oh sang nan mohngiong. Ansou kitail kapakap, kitail en dehr kapwkapwurehieng soahng kan ni mwohmw tehieu.

Kitail en kapakap ni pwoson, mehlel, oh inengieng mehlel en wia pasapeng kan kitail alehdi. Ni atail wia met, Koht pahn kaweid kitail oh sewesei kitail en wiahda koasoandi mwahu kan. Kitail pahn pehm me kitail karanihalahr Ih. E pahn ketkiheng kitail kamarain oh mehlel. E pahn ketin kapai kin kitailda soanamwahu, meleilei, oh kehl.

Onop en Pwuhk Sarawi

• 2 Nihpai 32:8-9

• Inos 1:1-12

• Alma 6:6; 13:28; 34:17-28; 37:36-37

• 3 Nihpai 18:20

• Moronai 10:3-5

• Doctrine and Covenants 6:22-23; 8:2-3; 9:7-9; 10:5; 19:28; 42:14

Kalaudehla Amw Wehwehki me pid duen Padahk Wet

• Kaweid ong iren Pwuhk Sarawi kan: “Kapakap”

• Diksineri en Pwuhk Sarawi, “Kapakap”

• Iralaud kan en Rongamwahu: “Kapakap”

Luhk

Kumwail kak kin kapakap nan ehu ehu rahn ong Sahm Nanleng?

Onopiki pwuhk sarawi kan

Nihpai padahngkiher, “Kumwail en perenki sapwellimen Krais mahsen akan; pwe kilang, [sapwellimen Krais mahsen akan] pahn kasalehda mehkoaros me kumwail en kin wia”2 Nihpai 32:3; pil kilang 31:20).

Onopki pwuhk sarawi kan wia ahl kesempwal ehu pwehn taman oh idawehn Sises Krais. Nan pwuhk sarawi kan kitail esehla Sapwellime mour, misin, oh padahk kan. Kitail pil esehla Sapwellime inou kan. Ni atail kin wadek pwuhk sarawi kan, kitail kin kehn Sapwellime limpoak. Palingenatail kan kin laudla, atail pwoson Ih kin keirda, oh atail madamadau kan kin marainla. Atail kadehde kan ong Sapwellime misin sarawi kin kehlailla.

Kitail kin tamataman oh idawehn Sises ni atail doadoahngki Sapwellime mahsen kan nan atail mour kan. Kitail anahne onopki pwuhk sarawi kan nan ehu ehu rahn, mehlel pwuken Mormon.

Pwuhk sarawi kan en Mwomwohdiso en Sises Krais en Souleng en Imwin rahn akan iei Paipel Sarawi, Pwuhk en Mormon, Doctrine and Covenants, oh Pearl of Great Price. Mepwukat pil kahdanki “pwuhk sarawi kan.”

Onop en Pwuhk Sarawi

• 1 Nihpai 19:22-23

• 2 Nihpai 9:50-51; 25:26; 29:1-13; 31:19-20; 32:3

• Alma 32:28-30

• Doctrine and Covenants 1:37-38; 18:34-36

• Sohn 20:31

• 2 Timoty 3:14–17

• 2 Piter 1:20-21

Esehla Me Tohto me pid Padahk Wet

• Mehn kaweid ohng Pwuhk Sarawi kan:“Pwuhk Sarawi kan”

• Iralaud kan en Rongamwahu: “Pwuhk Sarawi kan”

Luhk

Kumwail kak wadek pwuhk sarawi kan rahn koaros? (Medewe mwahu mwohn lukehiong aramas en wadek ehu ehu iralaud kan.)

Atail Inou Sarawi en Kolokol sapwellimen Koht Kosonned kan

Mehn ketemen Mie ahl tohto kei duwen kaskuhlpen kosonned kan nan pali wet. Ni karaspepe, ke kak padahkih irail nan mwemweit en kaskuhl kei. De ke kak padahngki ekei irail ni arail wia kisehn tepin mehn kaskuhl siluh o. Ansoun kaskuhlki kosonned kan, tehk mwahu me kumwail kak kakone irail ohng inou sarawi kan en pepdais oh pilahn en komouro.

Ansou kitail pepdaislahr, kitail inoukihengehr Koht me kitail pahn “kolokol sapwellime kosonned kan” Mosaia 18:10; Alma 7:15).

Koht ketkiheng kitailehr kosonned akan pwehki E ketin poakehng kitail. E ketin kupwurki dahme keioun mwahu ong kitail, met oh pil nan mour soutik. Ni ah ketin wia Samatail Nanleng, E ketin mwahngih soahng kan kitail anahne ong kamwahupen palingenatail oh paliwaratail. E pil ketin mwahngih dahme pahn kiheng kitail popohl keiou laud. Ehu ehu kosonned wia kisakis sarawi ehu, me kohieng kitail pwehn kaweid atail koasoandi kan, wia perepatail, oh sewesei kitail keirda.

Ehu kahrepen atail kodohng sampah iei kitail en esehla oh keirda sang atail pahn doadoahngki atail mehn pilipil ni eripit.Abraham 3:25. Pilada en peikiong sapwellimen Koht kosonned akan—oh koluhla, ansou kitail kin wiahda dihp—pahn sewesei kitail nan seiloak en mour apwal wet.

Sapwellimen Koht kosonned akan wia poahsoanpen kehl oh kapai kan (kilang Doctrine and Covenants 82:8-9). Ni atail pahn momourki kosonned akan, kitail pahn esehla me irail sohte wia kosonned katoutou kei me kin keinapwihdi atail saledek. Saledek mehlel kin kohsang atail kin peikiong kosonned akan. Peik wia poahsoan en kehl me kin wadohng kitail marain oh erpit sang rehn Ngehn Sarawio. E kin wadohng kitail popohl laud oh sewesei kitail alehdi atail kehl sarawi ni atail wia seri en Koht kei.

Koht ketin inoukiher me E pahn ketin kapaikitailda ma kitail kolokol Sapwellime kosonned akan. Ekei kapai kan dokehte ekei kosonned akan. Sapwellime kapai keiou laud kan iei meleilei nan mour wet oh mour soutik nan mour me pahn kohdo. (Kilang Mosaia 2:41; Alma 7:16; Doctrine and Covenants 14:7; 59:23; 93:28; 130:20-21.)

Sapwellimen Koht kapai kan kin ohng palingehn oh paliwar. Ekei ansou, kitail anahne ahneki kanengamah ni atail pahn awiawih, ahneki koapwoaroapwoar me irail pahn lelledo oh kin pahsan duwen Sapwellime koasoandi oh ansou (kilang Mosaia 7:33; Doctrine and Covenants 88:68). Pwehn kasawihada ekei kapai kan, kitail anahne tetehk ni keneinei oh kak mwadang kasawihada ni palingehn. Met doke mehlel kapai kan me kin kohdo ni mwohmw me mengei oh kalapw wiawi kan.

Ekei kapai kan kakete sansal mwurin ah wiawiher. Ekei kapai kan kakete sohte kohdo lao mwurin mour wet. Sohte katepe wiepen ansou de mwomwen Sapwellimen Koht kapai kan, kitail kak ahneki koapwoaroapwoar me irail udahn pahn kohdo ni atail pahn nantiheng momourki sapwellimen Sises Krais rongamwahu (kilang Doctrine and Covenants 82:10).

Koht ketin poakoahng Sapwellime serihkan koaros. E kin ketin kanengamahieng atail luwet, oh E kin ketin ahneki mahk ansou me kitail kin koluhla.

Kosonned Laud Riauo

Ansou me Sises alehdi peidek wet, “Mehnia kosonned nan pelien Kosonnedo me keieu kesempwal?” A Sises ketin sapengki “Ke pahn poakohng Kauno omw Koht, sang nan kapehdomw unsek, sang ni ngenomw unsek, sang ni omw lamalam koaros unsek.”

Sises eri mahsanih me keriau en kosonned kesempwalo duwehte me keiouo: “Ke pahn poakohng mehn mpomw duwen omw kin poakohng pein uhk” (Madiu 22:36-39). “Sohte ehu kosonned mie me kesempwalsang mepwukat” (Mark 12:31).

Ni atail wia sapwellimen Koht seri ngehn kei, kitail ahneki ohng limpoak. E wia kisehn atail sohsohn palingehn. Momourki kosonned laud riauo—en poakehng Koht keiou oh poakehng mehn impatail—wia ehu kasalepen sapwellimen Sises Krais tohnpadahk kan.

Limpoak en Koht

Mie mwohmw tohto kei me kitail kak kasalehkihda atail limpoak ong Koht. Kitail kak momourki Sapwellime kosonned akan (kilang Sohn 14:15-21). Kitail kak kiheng Ih keiou nan atail mour kan, mweidehng Ih atail pilipil kan ohng Sapwellime. Kitail kak mweidehng Ih en poahsoanehda atail ineng kan, lamalam kan, oh mohngiong kan (kilang Alma 37:36). Kitail kak momourki kaping pwehki kapai kan me E ketkihong kitail—oh ahneki kadek ni atail pahn ehukihwei kapai kan (kilang Mosaia 2:21-24; 4:16-21). Kitail kak kasalehda oh koaloalehla atail limpoak ohng Ih ni atail kin kapakap oh papah mehteikan, .

Duwehte kosonned teikan, kosonned me ketihtihki kitail en poakohng Koht iei ohng kamwahupatail. Dahme kitail poakong kin kasalehda dahme kitail raparapahki. Dahme kitail kin rapahki kasalehda dahme kitail kin medewe oh wia. Oh dahme kitail kin medewe oh wia kin kasalehda ihs kitail—oh isime kitail pahn wiahla.

Limpoak ong Mehteikan

Poakohng mehteikan wia kadokepen atail limpoak ong Koht. Sounkomouro ketin kaskuhlihkinkitailehr mwohmw tohto kan duwen atail pahn poakohng mehteikan (kilang, ni karasepe, Luhk 10:25-37 oh Madiu 25:31-46). Kitail kin rapahkin irailla oh kasamwoh irail ong nan atail mohngiong oh mour kan. Kitail kin kasalehda limpoak sang atail kin papah—sang atail kin mendahkihla pein kitail menda ma pil ni mwohmw tikitik kan. Kitail kin poakohng mehteikan sang atail kin doadoahngki kisakis kan me Koht ketkiheng kitail pwehn kapai irailda.

Poakohng mehteikan iangahki ahneki kanengamah, kadek, oh mehlel. E iangahki mwadang en ahneki mahk. E wehwehki ahneki wahu ohng aramas koaros.

Ansou me kitail kin poakohng aramas emen, kitail oh aramaso kin alehdi kapai. Atail mohngiong kan kin keirda, atail mour kan miehla wehwe, oh atail popohl kin laudla.

Kapai kan

Kosonned keiou laud riauo—en poakohng Koht oh poakohng mehn impatail kan—wia poahsoan en sapwellimen Koht kosonned akan koaros (kilang Madiu 22:40). Ansou kitail poakohng Koht mahs, oh pil poakohng mehteikan, soahng koaros nan atail mour kan pahn kolahng nan dowe me pwung. Limpoak wet pahn sair atail madamadau, mwomwen atail kin doadoahngki ansou, soahng kan kitail kin pereniki oh kadoahke, oh kairekdien soahng kan kitail kesempwalki.

Onop en Pwuhk Sarawi

• 2 Nihpai 31:20

• Mosaia 2-5

• Moronai 7:45–48; 10:32

• Madiu 22:36-40; 25:31-46

• Mark 12:28-33

• Luke 10:25–37

• Sohn 13:34-35; 14:15-21

• 1 Sohn 4:7-8, 20-21; 5:3

• Joshua 22:5

Esehla Me Tohto me pid Padahk Wet

• Iren Kaweid en Pwuhk Sarawi kan, “Limpoak ,” “Limpoak”

• Iralaud kan en Rongamwahu: “Limpoak mehlel,” “Limpoak”

Idawehn Soukohpo

Koht kin ketin malipe soukohp kan pwe irail en wia weliepe pohn sampah. Sang Sapwellime soukohp akan, E kin ketin kasalehda mehlel oh ketkihda kaweid oh pakair en keper kan.

Koht ketin malipehier Sosep Smith en wia keioun soukohp en imwin rahn akan (kilang mehn kaskuhl 1{). Soukohp akan mwurin Sosep Smith pil iang malipilipsang Koht pwehn moangehda Sapwellime Mwomwohdiso, me iangahki soukohp me kawkaweid mwomwohdiso rahnwet. Kitail anahne alehdi atail kamehlele malipilip sarawi en soukohp ieias oh idawehn ah padahk kan.

Padahk kan en soukohp oh wahnpoaron ieias kan kin kihda angkehn mehlel soutik nan sampah me ire kesempwal kan kin wekiwekidek. Ni atail pahn idawehn sapwellimen Koht soukohp kan, pingiping oh uhpenehn nan sampah sohte pahn poweikitaildi. Kitail pahn diar peren laud nan mour wet oh alehdi kaweid ong pali wet en atail seiloak soutik.

Onop en Pwuhk Sarawi

• Mosaia 15:11-12

• 3 Nihpai 12:1–2

• Doctrine and Covenants 1:4, 37-38; 21:1-7; 136:37-38

• Wiewia Kan 10:34-43

• Episos 2:19-20; 4:11-14

• Amos 3:7

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan: “Soukohp,” “Lih Soukohp,” “Kokohp, Kohpada”

• Iralaud en Rongamwahu: “Soukohp kan,” “Kokohp”

Luhk

Komwi pahn kin idawehn kaweid en soukohp ieiaso?

Peidek kan me doke Pepdais

Komwi kamehlele me Preseden Russell M. Nelson wia soukohp en Koht emen? Ia wehwehn met ohng komwi?

Kapwaiada Kosonned Eisekko

Koht ketin kasalehiong Kosonned Eisek koa ong soukohp en mahs emen me kahdanki Moses pwehn kaweidihki sapwellime aramas akan. Kosonned pwukat pil doadoahk nan atail rahnakat. irail padahkiheng kitail en pwongih oh kasalehda wahu ong Koht. Irail pil padahkiheng kitail duwen atail pahn ehuong emen emen.

• “Kumwail sohte pahn ahneki emen koht tohrohr mwohi” (Eksodus 20:3). Ekei “koht akan” kak iangahki soahng tohto, soangen atail dipwisou kan, manaman, de indand.

• “Kumwail sohte pahn wiahiong kumwail dikedik en eni de sansal en mehkot” (Eksodus 20:4).

• “Kumwail sohte pahn kasaminehla mwarei, pwe ngehi, Kauno, amwail Koht” (Eksodus 20:7).

• “Kumwail tamataman rahnen Sapad, oh wiahki rahn sarawi” (Eksodus 20:8).

• “Kumwail wauneki samamwail oh inamwail kan” (Eksodus 20:12).

• “Kumwail sohte pahn kemehla aramas” (Eksodus 20:13).

• Kumwail sohte pahn kamwahl” (Eksodus 20:14).

• “Kumwail sohte pahn pirap” (Eksodus 20:15).

• “Kumwail sohte pahn karaunlikamwohng aramas emen” (Eksodus 20:16).

• “Kumwail sohte pahn noahroke imwen emen. Kumwail sohte pahn noahroke en emen eh pwoud, de eh lidu, de nah ahsde nah kou, de mehkot me uhda ).

Kaskuhlpen Wehwehkihla Mehlel: Sohte Emen Koht Mwohi

Aramas nan tiahk tohto kin pwongih dipwisou kan me kin katamanehng irail Koht de arail pahpa nohnohn en mahsko. Pak tohto dipwisou pwukat, me duwehte sansal takai kan, dipwisou ieu me kasalepen sarawi, de sansal tikitik kan, kak pil wia mehkot me irail kin pwongih. Sewese irail kan ke kin padahkih en kasohpailahngete arail pwoson oh kaudek ohng Sahm Nanleng oh Sises Krais.

Onop en Pwuhk Sarawi

• Mosaia 13:11-24

• Doctrine and Covenants 35:24; 59:5-6

• Eksodus 20:1–17 ;

• Deuderonomi 5:6-21

Kalaudehla Amw Wehwehki me pid duen Padahk Wet

• Mehn Kaweid ohng Pwuhk Sarawi kan: “Kosonned akan: Meh Eiseko”

• Iralaud kan en Rongamwahu: “Kosonned Eiseko”

Luhk

Ke kak kolokol Kosonned Eiseko?

Kapwaiada kosonned en mour mwakelekel

Kosonned en mour mwakelekel wia pali kesempwal ehu nan sapwellimen Koht pilahn en komour oh mour soutuk. Insenen pwopwoud nan pwungen ohl oh lih pwopwoud kasarawilahr sang Koht ohng kepikipikdahn serihkan oh ohng kasalepen limpoak nan pwopwoud ehu. Insenen pwopwoud wet oh manaman en wiahda mour en aramas koasoandieng en wia mehkot me kaselel oh sarawi.

Sapwellimen Koht kosonned en mour mwakelekel iei soikala insenen pwopwoud likin pwopwoud manaman nan pwungen ohl emen oh lih emen. Kosonned wet pil wehwehki ahneki poadidi oh mehlel unsek ohng en aramas pwoud mwurin kapwopwoud.

En sewesei kitail momourki kosonned en mour mwakelekel, soukohp akan kaweid kin kitail en mwakelekel nan atail lamalam oh koasoai kan. Kitail anahne soik kasdo sakanakan ni soangen mwohmw koaros. Pwehn kolokol kosonned en mour mwakelekel, kitail anahne karakarahk nan atail wiewia oh sansal mwohn aramas.

Irail kan me pahn pepdais anahne en momourki kosonned en mour mwakelekel.

Koluhla oh Mahk

Pahn Sihlangin Koht, kauwehla kosonned en mour mwakelekel wia dihp laud ehu (kilang Eksodus 20:14; Episos 5:3). E kamwamwahlih manaman sarawi me E ketin kidahr pwehn wiahda mour. Ahpw E ketin doulahte oh poakohng kitail mendahte ma kitail kauwelahr kosonned wet. E ketin lukehiong kitail en koluhla oh mwakelekella sang ni tohnmetei en tomwpen dihp en Sises Krais. Insensued laud pwehki dihp kak wekieng meleilei kaselel en sapwellimen Koht mahk (kilang Doctrine and Covenants 58:42-43).

Kapai kan

Koht ketkiheng kitail kosonned en mwakelekel pwehn kapai kitailda oh seri en ngehn kan me E kin ketin kadaredohng sampah. Kapwaida kosonned wet anahn pwe emen emen kitail en ahneki meleilei oh kitail en ahneki limpoak, likilik, oh ehupene nan peneinei kan.

Ni atail pahn mourki kosonned en mwakelekel, kitail pahn alehdi perehre sang ohlahn palingehn me pahn kohsang insenen pwopwoud likin kapwopwoud. Kitail pil pahn soik kahpwal akan en madamadau oh paliwar me kin kohsang soangen ehupene pwukat. Kitail pahn keirda nan atail koapwoaroapwoar mwohn Koht (kilang {Doctrine and Covenants 121:45). Kitail pahn mengeieng kaweid en Ngehn Sarawi. Kitail pahn onopada mwahu ong wiahda inou sarawi kan nan tehnpas sarawi me kin kihpene atail peneinei kan ohng mour soutik.

Ohl oh Lih Mihmipene

Ohl oh lih me mihmipene apw sohte kapwopwoud sohte kak pepdaisla lao irail momourki kosonned en mour mwakelekel. Met wehwehki solahr mihmipene—menda ma ohl oh lih me heterosexual de ehupene me lih lih de ohl ohl—de, ohng ohl emen oh lih emen, e wehwehki kapwopwoudla. E pil iangahki doadoahngki pwoson ohng koluhla me kawehwehda nan Doctrine and Covenants 20:37. Pwopwoud nan pwungen ohl oh lih emen wia pali anahn ehu nan sapwellimen Koht pilahn.

Luhk ong momourki kosonned en mour mwakelekel kak wiahda kahpwal laud kei ohng ekei aramas ke padapadakih. Kin poaden kapakap oh tehk mwahu en emen emen irair kan. Idawehn pepehm kan en Ngehno ansoun padahk. Kanaiohng oh dehr koasoaia ni mengihtik kan. Ma mie anahnepe, ale kaweid sang ahmw misin preseden ong mengihtik en irair kan.

Onop en Pwuhk Sarawi

• 3 Nipahi 12:27-30

• Doctrine and Covenants 42:22;; 59:6; 63:16

• Madiu 5:27–28

• Episos 5:3-5

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan, “Mour Mwakelekel”

• Iralaud kan en Rongamwahu, “Mour Mwakelekel”

Luhk kan

Komwi kin nantiong en ahneki lamalam oh wiewia mwakelekel? Komwi kak momourki kosonned en mour mwakelekel?

Peidek me Doke kan en Kaunopehng Pepdais

• Dahme komwi wehwehki duwen kosonned en mour mwakelekel, me keinapwih insenen pwopwoud likin kapwopwoud manaman nan pwungen ohl oh lih emen? Komwi kak nantiheng kapwaiada kosonned wet mwowe oh mwurin ahmw pepdais?

• Miehier pak komwi iang towehda doadoahk en kauwehla liseian? [Ire Aramas emen me sapengki ei ohng peidek wet anahne tuhweng misin preseden de emen sounsawas me kileldieng pwukoahu mwohn pepdais kak mweimweida.]

Momourki Kosonned en Meiroang en Eisekis Ehu

Ehu paiamwahu laud ohng towehkan en Mwomwohdiso iei ansou mwahu en pwain meiroang en eisekis ehu. Ni atail pwain atail meiroang, kitail sewese sapwellimen Koht doadoahk wet en doulahte mwowe oh kapaiada Sapwellime serihkan.

Kosonned en meiroang wet tepisang nan ansou en Kadehde Mering. Ni karasepe, soukohp Apram pwain ah meiroang ohng soahng koaros me mie ah (kilang Alma 13:15; Senesis 14:18-20).

Lepin lokaia tithe wehwehki eisekis ehu. Ni atail wia atail meiroang, kitail kihda eisekis ehu en mwohni kitail wiahda ong Mwomwohdiso (kilang Doctrine and Covenants 119:3-4;interestwehwehki omw ale pweipwei). Soahng koaros me kitail ahneki wia kisakis sang Koht. Ansou kitail kin pwain atail meiroang en eisek kis ehu, kitail kin kasalehda atail kaping ohng Ih ni atail kin kapwurelahng ekis dahme E ketkiheng kitail.

Pwain meiroang en eisekis ehu wia kasalepen pwoson. E pil wia mwohmw ehu en wauneki Koht. Sises ketin padahngkiher me kitail anahne “rapahki … mahs wehin Koht” (Madiu 6:33{), oh meiroang iei ehu ahl en wia mwo.

Wiepen Doadoahngki Mwohni kan en Meirong en Eisekis Ehu

Mwohni kan en meiroang me sarawi. Kitail kin kiheng atail meiroang ohng emen tohn pisoprik, de wasa tohto kitail kak pwain online. Ansou me pisoprik kin alehdi meiroang, irail kin kadaralahng ohpis lap en Mwomwohdiso.

Ehu pwihn en kaunsel me iangahki Presedensi Keiou, Pwihn en Wahnpoaron Ehk-Riemeno, oh presding pisoprik kin koasoanehdi mwomwen doadoahkepen mwohnihn meiroang nan sapwellimen Koht doadoahk wet (kilang Doctrine and Covenants 120:1). Doadoahk pwukat iangahki:

• Kauwada oh epwelpen tehnpas sarawi oh imwen kaudek kan.

• Kawehwe oh wiahda pwuhk sarawi kan.

• Sowese kemwekid kan oh koasoandi kan en Mwomwohdiso nan ehu ehu wasa.

• Sowese doadoahk en misineri nan sampah pwon.

• Sowese doadoahk en poadepen peneinei.

• Sawas en Mwohni ohng wasahn kasukuhl oh palien sukuhl.

Meiroang en eisekis ehu sohte kin pwain sounkaweid kan en Mwomwohdiso. Irail kin papah ni sohte pweipwei.

Kapai kan

Ansou me kitail kin pwain meiroang, Koht ketin inoukiher kapai kan me laudsang dahme kitail kihla. E pahn ketin “ritingadahng … kumwail dipwisou kesempwal en nanleng, oh kamwerediong kumwail soangen kamwahu kan ni uwe ieu me laud” ({Malakai 3:10; kilang ire tikitik kan 7-12). Kapai pwukat kak ohng palingehn oh paliwar.

Onop en Pwuhk Sarawi

• Doctrine and Covenants 119; 120

• Matthew 6:33

• Ipru 7:1-2

• Senesis 14:18-20

• Lipai 27:30-33

• Malakai 3:7-12

Esehla Me Tohto me pid Padahk Wet

• Mehn kaweid ohng Pwuhk Sarawi kan: “Eisekis ehu, Meiroang”

• Iralaud kan en Rongamwahu: “Meiroang”

Luhk

Komwi pahn kapwaiada kosonned en meiroang en eisekis ehu mwurin omwi pahn pepdaisla?

Peidek me Doke kan en Kaunopehng Pepdais

Dahme komwi wehwehki me pid kosonned en meiroang? Komwi men kapwaiada kosonned wet?

Sawaskihda Eisekis ehu oh Meiroang teikan

Kasalehiong towe kapw kan duwen arail pahn kiheng sawas en meiroang en eisekis ehu oh sawas teikan ohng emen tohn pisoprik (doadoahngki silikoun meiroang) de online (kilang donations.ChurchofJesusChrist.org).

Kawehwehiong me pisoprik oh emen klerk kin kilelehdi mwahu meiroang oh sawas teikan. Doadoahkepen mwohni koaros kin neknekla ni keneinei.

Towehkan kin tuhweng pisop ohng kasaladahn arail meiroang ni kolahn imwin pahr. Ni mihting wet, irail kin kasalehda arail mehlelieng pwain meiroang oh kak alehdi ehu repwoht en arail sawas kan.

Momourki Mahsen en Eripit

Sapwellimen Koht Kosonned en Roson

Paliwaratailkat wia kisakis sarawi kei sang Koht. Kitail koaros anahne paliwar pwehn kak duwehla Ih. Wen paliwaratailkat ah kesempwal pwuhk sarawi kan karasahieng tehnpas sarawi kei (kilang 1 Korint 6:19-20).

Kauno ketin kupwurki kitail en apwalih mwahu oh wauneki paliwaratailka. Pwehn sewesei kitail wia met, E ketin kasalehdahr kosonned en roson mwahu ehu kahdanki Mahsen en Eripit. Kaudiahl wet padahkiheng kitail kitail en kang mwenge kan me mwahu oh sohte doadoahngki wini kan me suwed ohng paliwaratail kan— mehlel sakau, tupaker, oh mehn niminim karakar kan (wehwehki dih oh koahpi).

Me pid Mahsen en Eripit, soukohp kan en rahn pwukat keperkiher doadoahkepen wini teikan me keper, uhweng kosonned, de kasoumwahu, uhweng kosonned, de kasoumwahu. Soukohp akan pil keperkiher doadoahk sapwung en wini kan me sang toahkte. (Sapwellimomwi misin preseden pahn sapeng peidek kan me pid wini kan de substance kan nan omwi wasa me sohte konehng aramas en doadoahngki.”

Kapai kan

Kauno ketin wiahda Mahsen en Eripit ohng kamwahupen paliwaratail oh ngenatail kan. E ketin inoukiher kapai kaselel kan ni atail pahn kapwaiada kosonned wet. Kapai pwukat iangahki roson, eripit, kisakis kan en loalekeng, oh perehre (kilang Doctrine and Covenants 89:18-21).

Kapwaiada Mahsen en Eripit pahn sewesei kitail en esehla kasawihada pepehm kan en Ngehn Sarawio. Mendahte kitail koaros kin lelehng kahpwal en roson mwahu, ni atail pahn kapwaiada kosonned wet paliwaratail, atail madamadau, oh ngenitail kan pahn kehlail.

Irail kan me onohnopehng pepdais anahne kapwaiada Mahsen en Eripit wet.

Mehn kaweid ohng sawasepen irail kan me ahneki kahpwal en addiction, kilang iralaud 10.

Onop en Pwuhk Sarawi

• Doctrine and Covenants59:15-20; 88:124; 89

• 1 Korint 6:19-20

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan: “Mahsen en Eripit”

• Iralaud kan en Rongamwahu: “Roson mwahu,” “Mahsen en Eripit”

• Sawasepen Mour: “Addiction”

Luhk

Komw kak kapwaiada Mahsen en Eripit?

Peidek kan me Doke Pepdais

Dahme komwi wehwehki me pid Mahsen en Eripit? Komw kak peikiong Mahsen en Eripit mwowe oh mwurin ahmw pepdais?

Kin Kasarawihala Rahnsarawi

Rahn ehu ong Komoal oh Kaudek

Rahn en Sapad iei rahn sarawi ehu me Koht ketin kasarawialahr ong nan ehu ehu wihk pwe kitail en komoal sang atail doadoahk en ehu ehu rahn oh kaudekiong Ih. Ehu Kosonned Eiseko me kohieng Moses iei en “tamataman rahnen Sapad, oh wiahki rahn sarawi” (Eksodus 20:8; pil kilang iretikitik 9–11).

Nan kaudiahl en rahn pwukat, Kauno ketin kadehdehki me rahn en Sapas “wia rahn ehu me kilelediongehr kitail en komoalsang atail doadoahk kan, oh en kaudekiong Kaun Lapalapo” (Doctrine and Covenants 59:10). E pil ketin mahsaniher me rahn en Sapad anahne wia rahnen pereperen, kapakap, oh kaping (kilang iretikitik kan 14–15).

Pwe en wia kisehn atail kaudek en rahn en Sapad, kitail pahn towehda kaudek en kamadipw sarawi nan wihk koaros. Nan kaudek wet, kitail kin pwohngih Koht oh alehda kamadipw sarawi pwehn tamataman Sises Krais oh Sapwellime Tomwpend Dihpo. Ansou kitail alehda kamadipw sarawi, kitail kin kaweliakapwih atail inou sarawi kan ohng Koht oh kasalehda me kitail men koluhkihla dipatail kan. Tiahk sarawi en kamadipw sarawi iei poahsoanen atail kawauih rahn en Sapad.

Nan mwomwohdiso wet kitail kin iang towehda kasukuhl kan me kitail kin esehlakihla me tohto me pid rongamwahu en Sises Krais wet. Atail pwoson kin keirda ni atail kin onopkipene pwuhk sarawi kan. Atail limpoak pil kin keirda ni atail kin papah oh kakehlaka emen emen nan pwungatail.

Pwe en patehng atail kin komoalsang atail doadoahk kan ni rahn en Sapad, kitail anahne uhdihsang netnet oh kemwekid teikan me pahn kiheng kitail en medewe me e duwehte rahn teikan. Kitail anahne pwilikihdi kemwekid kan en sampah oh kasohpailahng atail lamalam oh wiewia kan ohng soahng kan en palingehn.

Rahn Ehu ohng Wiewia Mwahu

Wiewia mwahu ni Rahn Sarawi kesempwal duwehte dahme kitail kin sohte wia pwe en wia rahn me sarawi. Kitail kin esehla rongamwahu wet, kakehlaka atail pwoson, wiahda ehupene kan, papah, oh iang towehda ekei kemwekid kaperen kan rehn peneinei oh kempoakepahtail kan.

Kapai kan

Kolokol kesempwalpen rahn en Sapad wia kasalepen atail loaloapwoat ohng Sahm Nanleng oh Sises Krais. Ni atail pahn wiahda atail kemwekid en rahn en Sapad kan en mwahuong sapwelllimen Koht koasoandi ohng rahno, kitail pahn ahneki pepehm en popohl oh meleilei. Palingenatail kan oh paliwaratail kan pahn kehlailla. Kitail pil pahn karanihala Koht oh kaloalehla atail ehuong atail Sounkomouro. Kitail pahn nantihong pwe kitail en “dehr saminkihla samin en sampah”Doctrine and Covenants 59:9). Rahnen Sapad pahn wiahla “rahn kaperen ehu” (Aiseia 58:13; pil kilang iretikitik 14).

Onop en Pwuhk Sarawi

• 3 Nihpai 18:1–2

• Doctrine and Covenants 59:9–19

• Moses 3:1-3

• Madiu 12:10-13

• Eksodus 20:8-11; 31:12-13, 16-17

• Aiseia 58:13–14 .

Kalaudehla Amw Wehwehki me pid duen Padahk Wet

• Iralaud kan en Rongamwahu: “Rahn Sarawi”

• Mehn Kaweid ohng Pwuhk Sarawi kan: “Rahn Sarawi”

Luhk kan

• Komw kak kesempwalki Rahn Sarawi oh iang Sarawi nan wihk koaros?

• Komwi kak nantiheng ni pwoson alehda kamadipw sarawi mwurin ahmw pahn pepdaisla?

• Komwi kak iang kiht kohla tuhweng pisop (de prans preseden) en aht mwomwohdisohu?

Peidek me Doke kan en Kaunopehng Pepdais

Dahme komwi ese duwen kolokol rahn Sarawi en wia rahn kesempwal ehu, me iangahki alehda kamadipw sarawi wihk koaros oh papah mehteikan? Komwi men nantiheng kapwaiada koasoandi pwukat mwowe oh mwurin ahmw pepdais?

Doadoahk ni Rahn en Sapad

Tohn mwomwohdiso kan kin pak tohto anahne doadoahk ni rahn en Sapad sang arail kaun en doadoahk kan de ohng sawasepen arail anahn akan de anahn en arail kousoan kan. Nan soangen irait pwukat, tohwekan kin kolokolete ngehnen rahnen Sapad wen arail kak. Memper kan kak ale kaweid sang arail sounkaweid kan duwen arail irair kan.

Peikiong oh Kesempwalki Kosonnedo

Souleng en Imwin rahn akan kamehlele kepweipweidahn kosonned oh wia aramas mwahu kei (kilang Doctrine and Covenants 134; Iren Pwoson akan 1:12{). Kangoang kin kohieng memper kan en Mwomwohdiso en papah nan arail kousoan kan oh wehi kan pwehn kamwahuihala arail kousoan oh wehi kan. Irail pil kin alehdi kangoang en wia kasalepen mour mwahu nan kousoan oh koapwerment.

Memper kan en Mwomwohdiso pil lukohng en patehng koapwerment oh wiepen doadoahk en koapwerment kan me dadaur kosonned. Memper kan me ahneki pwukoah nan koapwerment anahne wia arail doadoahk ni arail wia aramas limpoak kei, kaidehn weliepen Mwomwohdiso.

Onop en Pwuhk Sarawi

• Doctrine and Covenants 58:21; 134

• Iren Pwoson Akan 1:12

Kalaudehla Amw Wehwehki me pid duen Padahk Wet

• “Kemwekid kan en Koapwerment oh Kousoan” nan seksin 38.8 en Pwuken Kaweid

• Iralaud kan en Rongamwahu: “Tohn wasa ieu”

Luhk

Komwi kak kapwaiada kosonned akan en sahpw komwi kin kousoan loale?

Peidek kan en Kaunopehng Pepdais me Konehng

Miehier pak ke wiahda ehu dihp toutou? Ma iei, ansou wet ke mih nan prohpeisin de parohl? [ire Aramas emen me sapengi ei ohng kalelapak wet anahne kapeidek rehn misin preseden de emen sounsawas me pwukoahki mwohn pepdais ah kak mweimweida.]

Atail Inou Sarawi en Papah Koht oh Mehteikan

Sawas en Papah

Ansou kitail pepdaislahr, kitail wiadahr inou sarawi en papah Koht oh mehteikan. Papah mehteikan wia ehu mwohmw kesempwal me kitail kin papah Koht (kilang Mosaia 2:17). Soukohp Alma padahkih irail ko me men pepdaisla me irail anahne en “inangih sawaskipene amwail katoutou kan, … mwahiei rehn me kin mwahiei kan … , oh koaloalamwahwih irail akan me anahneMosaia 18:8-9).

Mwurinte pepdais, towe kapw kan kin alehdi ehu pwukoahn papah nan Mwomwohdiso. Pwukoah pwukat kin pein en emen pilipil oh sohte kin pweipwei. Ni atail pahn alehda oh papah ni ngoang, kitail pahn keirda ni pwoson, ahnekihda koahiek kan, oh kapaiada mehteikan.

Ehu palien atail papah nan Mwomwohdiso iei en wia “ohlen minisder” de “lihen minisder” men. Nan pwukoah wet, kitail kin papah irail akan oh peneinei kan me kitail kileldiong.

Ni atail wia tohnpadahk en Sises Krais, kitail kin rapahki ansou mwahu en papah nan ehu ehu rahn. Duwehte Ih, kitail kin “wiahda me mwahu” ({Wiewia kan 10:38). Kitail kin papah mehn impatail kan oh mehteikan nan atail wasahn kousoan. Kitail kak iang patehng pwukoahn papah kan sang nan JustServe wasahkan me e mihie. Kitail kak utung en Mwomwohdiso pwukoahn sawas ong momour en aramas oh patehng sawas en kahpwal akan me kin wiawi.

Onop en Pwuhk Sarawi

• Mosaia 2:17; 4:15-16, 26; 18:8-10; 23:18

• Doctrine and Covenants 42:38

• Madiu 25:31–46

• Luke 10:25–37

• Seims 1:27; 2:17

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan, “Doadoahk en Papahi”

• Iralaud kan en Rongamwahu: “Doadoahk en Papah”

Luhk

Komwi kak alehda malipilip de ehu pwukoah ma e kohieng komwi (me iangahki ehu pwukoahn wia ohlen de lihen minisder men)?

Kalohngki Rongamwahuo

Me wia kisehn atail inou sarawi en pepdais, kitail inoukidahr me kitail pahn “wia sounkadehdehn Koht”Mosaia 18:9). Ehu wiepen kitail en wia sounkadehde iei kitail en ehukihwei rongamwahu en Sises Krais wet. Sewese mehteikan en alehda rongamwahu wet iei ehu papah keiou kaperen kitail kak wia (kilang Doctrine and Covenants 18:15-16). E wia kasalepe manaman duwen limpoak.

Ansou kitail kehnehr kapai kan en momourki rongamwahu wet, kitail udahn pahn men ehukihwei kapai pwuko. Tohn peneinei kan, kempoakepahtail kan, oh iangatail kan kin pak tohto perenkihda pwehki atail wia karasaras en pwoson oh irail kilang mwomwen rongamwahu wet ah kin kapaiada atail mour kan. Kitail kak ehukihwei rongamwahu wet ni mwohmw mengei oh sohte anahne kaunop (kilang Pwuken Kaweid; iralaud 23).

Kitail kin luke mehteikan en patehng kitail nan pwukoahn papah, kousoan, kamwadong, oh kemwekid kan en Mwomwohdiso. Kitail kak luke irail ong ehu kaudek en Mwomwohdiso de ehu sarawi en pepdais. Kitail kak lukehiong irail en kilang ehu kasdo online me kawehwehda rongamwahu en Sises Krais wet, wadek Pwuken Mormon, de mwamwaitih ehu tehnpas sarawi me langada ohng wehi pokon. Mie soangen luhk epwiki kei me kitail kak ehukihong mehtei kan. Pak tohto, luhk ni mengei wehwehki iangahki atail peneinei, kempoakepahtail kan, oh mehn impatail kan nan mehkot me kitail wiewiahier.

Me kitail idek, Koht pahn sewesei kitail kasawihada ansou mwahu kan en ehukihwei rongamwahu wet oh indahng mehteikan duwen ah kin kapaiada atail mour kan.

Ohng ekei ire duwen doadoahngki padahk kan en ahneki limpoak, ehukihwei, oh lukehiong, kilang “Ehuong Memper kan” nan iralaud 9.

Onop en Pwuhk Sarawi

• Doctrine and Covenants 88:81

• Matthew 28:19–20

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan: “Doadoahk en Misineri”

• Iralaud kan en Rongamwahu: “Doadoahk en Misineri”

Luhk kan

• Komwi kak kapakapki misineri kan oh ohng ansou mwahu en kalohngki rongamwahu wet?

• Komwi kak nantihong kaskuhlki padahk kan en limpoak, ehukihla, oh luhk ohng kempoakepahmw , peneinei kan, oh mehteikan?

Kaisihsol oh Meiroang Kan en Kaisihsol

Koht ketin wiadahr kosonned en kaisohsol pwehn wia ahl en kakehlaka atail kehl en palingenatail oh en sewese irail akan me mie arail anahn.

Kaisihsol wehwehki sohte mwengehki oh nimpilki erein ansou ehu. Mwomwohdiso wet koaosanehdier keioun Rahn Sarawi en ehu ehu sounpwung en wia rahn en kaisihsol. Rahn en kaisihsol ehu kin iangahki sohte mwenge oh nimpil erein awa 24 [rieisek pahieu ma paliwaratailkat kakehng. Ekei pali kesempwal en Rahn Sarawi en kaisihsol iangahki kapakap oh wia kadehde. Kangoang pil kohieng kitail en kaisihsol ansou teikan me kitail pehm anahnepe.

Kakehlail en Pali Ngehn

Kaisihsol kak sewesei kitail en karakarahkala, karanihala Koht, oh pehm kakehlaildahn palingehn. Mwohn tepdahn Sapwellime doadoahk, Sises Krais ketin kaisihsol (kilang Madiu 4:1-2). Pwuhk sarawi kan kilelehdi ansou tohto me soukohp oh mehteikan kaisihsol pwe irail en kak kalaudehla kehlepen palingenarail oh rapahki kapai kesempwal kan ohng pein irail de mehteikan.

Kaisihsol oh kapakap kin ehupene. Ansou kitail kaisihsol oh kapakap ni pwoson, kitail epwehieng alehdi kaudiahl ohng pein kitail. Kitail pil epwehieng kasawihada mehlelo oh wehwehkihla sapwellimen Koht koasoandi.

Sewese Irail kan me Mie Arail Anahn

Ansou kitail kaisihsol, kitail kin sawaskihda mwohni ohng Mwomwohdiso pwehn sawas nan epwelpen aramas me mie arail anahn kan. Met kahdanki meiroangen kaisihsol. Kitail lukehngehr en sawaskihda meiroang me kak pahrekiong wen pweinen mwenge me kitail sohte kang kan. Kitail kapwukoahkier en kin sapan oh kihda laud sang uwen pweipwei en mwonge riauo ma irail kak. Sawaskihda meiroangen kaisihsol wia ehu elen papah mehteikan.

Mwohni pwukat kin doadoahk pwehn sawaskihda mwenge, ihmw, oh anahn teikan ong aramas me anahn, mehn limwahtail oh nan sampah pwon. Ohng ire kan duwen sawaskihda meiroang en kaisihsol, kilang “Sawaski Meiroang oh Meiroang Teikan” nan mehn kaskuhl wet.

Onop en Pwuhk Sarawi

kaisihsol

• Alma 5:45-46; 6:6; 17:2-3

• Moronai 6:5

• Doctrine and Covenants 59:12-16; 88:76

• Aiseia 58:6-11

Apwahpwali Irail me Semwehmwe kan

• Mosaia 4:16-27

• Alma 4:12-13

• Madiu 25:31–46

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan: “Kaisihsol, Wia kaisihsol”

• Pwuken Kaweid: 22.2.2

• Iralaud kan en Rongamwahu: “Wia Kaisihsol oh Meiroangkan en Kaisihsol”

Luhk kan

• Komwi kak kaisihsol oh kapakap ni Rahn Sarawi en kaisihsol me kohkohdoh ohng kahrepe anahn ehu?

• Komwi kak sawaskihda meironagen en kaisihsol (mwurin omwi pepdaislahr)?

Atail Inou Sarawi en Nanantihla lel ni Imwio

Ni atail pepdaisla, kitail inou ohng Koht en “papah ih lao kowe mehla” nan momourki rongamwahu en Sises Krais wet (2 Nihpai31:20, pil kilang Mosaia 18:13). Kitail kin nantihong en wia tohnpadahk en Sises Krais en erein mour kei.

Soukohp Nihpai sang nan Pwuken Mormon kawehwehda me pepdais wia kehl me kitail pahn pidelohng ohng ahl en rongamwahu wet (kilang 2 Nihpai 31:17). Mwurin pepdais, kitail kin doula oh “nantihla mwowe ni amwail tengediong rehn Krais” (2 Nephi 31:20).

Ni atail “nantihla mwowe” pohn elen mour en tohnpadahk, kitail kaunopehng pwarek tehnpas sarawi. Wasahu kitail pahn wiahda inou sarawi kan ohng Koht ni atail pahn alehdi tiahk sarawi kan. Nan tehnpas sarawi, kitail pahn alehdi manaman oh kak katengtengpene nan peneinei kan ong mour soutik. Momourki inou sarawi kan kitail wiada nan tehnpas sarawi kan pahn ritingehng kitail wenihmw en paiamwahu oh kapai en palingehn koaros me Koht ketin kolokol ohng kitail.

Ni atail pahn nantihla ni pwoson pohn elen rongamwahu, kitail udahn pahn alehdi sapwellimen Koht kisakis keiou laud— 2 Nihpai 31:20; Doctrine and Covenants 14:7.

Seksin pwukat pahn kawehwehda soahng kan me Koht ketkiheng kitailehr pwehn seweseikitail nantihla lel imwin atail seiloaken mour wet—oh diar popohl.

Pwihn akan en Prihsduhd oh Mwomwohdiso

Prihsduhd iei manaman oh mweimwei en Koht. Sang ni prihsduhd, Sahm Nanleng kin kapwaiada Sapwellime doadoahk en ketkiheng kitail mour poatoapoat oh mour soutik ohng Sapwellime serihkan (Moses 1:39). Koht kin ketkiheng mweimwei oh manaman ohng Sapwellime ohl oh lih akan pohn sampah pwehn sewese wiahda doadoahk wet.

Prihsduhd kin kapaiada kitail koaros. Tiahk sarawihkan soangen pepdais oh kamadipw sarawi kak alahldi sang irail kan me ahneki pwukoahn prihsduhd. Kitail pil kak ale kapai kan en prihsduhd en kakehlail, kaloalamwahu, oh kaweid.

Prihsduhd oh Pwukoahn Kaun kan en Mwomwohdiso oh Pwukoah kan

Sises Krais kin kawkaweid Mwomwohdiso wet sang soukohp oh wahnpoaron akan. Sounkaweid pwukat alehdier malipilip sang Koht, kasarawilahr, oh kohiengehr mweimwei en prihsduhd pwe irail en doadoahk ni mwaren Sounkomouro.

Mahso, Krais ketkihongehr Sapwellime wahnpoaron kan mweimwei en prihsduhdohte, me mweidohng irail en kaweid Sapwellime Mwomwohdiso mwurin Ah ketdalahr nanleng. Lel ansou ehu me mweimweio salongalahr ansou me aramas soikalahr rongamwahu wet oh Wahnpoaron kan melahr.

Tohn doadoahk en nanleng kan kapwuredohr prihsduhdo nan pahr 1829 [kid welipwiki rieisek duwau] sang Soukohp Soses Smith, oh Kauno pwurehng kauwada Sapwellime Mwomwohdiso iangahki wahnpoaron oh soukohp kan. (Kilang padahk 1.)

Nan wasa tikitik kan, pisop oh steik preseden kan kolokol mweimwei en prihsduhd en kaunda pokon kan en Mwomwohdiso.

Ansou me ohl oh lih emen alehier malipilip oh kasarawilahr pwehn papah nan Mwomwohdiso, irail kin alehdi mweimwei sang Koht pwehn wia doadoahko. Mweimwei wet kin kohieng misineri kan, sounkaweid kan, sounpadahk kan, oh mehteikan lao irail komoaldihsang arail pwukoah kan. E kak kohieng emen sang pahn kaweidpen irail kan me kolokol kih kan en prihsduhd.

Mweimwei en prihsduhd kakete doadoahk ni mehkot mwahu kan (kilang Doctrine and Covenants 121:34-46). Mweimwei wet wia koapwoaroapwoar sarawi ehu pwehn weliandi Sounkomouro oh doadoahk ni Mware. E udahn kin wiawi pwehn kapaiada oh papah mehteikan.

Prihsduhd en Aron oh Melisedek

Nan Mwomwohdisoht, prihsduhd iei Prihsduhd en Aron oh Melkisedek. Pahn kaweidpen irail kan me kolokol kih kan en prihsduhd, Prihsduhd en Aron oh Melkisedek kak kohweng memper ohl akan me warohng nan Mwomwohdiso. Mwurin prihsduhd me konehng ah kohwengehr emen, aramaso pahn kasarawilahr ohng ehu ohpis en prihsduhdo, soangen dihken de elder. E anahne kasarawihla sang emen me ahneki mweimwei me anahno.

Ansou me ohl de pwutak pwulopwul men alehdi prihsduhd, e pahn wiahda inou sarawi ohng Koht me e pahn kapwaiada ah pwukoah sarawi kan, papah mehteikan, oh sewese kauwada Mwomwohdiso.

Pwutak pwulopwul kan kak alehdi Prihsduhd en Aron oh kasarawiheng wiahla dihken tepida nan Senueri en pahr irail pahn lel sounpar 12.[eisek riau]. Irail kak kasarawiheng wiahla sounpadahk nan pahr irail lel sounpar 14 [eisek pahieu] oh prihsd kan nan pahr irail lel sounpar 16.[eisek wenou} Ohl me weliakapwalahkan me lelehr sounpar kak alehdi Prihsduhd en Aaron mwurinte ah pepdaisla oh kasarawihla. Me kolokol prihsduhd en Aron kan kin apwalih tiahk sarawi kan me duwehte kamadipw sarawi oh pepdais.

Mwurin wie papahki wen ansou ieu ni ah wia prihsd men nan Prihsduhd en Aron, ohl emen me warehng me sohte pwulopwulsang sounpar 18 [eisek waluh] kak alehdi Melkisedek Prihsduhd oh kasarawiheng elder. Ohl akan me alehdi Melkisedek Prihsduhd kak wia tiahk sarawihkan en prihsduhd me duwehte kiheng kapai kan en kamwahuihla oh kaloalamwahu ohng tohn peneinei oh mehteikan.

Kilang Pwuken Kaweid, 38.2.9.1, ohng ire kan duwen memper kapw kan me alehdi prihsduhd.

Kohrumw kan oh Pwihn akan en Mwomwohdiso

Pwihn kan en Prihsduhd Kohrumw ehu iei pwihn koasoandi ehu ohng irail kan me ahneki prihsduhd. Ehu ehu ward ahneki kohrumw en elder kan ohng ohl mehlel kan. Kohrumw en dihken, sounpadahk, oh prihsd kan iei ohng mwahnakapw akan.

Pwihn en Sawas en Lih Pwihn en Sawas en Lih iangahki lih sounpar 18 [eisek waluh] kohda, Memper kan en Pwihn en Sawas en Lih kin kakehlaka peneinei kan, emen emen, oh washn kousoan.

Peinakapw Akan. Peinakapw akan iangala pwihn en Peinakapw tepida nan Senueri nan pahr irail lel sounpar 12 [eisek riau].

Praimeri. Serihkan sounpar 3 to 11 [siluh lel eisek ehu] wia kisehn peihn en Praimeri.

Santi Sukuhl. Koaros aramas laud oh me pwulopwul kan pahn towehda Santi Sukuhl, wasa irail kin tuhpene pwehn onopkipene pwuhk sarawi kan.

Ohng ire teikan me pid prihsduhd, kilang Pwuken Kaweid, iralaud 3.

Ohng ire teikan duwen prihsduhd kohrumw kan oh pwihn akan nan Mwomwohdiso, kilang Pwuken Kaweid, iralaud kan 8–13.

Onop en Pwuhk Sarawi

• Mosaia 18:17

• Alma 13:1-19

• Doctrine and Covenants 20:38-65; 84:19-20; 107; 121:34-46

• Iren Pwoson 1:5

• Luke 9:1-6

• John 15:16

• James 5:14–15

Kalaudehla Amw Wehwehki me pid duen Padahk Wet

• Pwuken Kaweid, iralaud 3: “Padahk kan en Prihsduhd”

• Iralaud kan en Rongamwahu: “Prihsduhd en Aron,” “Melkisedek Prihsduhd,” “Prihsduhd”

Luhk kan

• Komwi kak kaunopehng alehdi Prihsduhd en Aron? (Ohng ohl akan sounpar 11 {eisek ehu] oh mahsang)

• Komwi kak kaunopehng alehdi Prihsduhd en Melikisedek? (Ohng ohl mehlel kan)

• Komwi kak kin iang patehng pwihn akan en Mwomwohdiso me konehng?

Pwopwoud oh Peneinei kan

Kopwopwoud

Pwopwoud nan pwungen ohl emen oh lih emen kasarawisang Koht. E inenen kesempwal ohng sapwellime pilahn ohng keirda soutik en Sapwellime serihkan.

Ehupenehn ohl oh lih pwopwoud nan ara pwopwoud anahne wia ara ehupene me keioun kesempwal. Ira ahneki pwukoah sarawi irahn loaloapwoatpene oh mehlelieng ara inou sarawi en kopwopwoud.

Ohl pwopwoud men oh lih pwopwoud men soahngetehieu pahn sihlangin Koht. Emen sohte pahn kaunda mehteio. Ara koasoandi kan anahne wiawihda sang ara ehupene oh limpoakpene, sang ira koaros ara ehupene ni unsek.

Ni ohl pwopwoud emen oh lih pwopwoud emen ara limpoak pene oh sawaspene, ara pwopwoud kak wia poahsoan en ara peren laud. Irail kak sawaspene oh sewese neirail serihkan keirda kowehng mour soutik.

Peneineio

Me duwehte pwopwoud, peneinei kasarawihla sang Koht oh wia poahsoan en Sapwellime pilahn ohng atail popohl soutik. Atail peneinei kan udahn pahn peren ansou kitail momourki padahk kan en Sises Krais. Pahpa nohno kan kin kaskuhlihki neirail serihkan rongamwahu en Sises Krais wet oh wia karasaras en momourki. Peneinei kan kiheng kitail ahl mwahu kan ohng kitail en poakohng oh papah emen emen.

Pahpa oh nohno anahne wiahda arail peneinei en wia mehkot keiou kesempwal ohng ira. Paiamwahu oh pwukoah sarawi ehu ohng pahpa nohno en apwalih serihkan me irail nainkihda de pwokada.

Peneinei koaros ahneki kahpwal kan. Ni atail pahn rapahki sapwellimen Koht utuht oh kolokol Sapwellime kosonned kan, kahpwal en peneinei kan kak sewesei kitail marainla oh keirda. Pak tohto kahpwal pwukat kin seweseikitail en esehla koluhla oh ahneki mahk.

Sounkaweid kan en Mwomwohdiso kangoangehier towehkan en wia soutik en peneinei wihk koaros. Pahpa oh nohno kan kin doadoahngki ansou wet pwehn kaskuhlihki neirail serihkan rongamwahu wet, kakehlaka ehupenehn peneinei kan, oh pereperenpene. Sounkaweid kan en Mwomowhdiso pil wiadahr ehu kalohk me padahngki mehlel kesempwal kan me pid peneinei (kilang “Peneinei: Kalohk Ehu ohng Peneinei,” ChurchofjesusChrist.org)

Soangen ahl teikan ohng kakehlepen peninei iangahki kapakap en peninei, onopen pwuhk sarawi, oh kaudekpene ni wasahn kaudek. Kitail pil kak rapahki poadepen peneinei, kihpene soaikan en peneinei, oh papah mehteikan.

Aramas tohto sohte pwopwoud de ehupenehn peneinei me limpoak. Tohto lelehngehr mweipeseng en pwopwoud oh ekei kahpwal en peneinei kan. Ahpw, rongamwahu wet kin kapaiada emen emen kitail sohte lipilipil irair en atail peneinei kan. Oh ni atail pahn ahneki pwoson, Koht pahn kaunopada ahl ehu ohng kitail en ahneki kapai en peneinei limpoak kan, menda ma nan mour wet de nan mour me pahn kohdo.

Onop en Pwuhk Sarawi

Pwopwoud

• Doctrine and Covenants 42:22; 49:15

• Episos 5:25

• Senesis 2:18-24

Peneinei

• Mosaia 4:14-15

• Alma 56:47: 57:21

• 3 Nihpai 18:21

• Doctrine and Covenants 68:25–28

• Episos 6:4

• Lepin Padahk Audapan kan 22:6

• “Peneinei: Kalohk Ehu Ong Sampah”

Kalaudehla Amw Wehwehki me pid duen Padahk Wet

• Mehn kaweid ohng Pwuhk Sarawi kan: “Peneinei,” “Pwopwoud, Pwoudki”

• Pwuken Kaweid, iralaud 2: “Utungada Emen oh Peneinei kan nan Doadoahk en Komourla oh Lapalapala”

• Iralaud kan en Rongamwahu: “Pwopwoud, ” “Peneinei,” “Doadoahk en Nohno pahpa”

Luhk kan

Wekid luhk pwukat pwe en pahrek ong anahn en aramas akan.

• Kumwail kak wia soutik en peneinei wihk koaros, kapakap en peneinei rahn koaros, oh onopen pwuhk sarawi ohng peneinei rahn koaros?

• Amwail peneinei kak iang kaudek ni Rahn en Sabbath?

Doadoahk en Tehnpas Sarawi oh poadepen Peneinei ohng Peneinei Melahr akan

Sahm Nanleng poakohng koaros Sapwellime serihkan oh kupwurki irail en ahneki komour oh mour soutuk. Ahpw aramas pilien kei melahr ni arail sohte alehdi rongamwahu en Sises Krais de alehdi tiahk sarawi kan en rongamwahu. Tiahk sarawi pwukat iangahki pepdais, kasarawi, kasarawihn prihsduhd ohng ohl, endaumen en tehnpas sarawi, oh pwopwoud soutik.

Sang Sapwellime limpoak oh mahk, Kauno ketin wiadahr ehu ahl ohng aramas pwukat en alehdi rongamwahuo oh tiahk sarawihkan. Nan sapwen ngehno, rongamwahu wet pahn padahk ohng irail kan me melahr apw sohte alehdi (kilang Doctrine and Covenants 138). Nan tehnpas sarawi kan, kitail kak wiahda tiahk sarawi kan ohng atail peneinei en mahs me melahr kan oh mehteikan. Aramas melahr pwukat nan sapwen ngehno kakehr alehda de soikala rongamwahuo oh tiahk sarawikan me wiawiher ohng irail.

Mwohn atail pahn wia tiahk sarawihkan, kitail anahne kilangada atail pahpa nohnohn mahskoa me saikinte alehdi. Rapahkihda tohn atail peneinei kan pwe irail en alehdi tiahk kan iei kahrepen doadoahk en poadepen peneinei. Ansou kitail diar rohng kan duwen irail, kitail pahn kapatahieng nan database en Mwomwohdiso ni FamilySearch.org. Eri kitail (de mehteikan) kak wia weliepe ohng irail nan tiahk sarawihkan en tehnpas sarawi.

Ni atail pahn diarada atail peneinei en mahsko oh wiahda tiahk sarawihkan ohng irail, atail peneinei kan kak ehupene kohkohlahte.

Doadoahk en Poadepen Peneinei oh Towehda Tehnpas Sarawi

Kapehsehiong memper kapw kan oh me komwi melahn kaskuhlih kan ohng sounkaweid en tehnpas sarawi oh poadepen peneinei nan ward (de ohng mene memper me ese doadoahk en poadepen peneinei). Sounkaweid menet kak sewese aramas kilangada arail peneinei melahr akan me anahne arail tiahk sarawihkan. Doadoahngki mihting en kaweid en wihk koaros en koasoanehdi duwen sewese memper kapw kan tepida wia neirail poadepen peneinei oh doadoahk en tehnpas sarawi.

Memper kapw kan oh memper teikan kak alehdihsang pisop neirail recommend en tehnpas sarawi pwehn wia weliepe nan pepdais oh kasarawi kan ohng arail peneinei en mahs me melahr kan oh mehteikan. Memper men kak ale recommend wet tepida nan Senueri en pahr e pahn lel sounpar 12. Ohl akan pil anahne ahneki Prihsduhd en Aron pwehn kak ale. Kangoange memper kapw kan en alehdi neirail recommend ansou me konehng.

Ma mie tehnpas sarawi me keren, iang memper kapw kan kohla. Iang irail nan tiahk sarawihkan en tehnpas sarawi.

Onop en Pwuhk Sarawi

• Doctrine and Covenants 128; 138

• 1 Korint 15:29

• 1 Piter 3:18–21; 4:6

Kalaudehla Amw Wehwehki me pid duen Padahk Wet

• Pwuken Kaweid, iralaud 28: “Tiahk Sarawihkan en Tehnpas Sarawi ohng me Melahr”

• Iralaud kan en Rongamwahu: “Pepdais en me Melahr,” “Poadepen Peneinei”

Luhk kan

• Ke kak kaunopehng alehdi tiahk sarawi kan ong amw peneinei en mahs akan?

• Komwi kak iang patehng doadoahk en poadoapoad en peneinei oh kapidolong eden amw peneinei en mahs akan pwe irail en kak ale tiahk sarawi en nan tehn pas sarai kan?

Tehnpas sarawi kan, Endaumen, Pwopwoud Soutik, oh Peneinei Soutik kan.

Tehnpas Sarawi kan

Tehnpas Sarawi iei me tehnpas en Kauno. E wia wasa sarawi ehu wasa me kitail kak wiahda inou sarawihkan ni atail alehdi Sapwellime tiahk sarawi kan. Ni atail pahn kolokol inou sarawi pwukat, manaman en koht pahn sansal nan atail mour (see Doctrine and Covenants 84:19–22; 109:22–23).

Endaumeno

Ehu tiahk sarawi me kitail kin alehdi nan tehnpas sarawio iei endaumen. Lepin lokaia endaumenwehwehki ”kisakis ehu.” Kisakis en marain oh manaman pwukat kohsang rehn Koht. Nan endaumeno, kitail kin wiahda inou sarawi ohng Koht me katengeikitail ohng Ih oh Naho, Sises Krais (kilang iralaud 1).

Aramas laud kan kak alehdi pein arail endaumen en tehnpas sarawi mwurin sounpar ehu ni arail wihala tohn Mwomwohdiso. Ohng ekei ire duwen endaumen, kilang Pwuken Kaweid, 27.2.

Pwopwoud Soutik oh Peneinei Soutik kan

Pilahn sarawi en peren kin kahrehieng ehupenehn nanpwungen peneinei en kak doulahte mwurin mehla. Nan tehnpas sarawi kitail kak kopwopwoud ohng ansouet oh mour soutik. Met elehda peneinei kan en kak mihmipene kohkohlahte.

Mwurin pwopwoud kan arail alehdier arail endaumen en tehnpas sarawi, irail kak katengetengpene ohng mour soutik. Serihkan kak katengteng ohng ira.

Ohl pwopwoud men oh ah pwoud me katengtengpenehier nan tehnpas sarawi anahne kolokol inou sarawihkan me irail wiadahr pwe ira en alehdi kapai kan en pwopwoud soutik.

Kanaiehng Ansoun Kaskuhlki Duwen Peneinei Soutik kan.

Ekei aramas kak ahneki irair kan nan arail peneinei me sohte kaperen ohng irail en mihmipene erein. Mie ekei me kakete sohte pwopwoud de naineki seri nan mour wet.

Katamanehng irail kan me komw padahkih me sapwellimen Koht pilahn iei pilahn en popohl ehu. Sewese irail en kilang me momourki rongamwahu wet met kak kaunopehng irail ohng peneinei soutik ehu rahn, menda ma e kohdo mwurin mour wet.

Mendahte en emen aramas irair kan en ah peneinei de pwopwoud, aramas laud kan anahne kaunopehng alehdi pein arail endaumen. Alehdi arail endaumen pahn wia mehn kakehlail kaselel ohng irail. Pil sewesehkin irail en kilang me mie arail ansou mwahu en pwurehng tuhweng arail peneinei kan me melahr sang ni doadoahk en tehnpas sarawi.

Onop en Pwuhk Sarawi

• Doctrine and Covenants 43:16; 95:8-9; 97:10-16; 109; 131:1-4

Kalaudehla Amw Wehwehki me pid duen Padahk Wet

• Pwuken Kaweid, iralaud 27: “Tiahk Sarawihkan ohng me Momour”

• Iralaud kan en Rongamwahu: “Tehnpas sarawi kan,” “Endaumen,” “Pwopwoud”

• temples.ChurchofJesusChrist.org

Luhk

Ke kak kaunopehng ken lela nan tehnpas sarawi oh alehda tiahk sarawi kan en tehnpas sarawi?